Te mau peropheta ’e te parau tohu

E ’ohipa rahi tā te mau peropheta ’e te parau tohu i te roara’a o te Faufa’a Tahito. ’Ua ’ite Aberahama, Isa’aka, ’e Iakoba i te mau ’ōrama ’e ’ua paraparau i te mau ve’a nō te ra’i mai. ’Ua paraparau ’o Mose i te Atua mata ’e mata ’e ’ua fa’a’ite mai i tōna hina’aro i te mau tamari’i a ’Īserā’ela. Tē fa’ati’a nei te buka mātāmua ’e te piti a Te mau Tāvana i te mau ’ohipa ’e te mau ha’api’ira’a fa’ahiahia a nā peropheta Eliaha ’e Elisaia. Tē parau ato’a nei te Faufa’a Tahito nō ni’a i nā peropheta vahine mai ia Miriama ’e Debora, ’e te tahi atu mau vahine tei ha’amaita’ihia nā roto i te vārua tohu, mai ia Rebeka ’e ’o Hana. ’E noa atu ē, ’aita te mau Salamo i pāpa’ihia e te mau peropheta i ha’amanahia, ’ua ’ī ato’a rā i te vārua tohu, i te tohura’a iho ā rā i te taera’a mai o te Mesia.

E ’ere te hō’ē o te reira i te ’ohipa māere nō te mau melo o Te ’Ēkālēsia a Iesu Mesia i te Feiā Mo‘a i te mau Mahana Hope’a nei. ’Oia mau, tē ha’api’ihia nei tātou e te ’evanelia a Iesu Mesia i fa’aho’ihia mai ē, e’ita te mau peropheta i te feiā tu’iro’o noa nō te ’ā’amu, e tuha’a faufa’a ato’a rā nō te fa’anahora’a a te Atua. Noa atu ē tē fa’ariro nei te tahi pae i te mau peropheta ’ei feiā nō te ’anotau ana’e o te Faufa’a Tahito, ’āre’a tātou, tē fa’ariro nei ïa ia rātou ’ei tū’atira’a nō tātou i te tau o te Faufa’a Tahito.

Te tai’ora’a rā i te hō’ē pene i roto i te Isaia ’aore rā i te Ezekiela, e riro ïa ’ei mea ta’a ’ē i te tai’ora’a i te hō’ē a’ora’a nō te ’āmuira’a rahi a te peresideni ora o te ’Ēkālēsia. I te tahi taime e mea huru fifi ’ia hi’o ē, e parau tā te mau peropheta tahito nō tātou. ’Ia ferurihia, e mea ta’a ’ē roa tō tātou ao i teie mahana i te ao i reira rātou i te poro-haere-ra’a ’e i te tohu-haere-ra’a. E i te mea ē, e peropheta ora tō tātou, e tae mai ïa teie uira’a : Nō te aha pa’i e mea faufa’a ’ia tāmata i te fa’aitoito—’e e tītauhia iho ā ’ia fa’aitoitoo—nō te tai’o i te mau parau a te mau peropheta tahito ?

Nō te rahira’a o rātou, e ’ere te mau ta’ata nō teie ’anotau te feiā tā te mau peropheta o te Faufa’a Tahito e paraparau mātāmua nei. E mau māna’ona’ora’a iho tā te reira mau peropheta i paraparau i tō rātou tau ’e i te vāhi tei reira rātou—mai tā tō tātou mau peropheta i te mau mahana hope’a nei e paraparau nei i tō tātou mau māna’ona’ora’a i teie tau.

I te hō’ē ā taime, e nehenehe ato’a te mau peropheta e ’ite i ’ō atu i te mau māna’ona’ora’a nō te reira iho taime. E ha’api’i rātou i te ta’ata i te mau parau mau mure ’ore e tano i te mau tau ’e i te mau vāhi ato’a. ’E nā roto i te ha’amaita’ira’a o te heheura’a, tē ’ite ra rātou i te ’ā’anora’a o te fā o te ’ohipa a te Atua. ’Ei hi’ora’a, ’ua fa’aara Isaia i te mau ta’ata o tōna tau nō ni’a i tā rātou mau hara. ’Ua pāpa’i ato’a ’oia nō ni’a i te matarara’a te ’āti ’Īserā’ela i te tītīra’a e 200 matahiti i muri mai. I te hō’ē ā taime, ’ua hōro’a ’oia i te ha’api’ira’a nō ni’a i te ha’amatarara’a i te tītīra’a e ’imihia ra e te mau ta’ata ato’a o te Atua. E ’ua pāpa’i ’ōna i te mau parau tohu e tīa’i noa nei ā i tō rātou tupura’a ē tae noa mai i teie tau—mai te mau fafaura’a o te hō’ē « fenua ’āpī » (Isaia 65:17) tei « ’ī i te ’ite ia Iehova » (Isaia 11:9) i reira te mau ’ōpū mo’e o ’Īserā’ela e ha’aputuputuhia ai, ’e « e ’ore te hō’ē fenua » « e ha’api’i fa’ahou i te tama’i » (Isaia 2:4). Te hō’ē tuha’a nō te ’oa’oa ’e te fa’aurura’a e tae mai mai roto mai i te tai’ora’a i te mau parau a te mau peropheta o te Faufa’a Tahito, mai ia Isaia, ’o te ’itera’a ïa ē, e tuha’a ’ohipa tā tātou i roto i te mau mahana hanahana tā rātou i ’ite ātea.

Nō reira, ’ia tai’o ana’e ’outou i te mau tohura’a tahito, e nehenehe te reira e tauturu mai ’ia ’ite nō te aha te reira i pāpa’ihia ai—’ia hi’o ato’a rā ’outou ia ’outou iho i roto i te reira, ’oia ho’i, ’ia « fa’aauhia ho’i i ni’a ia ’outou » (1 Nephi 19:24 ; hi’o ato’a ’īrava 23). I te tahi mau taime, tōna aura’a ra ’o te ’itera’a ïa e taipe Babulonia nō te hara ’e te te’ote’o, e ’ere i te ’oire noa i tahito ra. Te tahi aura’a e noa’a mai, ’oia ho’i, ’o ’Īserā’ela te nūna’a o te Atua i te mau taime ato’a ’e i te mau vāhi ato’a. ’Aore rā, ’o te hi’ora’a ïa ia Ziona ’ei fā nō te mau mahana hope’a nei tā te mau ta’ata o te Atua e ’ati atu, ’eiaha rā te hi’ora’a i te reira ’ei ta’o ’ē atu nō Ierusālema.

E nehenehe tātou e fa’aau i te mau pāpa’ira’a mo’a i tō tātou orara’a nō te mea tē hāro’aro’a nei tātou ē, e tupu te parau tohu i roto i te raura’a o te mau rāve’a. ’Ei hi’ora’a tano, ’o te parau tohu ïa i roto i te Isaia 40:3 : « Tē pi’i mai ra te hō’ē reo i te mēdēbara, ’a fa’anehenehe na i te ’ē’a o Iehova. » Nō te mau ’āti Iuda i fa’atītīhia i Babulonia, e nehenehe teie fa’ahitira’a parau e riro ’ei fa’a’itera’a nō ni’a i te hōro’ara’a te Fatu i te hō’ē rāve’a nō te ora mai i te fa’atītīra’a ’e nō te ho’i mai i Ierusalema. Nō Mataio, Māreko ’e Luka, ’e tohu teie nō Ioane Bāpetizo ’o tei fa’aineine i te ’ē’a nō te misiōni a te Fa’aora i te tāhuti nei. ’E ’ua fa’ari’i Iosepha Semita i te heheura’a ē, tē tupu noa ra ā teie tohura’a i te mau mahana hope’a nei nō te fa’aineinera’a i te misiōni mileniuma a te Mesia. ’Ia au i te mea tā tātou e hāro’aro’a nei, ’ua paraparau mau te mau peropheta i tahito ra ia tātou nei. ’E ’ua ha’api’i mai rātou i te mau parau mau mure ’ore e rave rahi ’e te faufa’a rahi ’e te tano maita’i ia tātou nei, mai i tō ’Īserā’ela i tahito ra.

Pēnei a’e te mea faufa’a rahi atu ā i te ’itera’a ia ’outou iho i roto i te mau parau tohu o te Faufa’a Tahito, ’o te ’itera’a ïa ia Iesu Mesia i roto i te reira. ’Ia ’imi ’outou iāna, e ’itehia mai ’ōna ia ’outou, noa atu ē, ’aita i fa’ahitihia tōna i’oa. E mea tauturu paha ’ia ha’amana’o noa ē, te Atua nō te Faufa’a Tahito, te Fatu ’o Iehova, ’o Iesu Mesia ïa. I te mau taime ato’a e fa’ata’a ai te mau peropheta i te ’ohipa tā te Fatu e rave ra, ’aore rā ’o tāna e rave, tē parau ra ïa rātou nō te Fa’aora.

E ’ite-ato’a-hia ia ’outou te mau fa’ahitira’a nō tei Fa’atāhinuhia, te hō’ē Tāra’ehara ’e te hō’ē Ari’i a muri a’e mai roto mai i te rēni tuatāpapara’a tupuna o Davida. E mau parau tohu ana’e teie nō ni’a ia Iesu Mesia. Te rahira’a o te taime, e tai’o ’outou nō ni’a i te matarara’a i te tītīra’a, te fa’a’orera’a hara, te fa’aorara’a ’e te fa’aho’i-fa’ahou-ra’a mai. Ma te Fa’aora i te ferurira’a ’e i te ’ā’au, e fa’atoro ’ōhie noa teie mau parau tohu ia ’outou i te Tamaiti a te Atua ra. ’E ’ia hi’ohia, te rāve’a maita’i a’e nō te hāro’aro’a i te parau tohu ’o te fa’ari’ira’a ïa « i te vārua o te tohu », tā Ioane e parau nei ia tātou ē, ’o « te parau ia Iesu ra » (’Āpokalupo 19:10).