Ioba 1–3 ; 12–14 ; 19 ; 21–24 ; 38–40 ; 42

Tē tūra’i nei te mau pene mātāmua nō Ioba mai te huru te pehepehe, i te parau nō te ’ohipa a Sātane ’ei ’enemi ’aore rā ’ei fa’ahapa ; e ’ere i te ’āparaura’a mau i rotopū i te Atua ’e ia Sātane. ’A tai’o ai ’outou i te mea tā Sātane i parau nō Ioba (hi’o Ioba 1:9–11 ; 2:4–5), e ui paha ’outou ia ’outou iho : « Nō te aha vau e ha’apa’o noa ai i te parau a te Atua ? » Nō te aha e mea huru ataata ’ia ha’apa’o i te parau a te Fatu nō terā tumu noa tā Sātane i parau ?

E aha te mea e fa’ahiahia nei ’outou i roto i te mau pāhonora’a a Ioba i mua i tōna mau fifi ? (hi’o Ioba 1:20–22 ; 2:9–10).

’Ua parau te mau hoa o Ioba ē, tē fa’autu’a ra te Atua iāna (hi’o Ioba 4–5 ; 8 ; 11). E aha te mau fifi tā ’outou e ’ite nei i teie parau ? ’A tai’o i te pāhonora’a a Ioba i roto i te mau pene 12–13. E aha tā Ioba i ’ite nō ni’a i te Atua i tāmau noa ai ’oia i te ti’aturi ? E aha tā ’outou i ’ite nō ni’a i te Atua ’o tē tauturu ia ’outou ’ia fa’aruru i te mau tāmatara’a ?

I te tahi mau taime e ha’api’i tātou i te mau parau mau faufa’a roa a’e i roto i tō tātou mau taime fifi roa a’e. ’A feruri i te mau tāmatara’a tā Ioba e fa’ati’a nei i roto i te Ioba 19:1–22 nā reira ato’a te mau parau mau tāna i poro i roto i te mau ’īrava 23–27. E mea nāhea ’outou i te ’ite ē tē ora nei tō ’outou Fa’aora ? E aha te ta’a-’ē-ra’a tā teie ’itera’a e fa’atupu nei i roto i tō ’outou orara’a ?

E nehenehe e hīmene ’aore rā e fa’aro’o i te hō’ē hīmene nō ni’a ia Iesu Mesia, mai te hīmene « ’Ua ’ite au te ora nei tō’u nei Fatu » (Te mau hīmene, N°69). E aha te mau parau i roto i teie hīmene e fa’a’ite nei i tō ’outou mau mana’o nō ni’a iāna ?

Hi’o ato’a Te Ha’api’ira’a Tumu ’e te mau Fafaura’a 121:1–12 ; 122.

I roto i te Ioba 21–24, e tai’o ’outou i te hō’ē ’āparaura’a i rotopū ia Ioba ’e tōna mau hoa. I te pū o teie ’āparaura’a, ’o te hō’ē ïa uira’a i uihia e te mau ta’ata e rave rahi : Nō te aha te mau ta’ata parauti’a e māuiui ai i te tahi taime ?

Noa atu ē ’aita tā tātou e pāhonora’a nō ni’a i te mau mea ato’a, i roto i te ’evanelia a Iesu Mesia i fa’aho’i-fa’ahou-hia mai, tē vai ra tā tātou mau parau mau ’o tē nehenehe e tauturu ia tātou ’ia ’ite i te aura’a nō te ’ati ’e te māuiui. Teie i raro nei te mau pāpa’ira’a mo’a nō te mau mahana hope’a nei tei roto te tahi o teie mau parau mau. E aha tā teie mau ’īrava pāpa’ira’a mo’a e ha’api’i nei ia tātou nō ni’a i tō tātou Metua i te ao ra ’e tāna fa’anahora’a ?

• 2 Nephi 2:11–13

• Mosia 23:21–23 ; 24:10–16

• Etera 12:27

• Te Ha’api’ira’a Tumu ’e te mau Fafaura’a 58:3–5

• Aberahama 3:22–26

E nehenehe ato’a ’outou e tai’o i te mau ha’api’ira’a a te peresideni Spencer W. Kimball nō ni’a i te ’ati i roto i te « E ’ati ’aore rā, e haere’a fa’ata’ahia ? » (Te mau Ha’api’ira’a a te mau Peresideni o te ’Ēkālēsia: Spencer W. Kimball [2011]), 13–26).

’Ia au i tā ’outou i tai’o, nāhea ’outou e pāhono ai i te hō’ē uira’a mai teie « Nō te aha te Atua e fa’ati’a ai i te feiā parauti’a ’ia māuiui ? »

Nō tōna ’ino’ino i te parira’a a tōna mau hoa (hi’o Ioba 16:1–5 ; 19:1–3), ’ua ani tāmau noa Ioba i te Atua nō te aha ’oia i mauiui rahi roa ai (hi’o Ioba 19:6–7 ; 23:1–9 ; 31). ’Aita te Fatu i hōro’a i te hō’ē tumu pāpū i roto i te buka a Ioba. ’Ua ha’api’i rā ’oia i te hō’ē poro’i faufa’a roa i roto i te mau pene 38–40. Nāhea ’outou e ha’apoto ai i teie poro’i ? ’Ei hi’ora’a, e aha tā ’outou i ha’api’i mai roto mai i te mau uira’a a te Fatu i roto i te Ioba 38:1–7, 18–24 ?

E ’ite ’outou ē, ’ua paraparau te Fatu ia Ioba nō ni’a i te tahi o tāna mau hāmanira’a ’e te tahi atu mau ’ohipa pūai (hi’o Ioba 38–39). E nehenehe ’outou e hi’o i te tahi o te reira mau hāmanira’a (’aore rā, te mau hōho’a nō te reira). Nāhea teie mau mea i te tauturu ia ’outou ’ia taui i te ferurira’a nō ni’a i te Atua ? nō ni’a i tō ’outou mau tāmatara’a ? ’Ua nāhea rātou i te tauira’a i te hi’ora’a ātea a Ioba ? (hi’o Ioba 42:1–6 ; hi’o ato’a Mose 1:8–10).

Teie e piti a’ora’a nō te ’āmuira’a rahi ’o tē nehenehe e tauturu i te taui i tā tātou hi’ora’a : Tamara W. Runia, « Hi’ora’a i te ’utuāfare o te Atua nā roto i te hi’o fa’arahi » (Liahona, Novema 2023, 62–69) ; Russell M. Nelson, « ’A feruri tiretiera ! » (Liahona, Novema 2023, 117–20). I roto i terā ’e terā a’ora’a, ’a ’imi i te hō’ē mea ’o tā ’outou e hina’aro e ha’amana’o ’ia tae noa atu i te taime e fa’aruru ai ’outou i te mau tāmatara’a teimaha. Nāhea ’outou ’ia fa’aha’amana’o ia ’outou iho i te ha’api’ira’a tā ’outou i ’apo mai ?

• ’A fa’aitoito i tā ’outou mau tamari’i ’ia fa’ati’a mai i te mea tā rātou i ’ite nō Ioba. Mai te mea e hina’aro rātou i te tauturu, e nehenehe ’outou e fa’a’ite i te Ioba 1:1, 13–22 ; 2:7–10 ’aore rā « Ioba » (i roto i Te mau ’ā’amu o te Faufa’a Tahito, 145–47). Nāhea tō Ioba pāhonora’a i te mau fifi ? (hi’o Ioba 1:21 ; 2:10).

  

  1:55

• ’Ua ha’apa’o maita’i Ioba i roto i tōna mau ’ati nō te mea tāna i ’ite nō ni’a i te Fatu. E nehenehe paha ’outou ’e te mau tamari’i e hi’o i te mau hōho’a nō Iesu Mesia ma te ’ohipa te tahi i te tahi (mai te hōho’a i raro nei ’aore rā i roto i te Buka hōho’a o te ’evanelia). ’A paraparau i te mea tā ’outou i ’ite nō ni’a iāna ’e mai te aha tōna huru. Teie te tahi mau ’īrava e fa’a’ite nei i tā Ioba i ’ite nō ni’a i te Fatu : Ioba12:10, 13, 16 ; 19:25–27. Nō te aha e mea faufaʼa ’ia ʼite i teie mau mea nō ni’a iāna ?

• ’Ua ui Ioba i te hō’ē uira’a faufa’a rahi i roto i te Ioba 14:14. Pēnei a’e e nehenehe ’outou ’e te mau tamari’i e fa’a’ohu nō te fa’a’ite e nāhea ’outou i te pāhono ia Ioba. E nehenehe ’outou e ’imi i te mau mana’o i roto i te Alama 11:42–44, i roto i te video « In a Coming Day [’Ia tae i te hō’ē mahana i muri nei] » (Vaira’a buka ’evanelia), ’aore rā i roto i te hō’ē hīmene nō ni’a i te ti’afa’ahoura’a, mai te hīmene « Ti’afa’ahou ānei Iesu ? » (Buka Hīmene nā te mau tamari’i, 64).

1:11

• I te taime ’a fifi ai Ioba, ’ua parau tōna mau hoa ē, tē fa’autu’a ra te Atua iāna nō te mea ’ua hara ’oia (hi’o Ioba 22:5). Mai te mea e hoa tātou nō Ioba, nāhea tātou i te tāmata i te tauturu iāna ? Nāhea tā tātou mau parau e tauturu ai ia vetahi ’ē i roto i tō rātou ’oto ? (hi’o Ioba 16:5). E nehenehe e fa’a’ite i te hō’ē hōho’a, ’aore rā hau atu, i roto i teie arata’i ha’api’ira’a ’a ’āparau ai ’outou i teie mau uira’a.

• E nehenehe e ani i te mau tamari’i ’ia tāpura i te tahi huru nō te hoa maita’i ’e ’ia fa’a’ite i te i’oa o te hō’ē hoa mai te reira te huru. I muri iho e nehenehe ’outou e hi’o i te hō’ē hōho’a nō Iesu Mesia. E aha te mau fa’a’itera’a ē e hoa rahi ’o Iesu nō tātou tāta’itahi ? ’A feruri na i te hō’ē ta’ata e fa’aruru nei i te hō’ē tau fifi. ’A fa’anaho nāhea ’outou ’ia riro ’ei hoa mai te Mesia te huru nō rātou.

• I muri a’e i te tai’ora’a i te Ioba 19:23–27, e nehenehe ’outou ’e tā ’outou mau tamari’i e paraparau e mea nāhea ’outou i te ’itera’a ē, tē ora nei tō tātou Tāra’ehara. E nehenehe ’outou e ’ohipa ’āmui nō te tu’u i tō ’outou ’itera’a pāpū (’aore rā te mau hōho’a pāpa’i nō te Fa’aora) i roto i te hō’ē buka (hi’o ’īrava 23).

• E nehenehe ato’a ’outou e hīmene i te hō’ē hīmene e fa’a’ite pāpū nō te Fa’aora, mai te hīmene ra « ’Ua ’ite au tē ora nei tō’u nei Fatu » (Te mau hīmene, N°69). ’A fa’a’ite i te mau ’īrava o te hīmene ’o tē ha’apūai i tō ’outou fa’aro’o iāna. Nō te aha e mea faufa’a ’ia ’ite ē, tē ora nei Iesu Mesia ?