1 Samuel 8–10; 13; 15–16

1 Samuel 8 nagsaysay og usa ka panghitabo nga sa kahangtoran mag-usab sa padulngan sa mga Israelita. Alang sa pagpanalipod batok sa ilang mga kaaway, gusto sa mga Israelita nga makabaton og unsay anaa sa ilang mga silingan—usa ka hari nga magmando kanila. Samtang ikaw nagbasa mahitungod sa ilang hangyo ug sa tubag sa Ginoo, paghunahuna mahitungod kon kinsa ang imong gisaligan alang sa kaluwasan ug giya. Hunahunaa unsa ang buot ipasabot sa paghimo sa Ginoo nga “maghari ibabaw [kanimo]” (1 Samuel 8:7).

Sa umaabot nga mga semana, mabasa nimo ang mahitungod sa daghang mga hari nga gitawag aron paggiya sa Israel. Samtang ikaw magkat-on mahitungod kanila, hunahunaa ang mosunod nga mga pangutana:

• Giunsa pagtuman sa mga pahimangno sa Ginoo diha sa 1 Samuel 8:10–18?

• Sa unsang paagi naapektuhan ang mga anak sa Israel sa ilang pagpili nga magbaton og yutan-ong hari?

• Sa unsa nga paagi si Jesukristo lahi gikan sa yutan-ong mga hari? Hunahunaa unsa nga kalibotanong mga impluwensya ang kinahanglan nimong tangtangon sa imong kinabuhi aron sa paghimo ni Kristo nga imong Hari.

Tan-awa usab diha sa “Paglipay, ang Ginoo Hari!,” Mga Himno, nu. 33.

Basaha ang mahitungod kon giunsa sa Dios pagpili ang hari sa Israel diha sa 1 Samuel 9–10 ug 16 (tan-awa ilabi na ang 9:15–17; 10:1–12; 16:1–13). Pangita og mga tudling nga nagtabang kanimo sa pagsabot unsay kahulogan sa “pagatawgon sa Dios, pinaagi sa panagna” diha sa Simbahan sa Ginoo karon (Mga Artikulo sa Hugot nga Pagtuo 1:5). Mahimong hunahunaon nimo ang pagbutang sa imong kaugalingon sa lugar sa lider nga naghatag sa tawag (Samuel), sa tawo nga gitawag (Saul ug David), ug ang mga katawhan nga sila gitawag aron alagaran (ang mga Israelita). Unsay imong nakat-onan gikan sa mga pulong ug mga lihok niini nga mga kapitulo?

Maghunahuna kon unsa ka manggiulawon si Saul sama diha sa 1 Samuel 10, kini makapatingala ang pagbasa mahitungod sa iyang “pagsukol” ug “pagkamagahi og kasingkasing” human siya mahimong hari (1 Samuel 15:23). Ngano sa imong hunahuna kini nahitabo? Sa 1 Samuel 13:5–14, unsa nga mga linihokan ug mga pamatasan ang imong makita nga nagdala sa iyang pagkapukan?

Sa 1 Samuel 15, mabasa nimo ang usa ka sugo gikan sa Ginoo nga wala sunda ni Saul tungod kay nagtuo siya nga adunay siya’y maayong rason. Aron makakat-on gikan sa dili maayo nga mga pagpili, tan-awa diha sa mga sayop nga desisyon ni Saul, tan-awa diha sa bersikulo 22 ug ilisi ang mga pulong nga “halad” ug “tambok sa mga laking karnero” sa mga butang nga ingon og maayo apan dili sama ka importante sa pagpaminaw ug sa pagsunod sa Ginoo. Giunsa ka pagpanalangin samtang gibutang nimo og una ang kabubut-on sa Ginoo diha sa imong kinabuhi?

Nakahimo ka ba sukad og desisyon base sa “panagway sa gawas” sa usa ka butang o sa usa ka tawo, nga sa kaulahian lamang nahibaloan nga ikaw nasayop? Tingali mikaon ka og usa ka butang nga dili ingon ka maayo sama sa iyang hitsura. O tingali mihukom ka og usa ka tawo nga dili patas.

Sa dihang nangita si Samuel og bag-ong hari sa Israel, gitudloan siya sa Ginoo ug mas maayo nga paagi. Basaha ang mahitungod niini diha sa 1 Samuel 16:6–7, ug hunahunaa ang paghimo ug lista sa mga paagi nga gihukman sa mga tawo ang uban base sa “panagway sa gawas.” Makakita ka og pipila ka mga ehemplo diha sa mensahe ni Elder Christopher G. Giraud-Carrier “Kita Iyang mga Anak” (Liahona, Nob. 2023, 114–16). Unsa ang buot ipasabot sa pagtan-aw “sa kasingkasing,” sama sa gibuhat sa Ginoo? (1 Samuel 16:7). Makakaplag ka usab ug mga ehemplo niini, diha sa mensahe ni Elder Giraud-Carrier. Tingali makahunahuna ka og uban pang mga higayon nga ang Manluluwas mitan-aw lapas sa panagway sa gawas sa usa ka tawo. (Tan-awa, sama pananglit, sa Marcos 12:41–44; Lucas 5:1–11; 19:1–9; Juan 4:5–30; Moises 6:31–36.) Unsa ang imong nakat-onan gikan niini nga mga ehemplo?

Unsaon nimo pagsunod sa ehemplo sa Manluluwas sa paagi nga ikaw nagtan-aw sa uban—ug sa imong kaugalingon? Sa unsang paagi nga ang pagbuhat sa mao makaapekto sa imong mga inter-aksyon sa uban? Hunahunaa ang pagsulti sa usa ka tawo mahitungod sa kaayo nga imong nakita diha sa ilang kasingkasing.

Tan-awa usab ang Ulisses Soares, “Mga Kaigsoonan diha ni Kristo,” Liahona, Nob. 2023, 71.

• Samtang ikaw nagbasa sa 1 Samuel 8 uban sa imong mga bata, tabangi sila sa pagpangita ug mga rason sa pagsulti ni Samuel sa mga Israelita nga ang pagbaton og hari usa ka ngil-ad nga ideya. Ngano nga mas maayo ang pagbaton ni Jesukristo isip atong hari? Tingali makahimo kamo ug korona nga papel nga magdungan ug magpuli-puli sa pagsul-ob niini ug makigbahin og usa ka butang nga kita makahimo sa pagpakita nga kita gusto ni Jesus nga mahimo natong Hari. (Tan-awa diha sa Jeremias 23:5; Doktrina ug mga Pakigsaad 45:59.)

• Ang mga asoy sa Dios nga nagpili ni Saul ug David nga mahimong mga hari makatabang sa imong mga bata sa pagsabot kon giunsa pagtawag ang mga tawo sa pagserbisyo diha sa Simbahan karon pinaagi sa pagpadayag. Aron matudloan sila niining mga istorya, makahimo ka sa pagsulat sa mga panghitabo gikan sa mga istorya diha sa mga piraso sa papel, ug ang imong mga bata makapahimutang niini sa hustong pagkasunod-sunod samtang imong basahon ang mga tudling sa kasulatan og dungan (tan-awa usab diha sa “Batan-ong David” sa Mga Istorya sa Daang Tugon, 110–11). Dayon makahimo ka sa paghisgot mahitungod sa mga panahon sa dihang ang Dios mipanalangin kanimo og espirituhanong gahom sa pagtuman sa tahas o calling (tan-awa diha sa 1 Samuel 10:9–10).

  

  1:16

• Mahimo usab nga kini ang maayo nga panahon sa pagtudlo sa imong mga kabataan sa ikalima nga artikulo sa hugot nga pagtuo. Isulti kanila kon giunsa nimo pagdawat ang imong calling sa Simbahan. Giunsa nimo pagkahibalo nga ikaw gitawag sa Dios?

• Ang usa ka leksiyon nga naggamit og butang makatabang sa imong mga bata nga masabtan ang prinsipyo diha sa 1 Samuel 16:7. Sama pananglit, makapakita ka kanila og pipila ka pagkaon o usa ka basahon nga adunay putos o hapin nga wala motukma sa tinuod nga sulod niini. Unsa ang gisugyot sa 1 Samuel 16:7 ug niining leksiyon nga naggamit og butang mahitungod kon unsaon nato pagtan-aw ang atong mga kaugalingon ug ang ubang mga tawo? Kantaha ang usa ka awit nga naghatag og gibug-aton niini nga baroganan, sama sa “Maghigugmaay” (Songbook sa mga Bata, 54).

  Gamit og mga leksiyon nga naggamit og butang. Kon ang imong mga bata adunay usa ka butang nga matan-aw ug mahikap kalabot ngadto sa usa ka baroganan sa ebanghelyo, sila mas dali nga mahinumdom niini. Sama pananglit, samtang nagbasa ka sa 1 Samuel 16:7 uban kanila, makapatabang ka sa pagpangita ug mga pananglitan sa mga optical illusion aron ihulagway ang punto nga kinahanglan maninguha sa pagtan-aw ingon nga ang Ginoo nagbuhat—pinaagi sa pagtan-aw “sa kasingkasing”—kay sa mga paghukom base sa “panagway sa gawas.”

• Ikaw ug ang imong mga bata mahimong makapakigbahin og mga kasinatian diin ikaw nakakat-on kon nganong ikaw kinahanglan nga “magatan-aw sa kasingkasing,” dili lamang “sa panagway sa gawas” (bersikulo 7). Mahimo usab kamo nga magpuli-puli sa pagsulti sa usag-usa mahitungod sa maayong mga kalidad nga imong makita diha sa kasingkasing sa usag usa.