1 Samuel 17–18; 24–26; 2 Samuel 5–7

Ang istorya ni David ug Goliat usa sa labing nabantog nga mga istorya diha sa kasulatan. Sa tinuod, sa kasagaran kita nagtutok diha ni David. Apan niining panahona, samtang imong tun-an ang 1 Samuel 17, pamalandonga usab ang mga pulong sa ubang mga tawo niini nga kapitulo (tan-awa ang lista sa ubos). Unsa ang imong makat-onan mahitungod kanila ug sa ilang mga motibo? Unsay imong nakat-onan mahitungod ni David? Sa unsang paagi nga siya lahi?

• Goliat: mga bersikulo 8–10, 43–44

• Eliab: bersikulo 28

• Saul: bersikulo 33

• David: mga bersikulo 26, 32, 34–37, 39, 45–47

Ang imong istorya, bisan dili ingon ka nabantog sama kang David, sigurado nga naglakip og mga hagit nga sama kadako ni Goliat nga buntugon ug mga oportunidad sa paggamit og hugot nga pagtuo diha sa Ginoo. Unsa ang gitudlo kanimo sa ehemplo ni David mahitungod sa pag-atubang sa mga kalisdanan sa imong istorya? Mahimo usab nimong basahon ang mensahe ni Presidente Camille N. Johnson nga “Dapita si Kristo nga Mosulat sa Imong Sugilanon” (Liahona, Nob. 2021, 80–82) uban sa usa sa imong mga hagit nga gihunahuna. Pangita og tubag sa mga pangutana sama niini: Sa unsang paagi gusto sa Ginoo kanako nga tan-awon ang akong mga hagit? Giunsa Niya ako pagtabang sa nanglabay nga panahon? Sa unsa nga paagi ako makapakita sa akong pagsalig Kaniya sa pagsulat sa akong istorya?

Tingali nasayod na ikaw nga adunay pipila ka masulub-ong mga kapitulo sa ulahi nga bahin sa istorya ni David (tan-awa, pananglitan, diha sa 2 Samuel 11). Kon ikaw dihay oportunidad sa paghatag og tambag ni David human sa iyang pakiggubat ni Goliat, unsa ang imong isulti? Sa unsang paagi kini nga tambag maggamit sa imong kinabuhi?

Tan-awa usab sa “The Lord Will Deliver Me” (video), Gospel Library.

3:24

Agi og dugang ngadto sa personal nga mga hagit, nag-atubang usab kita og dagko, komplikadong mga problema nga nag-apekto sa tibuok kalibotan. Kon ang mga pwersa sa daotan “nagtigom pagtingob … aron sa pakiggubat” batok sa mga pwersa sa maayo (1 Samuel 17:1), kita mahimong maghunahuna unsaon sa atong indibidwal nga mga paningkamot posible nga makahimo og kalainan. Unsa ang inyong nakaplagan sa istorya ni David nga naghatag kaninyo og paglaom?

Tan-awa usab sa “Magpadayon Tang Tanan,” Mga Himno, nu. 150.

Samtang imong basahon ang 1 Samuel 18, hunahunaa ang pagpakita sa kalainan ni Saul ug sa iyang anak nga lalaki nga si Jonatan (kinsa, kon dili pa ni David, magtuo nga siya ang sunod nga hari). Sa unsang paagi si Saul ug si Jonatan mitubag ngadto sa kalamposan ni David? Unsa ang imong nakat-onan gikan niini nga kasinatian?

Unsa ang imong nakita sa mga kinaiya ug mga lihok ni Jonatan nga nagpahinumdom kanimo ni Jesukristo?

Sa 1 Samuel 24–26, pangita alang sa mga leksiyon mahitungod sa garbo, pagpasaylo, ug pagpugong sa kaugalingon. Mahimo usab nimong hunahunaon ang pagbasa sa mensahe ni Elder Mark A. Bragg nga “Kristohanong Pamayhon sa Kaligdong” isip kabahin sa imong pagtuon (Liahona, Mayo 2023, 60–63). Giunsa ni David, ni Abigail, ug sa uban pagpakita—o napakyas sa pagpakita—sa Kristohanong pamayhon sa kaligdong niini nga mga kapitulo? Unsa nga mga oportunidad kamo aduna sa pagpakita og Kristohanong pamayhon sa kaligdong?

Ang mensahe ni Sister Kristen Yee nga “Kahimayaan Alang sa mga Abog: Ang Dalan sa Kaayohan pinaagi sa Pagpasaylo” (Liahona, Nob. 2022, 36–39) makatabang kanimo sa pagtuon sa 1 Samuel 25. Sa unsang paagi si Abigail sama ni Jesukristo?

Bisan human gipildi ni David si Goliat, ang iyang mga problema sa mga Filistihanon wala pa mahuman. Samtang magbasa ka diha sa 2 Samuel 5:17–25, hunahunaa kon sa unsang paagi ang ehemplo ni David makatabang kanimo sa mga hagit nga imong giatubang (tan-awa usab diha sa 1 Samuel 23:2, 10–11; 30:8; 2 Samuel 2:1). Sa unsang paagi ikaw napanalanginan pinaagi sa pagsunod sa pagpadayag nga imong nadawat?

Sa dihang si David mitanyag sa pagtukod og balay, nga nagpasabot sa usa ka templo, alang sa Ginoo (tan-awa diha sa 2 Samuel 7:1–3), ang Ginoo mitubag nga sa pagkatinuod ang anak ni David ang motukod niini (tan-awa diha sa mga bersikulo 12–15; (tan-awa usab diha sa 1 Mga Cronicas 17:1–15). Ang Ginoo miingon usab nga agig balos Siya motukod ni David og “balay,” nga nagpasabot og kaliwatan, ug nga ang iyang trono molungtad sa kahangtoran (tan-awa diha sa 2 Samuel 7:11, 16, 25–29; Salmo 89:3–4, 35–37). Kini nga saad natuman diha ni Jesukristo, ang atong Mahangturong Hari, kinsa usa ka kaliwat ni David (tan-awa diha sa Mateo 1:1; Lucas 1:32–33; Juan 18:33–37).

• Mahimo nimong gamiton ang “David ug Goliat” sa Mga Istorya sa Daang Tugon, 112–16, aron matabangan ang imong mga bata nga mapamilyar sa unsay nahitabo sa 1 Samuel 17:20–54. Dayon mahimo nimo silang pasultion pag-usab sa istorya gamit ang mga hulagway o mga linya nga mga drowing dinhi niini nga latid. Pangutan-a sila unsa sa ilang hunahuna nga gusto sa Ginoo nga ilang makat-onan gikan niini nga istorya.

  

  2:36

• Ikaw ug ang imong mga bata makahimo usab og lista sa pipila ka lisod nga mga hagit nga mahimong ilang masinati atol sa ilang kinabuhi. Dayon dapita sila sa pagpangita og mga butang nga gisulti ni David nga makatabang niini nga mga hagit (tan-awa diha sa 1 Samuel 17:26, 32, 34–37, 45–47). Ipakigbahin kon giunsa ni Jesus pagtabang kanimo atol sa mga hagit.

• Ang imong mga bata makamartsa ingon og sila si David nga padulong sa pakig-away ni Goliat samtang nagkanta og usa ka awit mahitungod sa pagkaisog, sama sa “Magmaisugon Ko” (Songbook sa mga Bata, 63).

• Unsaon nga makatabang ka sa imong mga bata sa pagkat-on gikan sa panaghigalaay ni Jonatan ug David? Usa ka paagi mao ang paghatag sa matag bata ug duha ka papel nga mga kasingkasing, usa nga nagrepresentar ni David ug ang lain nga nagrepresentar ni Jonatan. Dayon basaha og dungan ang pipila ka mga hugpong sa mga pulong gikan sa 1 Samuel 18:1–4 nga naghatag og gibug-aton sa gugma nga gibati niining duha ka mga higala alang sa usag usa. Ang imong mga bata dayon makasulat o makadrowing diha sa ilang papel og mga kasingkasing kon unsaon nga sila makapakita og gugma ngadto sa usa ka higala.

• Niini nga mga kapitulo, si David nahimong hari sa Israel. Makalingaw tingali alang sa imong mga bata ang magpakaaron ingnon nga mahimong hari o reyna. Unsa nga mga balaod ang ilang himoon? Asa sila moadto aron mangayo og panabang? Tabangi ang imong mga bata nga sa dihang si David nagkinahanglan og tabang, siya “nangutana,” o nag-ampo, alang sa mga tubag. Sama pananglit, samtang ikaw nagbasa diha sa 2 Samuel 5:19, 23, dapita ang mga kabataan sa pagpaminaw alang sa pulong nga “nangutana” ug sa pagkyugpos sa ilang mga bukton kon ilang madunggan kini. Ngano nga nagkinahanglan si David sa panabang sa Ginoo sa iyang bag-ong tahas?

• Pagsinultihay sa usag usa mahitungod sa mga panahon sa dihang ikaw nag-ampo alang sa panabang sa Langitnong Amahan. Unsay nahimong kalainan nga anaa siya sa pagtabang kanimo?

• Ang mga hari nga atong gibasa diha sa Daang Tugon tanan dihay mga kasaypanan, ug ang ilang mga gingharian tanan natapos. Apan si Jesukristo usa ka hingpit nga Hari ug maghari hangtod sa kahangtoran. Makahimo ka sa pagtabang sa imong mga bata nga makadiskobre niini pinaagi sa pagbasa nga magdungan kon unsa ang gisulti ni propeta Natan ni Hari David diha sa 2 Samuel 7:16–17. Sa unsa nga paagi nga ang gingharian ni David walay kataposan? Tabangi ang imong mga bata sa pagpangita ug pagbasa sa mga tudling sa kasulatan nga nagtudlo nga si Jesukristo, usa ka kaliwat ni David, mao ang atong Hari, sama sa Lucas 1:32–33; Juan 18:33–37; ug Gipadayag 19:16. Sa unsa nga paagi nga si Jesus lahi gikan sa yutan-ong mga hari? Unsaon nato pagpasidungog si Jesukristo isip atong Mahangturon nga Hari?