Mga Salmo 1–2; 8; 19–33; 40; 46

Samtang inyong basahon ang Mga Salmo, inyo tingali nga mamatikdan unsa ka sagad ang mga tigsulat nagpahayag og kahadlok, kaguol, o kabalaka. Ang ingon nga mga pagbati normal, bisan sa mga tawo nga hugot ang pagtuo. Apan unsay nakahimo sa Mga Salmo nga makadasig mao nga kini usab nagtanyag og makadasig nga mga solusyon, lakip ang hingpit nga pagsalig diha sa Ginoo. Samtang kamo nagbasa sa Mga Salmo 1; 23; 26–28; 46, pagsulat:

• Mga pagdapit nga mosalig sa Ginoo.

• Mga pulong nga naghulagway Kaniya.

• Mga pulong nga naghulagway sa kalinaw, kalig-on, ug ubang mga panalangin nga Siya naghatag.

• Mga pulong nga naghulagway sa mga tawo kinsa nagsalig Kaniya.

Bantayi usab ang tin-aw nga hulagway ug mga simbolo nga ang Mga Salmo naggamit sa pagtudlo mahitungod sa Manluluwas. Pananglitan, sa Salmo 23, unsa ang mga hugpong sa mga pulong sama sa “nagapahigda sa mga sibsiban nga malunhaw” o “mga tubig nga malinaw” (bersikulo 2) nagpahinumdom? Unsa ang gisimbolo sa makahupay nga “sungkod” ug “baras” (bersikulo 4)? Unsa kaha ang gipasabot sa ang among “kopa” (bersikulo 5) nagaawas?

Pipila sa mga salmo nagpunting ngadto sa mortal nga kinabuhi ni Jesukristo. Ang mga Kristiyanos sa mga panahon sa Bag-ong Tugon nakakita usab niini nga koneksiyon. Hunahunaa ang pagbasa sa mosunod nga mga pakisayran sa kasulatan. Pangita og mga koneksiyon tali sa mga pulong dinhi niini nga mga salmo ug sa kinabuhi sa Manluluwas:

• Salmo 2:1–3 ug Mga Buhat 4:24–28

• Salmo 2:7 ug Mga Buhat 13:30–33

• Salmo 22:1 ug Mateo 27:45–46

• Salmo 22:7–8 ug Mateo 27:39–43

• Salmo 22:16 ug Lucas 23:32–33

• Salmo 22:18 ug Mateo 27:35

• Salmo 31:5 ug Lucas 23:46

Unsay inyong nakat-onan gikan sa pagtuon niini nga mga koneksiyon? Unsa nga eskriptohanon nga mga panagna ug mga saad ang wala pa mangatuman? Unsay nakita ninyo niini nga mga saad nga naghatag kaninyo og paglaom alang sa umaabot?

Ang pagbasa sa Mga Salmo 8; 19; 33 mahimong modasig kaninyo sa paghunahuna sa daghang talagsaong mga nilalang sa Ginoo. Hatagi og pagtagad ang inyong mga pagbati samtang inyong buhaton. Mahimo usab nga gusto ninyong mokanta o mamalandong sa mga pulong sa usa ka awit kalabot ngadto niini nga mga salmo, sama sa “Gamhanan Ka” (Mga Himno, 45). Sa unsang paagi ang mga nilalang sa Ginoo “nagapahayag sa himaya sa Dios” nganha kaninyo? (Salmo 19:1).

Ania ang pipila sa ubang himno nga nadasig pinaagi sa Mga Salmo:

• Salmo 23: “Ang Dios ang akong Magbalantay” (Mga Himno, nu. 61)

• Mga Salmo 23:6; 150: “Daygon ang Dios, nga Gamhanan” (Mga Himno, nu. 39)

• Salmo 26:8: “We Love Thy House, O God” (Hymns, no. 247)

• Salmo 27:1: “Ang Dios Kahayag Ko” (Mga Himno, nu. 46)

• Mga Salmo 33:1–6; 95:1–6: “Sa Katahum sa Yuta” (Mga Himno, nu. 47)

• Salmo 37:3–9: “Akong Kalag Magmalinawon” (Mga Himno, nu. 70)

• Salmo 148: “Tanan nga Nilalang sa Atong Dios” (Mga Himno, nu. 31)

Diha sa Mga Salmo, ang mga pulong sama sa pagpamatuod, mga balaod, sugo, ug mga paghukom magpasabot ngadto sa pulong sa Ginoo. Timan-i kana samtang magbasa kamo sa Salmo 19:7–11. Unsa ang gisugyot niini nga mga bersikulo kaninyo mahitungod sa pulong sa Ginoo? Unsa ang gitudlo sa Salmo 29 kaninyo mahitungod sa Iyang tingog? Sa inyong kasinatian, sa unsang paagi ang pulong o tingog sa Ginoo mitakdo niini nga mga paghulagway?

Tungod kay ang templo sa Jerusalem gitukod diha sa usa ka bungtod, ang hugpong sa mga pulong nga “bungtod sa Ginoo” (Salmo 24:3) mahimong nagpasabot ngadto sa templo o sa presensya sa Dios. Unsa ang gidugang niini nganha sa imong pagsabot sa Salmo 24? Unsa ang gipasabot niini diha kanimo sa pagbaton og “malinis og mga kamot ug may usa ka putli nga kasingkasing”? (bersikulo 4). Samtang kamo nagbasa sa Mga Salmo 26–27, unsa pa ang inyong nakat-onan mahitungod sa balay sa Ginoo?

Usahay, kita tingali mawad-an og kadasig sa pagkadungog nga kita kinahanglan nga mahimong putli sa pagsulod sa presensya sa Dios. Hinoon, tanan kita nanlimbasog, ug walay usa kanato nga hingpit. Unsa nga paglaom ang inyong nakaplagan diha sa mensahe ni Elder David A. Bednar “Limpyo nga mga Kamot ug Putli nga Kasingkasing”? (Liahona, Nob. 2007, 80–83). Unsaon ninyo paggamit ang iyang mensahe sa pagtabang sa usa ka tawo kinsa mibati nga nasanapan sa pagkagusto nga mahimong hingpit? Hunahunaa kon unsaon ninyo nga makadawat sa tabang sa Manluluwas sa inyong mga paningkamot sa pagbaton og “limpyo nga mga kamot, ug usa ka putli nga kasingkasing.”

Tan-awa usab sa Bradley R. Wilcox, “Ang Pagkatakos Dili ang PagkawalayTatsa,” Liahona, Nob. 2021, 61–67.

• Hunahunaa ang pagsulat sa Ang Ginoo mao … Dapita ang inyong mga bata sa pagpangita alang sa mga paagi sa pagkompleto niana nga kapahayag naggamit sa mga kasulatan sama niini: Mga Salmo 23:1; 27:1; 28:1; 28:7; 32:7; 46:1. Unsa ang gitudlo kanato niini nga mga kasulatan mahitungod kon giunsa sa Ginoo pagtabang kanato?

• Kamo makahisgot uban sa inyong mga bata kon unsay gikinahanglan sa nating karnero nga mahimong luwas ug himsog. Dayon, samtang basahon ninyo og dungan ang Salmo 23, tabangi ang inyong mga bata sa pagtandi kon unsay buhaton sa magbalantay sa nating karnero ngadto sa unsay buhaton ni Jesus alang kanato. Unsa ang atong gikinahanglan aron luwas ug himsog sa espirituhanong paagi? Panganta og dungan sa usa ka awit nga makahatag kanila og mga ideya, sama sa “Gibati Ko ang Gugma sa Akong Manluluwas” (Songbook sa mga Bata, 30).

• Samtang kamo nagbasa sa Salmo 24:3 og dungan, ang inyong mga bata makapangita alang sa mga pulong nga nagpahinumdom kanila sa templo. Makatan-aw usab sila sa usa ka hulagway sa usa ka templo. Dayon makabasa kamo og dungan sa bersikulo 4 sa pagkat-on kon kinsa ang makasulod sa templo. Kamo makahisgot mahitungod sa unsaon nga mahugaw ang mga kamot ug unsaon nato sa paglimpyo niini. Unsaon nato pagkahugaw sa espirituhanong paagi? Unsaon sa Manluluwas pagtabang kanato nga malimpyo sa espirituhanong paagi?

• Kon kamo adunay gagmay nga mga bata, makadapit kamo kanila sa pagpakaaron-ingnon nga naghilak samtang kamo nagbasa gikan sa Salmo 30:5, “Ang paghilak mopabilin sa kagabhion.” Dayon hangyoa sila sa pagpahayag og kalipay samtang inyong basahon, “Apan ang kalipay moabut sa kabuntagon.” Balika kini nga hugpong sa mga pulong sa pipila ka higayon.

• Pagpakita og usa ka hulagway sa Manluluwas, ug sultihi ang inyong mga bata unsay Iyang nabuhat alang kaninyo nga nagdala kaninyo og kalipay. Makahatag usab kamo sa matag bata og turno sa paggunit sa hulagway ug sa pagpakigbahin sa unsay nabuhat ni Jesus nga nagdala kanila og kalipay.

• Tabangi ang inyong mga bata sa pagmemorya sa unang linya gikan sa Salmo 46:10: Humilom kamo, ug ilhon ninyo nga Ako mao ang Dios.” Unsay ipasabot sa “humilom kamo”? Tingali kamo makagahin og pipila ka panahon sa pagbansay og paghilom. Makahimo usab kamo sa pagpakigbahin ngadto sa usag usa og mga kasinatian kon ang “pagpakahilom” milig-on sa inyong relasyon ngadto sa Dios. Tabangi ang inyong mga bata sa paghunahuna og mga higayon sa panahon sa adlaw nga sila makahimo sa “paghilom” aron bation ang kaduol ngadto sa Langitnong Amahan.