2 Mga Hari 2–7

Ang mga milagro nagpakita kanato sa gahom sa Dios. Makatabang kini kanato sa pagbuntog sa mga kalisdanan sa mortalidad—sama sa usa ka yuta nga walay abot nga nagkinahanglan og limpyo nga tubig (tan-awa diha sa 2 Mga Hari 2:19–22) o usa ka nawala nga wasay nga kinahanglan makit-an (tan-awa diha sa 2 Mga Hari 6:4–7). Apan labing importante, ang mga milagro makapabalik kanato ngadto sa Ginoo. Samtang ikaw magbasa diha sa 2 Mga Hari 2–6, hunahunaa ang paglista sa mga milagro nga imong makaplagan, ug pamalandonga ang espirituhanong mga leksiyon nga imong makat-onan gikan sa matag usa.

Mahimo usab nimong itandi ang mga milagro nga gihimo ni Eliseo ngadto sa mga milagro nga gihimo ni Jesukristo (tan-awa diha sa 2 Mga Hari 4:8–37 ug Lucas 7:11–16; 2 Mga Hari 4:42–44 ug Juan 6:1–13; 2 Mga Hari 5:1–15 ug Lucas 17:11–19). Unsa ang gitudlo niini nga mga milagro kanimo mahitungod sa Manluluwas ug sa Iyang mga propeta?

Tan-awa usab diha sa 2 Nephi 26:12–13; 27:23; Moroni 7:35–37; sa seksiyon “Tinguhaa ug laomi ang mga milagro” sa Russell M. Nelson, “Ang Gahom sa Kadasig sa Espirituhanong Paglambo,” Liahona, Mayo 2022, 99–100.

Ang Ginoo midasig ni Eliseo sa pagpanagna sa mga butang nga umaabot—kasagaran, mga butang nga ingon og dili mahitabo. Samtang ikaw nagbasa sa 2 Mga Hari 4:8–17; 7:1–16, paghunahuna mahitungod kon giunsa nimo pagtubag ngadto sa pulong sa Ginoo pinaagi sa Iyang mga propeta karon. Unsa nga mga pagtulun-an, mga panagna, o mga saad ang imong nadungog gikan sa buhi nga mga propeta? Unsa ang imong gibuhat sa paglihok uban sa hugot nga pagtuo kalabot sa ilang mga pulong?

Tan-awa usab diha sa 3 Nephi 29:6; Doktrina ug mga Pakigsaad 1:37–38; “koleksyon sa Mga Pagtulun-an sa mga Presidente”, Librarya sa Ebanghelyo.

Samtang ikaw magbasa sa 2 Mga Hari 5, hunahunaa ang pagtandi sa sanla ni Naaman sa usa ka espirituwal nga hagit nga imong giatubang.

Aduna bay usa ka tawo nga sama sa “gamayng sulugoon nga babaye” sa imong kinabuhi, nga nag-awhag kanimo sa pagpangita og giya mahitungod sa imong hagit gikan sa mga propeta sa Ginoo? (tan-awa diha sa mga bersikulo 2–3, 13).

Unsa ang gidapit sa Ginoo kanimo nga buhaton nga ingon og yano kaayo—sama sa “pagkaligo, ug magpakahinlo”? (bersikulo 13). Unsa kaha ang makapugong kanimo sa pagdawat sa Iyang yano nga mga pagdapit?

Unsaon nimo pagpakita og pagpaubos sama sa gibuhat ni Naaman?

Timan-i kon sa unsang paagi ang kasinatian ni Naaman nakaapekto sa iyang hugot nga pagtuo diha sa Dios sa Israel (tan-awa diha sa bersikulo 15). Unsay imong makat-onan gikan niini?

Tan-awa usab sa Lucas 4:27; 1 Pedro 5:5–7; Alma 37:3–7; Ether 12:27; L. Whitney Clayton, “Unsa gani Iyang Isugo Kaninyo, Buhata Ninyo,” Liahona, Mayo 2017, 97–99; “Naaman and Elisha” (video), Gospel Library.

14:30

Samtang naninguha ka sa pagsunod ni Kristo, gibati mo na ba sukad sama sa batan-ong sulugoon ni Eliseo—gamay ang gidaghanon ug mahadlokon? Handurawa nga ikaw anaa sa iyang lugar samtang ikaw nagbasa sa 2 Mga Hari 6:8–23. Sa unsang paagi kini nga istorya makausab sa paagi sa imong paghunahuna ug pagbati mahitungod sa imong mga pagsulay, sa imong mga responsibilidad, o sa imong mga paningkamot sa pagsunod sa ebanghelyo?

Samtang mamalandong ka, hunahunaa ang mga pulong ni Presidente Henry B. Eyring: “Sama niana nga sulugoon ni Eliseo, adunay mas daghan pa nga uban kanimo kay sa niadtong imong makita nga mibatok kanimo. Ang pipila kinsa nag-uban kanimo mahimo nga dili makita sa imong mortal nga mga mata. Ang Ginoo mosangga kanimo ug usahay mobuhat niini pinaagi sa pagtawag sa uban sa pagbarog uban kanimo” (“O Kamo Nga Anaa sa Pag-alagad,” Liahona, Nob. 2008, 58).

Hunahunaa ang paghimo og lista sa “sila nga uban [kanimo]” (bersikulo 16)—mga tawo nga gibutang sa Dios sa imong kinabuhi aron mosuporta kanimo. Mahimo nimo Siyang hangyoon sa pagtabang kanimo sa pag-ila kanila pinaagi sa pag-abli sa imong espirituwal nga mga mata. Siya tingali usab mibutang kanimo diha sa kinabuhi sa uban sa pagtabang kanila. Unsaon nimo pagkuha og kusog ug suporta gikan sa usag usa?

Kanus-a nimo nabati ang suporta nga gihulagway sa Ginoo diha sa Doktrina ug mga Pakigsaad 84:88?

Mahimo usab nimong tun-an ang mensahe ni Sister Michelle D. Craig nga “Mga Mata aron sa Pagtan-aw” (Liahona, Nob. 2020, 15–17). Pangutan-a ang imong kaugalingon, “Unsa ang gusto sa Dios nga akong makita?”

Nagpasabot sa istorya sa 2 Mga Hari 6:8–23, si Elder Ronald A. Rasband miingon: “Kita mahimo nga aduna o walay mga karo sa kalayo nga gipadala aron pagwagtang sa atong mga kahadlok ug pagbuntog sa atong mga demonyo, apan tataw ang leksiyon. Ang Ginoo nag-uban kanato, naghunahuna kanato ug nagpanalangin kanato sa mga paagi nga Siya lamang ang makabuhat. Ang pag-ampo makatawag sa kalig-on ug sa pagpadayag nga atong gikinahanglan aron sa pagsentro sa atong mga hunahuna diha ni Jesukristo ug sa Iyang maulaong sakripisyo. Ang Ginoo nahibalo nga usahay kita mobati og kahadlok. Nakasulay na ako niana ug kamo usab. … Niini nga Simbahan tingali kita diyutay ang gidaghanon sa paagi ang kalibotan nag-ihap sa impluwensya, apan kon atong ablihan ang atong espirituhanong mga mata, “sila nga ania uban kanato, labing daghan kay kanila nga anaa kanila’ [2 Mga Hari 6:16]” (“Ayaw Kabalaka,” Liahona, Nob. 2018, 18, 19). Unsaon nimo paggamit kini nga mga pulong aron sa pagtabang sa usa ka tawo kinsa mibati og kabalaka o kahadlok?

Tan-awa usab sa “Pinalangga nga mga Anak, ang Dios Duol Kaninyo,” Mga Himno, nu. 50.

• Human sa pagtabang sa imong mga bata sa pagsabot kon unsa ang milagro, dapita sila sa paglista og daghang mga pananglitan sa mga milagro kutob sa ilang mahimo. Ang mga hulagway diha sa Libro sa mga Hulagway sa Ebanghelyo o Dali, Sunod Kanako makatabang. Dayon makapangita sila og mga milagro diha sa 2 Mga Hari 4:1–7, 14–17, 32–35, 38–44. Unsa ang gitudlo niini nga mga bersikulo mahitungod sa Langitnong Amahan?

• Ikaw ug ang imong mga bata makahisgot mahitungod kon giunsa sa Dios pagpakita sa Iyang gugma pinaagi sa mga milagro. Mahimo usab kamo manganta og dungan sa usa ka awit sama sa “Mabinationg Gugma sa Dios” (Librarya sa Ebanghelyo).

• Tabangi ang imong mga bata nga makat-on sa istorya diha sa 2 Mga Hari 5:1–3, 9–14. Hunahunaa ang paggamit sa “Eliseo Nag-ayo ni Naaman” (diha sa Mga Istorya sa Daang Tugon, 134–37) o ang hulagway ni Naaman sa latid niini nga semana. Ngano nga si Naaman dili buot nga maligo sa Suba sa Jordan, bisan tuod og gisultihan siya ni Eliseo nga kini moayo sa iyang sakit? Giunsa pagpanalangin si Naaman sa dihang misunod siya sa mga panudlo ni Eliseo? Mahimo ninyong ipakigbahin sa usag usa ang mga kasinatian sa dihang misunod kamo sa Ginoo, bisan og dili kamo sigurado nga kamo gusto nga mosunod.

  

  1:52

• Mahimo usab nimong hatagan og gibug-aton ang 2 Mga Hari 5:13, diin ang mga sulugoon ni Naaman mitabang kaniya sa paghukom nga mosunod ni propeta Eliseo. Ang imong mga bata makahisgot dayon mahitungod sa mga paagi sila makatabang sa ilang mga higala o mga sakop sa pamilya sa pagpaminaw ug sa pagsunod sa propeta.

• Ikaw ug ang imong mga bata makahanduraw nga gilibotan kamo sa kasundalohan nga may mga espada, kabayo, ug mga karo. Unsay inyong bation? Unsay inyong buhaton? Ang imong mga bata niana makapiyong sa ilang mga mata samtang ikaw nagbasa diha sa 2 Mga Hari 6:16–17 ngadto kanila. (Tan-awa usab ang “Eliseo ug ang Kasundalohan sa Ginoo,” diha sa Mga Istorya sa Daang Tugon, 138–39, o ang hulagway sa kataposan sa kini nga latid.) Kon ikaw moabot sa mga pulong “bukha ang iyang mga mata” (bersikulo 17), hangyoa ang mga kabataan sa pagbuka sa ilang mga mata. Paghisgot mahitungod sa unsay nakita sa sulugoon. Ipakigbahin uban sa imong mga bata ang mga paagi ikaw mibati nga ang Ginoo nag-uban kanimo sa panahon sa imong mga hagit, bisan kon ikaw ingon og nag-inusara.

  

  1:9