Ruth; 1 Samuel 1–7

Ang kinabuhi malisod alang sa usa ka balo nga babaye sa bisan kanus-a nga panahon. Apan sa dihang namatay ang bana ni Ruth, ang iyang sitwasyon hilabihan sa kalisod. Sa Israelita nga kultura nianang panahona, ang usa ka babaye nga walay bana o mga anak nga lalaki walay katungod sa kabtangan ug diyotay kaayo ang mga paagi sa pagpanginabuhi. Samtang magbasa ka sa istorya ni Ruth, timan-i kon sa unsang paagi ang Ginoo mihimo sa trahedya ngadto sa dagkong mga panalangin. Unsa ang imong nabantayan mahitungod ni Ruth nga tingali nakatabang kaniya? Giunsa ni Boaz sa pagtubos ni Ruth gikan sa iyang makaluluoy nga sitwasyon? (tan-awa diha sa Ruth 4:4–10). Sa unsang paagi si Ruth ug Boaz sama ni Jesukristo?

Tan-awa usab ang “Akong Kalag, Magmalinawon,” Mga Himno, nu. 70.

Tingali nag-antos ka og grabeng pagkanawad-an, sama kang Ruth ug Noemi (tan-awa sa Ruth 1:1–5). O tingali, sama kang Ana, nangandoy ka og mga panalangin nga wala pa nimo madawat (tan-awa diha sa 1 Samuel 1:1–10). Sa unsang paagi kini nga mga babaye nagpakita sa ilang hugot nga pagtuo sa Dios? Unsay imong nakat-onan gikan sa ilang mga ehemplo?

Sa tinuod, dili tanan kinsa nag-ampo makabaton og anak makadawat og anak, ug dili tanan kansang kapikas namatay magminyo og usab. Apan ang tanan kinsa moduol ngadto sa Manluluwas nagdawat sa Iyang panabang ug giya. Hunahunaa kon sa unsang paagi ikaw “miabot sa pagsalig” sa Ginoo (Ruth 2:12) atol sa imong malisod nga mga panahon.

Tan-awa usab sa Amy A. Wright, “Paglahutay sa Adlaw diha ni Kristo,” Liahona, Nob. 2023, 9–11.

Sa dihang ang ilang mga kaaway miatake, ang mga Israelita sa dayag mihunahuna nga ang yano nga pag-angkon sa arka sa pakigsaad mopanalipod kanila. Samtang imong basahon ang 1 Samuel 4–6, paghunahuna mahitungod kon nganong kana wala moepekto. (Timan-i usab ang dili matarong nga mga lihok sa mga anak nga lalaki ni Eli, kinsa miserbisyo isip mga pari sa tabernakulo, diha sa 1 Samuel 2:12–25.) Sa inyong hunahuna unsa ang gipaningkamotang itudlo sa Ginoo sa Iyang katawhan? Unsa ang inyong nakat-onan gikan sa unsay nahitabo ngadto sa mga Filestihanon human makuha ang arka? (tan-awa diha sa mga kapitulo 5–6). Unsa ang inyong nakat-onan gikan sa mga paningkamot sa Israel sa pagkuha og usab sa panalipod sa Ginoo diha sa 1 Samuel 7?

Kamo tingali madasig pinaagi sa balak ni Ana sa pagdayeg diha sa 1 Samuel 2:1–10. Unsa ang imong nakaplagan diha sa iyang mga pulong nga makatabang unta sa mga anak nga lalaki ni Eli ug sa nahibilin sa mga Israelita?

Usahay, imong bation nga sama ni Samuel, kinsa nadungog ang tingog sa Ginoo apan wala makaila niini. Sama kanatong tanan, si Samuel kinahanglang makat-on unsaon sa pag-ila sa tingog sa Ginoo. Samtang ikaw nagtuon diha sa 1 Samuel 3, unsa ang imong nakat-onan gikan niining batang lalaki mahitungod sa pagpaminaw ug pagsunod sa tingog sa Ginoo? Mahimo usab nga magsisik niining dugang nga mga kasulatan ug maghimo og usa ka lista sa giya nga makatabang sa usa ka tawo sa pag-ila sa tingog sa Ginoo: 1 Mga Hari 19:11–12; Lucas 24:15–32; 3 Nephi 11:3–7; Doktrina ug mga Pakigsaad 6:22–23; 8:2–3; 9:7–9.

Sa ubang mga higayon, ikaw mobati nga ang kalangitan gisirhan ug nga ang Dios dili buot nga makigsulti kanimo. Si Presidente Russell M. Nelson miingon: “Ang Dios sa tinuod buot ba gayod makigsulti kaninyo? Oo!” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96). Samtang kamo nagtuon sa mensahe ni Presidente Nelson, unsay inyong nakaplagan nga nagdasig kaninyo sa pagpaminaw ug pagsunod sa tingog sa Ginoo? Unsay gidapit kaninyo ni Presidente Nelson nga buhaton, ug unsa nga mga panalangin iyang gisaad? Kamo makakaplag usab og mga pagdapit ug gisaad nga mga panalangin mahitungod sa pagpadayag diha sa “Magkinabuhi sa kahayag sa Dios” (Alang sa Kalig-on sa mga Kabatan-onan: Usa ka Giya alang sa Paghimo og mga Pagpili, 16–20). Hunahunaa ang pagpili og usa ka butang nga ikaw makahimo sa “pagdugang sa imong espirituhanong kapasidad sa pagdawat og pagpadayag.”

• Samtang ikaw makigbahin ngadto sa imong mga kabataan sa istorya ni Ruth (makagamit ka sa “Ruth ug Noemi” diha sa Mga Istorya sa Daang Tugon, 100–103), dapita sila sa pagpataas sa ilang mga kamot sa matag higayon ilang madungog ang usa ka buhat sa pagkamabination diha sa istorya. Sila makapakigbahin usab kon unsay ilang gibati kon ang uban mabination ngadto kanila, o kon sila mabination ngadto sa uban. Sa unsang paagi ang Manluluwas nagmabination ngari kanato? Unsaon nga kita makasunod sa Iyang ehemplo? (tan-awa diha sa “Pagkamabination Magagikan Kanako” Songbook sa mga Bata, 61).

  

  2:0

• Ang mga istorya ni Ruth ug Ana makadasig sa imong mga kabataan sa pagpabilin nga matinud-anon atol sa malisod nga mga panahon. Hunahunaa ang pagtabang kanila sa pagbuhat og yano nga tsart nga may mga ulohan og Mga Pagsulay, Mga Lihok, Mga Panalangin. Dayon makabasa saila og gungan diha sa Ruth 1:3–5, 8, 16; 2:1–3, 8–12; 4:13–17; 1 Samuel 1:1–18 ug sa pagsulat ubos sa mga ulohan unsa ang ilang nakaplagan dinhi niini nga mga bersikulo. Giunsa ni Ruth ug Ana pagpakita ang ilang hugot nga pagtuo sa Ginoo? Ikaw ug ang imong mga bata makahimo sa pagpakigbahin og mga ehemplo kon giunsa sa Ginoo pagpanalangin kanimo atol sa malisod nga mga panahon.

• Sa pagkat-on mahitungod ni Ana, makabasa ang imong mga bata diha sa 1 Samuel 1:1–18 o “Ana” sa Mga Istorya sa Daang Tugon (104–5) o tan-awa ang “Hannah’s Faith” (video, Gospel Library). Mahimo kini nga makalingaw sa pag-itsa og bola ngadto sa usa ka bata ug makadapit kanila sa pag-asoy og bahin sa istorya nga magpasa sa bola ngadto sa usa ka bata. Unsa ang atong nakat-onan mahitungod sa pag-ampo gikan sa ehemplo ni Ana?

  

  1:15

  

  3:9

• Tingali usa ka yano nga role-play makatabang sa imong mga bata sa pagkat-on gikan sa kasinatian ni Samuel uban sa pagpadayag. Ang usa ka bata mahimong magpakaaron ingnon nga si Samuel, ug ang lain magpakaaron ingnon nga si Eli samtang ikaw magbasa diha sa 1 Samuel 3:1–10 (tan-awa usab sa “Samuel ang Propeta” sa Mga Istorya sa Daang Tugon, 106–9, o sa bidyo “Samuel and Eli,” sa Gospel Library). Unsa ang atong makat-onan gikan ni Samuel mahitungod kon unsaon sa pagpaminaw sa tingog sa Ginoo? Unsaon nato pagpakita nga kita andam sa pagpaminaw kon ang Ginoo makigsulti kanato?

  

  2:10

  

  1:58

• Pangutan-a ang mga bata kon unsaon nila sa pagpasabot ngadto sa usa ka tawo kon sa unsa nga paagi ang Ginoo makigsulti kanila. Makatabang ka kanila sa pagpangita alang sa mga tubag diha sa Doktrina ug mga Pakigsaad 6:22–23; 8:2–3; 9:7–9.