Job 1–3; 12–14; 19; 21–24; 38–40; 42

Ang pambukas nga mga kapitulo sa Job naghatag og gibug-aton, sa balaknong paagi, sa tahas ni Satanas isip atong kaaway o tig-akusar; kini dili mohulagway sa aktuwal nga inter-aksyon tali sa Dios ug ni Satanas. Samtang kamo nagbasa sa unsay gisulti ni Satanas mahitungod ni Job (tan-awa sa Job 1:9–11; 2:4–5), mahimo ninyong pangutan-on ang inyong kaugalingon, “Nganong ako nagpabilin nga matinud-anon ngadto sa Dios?” Nganong mahimong kuyaw nga mosunod sa Ginoo tungod lamang sa rason nga gisugyot ni Satanas?

Unsa ang nakapadayeg kanimo mahitungod sa mga tubag ni Job ngadto sa iyang mga husay? (tan-awa sa Job 1:20–22; 2:9–10).

Ang mga higala ni Job misugyot nga gisilotan siya sa Dios (tan-awa sa Job 4–5; 8; 11). Unsa nga mga problema ang inyong nakita dinhi niini nga ideya? Basaha ang tubag ni Job diha sa mga kapitulo 12–13. Unsa ang nahibaloan ni Job mahitungod sa Dios nga naghimo kaniya sa pagpadayon sa pagsalig? Unsa ang imong nahibaloan mahitungod sa Dios nga nagtabang kanimo sa pagsagubang sa mga hagit?

Usahay atong makat-unan ang labing importanting mga kamatuoran atol sa atong labing malisod nga mga panahon. Pamalandonga ang mga pagsulay nga gihulagway ni Job diha sa Job 19:1–22 ug ang mga kamatuoran nga iyang gimantala diha sa mga bersikulo 23–27. Giunsa ninyo pagkahibalo nga ang imong Manunubos buhi? Unsa nga kalainan ang mahimo niini nga kahibalo diha sa inyong kinabuhi?

Hunahunaa ang pagkanta o pagpaminaw ngadto sa usa ka himno mahitungod ni Jesukristo, sama sa “Buhi ang Manunubos Ko, Niini Nasayud Ako” (Mga Himno, nu.80). Unsa nga mga pulong gikan niini nga himno nga nagpahayag sa inyong mga pagbati mahitungod Kaniya?

Tan-awa usab sa Doktrina ug mga Pakigsaad 121:1–12; 122.

Sa Job 21–24, inyong mabasa ang usa ka debate tali ni Job ug sa iyang mga higala. Sa kinauyokan niini nga debate mao ang usa ka pangutana nga daghang mga tawo ang nangutana: Nganong ang matarong nga mga tawo usahay nag-antos?

Bisan tuod og kita wala sa tanang mga tubag, diha sa gipahiuli nga ebanghelyo ni Jesukristo, kita adunay pipila ka kamatuoran nga makatabang kanato sa pagsabot sa kalisdanan ug pag-antos. Sa ubos mao ang mga kasulatan sa ulahing mga adlaw nga naglangkob sa pipila niini nga mga kamatuoran. Unsay gitudlo niini nga mga kasulatan kaninyo mahitungod sa Langitnong Amahan ug sa Iyang plano?

• 2 Nephi 2:11–13

• Mosiah 23:21–23; 24:10–16

• Ether 12:27

• Doktrina ug mga Pakigsaad 58:3–5

• Abraham 3:22–26

Makabasa usab kamo sa kang Presidente Spencer W. Kimball nga mga pagtulun-an mahitungod sa kalisdanan diha sa “Trahedya o Kapalaran?” (Mga Pagtulun-an sa mga Presidente sa Simbahan: Spencer W. Kimball [2011], 13–26).

Pinasubay sa unsay inyong natun-an, unsaon kaha ninyo pagtubag ang usa ka pangutana sama sa “Nganong ang Dios nagtugot sa matarong nga mga tawo nga mag-antos?”

Nahigawad sa mga pasangil sa iyang mga higala (tan-awa sa Job 16:1–5; 19:1–3), si Job pabalik-balik nga nangutana sa Dios nganong kinahanglan siyang mag-antos pag-ayo (tan-awa sa Job 19:6–7; 23:1–9; 31). Ang Ginoo wala mohatag og usa ka tin-aw nga rason diha sa basahon ni Job. Apan siya mitudlo og usa ka importanting mensahe diha sa mga kapitulo 38–40. Unsaon nimo pag-summarize niana nga mensahe? Sama pananglit, unsay inyong nakat-onan gikan sa mga pangutana sa Ginoo diha sa Job 38:1–7, 18–24?

Inyong mamatikdan nga ang Ginoo namulong ngadto ni Job mahitungod sa pipila sa Iyang nilalang ug ubang gamhanang mga buhat (tan-awa sa Job 38–39). Mahimo ninyong tan-awon ang pipila niadtong mga nilalang (o mga hulagway niini). Giunsa niining mga butanga pagtabang kaninyo sa paghunahuna og lahi mahitungod sa Dios? mahitungod sa inyong mga pagsulay? Giunsa niini pag-usab ang panan-awon ni Job? (tan-awa sa Job 42:1–6; tan-awa usab sa Moises 1:8–10).

Aniay duha ka mensahe sa kinatibuk-ang komperensiya nga makatabang sa pag-usab sa atong panan-awon: Tamara W. Runia, “Pagtan-aw sa Pamilya sa Dios pinaagi sa Kinatibuk-ang Lente” (Liahona, Nob. 2023, 62–69); Russell M. Nelson, “Paghunahuna og Celestial!” (Liahona, Nob. 2023, 117–20). Sa bisan hain nga mensahe, pangita og usa ka butang nga inyong gusto nga mahinumdoman sa sunod higayon nga ang inyong mga pagsulay ingon og hilabihan sa kadaghan. Unsaon ninyo sa pagpahinumdom ang inyong kaugalingon sa unsay inyong nakat-onan?

• Awhaga ang inyong mga bata sa pagsulti kaninyo kon unsay ilang nahibaloan mahitungod ni Job. Kon sila nagkinahanglan og tabang, kamo makatudlo kanila ngadto sa Job 1:1, 13–22; 2:7–10 o ngadto sa “Job” (sa Mga Istorya sa Daang Tugon, 145–47). Sa unsang paagi gitubag ni Job ang mga hagit? (tan-awa sa Job 1:21; 2:10).

  

  1:55

• Si Job matinud-anon diha sa iyang mga hagit tungod sa unsay iyang nahibaloan mahitungod sa Ginoo. Tingali kamo ug ang inyong mga bata makatan-aw sa mga hulagway ni Jesukristo nga nakigbinayloay og istorya sa uban (sama sa usa nga anaa sa ubos o mga hulagway diha sa Libro sa mga Hulagway sa Ebanghelyo). Paghisgot mahitungod sa unsay inyong nahibaloan mahitungod Kaniya ug sama Siya sa unsa. Aniaa ang pipila ka mga bersikulo nga nagpakita kon unsay nahibaloan ni Job mahitungod sa Ginoo: Job 12:10, 13, 16; 19:25–27. Nganong bililhon nga mahibalo niining mga butanga mahitungod Kaniya?

• Si Job nangutana og usa ka importanting pangutana diha sa Job 14:14. Tingali kamo ug ang inyong mga bata makapulipuli sa pagpakigbahin kon unsaon ninyo pagtubag si Job. Kamo makapangita og mga ideya diha sa Alma 11:42-44, diha sa video “In a Coming Day” (Gospel Library), o sa usa ka awit mahitungod sa Pagkabanhaw, sama sa “Nabuhi ba Gayud Pag-usab si Jesus?” (Songbook sa mga Bata, 32).

1:11

• Sa dihang si Job nagmagul-anon, ang iyang mga higala miingon nga ang Dios nagsilot kaniya tungod kay siya nakasala (tan-awa sa Job 22:5). Kon kita mga higala pa ni Job, unsaon nato pagpaninguha sa pagtabang kaniya? Sa unsang paagi ang atong mga pulong makatabang sa uban kon sila nagmagul-anon (tan-awa sa Job 16:5). Hunahunaa ang pagpakita og usa o daghan pa sa mga hulagway dinhi niini nga latid samtang kamo naghisgot niini nga mga pangutana.

• Hunahunaa ang paghangyo sa inyong mga bata sa paglista og pipila ka kalidad sa usa ka maayong higala ug sa paghingalan og usa ka higala kinsa aduna niini nga mga kalidad. Dayon kamo makatan-aw og usa ka hulagway ni Jesukristo. Sa unsa nga mga paagi si Jesus usa ka maayong higala sa matag usa kanato? Mahimo kang maghunahuna og usa ka tawo kinsa nagsinati og usa ka malisod nga panahon. Pagplano kon unsaon ninyo nga mahimong usa ka Kristohanong higala ngadto kanila.

• Human sa pagbasa sa Job 19:23–27, kamo ug ang inyong mga bata makahisgot mahitungod kon unsaon ninyo nga mahibalo nga ang atong Manunubos buhi. Mahimong magtambayayong kamo sa pagbutang sa inyong pagpamatuod (o mga drowing sa Manluluwas) diha sa usa ka basahon, (tan-awa sa bersikulo 23).

• Makahimo usab kamo sa pagpanganta og usa ka awit nga nagpamatuod sa Manluluwas, sama sa “Buhi Ang Manunubos Ko, Niini Nasayud Ako” (Mga Himno, nu. 80). Pakigbahin og mga hugpong sa mga pulong gikan sa himno nga naglig-on sa inyong hugot nga pagtuo diha Kaniya. Nganong importante nga mahibalo nga si Jesukristo buhi?