1 Mga Hari 12–13; 17–22

Unsaon nimo sa paghulagway sa sayop ni Hari Jeroboam, ang anak nga lalaki ni Salomon, nga nahimo diha sa 1 Mga Hari 12:1–14? Unsang mga Kristohanong hiyas ang makatabang unta ni Jeroboam sa pagluwas sa iyang gingharian? (tan-awa diha sa bersikulo 7; Mateo 20:25–28; Mosiah 2:10–21). Unsaon nimo nga makagamit niini nga mga hiyas isip usa ka lider—sa calling man sa Simbahan o isip usa ka lider sa imong kaugalingong kinabuhi?

Si propeta Elias mihangyo sa usa ka balo nga babaye sa paghatag kaniya og pagkaon ug tubig sa dili pa pakan-on ang iyang kaugalingon ug ang iyang gigutom nga anak nga lalaki. Nganong buhaton niya kana? Ang hangyo ni Elias mahimo usab nga tan-awon nga usa ka panalangin alang niining gamay nga pamilya. Nagkinahanglan sila sa mga panalangin sa Ginoo, ug ang pagsakripisyo nagdala og mga panalangin—lakip ang panalangin sa mas lig-on nga hugot nga pagtuo.

Samtang imong basahon ang 1 Mga Hari 17:8–16, handurawa nga ikaw kining balo nga babaye. Unsa ang nakapadani nimo mahitungod kaniya? Makahimo ka usab og usa ka lista sa mga pagpili nga nagkinahanglan og hugot nga pagtuo diha ni Jesukristo (sama pananglit, tan-awa diha sa Alang sa Kalig-on sa Kabatan-onan: Usa ka Giya sa Paghimo og mga Pagpili [2022]). Unsay imong nakat-onan gikan niining balo nga babaye mahitungod sa paggamit sa hugot nga pagtuo?

Sa unsang paagi nga ang mga lihok ni Eliseo diha sa 1 Mga Hari 19:19–21 susama ngadto sa mga lihok sa balo nga babaye?

Paghunahuna mahitungod og mga sakripisyo nga imong nahimo sa pagsunod sa Manluluwas. Unsa ang 1 Mga Hari 17:8-16; 19:19-21 gitudlo kanimo mahitungod niini nga mga sakripisyo? Sa unsang paagi nga ang imong kahibalo bahin sa Manluluwas nagtabang kanimo kon Siya maghangyo kanimo sa paghimo og mga sakripisyo? Sa unsang paagi Siya mipanalangin kanimo?

Tan-awa usab diha sa Mateo 4:18–22; 6:25–33; Lucas 4:24–26; “Elijah and the Widow of Zarephath” (video), Gospel Library; “Kon Molahutay ang Pagtuo,” Mga Himno, nu. 74.

10:13

Tingali ang mga Israelita mibati nga sila adunay maayo nga mga rason sa pagsimba ni Baal, kinsa nailhan isip ang dios sa mga unos ug ulan. Human sa tulo ka tuig nga huwaw, sila miserable nga nanginahanglan og ulan. Ug ang pagsimba ni Baal katilingbanong gidawat ug giawhag sa hari ug rayna. Samtang imong basahon ang 1 Mga Hari 18, paghunahuna mahitungod kon nganong ang usa ka tawo sa atong panahon mahimong dili makadesisyon mahitungod sa pagsunod sa Ginoo. Niini nga kapitulo, unsa sa imong hunahuna ang gipaningkamotan sa Ginoo sa pagtudlo mahitungod sa Iyang kaugalingon? Unsa nga mga kasinatian ang nakatabang kanimo sa pagpasalig sa pagsunod sa Manluluwas?

Tan-awa usab sa D. Todd Christofferson, “Choice and Commitment” (tibuok kalibotan nga debosyonal alang sa mga young adult, Ene. 12, 2020), Gospel Library.

Sa kasubo, ang milagro diha sa Bungtod sa Carmel wala maghimo sa misyon ni Elias nga mas masayon. Sa tinuod, ang iyang kinabuhi namiligro, ug gikinahanglan siyang motago sa usa ka langob diha sa kamingawan. Didto, nanglimbasog sa kamingaw ug nawad-an sa kadasig, aduna siyay kasinatian uban sa Ginoo nga lahi kaayo gikan sa kasinatian diha sa Bungtod sa Carmel. Unsa ang gitudlo kanimo sa kasinatian ni Elias diha sa 1 Mga Hari 19:1–18 mahitungod kon sa unsang paagi ang Ginoo makigsulti kanimo sa imong mga panahon sa panginahanglan?

Pamalandonga ang mga panahon sa dihang ikaw mibati nga ang Ginoo nakigssulti nganha kanimo. Unsaon nimo sa paghulagway ang paagi Siya nakigsulti kanimo? Ngano nga ang mga pulong nga “hinay” ug “hinagawhaw” maayo nga mga paagi sa paghulagway sa tingog sa Espiritu? Unsa ang uban nga mga pulong nga imong makaplagan diha sa Helaman 5:30; Doktrina ug mga Pakigsaad 6:22–23; 11:12–14? Unsa ang kinahanglan nimong buhaton aron mas kanunay nga madawat ang giya sa Ginoo?

Tan-awa usab sa Salmo 46:10.

• Sa pagtabang sa imong mga bata sa pagkat-on sa mga istorya sa hugot nga pagtuo diha sa 1 Mga Hari 17, makapakita ka kanila og mga hulagway o mga butang sa paghulagway sa mga istorya, sama sa mga langgam, pan, o usa ka batang lalaki. Samtang ikaw nag-istorya sa imong mga bata niini nga mga istorya, dapita sila sa pagpangita sa hulagway o butang nga haom sa matag istorya. “Elias ang Propeta” (diha sa Mga Istorya sa Daang Tugon, 121–24) makatabang kanimo sa pag-istorya niini nga mga istorya. Unsa ang gitudlo kanato sa matag istorya mahitungod sa pagpakita og hugot nga pagtuo diha ni Jesukristo?

  

  1:58

• Tabangi ang imong mga bata sa paghunahuna og mga paagi nga sila makapakita sa ilang hugot nga pagtuo diha ni Jesukristo. Kanta uban kanila og usa ka awit mahitungod sa hugot nga pagtuo, sama sa “I Have Faith in the Lord, Jesus Christ” [“Ako Adunay Hugot nga Pagtuo diha sa Ginoo, si Jesukristo”] (Gospel Library), ug pakigbahin sa usag usa unsay imong nakat-onan mahitungod sa hugot nga pagtuo gikan sa awit.

• Tingali ang imong mga bata makadrowing og usa ka hulagway kabahin sa unsay gihangyo sa Ginoo sa balo nga babaye nga ihatag ni Elias (tan-awa diha sa 1 Mga Hari 17:12–13) ug unsay madawat sa balo nga babaye agi og balos (tan-awa diha sa 1 Mga Hari 17:15–16). (Tan-awa usab ang pahina sa kalihokan niini nga semana.) Makapangita usab sila og mga hulagway sa ubang mga tawo kinsa mihatag og usa ka butang nga ilang gusto alang sa usa ka butang nga mas maayo. Dapita ang imong mga bata sa pagpangita og mga hulagway diha sa Libro sa mga Hulagway sa Ebanghelyo o Dali, Sunod Kanako. Unsay gihangyo sa Ginoo nga atong isakripisyo? Sa unsang paagi Siya mopanalangin kanato?

• Samtang kamo magbasa diha sa 1 Mga Hari 18:17–39 og dungan, ang imong mga bata makapili og bersikulo ug makadrowing og usa ka hulagway sa unsay gihulagway niini. Makagamit sila sa ilang mga hulagway sa pagsaysay sa istorya diha sa ilang kaugalingong mga pulong. (Tan-awa usab “Elias ug ang mga Pari ni Baal,” diha sa Mga Istorya sa Daang Tugon, 125–128.)

  

  2:17

• Tabangi ang imong mga bata sa paghunahuna og mga sitwasyon nga sila tingali nagkinahanglan nga modesisyon kon mosunod ba o dili ni Jesukristo. Tingali mahimo silang magdrowing og mga hulagway sa ilang mga kaugalingon nga naghimo og matarong nga pagpili. Pakigbahin ngadto sa usag usa kon nganong ikaw nagpili sa pagsunod ni Jesus.

• Samtang imong gi-summarize ang 1 Mga Hari 19:9–12, dapita ang imong mga bata sa paghimo og mga aksyon sa pagrepresentar sa kusog nga hangin, sa linog, ug sa kalayo. Dayon dapita sila sa paglingkod nga dili maglihok samtang magdungan kamo sa pagsulti, sa hagawhaw nga tingog, “tapos sa kalayo ang usa ka malinawon nga diyutayng tingog” (bersikulo 12). (Tan-awa usab sa “Ang Ginoo Nakigsulti kang Elias,” diha sa Mga Istorya sa Daang Tugon, 129–31.) Sultihi ang mga bata mahitungod sa mga panahon sa dihang ikaw nakasinati og hinay, hinagawhaw nga tingog sa Espiritu Santo.

  

  1:48

• Kantaha sa hinagawhaw nga paagi ang usa ka awit mahitungod sa Espiritu, sama sa “Ang Malinawon nga Gamay nga Tingog” (Songbook sa mga Bata, 141). Unsa ang makapalinga kanato gikan sa pag-ila sa Espiritu? Unsa ang makatabang kanato sa pagdungog Kaniya?