Ezera 1 ; 3–7 ; Nehemia 2 ; 4–6 ; 8

I muri iho i tō Peresia harura’a ia Babulonia, ’ua fa’auru te Fatu i te ari’i nō Peresia, ’o Kuro, ’ia tono i te hō’ē pupu ’āti Iuda i Ierusalema nō te patu fa’ahou i te hiero. ’A tai’o ai ’outou i te Ezera 1, ’a hi’o e aha tā Kuro i rave nō te turu i te mau ’āti Iuda i roto i teie ’ohipa faufa’a rahi. Nāhea ’outou i te ’ite i te ’ohipa a te Fatu nā roto i te mau ta’ata ’e te mau vahine ’ati a’e ia ’outou, mai te mau ta’ata ato’a e ’ere i te melo nō tāna ’Ēkālēsia ? E aha tā teie e fa’a’ite nei ia ’outou nō ni’a i te Fatu ’e i tāna ’ohipa ?

Hi’o ato’a Isaia 44:24–28.

I te harura’a tō Babulonia ia Ierusalema, ’ua ’eiā rātou i roto i te hiero ’e ’ua tūtu’i i te reira ē pau roa a’e (hi’o 2 Ari’i 25:1–10 ; 2 Paraleipomeno 36:17–19). E aha tō ’outou mana’o ’āhani ’o ’outou te hō’ē o te mau ’āti Iuda tei ’ite i te reira ? (Hi’o Salamo 137). ’A hi’o maita’i na i te mana’o e iho mai i roto i te ’āti Iuda tau ’ahurura’a matahiti i muri mai, i tō rātou fa’ati’ara’ahia ’ia ho’i e patu fa’ahou i te hiero (hi’o Ezera 3:8–13 ; 6:16–22). E riro te reira i te ha’aferuri ia ’outou iho nō ni’a i te Fatu ’e i tōna fare. Nō te aha e tumu te patura’a o te hō’ē hiero nō te fa’ahanahanara’a ?

E mea varavara te ’ohipa a te Fatu tē ’ore e pāto’ihia. E parau mau te reira nō te mau tauto’ora’a i arata’ihia e Zerubabela ’e ’o Nehemia. Teie te hō’ē ravera’a ’ōhie ’o tē nehenehe e tauturu ia ’outou ’ia ha’api’i mai nā roto i teie mau ’ā’amu, ’e ’ia feruri nāhea ’outou e rave ai i te ’ohipa a te Fatu noa atu te pāto’ira’a :

Te ’ohipa a te Atua nō Zerubabela (Ezera 4:3) :

Te ’ohipa a te Atua nō Nehemia (Nehemia 2:17–18) :

Te ’ohipa a te Atua nō’u :

Te pāto’ira’a i fa’aruruhia e Zerubabela (Ezera 4:4–24) :

Te pāto’ira’a i fa’aruruhia e Nehemia (Nehemia 2:19 ; 4:1–3, 7–8 ; 6:1–13) :

Te pāto’ira’a tā’u e fa’aruru nei :

Nāhea Zerubabela i te pāhonora’a (Ezera 5:1–2) :

Nāhea Nehemia i te pāhonora’a (Nehemia 2:20 ; 4:6, 9 ; 6:3–15) :

Nāhea vau e pāhono ai :

Nō te tahi tauturura’a nō te fa’aau i te ’ohipa i tupu nō Nehemia ’e tō ’outou orara’a, e nehenehe e tai’o i te a’ora’a a te peresideni Dieter F. Uchtdorf « E ’ohipa rahi tā tātou e rave nei ’e e’ita e nehenehe e pou i raro » (Liahona, Mē 2009, 59–62), nā tuha’a hope’a iho ā rā. ’A feruri ai ’outou i te ’ohipa tā te Atua i fa’aue ia ’outou, e nehenehe ’outou e tai’o i te « Parau tai’o a te Feiā ’Āpī Tamāhine » ’aore rā i te « Parau tai’o a te pupu autahu’ara’a Aarona » (Vaira’a buka ’evanelia). ’Aore rā e nehenehe e hi’o i te hō’ē hīmene mai te hīmene « E mau tuahine tātou nō Ziona » (Te mau hīmene, N°193) ’aore rā « E te mau tāvini o te Atua » (Te mau hīmene, N°195).

I tō ’outou mana’o, e aha te aura’a o te parau « ’ua tae ho’i te ’ā’au o te ta’ata i taua ’ohipa ra » i roto i te ’ohipa tāvinira’a a te Fa’aora ? (Nehemia 4:6). E aha te aura’a ’ia fa’ari’i i « te hāmani maita’i o te Atua [ia ’outou] » ’a rave ai ’outou i tāna ’ohipa ? (Nehemia 2:8 ; hi’o ato’a Nehemia 2:18 ; Ezera 7:6, 9, 27–28). ’Ua nāhea ’outou i te ’itera’a i tōna rima i roto i tā ’outou mau tauto’ora’a ’ia tāvini iāna ?

Nō te mau u’i i fa’atītīhia, ’aita i roa’a rahi i te mau ’āti Iuda ’ia tai’o i « te buka ture a Mose » (Nehemia 8:1). I roto i te Nehemia 8, ’ua tai’o Ezera i te ture i te nūna’a. E aha tā ’outou e ’ite ra i roto i teie pene ’o tē fa’a’ite i te mana’o o Ezera ’e tōna mau ta’ata nō ni’a i te Atua ’e i tāna parau ? (hi’o iho ā rā i te mau ’īrava 1–12). E aha te mea i roto i tō ’outou orara’a e fa’a’ite nei i tō ’outou mana’o nō ni’a i te Atua ’e i tāna parau ?

Hi’o ato’a Te Mau Ha’api’ira’a a te mau Peresideni o te ’Ēkālēsia : Ezra Taft Benson (2014), 125–36.

• Nō te ha’api’i i tā ’outou mau tamari’i nō ni’a i te ’oa’oa tā te mau ’āti Iuda i fa’ari’i i te taime ’a patu-fa’ahou-hia ai tō rātou hiero, e nehenehe e fa’a’ite ia rātou i te hō’ē hōho’a mai teie i raro nei. ’A paraparau nō te aha teie mau ta’ata e ’oa’oa ai ’ia ti’a i roto i te fare o te Fatu. E nehenehe ato’a ’outou e parau i tā ’outou mau tamari’i nō te aha e vāhi ’oa’oa te hiero nō ’outou. Mea nāhea te hiero i te fa’atupura’a i roto ia ’outou i te mana’o fātata i tō tātou Metua i te ao ra ’e i te Fa’aora ?

• ’A tai’o ai ’outou i te Ezera 3:10–13 ’e tā ’outou mau tamari’i, ’a tauturu ia rātou ’ia ’imi i te mau ta’o e fa’a’ite ra i te mana’o i tupu i roto i te mau ’āti Iuda ’a patu-fa’ahou-hia ai te hiero. ’Ia tae ’outou i te hope’a o te ’īrava 13, e nehenehe ’outou e tuō ’āmui ma te ’oa’oa. ’A tauturu i tā ’outou mau tamari’i ’ia feruri i te mau tumu nō te ’oa’oara’a i te mau hiero ta te Fatu i horo’a mai. Nāhea tātou e fa’a’ite ai i taua ’oa’oara’a ra ?

• E nehenehe e hīmene i te hō’ē hīmene nō ni’a i te hiero ’e tā ’outou mau tamari’i, mai te ’īrava piti o te hīmene « Dieu nous attend » (Vaira’a buka ’evanelia). I muri iho i te rēni tāta’itahi, ’a ani i te hō’ē tamari’i ’ia fa’a’ite mai i te mea tāna i au nō ni’a i te hiero. E nehenehe ato’a ’outou e hi’o i te mau hōho’a hiero ’a hīmene ai ’outou.

• ’A fa’ati’a i tā ’outou mau tamari’i i te ’ā’amu o Nehemia (hi’o Nehemia 2:17–20 ; 6:1–9 ; ’aore rā « Nehemia » i roto Te mau ’ā’amu o te Faufa’aTahito, 173–74). ’Ia tai’o ’outou i te Nehemia 2:20, e nehenehe ’outou ’e tā ’outou mau tamari’i e « ti’a » ’e e rave mai te huru ē tē patu ra ’outou i te mau papa’i o Ierusalema. ’Aore rā e au paha tā ’outou mau tamari’i e fa’ati’a i te hō’ē patu i te tahi mau ta’aai ’aore rā i te tahi atu mau tao’a. ’A nā reira ai rātou, e nehenehe ’outou e tauturu ia rātou ’ia feruri i te mau mea faufa’a rahi tā tō tātou Metua i te ao ra e hina’aro ia tātou ’ia rave.

  

  1:38

• ’Ia tai’o ’outou i te Nehemia 6:9, e ani i tā ’outou mau tamari’i ’ia ’āfa’i i tō rātou rima i ni’a ’ia fa’aro’o ana’e ia ’outou ’ia parau « ’eta’eta atu ra rā ta’u rima. » ’A parau i te mau tamari’i nō ni’a i te hō’ē taime ’a ’ite ai ’outou i tō te Atua ha’apūaira’a i tō ’outou rima nō te rave i tāna ’ohipa.

• ’A tai’o pūai i te tahi mau pereota i roto i te Nehemia 8:2–3, 5–6, 8–9, 12 ’o tē fa’ata’a nei i te mea tā te nūna’a i rave ’a fa’aro’o ai rātou ia Ezera i te tai’ora’a i te mau pāpa’ira’a mo’a. ’A tai’o ai ’outou, e nehenehe tā ’outou mau tamari’i e ha’uti ta’ata ora i teie mau pereota. I muri iho e nehenehe ’outou e fa’a’ite i te tahi ’e te tahi i tō ’outou mana’o ’ia tai’o ’aore rā ’ia fa’aro’o ana’e ’outou i te mau pāpa’ira’a mo’a.

• ’A tai’o ’āmui ai ’outou i te Nehemia 8:8, e nehenehe e ani i tā ’outou mau tamari’i e aha te mea e tauturu nei ia rātou ’ia māramarama i te mau pāpa’ira’a mo’a. ’A fa’a’ite ia rātou nāhea ’ia fa’a’ohipa i te mau tauturu ’imira’a pāpa’ira’a mo’a mai te Arata’i nō te mau pāpa’ira’a mo’a ’e Topics and Questions (Vaira’a buka ’evanelia). ’A ani i te mau tamari’i ’ia fa’a’ite mai i te mea tā rātou i ’apo mai nō ni’a i te Fa’aora mai roto mai i te mau pāpa’ira’a mo’a.