“Si Jesus Moingon ngadto sa Tibuok Israel, ‘Pauli’”

Daghang higayon tali sa mga 735 ug 720 BC, ang mga Asirianhon misulong sa Amihanang Gingharian sa Israel, pinuy-anan sa napulog duha ka tribo, ug midala og liboan ka mga Israelita nga bihag ngadto sa nagkalinlaing bahin sa Emperyo nga Asirianhon. Kini nga mga Israelita nahimong nailhan isip “ang nawala nga mga tribo,” sa usa ka bahin tungod kay gipapahawa sila sa ilang yutang natawhan ug natibulaag taliwala sa ubang mga kanasoran. Apan nawala usab sila sa mas lawom nga paghunahuna: sa paglabay sa panahon nawala kanila ang ilang pag-ila sa kaugalingon isip ang katawhan sa pakigsaad sa Dios.

Sa kadugayan daghang mga tawo sa Habagatan nga Gingharian sa Juda mipahilayo usab gikan sa Ginoo. Ang mga Asirianhon misulong ug mibuntog sa kadaghanan niana nga gingharian usab; ang Jerusalem lamang ang milagrosong napreserbar. Wala madugay, tali sa 597 ug 580 BC, giguba sa mga Babylonian ang Jerusalem, lakip ang templo, ug gidala ang daghang mga tawo sa pagkabihag. Paglabay sa mga 70 ka tuig, ang salin sa Juda gitugotan sa pagbalik ngadto sa Jerusalem ug sa pagtukod og usab sa templo. Daghan, hinoon, ang nagpabilin sa Babelonia.

Paglabay sa mga henerasyon, ang mga Israelita gikan sa tanang tribo “natibulaag … pinaagi sa alimpulos sa tanang mga nasod nga wala nila hiilhi” (Zacarias 7:14). Ang uban gidala sa Ginoo ngadto sa ubang mga yuta. Ang uban mibiya sa Israel sa paglikay sa pagkabihag o tungod sa politika o ekonomikanhon nga mga rason.

Gitawag nato kini nga mga panghitabo og ang pagkatibulaag sa Israel. Ug importante kini nga masayod mahitungod sa pagkatibulaag tungod sa pipila ka rason. Usa niini, dako kini nga hilisgotan sa Daang Tugon—daghang propeta sa Daang Tugon ang mga saksi sa espirituhanong pagkabuntog nga misangpot ngadto sa pagkatibulaag. Ila kining nakita daan ug mipahimangno mahitungod niini. Ang pipila kanila nakasinati pa gani niini. Makatabang kana sa paghinumdom kon magbasa ka sa mga basahon ni Isaias, Jeremias, Amos, ug sa ubang mga propeta sa ulahing bahin sa Daang Tugon. Maghunahuna niining kinatibuk-ang kahulogan, kon magbasa ka sa ilang mga panagna mahitungod sa Asiria ug Babelonia, ang pagsimba og mga dios-dios ug pagkabihag, pagkagun-ob ug pagpahiuli sa kataposan, ikaw masayod kon mahitungod sa unsa ang ilang gihisgotan.

Ang pagsabot sa pagkatibulaag sa Israel motabang usab kanimo sa mas maayong pagsabot sa Basahon ni Mormon, tungod kay ang Basahon ni Mormon usa ka rekord sa usa ka sanga sa nagkatibulaag nga Israel. Kini nga rekord nagsugod diha sa pagbiya sa pamilya ni Lehi sa Jerusalem sa mga 600 BC, sa hapit nang pag-ataki sa mga Babylonia. Si Lehi usa niadto sa mga propeta kinsa nanagna mahitungod sa pagkatibulaag sa Israel. Ug ang iyang pamilya mitabang sa pagtuman niana nga panagna, midala sa ilang sanga sa Israel ug nagtanom niini sa pikas nga habig sa kalibotan, diha sa mga Amerika.

Ang pagkatibulaag sa Israel, hinoon, katunga lamang sa istorya. Ang Ginoo dili malimot sa Iyang katawhan, ni Siya mosalikway kanila, bisan kon sila misalikway Kaniya. Ang daghang panagna nga pagatibulaagon sa Dios ang Israel giubanan og daghang saad nga Siya usa ka adlaw niana mopundok kanila.

Kana nga adlaw mao karon—sa atong panahon. Ang pagpundok nagsugod na. Niadtong 1836, liboan ka tuig human gipundok ni Moises ang mga anak sa Israel diha sa tiilan sa Bukid sa Sinai, siya mipakita sulod sa Templo sa Kirtland aron itugyan ngadto ni Joseph Smith ang “mga yawe sa pagpundok sa Israel gikan sa upat ka mga bahin sa yuta” (Doktrina ug mga Pakigsaad 110:11). Karon, ubos sa direksyon niadtong naghupot niini nga mga yawe, ang mga tribo ni Israel gisugdan na sa pagpundok gikan sa matag nasod diin ang mga sulugoon sa Ginoo makahimo sa pag-adto.

Si Presidente Russell M. Nelson mitawag niini nga pagpundok og “ang labing importanting butang nga nagpanghitabo sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon. Ug kon pilion nimo, kon gusto nimo, ikaw mahimong dakong bahin niini.”

Sa unsang paagi kita makatabang? Unsa ang gipasabot sa pagpundok sa Israel? Nagpasabot ba kini sa pagpahiuli sa napulog duha ka tribo balik sa yuta nga sa makausa gipuy-an nila? Sa tinuod lamang, nagpasabot kini og mas dako, mas mahangturon. Sama sa gipasabot ni Presidente Nelson:

“Kon maghisgot kita kalabot sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan, diha sa matag habig sa tabil, angay nga makadungog sa mensahe sa gipahiuli nga ebanghelyo ni Jesukristo. …

“Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mohimo og lakang paingon sa paghimo og mga pakigsaad uban sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel. Ingon lamang niana sa ka yano.”

Mahitabo kini, sama sa gisulti ni Isaias, “ang usa ug ang usa” (Isaias 27:12) o, sama sa gipanagna ni Jeremias, “usa ka siyudad, ug duruha sa usa ka panimalay” (Jeremias 3:14).

Ang pagpundok sa Israel nagpasabot sa pagdala sa mga anak sa Dios balik ngadto Kaniya. Nagpasabot kini sa pagpahiuli kanila ngadto sa ilang pakigsaad nga relasyon uban Kaniya. Nagpasabot kini sa pagtukod og balik sa “balaan nga nasod” nga Iyang gisugyot nga tukuron kaniadtong dugay na kaayo (Exodo 19:6).

Ingon nga usa kinsa nakahimo og usa ka pakigsaad uban sa Dios, ikaw kabahin sa balay sa Israel. Napundok ka na, ug ikaw usa ka tigpundok. Ang gatosang-taas nga epikong sugilanon sa katawhan sa pakigsaad nagpadulong sa kinatumyan niini, ug ikaw usa ka importanting magdudula. Karon ang panahon nga si “Jesus moingon, ‘Israel pauli.’”

Kini ang mensahe sa mga tigpundok: Pauli na sa pakigsaad. Pauli na sa Zion. Pauli na ngadto ni Jesukristo, ang Usa nga Balaan sa Israel, ug Siya modala kanimo pauli sa Dios, imong Amahan.