2 Mga Cronicas 14–20; 26; 30

Sa dihang si Asa mao ang hari sa Juda, nakasinati siya ug daghang mga hagit—sama kanatong tanan karon. Samtang imong basahon ang mga pagsulay nga iyang giatubang, tan-awa kon hain niya ibutang ang iyang pagsalig ug sa unsa nga paagi kana nausab sa paglabay sa panahon.

Ngano nga usahay mohunong kita sa pagsalig sa Ginoo? Unsa pa ang imong nakat-onan gikan sa kinabuhi ni Asa?

Tan-awa usab sa D. Todd Christofferson, “Ang Atong Relasyon sa Dios,” Liahona, Mayo 2022, 78–80.

Ang propeta nga si Micheas tingali nakasinati ug dako nga kalisod sa pagtagna ug kalamposan alang sa mga hari nga si Josaphat ug si Ahab diha sa ilang gubat batok sa Siria. Pangitaa ang ebidensya niana nga kalisod sa 2 Mga Cronicas 18:1–12. Unsa nga ebidensya ang imong makita sa kaisog ug integridad ni Micaiah sa mga bersikulo 13–27? (Timan-i nga sa bersikulo 14, si Micaiah naghatag og usa ka biaybiay nga tubag; ang iyang tinuod nga tubag anaa sa bersikulo 16.) Giunsa pagtuman ang mga pulong ni Micaiah sa mga bersikulo 28–34?

Unsa ang pipila ka mga sitwasyon diin mahimo kang mag-atubang og kalisod sama sa giatubang ni Micaiah? Unsa ang maghatag kanimo ug kaisog sa pagbarog alang sa Ginoo ug sa Iyang mga pagtulun-an?

Samtang imong basahon ang 2 Mga Cronicas 20:1–12, pangitaa kon unsa ang gibuhat ni Hari Josaphat sa dihang daghang mga nasod ang miabot sa pag-atake sa Juda. Unsaon nimo paggamit ang iyang mga lihok diha sa mahagitong mga kahimtang nga imong giatubang?

Ang tubag sa Ginoo sa pag-ampo ni Josaphat makita diha sa mga bersikulo 14–17. Unsa nga mga hugpong sa mga pulong ang imong makit-an didto nga makahatag ug kahupayan kanimo o sa usa ka tawo nga imong kaila sa panahon sa mga kalisdanan?

Pagkasunod adlaw, ang mga tawo sa Jerusalem migawas aron atubangon ang kaaway nga mga kasundalohan. Samtang imong basahon ang 2 Mga Cronicas 20:20, pangitaa ang mensahe nga gihatag ni Josaphat sa mga tawo sa Jerusalem. Giunsa pagtuman ang iyang mga pulong? (tan-awa ang mga bersikulo 22–23). Giunsa ka pagpanalangin sa Dios tungod sa imong pagtuo diha Kaniya ug sa pagsunod sa Iyang mga propeta?

Si Presidente Russell M. Nelson miingon: “Ang akong kasinatian mao nga kon mohunong ka sa pagbutang og mga marka sa pangutana sa luyo sa mga pamahayag sa propeta ug magbutang og mga tulbok sa tuwaw [exclamation point] hinoon, ug buhaton kini, ang mga panalangin magbaha. Wala gayod ako mangutana sa akong kaugalingon, ‘Kanus-a mamulong ang propeta isip usa ka propeta ug kanus-a siya mamulong nga dili usa ka propeta?’ Ang akong interes mao, ‘Unsaon ko nga mahimong mas sama kaniya?’” (sa Lane Johnson, “Russell M. Nelson: A Study in Obedience,” Ensign, Ago. 1982, 24).

Tan-awa usab sa Doktrina ug Mga Pakigsaad 21:4–6; “A Secure Anchor” (video), Gospel Library; “Paghimo og dinasig nga mga pagpili,” Alang sa Kalig-on sa mga Kabatan-onan: Giya alang sa Paghimo og mga Pagpili (2022), 4–5.

3:37

Sama sa ubang daghan nga mga hari sa Juda, misugod ang paghari ni Uzzias uban sa dagkong mga kalamposan apan natapos diha sa trahedya. Pangita niini nga sundanan diha sa 2 Mga Cronicas 26. Unsa ang imong ikasulti nga mao ang labing importanting panahon sa kinabuhi ni Uzzzias?

Samtang ikaw magbasa sa mga bersikulo 16–23, hinumdomi nga niini nga panahon , ang mga pari lamang ang gitugotan sa pagsunog og insenso diha sa templo. Ngano sa imong hunahuna wala motuman si Hari Uzzias sa Dios? Unsay imong nakat-onan gikan niini nga makapasubo nga kasinatian?

Tan-awa usab ang “Magmapainubsanon Ka,” Mga Himno, nu. 76.

Sa 2 Mga Cronicas 30, si Ezechias mao ang hari sa Juda. Gidapit niya ang karibal nga Gingharian sa Israel sa pagpundok didto sa Jerusalem sa pagsaulog sa Pagpalabay—usa ka butang nga ang mga Israelita wala makahimo sa pagbuhat sulod sa daghang katuigan (tan-awa diha sa mga bersikulo 1–12). Unsa ang nakapadani kanimo mahitungod sa pagdapit ug giunsa kini sa pagdawat—sa mga dinapit nga Israelita ug sa ilang mga tigtagad sa mga dinapit sa Juda?

Tungod kay kini dugay na kaayo, ang pipila sa mga bisita ngadto sa Jerusalem dili sinati sa mga detalye kon unsaon ang pag-apil sa Pagpalabay. Samtang ikaw magbasa sa 2 Mga Cronicas 30:18–27, unsa ang imong nakat-onan gikan sa tubag ni Ezechias ug ang mga resulta sa iyang tubag?

Tan-awa usab sa Russell M. Nelson, “Gikinahanglan ang mga Tigpasiugda og Kalinaw,” Liahona, Mayo 2023, 98–101.

• Sa pagpaila sa ideya sa pagsalig sa Ginoo, mahimo kang magpakita sa imong mga bata sa usa ka butang nga ikaw nagsalig nga magpabilin kanimo nga uga kon kini mag-ulan, sama sa payong o dyaket. Pasultiha sila mahitungod kon nganong kita makasalig niini nga mga butanga. Dayon tabangi sila sa pagtandi niana ngadto sa atong pagsalig diha sa Ginoo. Nganong mosalig kita Kaniya sa pagpabilin kanato nga luwas sa espirituhanong paagi?

• Makatabang ka sa imong mga bata sa pagdiskobre kon giunsa ni Hari Asa ug Hari Josapath pagtubag ang mga hagit pinaagi sa pagsalig diha sa Ginoo (tan-awa diha sa 2 Mga Cronicas 14:11; 20:3–5, 12). Pakigbahin ngadto sa usag-usa og mga paagi ng ikaw makapakita sa Ginoo nga ikaw nagsalig Kaniya.

• Ang pahina sa kalihokan niini nga semana makatabang sa imong mga bata sa pagsabot sa istorya sa pag-ampo ni Josaphat ug sa tubag sa Ginoo. Ikaw ug ang imong mga bata makapakigbahin og mga panahon sa dihang gidungog ug gitubag sa Dios ang imong mga pag-ampo. Hunahunaa ang paglakip sa mga panahon sa dihang ang mga tubag miabot sa paagi o sa panahon nga wala nimo damha. Usa ka awit mahitungod sa pag-ampo, sama sa “Hugot nga Pagtuo” (Songbook sa mga Bata, 35), makatabang.sa pagtukod og hugot nga pagtuo sa imong mga bata.

• Sa pagkat-on mahitungod sa mga peligro sa garbo, makatukod ang imong mga bata og tore nga mga bloke o gagmay nga mga tasa. Samtang sila nagbutang sa matag usa sa bloke o tasa diha sa tore, tabangi sila sa pag-ila og usa sa mga kalamposan ni Uzzias gikan sa 2 Mga Cronicas 26:3–15. Human nila matapos ang tore, paghigot uban sa imong mga bata kon giunsa ni Uzzias pagpabilin niini nga taas ug lig-on. Unsa ang makatumba niini? Dayon, samtang imong basahon ang bersikulo 16, ikaw mahimong makasulti mahitungod sa unsay kahulogan sa pagbaton sa atong mga kasingkasing “nga nagmapahitas-on ngadto sa [atong] kalaglagan.” Pakigbahin sa imong mga bata kon unsay nahitabo ngadto ni Uzzias diha sa mga bersikulo 16–23. Ipatumba nila ang ilang tore. Pagsulti mahitungod sa unsay atong mabuhat sa pagpabilin nga mapainubsanon.

• Ang hulagway sa ibabaw nagpakita sa dihang si Ezechias midapit sa mga silingan sa Juda gikan sa Gingharian sa Israel sa pagsaulog sa Pagpalabay uban kanila. Makatan-aw ka niini nga imahe uban sa imong mga bata ug basaha ang 2 Mga Cronicas 30:18–19, nga nagpasabot nga pipila sa mga dinapit wala miligo sa ilang mga kaugalingon sumala sa balaod ni Moises. Unsay gibuhat ni Ezechias? Sa unsang paagi kini mipabati sa mga dinapit? Tabangi ang imong mga bata sa paghunahuna kon unsaon nila nga mahisama ni Ezechias sa paagi nga sila motagad sa uban.