2 Mga Hari 16–25

Kadaghanan kanato adunay mga kasinatian nga naghagit sa atong hugot nga pagtuo. Alang ni Ezechias ug sa iyang katawhan, usa niadtong mga hagit miabot sa dihang ang Asirianhon nga kasundalohan miduol sa Jerusalem. Samtang ikaw magbasa sa 2 Mga Hari 18–19, paghanduraw nga ikaw mipuyo sa Jerusalem niining panahona. Unsa kaha ang imong gibati, sama pananglit, sa pagkadungog sa mga pagbugal-bugal sa mga Asirianhon diha sa 2 Mga Hari 18:28–37; 19:10–13? Unsa kaha ang imong buhaton? Itandi ang mga rason sa Asirianhon sa dili pagsalig sa mga Israelita sa Ginoo ngadto sa mga rason nga gihatag ni Satanas kanato sa pagduda sa atong hugot nga pagtuo karon. Makahimo ka usab sa pagpakita og kalainan sa Asirianhon nga mga rason ngadto sa imong mga rason kon nganong ikaw mosalig sa Ginoo.

Unsa ang imong nakat-onan gikan sa mga lihok ni Ezechias dinhi niini nga sitwasyon? (tan-awa sa 2 Mga Hari 19:1–7, 14–19). Giunsa pagtubag sa Ginoo? (tan-awa diha sa 2 Mga Hari 19:35–37). Ngano sa imong hunahuna mipabilin si Ezechias nga matinud-anon? (tan-awa diha sa 2 Mga Hari 18:5–7). Pamalandonga kon giunsa sa Ginoo pagsuporta kanimo sa mga panahon nga mahagiton. Unsa ang imong gibati nga nagdasig sa pagbuhat sa pagdugang sa imong pagsalig diha Kaniya?

Mensahe ni Presidente Jeffrey R. Holland “Ayaw Kabalaka: Salig Lamang!” (Liahona, Mayo 2022, 34–36) adunay makatabang nga tambag alang sa mga panahon sa kahadlok o pagduda. Usa ka himno sama sa “Magpadayon Tang Tanan” (Mga Himno, nu. 150) makahimo usab og maawhagong mga mensahe. Unsay imong nakita dinhi niini nga mga kapanguhaan nga nagtabang kanimo?

Tan-awa usab sa 2 Mga Cronicas 31–32; 3 Nephi 3–4; Jörg Klebingat, “Maisugon nga Pagkadisipulo sa Ulahing mga Adlaw,” Liahona, Mayo 2022, 107–10.

Si Senacherib, ang hari sa Asiria, adunay maayo nga rason sa pagtuo nga ang iyang kasundalohan mobuntog sa Jerusalem (tan-awa diha sa 2 Mga Hari 17; 18:33–34; 19:11–13). Apan ang Ginoo adunay mensahe bahin ni Senacherib, nga gihatag pinaagi sa propetang Isaias. Kini natala diha sa 2 Mga Hari 19:20–34. Unsa nga mga kamatuoran ang imong nakaplagan diha sa mensahe sa Ginoo nga nagtabang kanimo sa pagbaton og hugot nga pagtuo Kaniya ug sa Iyang plano?

Mibati ka ba sukad nga ikaw adunay kulang sa espirituhanong paagi? Tingali mibati ka nga ang imong relasyon sa Dios mahimong mas malig-on. Unsa ang mitabang kanimo sa pagbalik ngadto Kaniya? Pamalandonga kini nga mga pangutana samtang magbasa ka sa 2 Mga Hari 21–23, diin naghulagway kon sa unsang paagi napalayo gikan sa Ginoo ang Gingharian sa Juda ubos ni Hari Manases (tan-awa diha sa 2 Mga Hari 21) ug sa unsang paagi si Hari Josias mitabang sa katawhan sa pagpabalik ngadto Kaniya (tan-awa diha sa 2 Mga Hari 22–23). Giunsa ug ngano nga si Josias ug ang iyang katawhan nausab? (tan-awa diha sa 2 Mga Hari 22:8–11; 23:1–6, 21, 24).

Si Presidente Spencer W. Kimball mitawag sa istorya ni Hari Josias nga “usa kana sa pinakanindot nga mga sugilanon diha sa tanang mga kasulatan” (Mga Pagtulun-an sa mga Presidente sa Simbahan: Spencer W. Kimball [2006], 79). Basaha ang mga pulong ni Presidente Kimball bahin ni Hari Josias (mga pahina 79–82). Tingali makahunahuna ka og usa ka kasinatian kon ang usa ka tudling sa kasulatan “makalig-on pag-ayo” diha kanimo. Unsa ang imong buhaton aron makadawat pa og daghang kasinatian sama niana?

Tan-awa usab diha sa Alma 31:5; “Josiah and the Book of Law” (video), Gospel Library.

12:25

Unsa ang nakapadani kanimo mahitungod sa pakigsaad nga gihimo ni Josias diha sa 2 Mga Hari 23:3? Samtang nagpadayon ka sa pagbasa sa kapitulo 23, timan-i unsay gibuhat ni Josias aron ipakita ang iyang pasalig ngadto sa Ginoo (tan-awa usab ang hulagway sa kataposan niini nga latid). Unsaon nimo sa pagpakita sa imong pasalig ngadto Kaniya?

• Diha sa 2 Mga Hari 18:3, 5–6, tabangi ang imong mga bata nga madiskobrehan kon unsay nakapahimo ni Hezekias nga usa ka maayong hari. Dayon samtang kamo nagbasa og dungan diha sa 2 Hari 19:14–19, madiskobrehan nila kung giunsa niya pagpakita nga siya misalig sa Ginoo. Makatan-aw kamo og hulagway ni Jesus ug maghisgot mahitungod kon ngano nga makasalig kita Kaniya. Unsaon nato pagpakita nga nagsalig kita sa Ginoo?

• Diha sa 2 Hari 22:1, tabangi ang imong mga bata nga madiskobrehan kon pila ang edad ni Josias sa dihang nahimo siya nga hari. Unsa ang atong makat-onan mahitungod ni Jesukristo diha sa bersikulo 2? Hunahunaa ang usa ka kalihokan nga makapakita sa pagsunod sa Ginoo ug sa dili pagtipas “ngadto sa kamot sa tuo kon sa wala.”

• Ang mga mamumuo nga gihulagway diha sa 2 Mga Hari 22:3–7 gisaligan sa kwarta nga gamiton sa pagtukod og usab sa templo “kay sila mga matinumanon man” (bersikulo 7). Human mabasa kini nga mga bersikulo, ikaw ug ang imong mga bata makahisgot mahitungod sa mga butang nga kamo gisaligan. Unsaon nato pagkahimong masaligan sama sa mga mamumuo dinhi niini nga mga bersikulo?

• Sa pagpaila sa istorya ni Hari Josias diha sa 2 Mga Hari 22–23, makahimo ka sa pagtago og usa ka kopya sa mga kasulatan sa bisan asa nga dapit sulod sa kwarto. Dapita ang imong mga bata sa pagpangita niini. Unya ikaw makahimo sa pagpakigbahin kon unsay nahitabo sa dihang usa sa mga pari ni Josiah nakakaplag sa mga kasulatan diha sa templo (tan-awa diha sa 2 Mga Hari 22:8–11; tan-awa usab sa “Hari Josias” sa Mga Istorya sa Daang Tugon, 148–49). Unsa kaha ang mahitabo kanato kon kita walay mga kasulatan? Makigbahin sa usag usa kon nganong ikaw malipayon nga kita adunay mga kasulatan karon.

  

  1:36

• Human mabasa ang 2 Mga Hari 23:2–3, ikaw ug ang imong mga bata makahisgot bahin sa mga kasulatan nga nakapadasig kaninyo nga “maglakaw sunod sa Ginoo” (bersikulo 3). Mahimo usab ninyong kantahon og dungan ang usa ka awit mahitungod sa mga kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66).

• Sa dihang si Josias ug ang iyang mga katawhan nakakat-on sa mga sugo sa Dios, mihimo sila og usa ka pakigsaad sa pagpuyo niini. Basaha kini uban sa imong mga bata diha sa 2 Mga Hari 23:1–3, ug tabangi sila sa pagpangita og mga pulong o mga hugpong sa mga pulong nga nagpakita kon unsa ang gibati sa mga tawo mahitungod sa mga sugo sa Ginoo. Tingali ang imong mga bata makabarog ug makasulti mahitungod sa unsa kaha ang kahulogan sa “[pagbarog] sa pakigsaad.” Dayon sila makalakaw diha sa gibarogan ug mosulti mahitungod kon unsa kaha ang kahulogan sa “paglakaw sunod sa Ginoo.” Sunod, sila makabutang sa ilang mga kamot diha sa ilang mga kasingkasing ug sa pagsugyot og mga paagi nga kita makasunod sa atong mga pakigsaad “sa bug-os [natong] kasingkasing.”