Salamo 102–103 ; 110 ; 116–119 ; 127–128 ; 135–139 ; 146–150

’A hi’o i te huru te Salamo 102:1–11 e fa’ata’a nei i te mau mana’o ahoaho ’e te ’āta’ara’a e tae pinepine nei ’ia tupu ana’e mai te fifi. ’Ua fa’aruru na paha ’outou ’aore rā te feiā tā ’outou i mātau i te mau mana’o mai te reira te huru. ’A tai’o ai ’outou i te Salamo 102:12–28 ; 103 ; 116, ’a ’imi i te mau pereota e fa’atupu i te itoito i roto ia ’outou nō te « ti’aoro […] i te i’oa o Iehova » (Salamo 116:13). E hina’aro paha ’outou e tāpa’o ’e e tāmau ’ā’au ’e e fa’a’ite ia vetahi ’ē i te mau pereota tē fa’atupu i roto ia ’outou i te tīa’ira’a iāna.

Hi’o ato’a Isaia 25:8 ; Hebera 2:17–18 ; Alama 7:11–13 ; Camille N. Johnson, « ’O Iesu Mesia te tauturu », Liahona, Mē 2023, 81–83 ; « I hea vau e fāri’i ai te hau ? » (Te mau hīmene, N°62).

Tē vai ra i roto i te Salamo te mau ’īrava nō ni’a i te orara’a ’e te misiōni a Iesu Mesia. Teie te tahi mau hi’ora’a :

• Salamo 110:1–4 (hi’o Mataio 22:41–45 ; Hebera 5:4–10 ; 6:20)

• Salamo 118:22 (hi’o Mataio 21:42 ; ’Ohipa 4:10–11 ; 1 Petero 2:7)

• Salamo 118:25–26 (hi’o Mataio 21:9)

E aha tā teie mau ’irava e ha’api’i nei ia ’outou nō ni’a ia Iesu Mesia ? Nō te aha e mea faufaʼa ai ’ia ʼite i teie mau mea nō ni’a iāna ?

I roto i te Salamo 119 e rave rahi pereota e fa’aau nei i tō tātou orara’a i te hō’ē tere ho’ira’a i tō tātou Metua i te ao ra. ’A tai’o ai ’outou, ’a ’imi i te mau ta’o mai te « haere’a », « ’ē’a », ’e « ’āvae ». ’A feruri i tō ’outou iho tere i roto i te orara’a nei—i te vāhi i haerehia e ’outou, tei hea ’outou i teienei, ’e e aha te vāhi tā ’outou e haere atu. E aha te ha’api’ira’a tā ’outou e ’apo nei i roto i teie salamo nō ni’a i tō ’outou tere ho’ira’a i te fare ? E aha te ha’api’ira’a tā ’outou i ’apo mai i te hi’ora’a i te mau ’ē’a o vetahi ’ē ? ’Ia au i teie nei salamo, e aha tā te Atua i hōro’a mai nō te tauturu ia ’outou ’ia fa’aea noa i ni’a i tōna ’ē’a ?

’A feruri i te hō’ē taime ’ua manuia ’outou i te tāpae i te hō’ē vāhi maoti te pe’era’a i te hō’ē ’ē’a ’aore rā i te hō’ē hōho’a fenua. E aha tā te reira ’ohipa e ha’api’i nei ia ’outou nō ni’a i te pe’era’a i te ’ē’a o te Atua ?

I roto i te tahi atu mau pāpa’ira’a mo’a e rave rahi, tē paraparau nei te Fatu ’e tāna mau peropheta nō ni’a i te hō’ē ’ē’a. Teie te tahi mau hi‘oraa i raro nei. E nehenehe e ’imi i teie mau ’īrava, e pāpa’i ’e e ’āparau ia vetahi ’ē nō ni’a i te mau mea tā ’outou e ’apo nei.

Nāhea teie mau parau mau e tauturu ai ia ’outou ’ia fa’aea noa i ni’a i te ’ē’a o te Atua ?

E aha te tahi atu ā mau ha’api’ira’a tā ’outou e nehenehe e ’apo mai i roto i te a’ora’a i muri nei a te peresideni Russell M. Nelson ?

« ’Ia manuia tō tātou tere i roto i te orara’a nei, tītauhia ia tātou ’ia pe’e i te arata’ira’a hanahana. ’Ua parau te Fatu ē : ‘’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u’ [Te Ha’api’ira’a Tumu ’e te mau Fafaura’a 6:36]. ’E ’ua pāpa’i te Salamo ē, ‘E lamepa tā ’oe parau i tō’u nei ’āvae, e ti’arama nō tō’u nei mau ’ē’a’ [Salamo 119:105] […]

« I roto i tō ’outou tere nā roto i te orara’a nei, e fa’aruru ’outou i te mau fifi e rave rahi ’e e rave ato’a ho’i ’outou i te tahi mau hape. E tauturu te arata’ira’a pāpa’ira’a mo’a ia ’outou ’ia ’ite e aha te hape ’e ’ia rave i te fa’atītī’aifarora’a e tītauhia. E fa’aea ’outou i te haere nā te ’ē’a hape. E tai’o māite ’outou i te hōho’a fenua o te pāpa’ira’a mo’a. I muri iho, e fa’atupu ’outou i te tātarahapa ’e te fa’aho’ira’a e tītauhia nō te haere nā ni’a i te i te ‘’ē’a piriha’o ’e te oaoa ē tae roa atu ai i te ora mure ’ore ra’ [2 Nephi 31:18] » (« Living by Scriptural Guidance », Ensign, Novema 2000, 17).

Hi’o ato’a Dieter F. Uchtdorf, « Te tamaiti hueāvai ’e te purūmu arata’i i te ’utuāfare », Liahona, Novema 2023, 86–88.

’A hi’o na i te mau tumu i hōro’ahia i roto i te Salamo 135:15–18, e mea ma’ama’a ’ia ti’aturi i te mau atua ha’avare. E aha te mea e hema ai ’outou i te ti’aturi, ’o tē hōho’a i te hō’ē ’īdolo ? E nehenehe ’outou e tāpura mai i te mau mea tā te Fatu e nehenehe e rave, mai tā te tāparau salamo i nā reira i roto i te Salamo 134–36. E aha te mau ’ohipa pūai tāna i rave nō ’outou ?

E aha tā ’outou e ’ite ra i roto i te Salamo 139 ’o tē tauturu ia ’outou ’ia māramarama ē, ’ua ’ite te Fatu ia ’outou—tō ’outou mau mana’o ’e tā ’outou mau ’ohipa, te mau pūai ’e te mau paruparu ? Nāhea teie parau mau i te fa’auru i tō ’outou orara’a ’e tā ’outou mau mā’itira’a ?

’A tai’o ai ’outou i teie mau salamo ’āruera’a hope’a, ’a feruri i te mau tumu e ’ārue ai ’outou i te Fatu. Nō te aha e mea faufa’a ’ia ’ārue iāna ? E aha te tahi mau rāve’a e ’ārue ai iāna ?

• E nehenehe ’outou ’aore rā hō’ē o tā ’outou mau tamari’i e tai’o i te Salamo 102:1–2, ma te ’imi e nāhea te Fatu i te tauturu ia tātou i roto i tō tātou mau fifi. Nāhea e roa’a ai ia tātou tāna tauturu ? E nehenehe ato’a e fa’a’ite i te tahi ’e te tahi i te mau taime ’a hina’aro ai ’outou i te tauturu ’e ’a ’ite ai ’outou ē, ’ua fa’aro’o te Atua i tā ’outou mau pure.

• E ’ārearea paha tā ’outou mau tamari’i ’ia paraparau mai nō ni’a i te huru ’ia vai i roto i te pōiri. ’Aore rā e paraparau rātou i te mau mea fifi e rave i roto i te pōiri. E nehenehe ’outou e ani ia rātou ’ia rave i te hō’ē mea ma te tāpiri i tō rātou mata, mai te pāpa’ira’a i te hō’ē hōho’a. E aha tā tātou e ha’api’i nei mai roto mai i te Salamo 119:105 nō ni’a i te māramarama ’e te parau a te Atua ?

• ’A ’imi i te mea tā tō tātou Metua i te ao ra i hōro’a mai nō te tauturu ia tātou ’ia fa’aea noa i ni’a i tōna ’ē’a, i roto i te mau ’īrava i muri nei : Salamo 119:47–48 ; 119:105 ; 1 Nephi 11:25 ; 2 Nephi 31:20. E aha tā tātou e nehenehe e rave nō te fa’aea noa i ni’a i te ’ē’a o te Atua ?

• E au paha tā ’outou mau tamari’i ’ia hi’o i te mau hōho’a nō te mau mea i fa’ahitihia i roto i te Salamo 119:105. E nehenehe rātou e tu’u i te mau hōho’a ’ia au i te ’āna’ira’a ’a tai’o ai rātou i te ’īrava. E nehenehe ato’a ’outou e hīmene ’āmui mai « Ha’api’i mai te ’ē’a » (Buka hīmene nā te mau tamari’i, 177) ’aore rā « Je marche avec Jesus » (Vaira’a buka ’evanelia).

• E nehenehe e hāmani i te mau tāpura poto nō te mau mea tā ’outou i ’ite nō ni’a i tā ’outou mau tamari’i. ’A tai’o ai ’outou i te mau tāpura te tahi i muri i te tahi, ’a ani i te mau tamari’i ’ia ’imi ’o vai tā ’outou e parau ra. I muri iho i te tai’o-’āmui-ra’a i te Salamo 139:1–3 e nehenehe ’outou e tāpura i te mau mea tā tō tātou Metua i te ao ra ’e Iesu i ’ite nō ni’a ia tātou.

• ’A pāpa’i i te mau parau a te Salamo 139:23–24 i ni’a i te hō’ē pāpie ’iti ’aore rā i te hō’ē tāpura ’ere’ere. ’A ani i tā ’outou mau tamari’i ’ia rēni i te mau ta’o e fa’ata’a nei i te mau mea tā te Atua e nehenehe e rave nō tātou. Nō te aha tātou e hina’aro ai ’ia rave te Atua i teie mau mea ?

• E ani i te mau tamari’i ’ia fa’ati’a mai i te hō’ē taime ’ua ha’apoupou te ta’ata ia rātou ’aore rā, ’ua parau mai ē, e mea maita’i roa te ’ohipa tā rātou i rave. ’A fa’a’ite i te tahi o te mau mea maitata’i i roto i te Salamo 146:6–9 tā te Fatu i rave (tauturu i tā ’outou mau tamari’i ’ia māramarama i te mau ta’o mātau-’ore-hia). E ani i tā ’outou mau tamari’i ’ia paraparau mai nō ni’a i te tahi atu mau mea tā te Fatu e rave nei nō tātou. Nāhea tātou e ’ārue ai iāna nō taua mau mea ra ?