Esdras 1; 3–7; Nehemias 2; 4–6; 8

Human mabuntog sa Persia ang Babelonia, gidasig sa Ginoo ang hari sa Persia, si Ciro, sa pagpadala og usa ka grupo sa mga Judeo ngadto sa Jerusalem aron sa pagtukod og balik sa templo. Samtang kamo magbasa sa Esdras 1, timan-i kon unsa ang gibuhat ni Ciro aron sa pagsuporta sa mga Judeo diha niining importante nga buhat. Sa unsang paagi ninyo nakita ang Ginoo nga naglihok pinaagi sa mga lalaki ug mga babaye sa inyong palibot, lakip niadtong dili mga miyembro sa Iyang Simbahan? Unsa ang gisugyot niini diha kaninyo mahitungod sa Ginoo ug sa Iyang buhat?

Tan-awa usab sa Isaias 44:24–28.

Sa dihang ang mga taga-Babelonia misulong sa Jerusalem, gilungkab nila ang templo ug gisunog kini hangtod naugdaw (tan-awa sa 2 Mga Hari 25:1–10; 2 Cronicas 36:17–19). Unsa kaha ang inyong bation kon kamo usa sa mga Judeo kinsa nakasaksi niini? (tan-awa sa Salmo 137). Timan-i kon unsa ang gibati sa mga Judeo, paglabay sa mga dekada, sa dihang gitugotan sila sa pagbalik ug sa pagtukod og balik sa templo (tan-awa sa Esdras 3:8–13; 6:16–22). Kana tingali moaghat kaninyo sa pagpamalandong sa inyong kaugalingong mga pagbati mahitungod sa Ginoo ug sa Iyang balay. Nganong ang pagtukod og templo usa ka hinungdan sa pagsaulog?

Ang buhat sa Ginoo panagsa ra kaayo nga walay mosupak. Kini tinuod diha sa mga paningkamot nga gipangulohan ni Zorobabel ug Nehemias. Aniay yano nga paagi nga makatabang kaninyo sa pagkat-on gikan niini nga mga istorya ug hunahunaa kon unsaon ninyo nga makahimo sa buhat sa Ginoo bisan pa sa oposisyon:

Buhat sa Dios alang ni Zorobabel (Esdras 4:3):

Buhat sa Dios alang ni Nehemias (Nehemias 2:17–18):

Buhat sa Dios alang kanako:

Oposisyon nga giatubang ni Zorobabel (Esdras 4:4–24):

Oposisyon nga giatubang ni Nehemias (Nehemias 2:19; 4:1–3, 7–8; 6:1–13):

Oposisyon nga akong giatubang:

Giunsa pag-atubang ni Zorobabel (Esdras 5:1–2):

Giunsa pag-atubang ni Nehemias (Nehemias 2:20; 4:6, 9; 6:3–15):

Unsaon nako sa pagtubag:

Alang sa tabang sa pagtandi sa kasinatian ni Nehemias ngadto sa inyong kinabuhi, mahimo ninyong tun-an ang mensahe ni Presidente Dieter F. Uchtdorf nga “Kita Nagbuhat og Dako nga Buhat ug Dili Makaanha” (Liahona, Mayo 2009, 59–62), ilabi na ang kataposang duha ka seksiyon. Samtang kamo naghunahuna mahitungod sa buhat nga gihatag sa Dios kaninyo, mahimo ninyong tun-an ang “Tema sa Batan-ong mga Babaye” o ang “Tema sa Korum sa Aaronic nga Pagkapari” (Librarya sa Ebanghelyo). O kamo makapangita diha sa usa ka himno sama sa “Isip Sisters sa Zion” (Mga Himno, nu. 197) o “Kamong Elder sa Israel” (Mga Himno, nu. 198).

Unsay gipasabot sa “madasigon nga nagtrabaho” diha sa pagserbisyo sa Manluluwas? (Nehemias 4:6). Unsa kaha ang gipasabot sa pagbaton sa “maayong kamot sa … Dios diha [kaninyo]” samtang kamo nagbuhat sa Iyang buhat? (Nehemias 2:8; tan-awa usab sa Nehemias 2:18; Esdras 7:6, 9, 27–28). Giunsa ninyo pagkakita sa Iyang kamot diha sa inyong paningkamot sa pagserbisyo Kaniya?

Sulod sa mga henerasyon sa pagkabihag, ang mga Judeo adunay limitado nga paggamit ngadto sa “ang basahon sa balaod ni Moises” (Nehemias 8:1). Sa Nehemias 8, gibasa ni Esdras ang balaod ngadto sa mga katawhan. Unsay inyong nakaplagan niini nga kapitulo nga nagpakita kon giunsa ni Ezra ug sa iyang mga katawhan pagbati mahitungod sa Dios ug sa Iyang pulong? (tan-awa ilabi na sa mga bersikulo 1–12). Unsa sa inyong kinabuhi ang nagpakita kon unsa inyong pagbati mahitungod sa Dios ug sa Iyang pulong?

Tan-awa sa Mga Pagtulun-an sa mga Presidente sa Simbahan: Ezra Taft Benson (2014), 137–49.

• Sa pagtudlo sa inyong mga bata mahitungod sa hingpit nga kalipay nga gibati sa mga Judeo sa dihang ang ilang templo gitukod pagbalik, makapakita kamo kanila og usa ka hulagway sama sa usa nga anaa sa ubos. Paghisgot mahitungod kon nganong kining mga tawhana mahimong malipayon nga maanaa sa balay sa Ginoo. Makasulti usab kamo sa inyong mga bata kon nganong ang templo usa ka dapit sa hingpit nga kalipay alang kaninyo. Sa unsang paagi ang templo mitabang kaninyo nga mobati og mas duol ngadto sa Langitnong Amahan ug sa Manluluwas?

• Samtang kamo nagbasa sa Ezra 3:10–13 uban sa inyong mga bata, tabangi sila sa pagpangita og mga pulong nga nagpakita kon giunsa sa mga Judeo pagbati sa dihang ang templo gitukod pagbalik. Kon moabot kamo sa kataposan sa bersikulo 13, tingali kamo makasinggit og dungan tungod sa hingpit nga kalipay. Tabangi ang inyong mga bata sa paghunahuna og mga katarongan nga magmalipayon sa hingpit nga ang Ginoo nakahatag kanato og mga templo. Unsaon nato sa pagpakita niana nga hingpit nga kalipay?

• Hunahunaa ang pagkanta og usa ka awit mahitungod sa templo uban sa inyong mga bata, sama sa ikaduhang bersikulo sa “Welcome Home” (Gospel Library). Human sa matag linya, makahunong kamo og kadiyot sa paghangyo sa usa ka bata sa pagpakigbahin og usa ka butang nga iyang nagustohan mahitungod sa templo. Mahimo usab kamo nga motan-aw diha sa mga hulagway sa mga templo samtang kamo nagkanta.

• Pakigbahin sa inyong mga bata sa istorya kabahin ni Nehemias (tan-awa sa Nehemias 2:17–20; 6:1–9; o “Nehemias” sa Mga Istorya sa Daang Tugon, 173–74). Samtang inyong basahon ang Nehemias 2:20, kamo ug ang inyong mga bata makahimo sa “pagbarug” ug magpakaaron-ingnon nga nagtabang sa pagtukod sa mga paril sa Jerusalem. O ang inyong mga bata mahimong malingaw sa pagtukod sa paril uban sa mga bloke o ubang mga butang. Samtang sila nagbuhat, makatabang kamo kanila sa paghunahuna og importanting mga butang nga gusto sa Langitnong Amahan kanato nga buhaton.

  

  1:38

• Samtang kamo nagbasa sa Nehemias 6:9, dapita ang inyong mga bata sa pagpataas sa ilang mga kamot kon madungog nila kamo nga nagsulti og “lig-unon ang akong mga kamot.” Sultihi ang mga bata mahitungod sa usa ka panahon nga inyong gibati ang Dios nga naglig-on sa inyong mga kamot sa paghimo sa Iyang buhat.

• Kusga pagbasa ang pipila sa mga hugpong sa mga pulong gikan sa Nehemias 8:2–3, 5–6, 8–9, 12 nga naghulagway kon unsay gihimo sa mga tawo sa dihang nadungog nila si Esdras nga nagbasa sa mga kasulatan. Samtang kamo nagbasa, ang inyong mga bata maka-aksiyon niini nga mga hugpong sa mga pulong. Dayon kamo mahimong makigbahin ngadto sa usag usa kon sa unsa nga paagi kamo mibati sa dihang inyong gibasa o nadungog ang mga kasulatan.

• Samtang kamo nagbasa og dungan sa Nehemias 8:8, makapangutana kamo sa inyong mga bata kon unsa ang nagtabang kanila sa pagsabot sa mga kasulatan. Pakit-a sila unsaon paggamit ang mga tabang sa pagtuon sa kasulatan sama sa Ang Giya ngadto sa mga Kasulatan ug Mga Hilisgotan ug mga Pangutana (Librarya sa Ebanghelyo). Dapita ang inyong mga bata sa pagpakigbahin og usa ka butang nga ilang nakat-onan mahitungod sa Manluluwas gikan sa mga kasulatan.