Pagbasa og Balak diha sa Daang Tugon

Una, kini mahimong motabang kaninyo sa pagkahibalo nga ang Hebreohanon nga balak sa Daang Tugon wala ipasikad sa garay, sama sa pipila sa ubang matang sa balak. Ug bisan kon ang garay, paggamit sa pulong, ug pagbalik-balik sa mga tingog mga komon nga bahin sa karaan nga Hebreohanon nga balak, kasagaran kining mga butanga mawala diha sa paghubad. Usa ka bahin nga inyong mabantayan, hinoon, mao ang pagbalik-balik sa mga hunahuna o mga ideya, usahay gitawag og “pagkaangid.” Ania ang usa ka yanong pananglitan gikan sa Isaias:

Salmo 29 adunay daghang linya nga kaangid—sama pananglit:

Ug aniay usa ka higayon diin ang pagkasayod nga ang ikaduhang linya kaangid sa nag-una naghimo sa unang tudling nga mas sayon sabton:

Dinhi niini nga mga pananglitan, gibalik sa magbabalak ang ideya nga may gamay nga mga kalainan. Kini nga pamaagi makahatag og gibug-aton sa gibalik nga ideya ug gigamit ang mga kalainan aron mas hingpit kini nga mahulagway o mapalambo.

Sa ubang mga sitwasyon, ang duha ka kaangid nga kapahayag migamit og susama nga pinulongan aron sa pagpahayag og managlahi nga mga ideya, sama niini nga ehemplo:

Kini nga pagkaangid wala mahitabo nga aksidente. Gituyo kini sa mga tigsulat. Mitabang kini kanila sa pagpahayag og espirituhanong mga pagbati o mga kamatuoran nga adunay gahom ug kaanindot. Busa kon makamatikod kamo og pagkaangid sa Daang Tugon nga sinulat, pangutan-a ang inyong kaugalingon kon sa unsang paagi kini nagtabang kaninyo sa pagsabot sa mensahe sa tigsulat. Sama pananglit, unsa kaha ang kanunay nga gipaningkamotang isulti ni Isaias pinaagi sa pakiglabot sa “kusog” ngadto sa “matahom nga mga bisti” ug sa “Zion” ngadto sa “Jerusalem”? (Isaias 52:1). Unsa ang atong matag-an mahitungod sa hugpong sa mga pulong nga “tubag nga malumo” kon nasayod kita nga ang mga “pulong nga mahait” mao ang kaatbang niini? (Mga Proverbio 15:1).

Ang pipila ka tawo nagtandi sa pagbasa og balak ngadto sa pakighimamat sa usa ka bag-ong higala. Ang pagbasa og balak sa Daang Tugon, niana, mahimong sama sa pakighimamat og usa ka tawo gikan sa usa ka layo nga nasod ug langyaw ang kultura kinsa nagsulti og usa ka lahi nga pinulongan gikan kanato—ug kinsa nahitabo nga labaw sa duha ka libo ka tuig ang panuigon. Kini nga tawo tingali mosulti og mga butang nga dili nato masabtan sa sinugdanan, apan wala kana magpasabot nga wala silay bililhong ikasulti. Kinahanglan lamang nato nga mogahin og panahon uban nila, maningkamot sa pagsabot sa mga butang sumala sa ilang panglantaw. Basin makaplagan nato nga diha sa atong mga kasingkasing, kita sa tinuod nagkasinabtanay sa usag usa og maayo kaayo. Ug kon kita magpakita og pailub ug kalooy, ang atong bag-ong kaila sa kadugayan mahimong usa ka minahal nga higala.

Busa sa unang higayon nga mobasa ka og tudling gikan sa Isaias, pananglitan, hunahunaa kini nga imong unang pagpaila ngadto sa bag-ong kahimamat. Pangutan-a ang imong kaugalingon, “Unsa ang akong kinatibuk-an nga pagbati?” Sa unsang paagi ang tudling naghimo ninyong mobati—bisan og wala kamo makasabot sa matag pulong? Dayon basaha kini pag-usab, sa makadaghang higayon kon mahimo. Hunahunaa ang pagbasa niini og kusog; ang pipila ka tawo makakaplag og dugang nga kahulogan niana nga paagi. Bantayi ang piho nga mga pulong nga gigamit ni Isaias, ilabi na ang mga pulong nga nagpintal og hulagway diha sa inyong hunahuna. Giunsa niadtong mga hulagway paghimo kaninyo nga mobati? Unsa ang gisugyot niini mahitungod sa mga pagbati ni Isaias? Kon mas magtuon kamo sa mga pulong niini nga mga tigsulat sa Daang Tugon, mas mahibaloan ninyo nga gituyo nila pagpili ang ilang mga pulong ug mga pamaagi aron sa pagpahayag og lawom nga espirituhanong mensahe.

Ang mga balak mahimong talagsaong mga higala tungod kay makatabang kini kanato sa pagsabot sa atong mga pagbati ug mga kasinatian. Ang mga balak sa Daang Tugon hilabihan ka bililhon tungod kay makatabang kini kanato sa pagsabot sa atong labing importante nga mga pagbati ug mga kasinatian—kadtong konektado sa atong relasyon sa Dios.

Samtang magtuon kamo sa balak diha sa Daang Tugon, hinumdomi nga ang pagtuon sa kasulatan labing bililhon kon mogiya kini kanato ngadto ni Jesukristo. Pangita og mga simbolo, mga kahulagwayan, ug mga kamatuoran nga naglig-on sa imong hugot nga pagtuo diha Kaniya. Paminaw sa mga pag-aghat sa Espiritu Santo samtang kamo magtuon.