Salamo 1–2 ; 8 ; 19–33 ; 40 ; 46

’Ia tai’o ’outou i te Salamo, e ’ite ’outou ē, tē fa’a’ite pinepine nei te mau tāparau i te te mata’u, te ’oto ’e te ahoaho. E tupu iho ā terā mau mana’o, nō te ta’ata fa’aro’o ato’a. Te mea rā e mea fa’auru mau te Salamo, ’oia ho’i, e hōro’a ato’a mai te reira i te mau rāve’a fa’auru, mai te ti’aturi-hope-ra’a i te Fatu. ’Ia tai’o ’outou i te Salamo 1 ; 23 ; 26–28 ; 46, ’a papa’i :

• Te mau tītaura’a manihini ’ia ti’aturi i te Fatu.

• Te mau ta’o e fa’a’ite i tōna huru.

• Te mau ta’o e fa’a’ite i te huru o te hau, te pūai ’e te tahi atu mau ha’amaita’ira’a tāna e hōro’a nei.

• Te mau ta’o e fa’a’ite i te huru o te feiā e ti’aturi nei iāna.

’A hi’o ato’a i te mau hōho’a ’e te mau taipe ’ara’ara’a tā te Salamo e fa’a’ohipa nei nō te ha’api’i i te parau o te Fa’aora. ’Ei hi’ora’a, i roto i te Salamo 23, e aha tā teie mau pereota e ha’amahiti nei i roto i te ferurira’a « tē fa’ata’oto nei ’oia iā’u i te mau ’āua he’euri ra » ’aore rā, « te pape atati’a ra » (’īrava 2) ? E aha te taipe ’o tā te « rā’au » ’e ’o tā te « to’oto’o » fa’anā (’īrava 4) e fa’ahōho’a nei ? E aha te aura’a tē ’ī nei tā tātou « ’āu’a »(’īrava 5) ?

E rave rahi Salamo e fa’ahiti nei i te orara’a tāhuti o Iesu Mesia. ’Ua ’ite ato’a te mau teretetiāno i te tau o te Faufa’a ’Āpī i teie mau tū’atira’a. E nehenehe e tai’o i te mau fa’ahorora’a pāpa’ira’a mo’a i muri nei. ’A ’imi i te mau tū’atira’a i rotopū i te mau ta’o o teie mau salamo ’e te orara’a o te Fa’aora:

• Salamo 2:1–3 ’e Te ’Ohipa 4:24–28

• Salamo 2:7 ’e Te ’Ohipa 13:30–33

• Salamo 22:1 ’e Mataio 27:45–46

• Salamo 22:7–8 ’e Mataio 27:39–43

• Salamo 22:16 ’e Luka 23:32–33

• Salamo 22:18 ’e Mataio 27:35

• Salamo 31:5 ’e Luka 23:46

E aha tā ’outou i ha’api’i mai roto mai i teie mau tū’atira’a ? E aha te mau tohu ’e te mau parau fafau o te pāpa’ira’a mo’a tei ’ore ā i tupu ? E aha tā ’outou e ’ite nei i roto i teie mau parau fafau tē fa’atupu i te tīa’ira’a nō a muri a’e ?

E nehenehe te tai’ora’a i te Salamo 8 ; 19 ; 33 e fa’auru ia ’outou ’ia feruri i te mau hāmanira’a fa’ahiahia e rave rahi a te Fatu. ’A ara māite i te mau mana’o o tō ’outou ’ā’au ’a nā reira ai ’outou. E riro ’outou i te hina’aro ato’a e hīmene ’e e feruri i te mau parau o te hō’ē hīmene e tū’ati i teie mau salamo, mai « Tō’u Fa’aora ! Tō’u Atua ! » (Te mau hīmene, N°42). Nāhea te mau hāmanira’a a te Fatu i « te parau hua […] i te hanahana o te Atua » ia ’outou ? (Salamo 19:1).

Teie te tahi atu ā mau hīmene i fa’auruhia e te Salamo :

• Salamo 23 : « Iehova tō’u tīa’i » (Te mau hīmene, N°54)

• Salamo 23:6 ; 150 : « ’Ārue iāna te Ari’i Mana Hope ra » (Te mau hīmene, N°33)

• Salamo 26:8 : « ’Ua here mātou i tō ’oe na fare » (Te mau hīmene, N°150)

• Salamo 27:1 : « ’O te Fatu ra tō’u māramarama » (Te mau hīmene, N°43)

• Salamo 33:1–6 ; 95:1–6 : « Nehenehe te ao nei » (Te mau hīmene, N°35)

• Salamo 37:3–9 : « Tō’u Vārua : tei te Fatu ’oe » (Te mau hīmene, N°61)

• Salamo 148 : « E tā te Atua rahi » (Te mau hīmene, N°28)

I roto i te Salamo, e nehenehe te mau ta’o mai te fa’a’ite, ha’apa’ora’a, a’o ’e fa’aaura’a e tū’ati i te parau a te Fatu. ’A tāpe’a noa i te reira i roto i te ferurira’a ’a tai’o ai i te Salamo 19:7–11. E aha te mana’o tā teie mau ’īrava e fa’aiho nei nō ni’a i te parau a te Fatu ? E aha tā te Salamo 29 e ha’api’i nei nō ni’a i tōna reo ? ’Ia au i te ’ohipa i tupu nō ’outou, mea nāhea te parau ’aore rā te reo o te Fatu e tū’ati ai i teie mau fa’ahitira’a ?

Nō te mea ’ua patuhia te hiero o Ierusalema i ni’a i te hō’ē ’āivi, e nehenehe te pereota « mou’a o Iehova » (Salamo 24:3) e fa’atoro i ni’a i te hiero ’aore rā te aro o te Atua. I teie parau, e aha te ’ite ’āpī e noa’a mai nō ni’a i te Salamo 24 ? E aha te aura’a nō ’outou « te ta’ata rima mā ra ’e te ’ā’au maita’i » ? (’īrava 4). ’Ia tai’o ’outou i te Salamo 26–27, e aha atu ā tā ’outou e ha’api’i nei nō ni’a i te fare o te Fatu ?

I te tahi taime, e mea huru ha’aparuparu i te mana’o ’ia fa’aro’o ē, tītauhia ’ia vai vi’ivi’i ’ore nō te tomo i mua i te aro o te Atua. Tātou pā’āto’a nei ho’i tē tāfifi nei, ’e ’aita e ta’ata fāito maita’i roa i rotopū ia tātou. E aha te tia’ira’a tā ’outou e ’ite nei i roto i te a’ora’a a Elder David A. Bednar « Rima mā ’e te ’ā’au maita’i » ? (Liahona, Novema 2007, 80–83). Nāhea ’outou e fa’a’ohipa ai i tāna a’ora’a nō te tauturu i te ta’ata tei teimaha roa i te hina’arora’a e tae i te fāito maita’i roa ? ’A feruri nāhea ’outou i te fa’ari’i i te tauturu a te Fa’aora i roto i tā ’outou mau tauto’ora’a ’ia riro ’ei ta’ata « rima mā ’e te ’ā’au mā ».

Hi’o ato’a Bradley R. Wilcox, « Te ti’a-mā-ra’a e ’ere i te hape-’ore-ra’a », Liahona, Novema 2021, 61–67.

• ’A pāpa’i ’O Iehova tō’u/tā’u… ’A ani i tā ’outou mau tamari’i ’ia ’imi i te mau rāve’a nō te fa’ahope i te reira parau ma te fa’a’ohipa i te mau pāpa’ira’a mo’a mai te : Salamo 23:1 ; 27:1 ; 28:1 ; 28:7 ; 32:7 ; 46:1. E aha tā teie mau ’īrava e ha’api’i nei ia tātou nō ni’a i te huru te Fatu e nehenehe ai e tauturu ia tātou ?

• E nehenehe ’outou e ’āparau ’e tā ’outou mau tamari’i nō ni’a i te mau mea e tītauhia nō te hō’ē ’ārenio, ’ia pāruruhia ’e ’ia oraora maita’i ’oia. I muri iho, ’a tai’o ’āmui ai ’outou i te Salamo 23, ’a tauturu i tā ’outou mau tamari’i ’ia fa’aau i te mea tā te hō’ē tīa’i māmoe e rave nō te hō’ē ’ārenio, ’e te mea tā Iesu e rave nō tātou. E aha tei tītauhia nō tātou, ’ia pāruruhia tātou ’e ’ia oraora maita’i i te pae vārua ? ’A hīmene ’āmui i te hō’ē hīmene e noa’a ai ia rātou te tahi mau mana’o, mai te hīmene « ’Ite au te here ; (Buka Hīmene nā te mau tamari’i, 74–75).

• ’A tai’o ’āmui ai ’outou i te Salamo 24:3 e nehenehe tā ’outou mau tamari’i e ’imi i te mau ta’o e fa’aha’amana’o ia rātou i te hiero. E nehenehe ato’a rātou e hi’o i te hōho’a o te hō’ē hiero. I muri iho e nehenehe ’outou e tai’o ’āmui i te ’īrava 4 nō te ’ite ’o vai tē nehenehe e tomo i roto i te hiero. E nehenehe ’outou e paraparau nō ni’a i te rima repo ’e nāhea i te tāmā i te reira. Nāhea tātou i te repo i te pae vārua ? Nāhea te Fa’aora i te tauturu ia tātou ’ia mā i te pae vārua ?

• Mai te mea e tamari’i na’ina’i tā ’outou, ’a ani ia rātou ’ia ha’avare ta’i ’a tai’o ’outou i te Salamo 30:5 : « ’Ia tāрае noa mai te ’oto i te ahiahi. » I muri iho, ’a ani ia rātou ’ia fa’a’ite i tō rātou ’oa’oa ’a tai’o ai ’outou : « E riro rā i te ’oa’oa ’ia po’ipo’i ». ’A tāpiti i teie pereota e rave rahi taime.

• ’A fa’a’ite i te hō’ē hōho’a o te Fa’aora, ’e ’a fa’ati’a i te mau tamari’i te mea tāna i rave nō ’outou ’o tē fa’atupu i te ’oa’oa i roto ia ’outou. E nehenehe ’outou e vaiiho i te tamari’i tāta’itahi ’ia tāpe’a i te hōho’a ’e ’ia fa’a’ite mai i te mea tā Iesu i rave ’o tei fa’atupu i te ’oa’oa i roto ia rātou.

• ’A tauturu i te mau tamari’i ’ia tāmau ’ā’au i te rēni mātāmua o te Salamo 46:10: « ’A fa’atupua na, ’ia ’ite mai ē, ’o vau te Atua ». E aha te aura’a ’ia «fa’atupua » ? E nehenehe paha ’outou e rave i te tahi taime nō te ha’api’ipi’i ’ia fa’atupua. E nehenehe ato’a ’outou e fa’a’ite i te tahi ’e te tahi i te mau taime ’ua ha’apūai te « fa’atupua » i tō ’outou tā’amura’a ’e te Atua. ’A tauturu i tā ’outou mau tamari’i ’ia feruri i te mau taime i roto i te mahana e nehenehe ai rātou e « fa’atupua » nō te ha’afātata i tō tātou Metua i te ao ra.