Esetera

’Ua ha’api’i te peresideni Dieter F. Uchtdorf ē, « tē ti’a nei tātou tāta’itahi i te hō’ē vāhi hō’ē roa ’e e ’ohipa faufa’a rahi tā [tātou] ana’e e nehenehe e rave […] ’Ua hōro’a mai te Fatu ia ’outou tā ’outou hōpoi’a nō te hō’ē tumu. Tē vai ra paha te tahi mau ta’ata ’e te tahi mau ’ā’au ’outou ana’e tē nehenehe e tauturu ha’amaita’i ia rātou. ’Aita paha e ta’ata e nehenehe e rave i te reira mai tā ’outou e rave » (« ’A amo i te vāhi tei reira ’outou te ti’ara’a », Liahona, Novema 2008, 56).

’A tai’o ai ’outou i te ’ā’amu o Esetera, ’a feruri nāhea teie parau i te tano nōna. ’A hi’o i te mau rāve’a tā te Fatu i fa’a’ohipa nō te fa’aora i te mau ’āti Iuda (hi’o, ’ei hi’ora’a, Esetera 2:21–23 ; 3:10–14 ; 4:14–16). I muri iho ’a feruri e mea nāhea tōna hōro’ara’a mai i te mau rāve’a i roto ia ’outou nō te ha’amaita’i ia vetahi ’ē. E aha te tahi mau vaira’a ’aore rā te tahi mau tā’amura’a tāna i arata’i atu ia ’outou « i teie nei ’anotau » ? (Esetera 4:14). Mai te mea e ha’amaita’ira’a patereareha tā ’oe, e nehenehe e tai’o i te reira nō te ha’api’i rahi atu ā nō ni’a i te ’ohipa a te Fatu nō ’oe. E aha tē ti‘a ia ’outou ’ia rave nō te fa’atupu i teie ’ohipa ?

Hi’o ato’a « For Such a Time as This [Nō te hō’ē tau mai teie] » (video), ChurchofJesusChrist.org.

13:44

I roto i te buka a Esetera, tē ’apo nei tātou i te ha’api’ira’a i roto i te ha’apa’o maita’i o Esetera ’e o Moredekai, terā rā tē ’apo ato’a nei tātou i te ha’api’ira’a i roto i te te’ote’o ’e te riri o Hamana. ’A tai’o ai ’outou i te Esetera 3 ; 5:9–14, ’a pāpa’i i te mau mana’o o Hamana, tāna mau parau ’e tāna mau ’ohipa. E aha tā te reira e fa’a’ite nei nō ni’a iāna ’e tōna mau hia’ai ? E aha te mau hōpe’ara’a tāna i fa’aruru atu ? (hi’o Esetera 7). ’Ia tai’o ’outou i te parau nō Hamana e riro ’outou i te fāito i te mau hia’ai e tūra’i nei i tō ’outou mana’o ’e tā ’outou mau ’ohipa. ’Ua fa’auruhia ānei ’outou i te fa’atupu i te tahi mau tauira’a ? Nāhea ’outou e fāriu ai i ni’a i tō tātou Metua i te ao ra nō te tauturu ?

Hi’o ato’a Maseli 16:32 ; Alama 5:28.

E hi’o maita’i na nō te aha ’o Esetera ’e te toe’a o te mau ’āti Iuda i ’ōpua ai e ha’apae i te mā’a (hi’o Esetera 3:13 ; 4:1–3, 10–17). E aha te ha’apaera’a mā’a i riro ai ’ei ha’amaita’ira’a nō rātou ? (hi’o Esetera 5:2–3 ; 8:11–12). Nō te aha te Fatu e ani ai ia tātou ’ia ha’apae i te mā’a ? (hi’o Topics and Questions, « Fasting and Fast Offerings », Gospel Library). ’A feruri e nāhea ’outou e fa’ariro ai i te ha’apaera’a mā’a ’ei ha’amaita’ira’a rahi atu ā i roto i tō ’outou orara’a.

Hi’o ato’a Isaia 58:6–12 ; « Fasting: Young Single Adult Ward, Amanda [Te ha’apaera’a mā’a : Pāroita feiā ’āpī pa’ari ’ōtahi, Amanda] » (video), ChurchofJesusChrist.org.

2:41

I tō Moredekai ’e ’o Esetera ti’ara’a mai nō tō rāua mau ti’aturira’a ’e nō tō rāua ato’a nūna’a, ’ua fa’aataata rāua i tō raua ora. E riro te mau hōpe’ara’a o tā tātou mau mā’itira’a i te mea ha’iha’i, te ravera’a rā i te mea ti’a, tītauhia-noa-hia ïa te itoito. E aha te ha’api’ira’a e roa’a ia ’outou i roto i te Esetera 3:1–4 ; 4:10–17 nō ni’a i te itoito ’ia rave i te maita’i ? ’A hi’o i te mau hope’ara’a i ’itehia e Moredekai ’e Esetera i muri a’e i tō rāua fa’a’itera’a i tō rāua itoito (hi’o Esetera 3:5–11 ; 5:1–4). E aha tei au ia Esetera ’e ia Moredekai ’ia ’ite nō ni’a i te Atua nō te rave i te mau mā’itira’a tā rāua i rave ?

’A feruri i te mau vaira’a e tītauhia te itoito nō te ti’a atu nō te maita’i. E aha te ha’api’ira’a e roa’a ia ’outou nā roto ia Esetera ’e ’o Moredekai, ’o tē tauturu ia ’outou ’ia ’ite mai i te itoito i roto i te Fatu ?

’Ua fa’atupu te itoito o Esetera i te « mahana […] ’oa’oa » (hi’o Esetera 9:17–19). Nāhea te itoito mai tō te Mesia i te fa’atupura’a nō ’outou te « mahana ’oa’oa » ?

Hi’o ato’a « Courage [Itoito] », « Dare to Stand Alone [Māfatu nō te ti’a i ni’a] » (video), Vaira’a buka ’evanelia ; « Mau Māite i te Fa’aro’o », Te mau hīmene, N°155.

3:19

4:20

• E riro ’outou i te fa’auruhia ’ia fa’a’ohipa i te Esetera 2:7 nō te ha’api’i i tā ’outou mau tamari’i nō ni’a i te tauturura’a i te mau melo o te ’utuāfare tei hina’aro i te tauturu, mai ia Moredekai i nā reira nō Esetera. E nehenehe ’outou e tai’o ’āmui i te ’īrava ’aore rā e ha’apoto i te reira ’ia au i tā ’outou iho mau ta’o. I muri iho, e nehenehe ’outou ’e tā ’outou mau tamari’i e feruri i te mau melo o te ’utuāfare e hina’aro nei i tā ’outou tauturu. Hāmani i te fa’anahora’a nō te tauturu ia rātou.

• E nehenehe te hi’ora’a o Esetera ’e o Moredekai e tauturu i tā ’outou mau tamari’i ’ia hāro’aro’a i te aura’a o te parau ’aito, ’oia ho’i, te ravera’a i te mea ti’a noa atu ē e mata’u ’outou. E nehenehe e pāpa’i E ’aito ’o Moredekai i tōna… ’e E ’aito ’o Esetera i tōna… . ’A ha’api’i ’āmui ai ’outou i te ’ā’amu o Esetera, e nehenehe tā ’outou mau tamari’i e hōro’a mai i te mau parau nō te fa’aoti i te pereota. E nehenehe ’outou e tai’o i te Esetera 3:1–11 ; 4:10–17 ’aore rā te « Ari’i vahine Esetera » (i roto Te mau ’ā’amu o te Faufa’a Tahito, 166–70) ’aore rā e hi’o i te mau hōho’a i roto i teie arata’i ha’api’ira’a. I muri iho, ’a pāpa’i E riro vau ’ei ’aito nā roto i te… , e ’a ani i te mau tamari’i ’ia tāpura i te mau mea tā tō tātou Metua i te ao ra e hina’aro nei ia rātou ’ia rave ’o tē tītau i te itoito. E nehenehe e fa’ahīmene « Rave te maita’i » (Buka hīmene nā te mau tamari’i, 158), nō te tauturu.

  

  2:45

• E nehenehe ato’a ’outou e hi’o i te mau taime e ’aito ’o Iesu Mesia—’ei hi’ora’a, i tōna māuiuira’a nō tā tātou mau hara i Gesetemāne ’e i ni’a i te sātauro (hi’o Mataio 26:36–39 ; 27:33–35). A ani i tā ’outou mau tamari’i ’ia fa’a’ite mai i te taime e ’aito rātou, ’e ’a fa’a’ite ato’a i te ’ohipa i tupo nō ’outou.

• E nehenehe te tai’ora’a i te Esetera 4:1–3, 10–17 e tauturu ia ’outou ’ia ha’api’i i tā ’outou mau tamari’i nō ni’a i te ha’apaera’a mā’a. Nō te aha Esetera ’e te mau ’āti Iuda i ha’apae ai i te mā’a ? ’A fa’ati’a i tā ’outou mau tamari’i te tumu ’outou e ha’apae ai i te mā’a. E nehenehe ato’a ’outou e ani ia rātou nāhea rātou ’ia fa’ata’a i te parau nō te ha’apaera’a mā’a i te hō’ē hoa tei ’ore roa i ha’apae nā mua atu. Nāhea tātou e tauturu ai i tō tātou mau hoa ’ia hāro’aro’a i te mau ha’amaita’ira’a e roa’a mai nā roto i te ha’apaera’a mā’a ?

• ’A fa’aitoito i tā ’outou mau tamari’i ’ia feruri i te hō’ē mea e hina’aro ai rātou i te tauturu a te Fatu. ’A parau ia rātou ’ia fa’ariro i te reira ’ei tuha’a nō tā rātou ha’apaera’a mā’a i te sābati ha’apaera’a mā’a i muri nei.

• ’A tauturu i tā ’outou mau tamari’i ’ia hāro’aro’a ē, i te mata’ura’a Esetera, ’ua fa’aitoito Moredekai iāna nā roto i te paraura’a ē, ’ua tauturu te Fatu iāna ’ia riro ’ei ari’i vahine « i teie nei ’anotau » (Esetera 4:14). E aha te aura’a te parau a Moredekai ? ’A paraparau i te tahi ’e te tahi e mea nāhea Esetera i te rirora’a ’ei mauha’a nā te Fatu. Nāhea tātou e riro ai ’ei mauha’a nā te Fatu ?

• Nāhea ’outou ’ia tauturu i tā ’outou mau tamari’i ’ia hāro’aro’a e aha te hō’ē mauha’a ? E nehenehe ’outou e ani i te hō’ē o rātou ’ia ha’uti i te hō’ē hīmene ma te hō’ē mauha’a ’upa’upa ’aore rā ma te fa’a’ite mai i te hō’ē hōho’a nō te hō’ē ta’ata e fa’a’ohipa ra i te hō’ē mauha’a. I muri iho e nehenehe ’outou e ’āparau nō ni’a i te aura’a o te parau ra, ’ia riro ’ei mauha’a i roto i te rima o te Atua.