2 Samuel 11–12; 1 Mga Hari 3; 6–9; 11

Usahay motan-aw kita sa mga tawo kinsa ingon og lig-on sa ilang hugot nga pagtuo, ug magtuo kita nga dili sila maapektohan sa tintasyon. Ang masulob-on nga mga pagpili ni David nga gihulagway diha sa 2 Samuel 11 klaro nga nagpakita nga kini dili mao ang hitabo. Hunahunaa unsa nga mga leksiyon ang imong makat-onan gikan sa iyang mga kasinatian. Ang mga pangutana sama niini mahimong magtabang kanimo sa pagtuon diha sa 2 Samuel 11–12:

• Unsa nga mga pagpili ang gihimo ni David nga midala kaniya ngadto sa nagkagrabe nga dalan sa pagpakasala? Unsang matarong nga mga pagpili nga iya unta nga mahimo? (Tan-awa usab ang bidyo “To Look Upon,” Gospel Library.)

  

  4:15

  Paggamit sa mga bidyo. Ang mga bidyo makatabang kanimo sa paghanduraw og mga asoy gikan sa kasulatan ug hunahunaa sa unsang paagi kini magamit diha kanimo. Hunahunaa kon unsaon nga ikaw makagamit niini sa pagpalambo sa pagtudlo ug pagkat-on. Sama pananglit, samtang nagtan-aw sa “To Look Upon” (Gospel Library), hunahunaa ang paghunong sa bidyo og kadiyot diha sa nagkalain-laing mga punto aron sa pagpamalandong o paghisgot sa pipila ka pangutana nga gisugyot niini nga kalihokan.

• Giunsa sa kaaway pagpaninguha sa paggiya kanimo ngadto sa ubos sa makasasala nga mga dalan? Unsa nga mga pagpili ang imong mahimo karon sa pagpabilin nga luwas sa espirituhanong paagi?

• Tan-awa ang reaksyon ni David ngadto sa istorya ni Natan diha sa 2 Samuel 12:1–6. Unsa ang gisugyot sa iyang reaksyon mahitungod sa pagtan-aw ni David sa iyang kaugalingon? Unsa ang gibuhat sa Ginoo aron ikaw matabangan nga makita ang imong kaugalingon sa mas tukma nga paagi?

• Unsaon nimo pag-summarize ang mga panghitabo diha sa 2 Samuel 11–12 sa usa ka kapahayag nga pahimangno?

Ang pagbasa mahitungod sa mga sayop nga pagpili ni David makagiya kanimo nga makakat-on mahitungod sa mga peligro sa pornograpiya ug sekswal nga sala. Ang usa ka maayong kapanguhaan alang niini mao ang Alang sa Kalig-on sa mga Kabatan-onan: Usa ka Giya alang sa Paghimo og mga Pagpili, ilabi na ang mga seksiyon nga giulohan og “Unsa ang buhaton niini nga higayon” ug “Ang imong lawas sagrado” (mga pahina 21–28). Tingali makatan-aw ka diha niana nga kapanguhaan alang sa tambag nga makatabang unta ni David sa paghimo og mas maayo nga mga pagpili. O ikaw makabasa sa “Si Jesukristo motabang kanimo” (mga pahina 6–9), mangita sa usa ka butang nga makatabang unta ni David sa pagbalik ngadto sa Ginoo.

Hunahunaa ang pag-awit og usa ka himno sama sa “Nagkinahanglan Ko Nimo sa Matag Takna” (Mga Himno, nu. 54) ug mamalandong kon giunsa ka paglig-on sa Manluluwas sa panahon nga ikaw nag-atubang og tintasyon.

Tan-awa usab diha sa 2 Nephi 28:20–24; Ulisses Soares, “Pagtinguha Kang Kristo sa Matag Hunahuna,” Liahona, Nob. 2020, 82–85; “Taking Charge of Technology,” Gospel Library; “Watch Your Step” (video), Gospel Library.

2:36

Kon ang Ginoo moingon kanimo, “Pangayo kon unsay akong ihatag kanimo” (1 Mga Hari 3:5), unsa ang imong pangayoon? Unsay nakapadani kanimo mahitungod sa hangyo ni Salomon? Pamalandonga nganong ang “usa ka masinabtanong kasingkasing” aron “maila tali sa maayo og daotan” (bersikulo 9) usa ka bililhon nga gasa. Unsa ang imong mabuhat sa pagtinguha niini nga gasa?

Tan-awa usab sa Moroni 7:12–19.

Sa 1 Mga Hari 6–7 makit-an nimo ang usa ka detalyadong paghulagway sa sagradong balay nga gitukod ni Salomon alang sa Ginoo. Ang mga detalye mahimong dili ingon ka importante nganha kanimo sama ngadto sa karaang mga Israelita. Apan ang pagbasa niini nga mga kapitulo mahimong maghatag kanimo ug pagbati kon unsa ka importante kini kanila kaniadto nga adunay balay sa Ginoo. Nganong importante kini kanimo?

Mahimo nimong pamalandungon kon unsa ang gisimbolo sa lainlaing mga parte sa templo ni Salomon. Sama pananglit, hunahunaa kon unsa kaha ang mga kerubin, mga kahoy, ug mga bulak diha sa 1 Mga Hari 6:35 girepresentar. (Tan-awa usab diha sa Genesis 3:24.)

Ang Kapitulo 8 nagrekord sa pag-ampo ni Salomon sa dihang nahuman ang templo (tan-awa diha sa mga bersikulo 22–61). Hunahunaa ang paghimo og lista sa mga panalangin nga gipangayo ni Salomon. Unsa ang nakapadani kanimo mahitungod niini nga mga panalangin? (Hinumdomi usab ang mga saad sa Ginoo diha sa 2 Mga Hari 6:11–13; 9:1–9.) Kon ikaw nakaadto na sa balay sa Ginoo, paghunahuna mahitungod sa imong mga kasinatian sa pagsimba didto. Sa unsa nga paagi nga ang paghupot sa mga pakigsaad sa templo mitabang kanimo sa pagdawat sa mga panalangin sa Ginoo?

Tan-awa usab ang Doktrina ug mga Pakigsaad 109; Henry B. Eyring, “Gusto Ko nga Makita ang Templo,” Liahona, Mayo 2021, 28–31.

Unsay gipasabot sa “hingpita ang inyong kasingkasing … ngadto sa Ginoo”? (1 Mga Hari 8:61). Lahi ba kana sa atong mga lihok nga mahimong hingpit? Sa unsang paagi? Basaha ang 1 Mga Hari 11:1–11, ug timan-i unsay gisulti sa Ginoo mahitungod sa kasingkasing ni Salomon. Mahimo nimong pamalandungon kon aduna bay mga impluwensya sa imong kinabuhi nga makapalayo sa imong kasingkasing gikan sa Ginoo ug makapadani ngadto sa “ubang mga dios.”

• Si “Hari David” sa Mga Istorya sa Daang Tugon, 117–20, makatabang kanimo sa pag-istorya sa imong mga bata sa istorya diha sa 2 Samuel 11. Mahimo nimong hangyoon ang imong mga bata sa pag-ila sa mga sayop nga pagpili nga gihimo ni David ug sa pagsugyot og mga maayong pagpili nga iya untang mahimo. Unsa ang pipila ka butang nga kita makabuhat kon kita pagatintalon nga makatabang kanato sa paghimo sa hustong pagpili?

  

  2:11

• Ang pagbasa mahitungod sa makalilisang nga mga sala ni David tingali maayo nga oportunidad sa paghisgot sa mga peligro sa pornograpiya. Ang bidyo nga “What should I Do When I See Pornography?” (Gospel Library) adunay mapuslanong giya. Tabangi ang imong mga bata sa paghimo og plano mahitungod sa unsay ilang buhaton kon sila makakita og pornograpiya.

  

  5:46

• Samtang ikaw ug ang imong mga bata nagkat-on mahitungod sa paghalad sa templo diha sa 1 Mga Hari 8, makahimo kamo sa pagtan-aw sa mga hulagway sa mga templo diha sa latid niini nga semana. Dapita ang imong mga bata sa paghisgot mahitungod sa mga detalye nga ilang nakita diha sa mga hulagway. Mahimo nimong hatagan og gibug-aton ang mga bersikulo 57–58. Unsay ipasabot sa “paglakaw sa tanan sa mga dalan [sa Ginoo]”? (1 Mga Hari 8:58). Tingali makahimo og usa ka lakang ang imong mga bata alang sa matag tubag nga ilang mahatag.

• Sultihi ang imong mga bata kon sa unsang paagi ang pagsunod sa mga pakigsaad nga imong gihimo sa templo nagtabang kanimo sa paglakaw sa mga dalan sa Ginoo. Mahimong mosulti ka kanila unsa kini nga mga pakigsaad (tan-awa diha sa Kinatibuk-ang Tamdanan nga Basahon, 27.2, Librarya sa Ebanghelyo). Makahimo usab kamo sa pagpanganta og dungan sa usa ka awit sama sa “Gusto Ko nga Makita ang Templo” (Songbook sa mga Bata, 72).

• Ang pagbasa mahitungod kon giunsa pag-impluwensya sa mga asawa ni Salomon kaniya makagiya ngadto sa usa ka panagsultihanay mahitungod sa mga panig-ingnan “sa laing mga dios”—o mga butang nga gisimba o gihigugma sa mga tawo kay sa Ginoo. Unsaon nato pagpakita nga mas gihigugma nato Siya labaw kaysa bisan unsa pa sa atong kinabuhi?