Salamo 49–51 ; 61–66 ; 69–72 ; 77–78 ; 85–86

E poro’i i roto i te Salamo 49 nō « tei ha’eha’a ’e tei teitei, ’o tei veve ’e te ta’ata tao’a rahi ato’a ra » (’īrava 2). Ia ’outou e aha terā poro’i ? I tō ’outou mana’o, e aha tā te Salamo 62:5–12 e ’āpiti nei i terā poro’i ?

Pēnei a’e e fa’auru teie mau salamo ia ’outou ’ia feruri i te huru tātou e fa’ahemahia nei ’ia ti’aturi i te hō’ē mea ’ē i te Atua ’ei tāra’ehara (hi’o Salamo 49:6–7). E mea nāhea tō ’outou orara’a i te fa’auruhia e tō ’outou ’itera’a pāpū ē « Nā te Atua e fa’aora i [tō ’outou] vārua i te pūai o hade » ? (Salamo 49:15).

’Ua pāpa’i te ari’i Davida i te Salamo 51 i muri a’e i tōna ’itera’a ē tītau-hope-hia te fa’a’orera’a hara nōna—te mea e tītau-ato’a-hia nō tātou pā’āto’a. E aha te mau ’īrava e fa’a’ite nei i tō ’outou mau mana’o ? E aha tā ’outou e ’ite ra i roto i teie salamo ’o tē fa’atupu i te tīa’ira’a i roto ia ’outou nō te fa’a’orera’a hara ?

E nehenehe ato’a ’outou e ’imi i roto i te Salamo 51 i te mau mana’o nō ni’a i te aura’a o te tātarahapa. ’A tapura mai i te mau mea tei ’itehia ia ’outou. ’A hi’o mai te mea e nehenehe ’outou e tu’u i roto i tā ’outou tāpura nā roto i te ’imira’a i roto i te a’ora’a a te peresideni Russell M. Nelson « E nehenehe tātou e rave maita’i a’e ’e e ha’amaita’i ia tātou » (Liahona, Mē 2019, 67–69).

E nāhea ïa ’outou i te fa’ata’a mai i tō ’outou mana’o i te fa’ari’ira’a i te fa’a’orera’a hara nā roto mai i te Mesia ? Mai te mea e hina’aro ’outou i te tauturu nō te fa’ata’a i tō ’outou mau mana’o, e nehenehe e hi’o i roto i te Salamo 51:1–2, 7–12 ; 85:2–9. E mea au nā te tahi mau ta’ata ’ia pāpa’i i te hōho’a ’aore rā ’ia ’imi i te mau hōho’a nō te fa’a’ite i te mau mana’o i tupu i roto ia rātou ; e nehenehe ’outou e tāmata i te reira. E nehenehe ato’a ’outou e hīmene ’aore rā e fa’aro’o i te hō’ē hīmene nō ni’a i te Fa’aora, mai te hīmene ra « Tē māere nei au » (Te mau hīmene, N°111).

Nō te tātarahapa, tītauhia te fa’aro’o, ’eiaha te fa’aro’o noa e nehenehe Iesu Mesia e tāmā ia tātou, te fa’aro’o ato’a rā, e nā reira mau ’oia. E aha tā ’outou e ’ite ra i roto i te Salamo 86:5, 13, 15 ’o tē tauturu i te fa’a’ite mai ē, e nehenehe te Fa’aora e fa’a’ore i te hapa ’e e ti’a roa ato’a iāna ’ia nā reira ?

Hi’o ato’a Alama 36 ; Peter F. Meurs, « ’Ua ti’a iāna e fa’aora iā’u ! », Liahona, Mē 2023, 39–41.

’A feruri e mea nāhea i te noa’ara’a mai tō ’outou ’itera’a pāpū nō Iesu Mesia ’e nō tōna mana tāra’ehara. I muri iho, ’ia tuatāpapa ’outou i te Salamo 51:13–15 ; 66:5–20 ; 71:15–24, ’a feruri i te rāve’a nō te tītau manihini i te ta’ata ’ia « haere mai e hi’o i te mau ’ohipa a te Atua » (Salamo 66:5). Mai te mea e « fa’a’ite [’outou] i te mea tā [te Fatu] i rave nō tō [’outou vairua] » (Salamo 66:16), e aha tā ’outou e parau ?

E aha te aura’a nō ’outou terā parau ē « e parau tā’u vaha i te parauti’a [nāna] ra ē ru’i noa atu » ? (Salamo 71:24).

Hi’o ato’a Alama 26.

E rave rahi salamo e fa’ata’a nei e aha te huru ’ia ātea i te Atua ’e ’ia hina’aro onoono i tāna tauturu (hi’o Salamo 63:1, 8 ; 69:1–8, 18–21 ; 77:1–9). E aha tā ’outou e ’ite nei i roto i te Salamo 63 ; 69 ; 77–78, tei tāmarū i te ’ā’au o te mau tāparau salamo ?

’Ia hepohepo ana’e ’outou, nāhea te « [ha’amana’ora’a] i te mau ’ohipa a te Fatu » ’e i tāna « mau ’ohipa i rave i tahito ra », i te tauturu ia ’outou ? (Salamo 77:11). Tē vai ra te tahi o te reira mau ’ohipa ta’a ’ē i roto i te Salamo 78. ’A tai’o ai ’outou i te reira, ’a feruri e aha tē tauturu ia ’outou ’ia « ti’aturi […] i te Atua » (’īrava 7).

• Nō te tauturu i tā ’outou mau tamari’i ’ia ’ite i te mau parau mau nō ni’a i te tātarahapa i roto i te Salamo 51, ’a pāpa’i hōho’a i te hō’ē māfatu rahi. I muri iho e nehenehe e tauturu i tā ’outou mau tamari’i ’ia pāpa’i i roto i te māfatu i te mau mea ’ino tā Sātane e fa’ahema nei ia tātou ’ia rave. Nāhea tātou i te fa’ahaere i teie mau mea i rāpae i tō tātou ’ā’au ? ’A ani i te mau tamari’i ’ia ’imi i te mau ta’o « ’ā’au » i roto i te Salamo 51:10, 17. ’A mātutu i te mea tā teie mau ’īrava e ha’api’i nei nō ni’a i te tātarahapa. ’A vaiiho i tā ’outou mau tamari’i ’ia tūmā i te mau ta’o i roto i te ’ā’au ’e ’ia pāpa’i i te mau ta’o ’āpī ’o tē fa’ata’a nei i te mau rāve’a e taui ai Iesu ia tātou ’ia tātarahapa ana’e tātou.

• E hina’aro paha ’outou e tauturu i tā ’outou mau tamari’i ’ia ’ite i te aura’a nō te parau « te ’ā’au paruparu ra ’e te ’oto ra » (Salamo 51:17). E nehenehe rātou e tūpararī i te hō’ē ’apu pa’ari, mai te huero moa ’aore rā te ’autera’a, te tahi i muri i te tahi. E nehenehe e tauturu ia rātou ’ia fa’aau i te ’apu pa’ari i te mau mea e fa’aātea nei ia tātou i te here o tō tātou Metua i te ao ra. Nāhea tātou e ha’amāhorahora ai i tō tātou ’ā’au iāna ?

• E nehenehe ato’a ’outou e hi’o ’āmui i te hō’ē hōho’a o te Fa’aora ’e e ani i tā ’outou mau tamari’i e aha te mau ta’o tā rātou e fa’a’ohipa nō te fa’ata’a i tōna hīro’a. ’A ani ia rātou ’ia ’imi i te mau ta’o e fa’ata’a i tōna hīro’a i roto i te Salamo 86:5, 13, 15. Nō te aha e mea faufaʼa ’ia ʼite i teie mau mea nō ni’a iāna ?

• E au paha tā ’outou mau tamari’i ’ia pāpa’i hōho’a i te mau tāpa’o i roto i te Salamo 61:2–3. I te aha Iesu Mesia e hoho’a ai i « te mato » (’īrava 2), i te « ha’apūra’a » ’e i te « pare ’eta’eta i te ’enemi » ? (’īrava 3).

• ’A ani i tā ’outou mau tamari’i ’ia fa’a’ite mai i tā rātou mau ’ā’amu au roa a’e i roto i te mau pāpa’ira’a mo’a (e nehenehe te Buka hōho’a nō te ’evanelia e tauturu atu). E aha tā teie mau ’ā’amu e ha’api’i mai nei ia tātou nō ni’a i te Fatu ? E nehenehe ’outou e tai’o ’āmui i te Salamo 66:16 ’e e pāhono i te uira’a « E aha tā te Fatu i rave nō tō’u vairua » ?

• ’Ia tai’o ’āmui ’outou i te Salamo 77:11 ; 78:6–7 e nehenehe ’outou e fa’a’ite i te tahi ’e te tahi nāhea ’outou i te tāmata i te « ha’amana’o i te ’ohipa a te Fatu » (Salamo 77:11), tae noa atu i tāna mau ’ohipa i roto i tō ’outou orara’a. Nāhea te ’ōro’a mo’a i te tauturu ia tātou ’ia « ha’amana’o noa » ? (Moroni 4:3 ; 5:2).

• I muri a’e i te tai’ora’a i te Salamo 71:8 ’e tā ’outou mau tamari’i, ’a ani ia rātou ’ia pāpa’i hōho’a i te hō’ē vaha rahi. ’A ani ia rātou ’ia tauturu mai ’ia fa’a’ī i te vaha i te mau mea e nehenehe e paraparau ia vetahi ’ē nō ni’a ia Iesu Mesia.

• E fa’ahaere ’outou i te hō’ē hōho’a nō Iesu Mesia e ’ati noa a’e te piha. E nehenehe te tamari’i e tāpe’a ra i te hōho’a e parau i te hō’ē mea tāna i ’ite nō ni’a iāna. Nāhea tātou i te tauturu ia vētahi ’e ’ia ’ite i teie mau mea ?

• E au te mau salamo e rave rahi i te hō’ē pure i te Atua. ’A tai’o ai ’outou i te Salamo ’e tā ’outou mau tamari’i, e nehenehe ’outou e fa’a’ite ia rātou i te mau mea tā tātou e nehenehe e fa’a’ohipa nō te paraparau i te mau ta’ata tei te ātea roa, mai te niuniu ’aore rā te hō’ē rata. I muri iho ’a tai’o i te Salamo 86:7. Nāhea tātou i te « ti’aoro » i tō tātou Metua i te ao ra ? Nāhea ʼoia i te pāhono mai ia tātou ?

• E nehenehe ’outou e hīmene ’āmui i te hō’ē hīmene nō ni’a i te pure, mai « Te pure a te hō’ē tamari’i » (Buka hīmene nā te mau tamari’i, 12–13 ; hi’o ato’a Susan H. Porter, « Pure, tei ’ō nei ’oia », Liahona, Mē 2024, 77–79). E parau te tahi i te tahi nō ni’a i te hō’ē taime ’a pāhono mai ai te Atua i tā ’outou mau pure.