“Ahkos 24–30. ‘I Pahn Kosoiahiong Kumwail Dahme E Ketin Wiagiongehr Pali Ngeni’: Melkahka Kan 49–51; 61–66; 69–72; 77–78; 85–86,” Kohdo, Idawehn Ie—Ohng Tehnpesomwi oh Imwen Sarawi Kan: Kadehdeh Mering 2026 (2026)
“Ahkos 24–30. ‘I Pahn Kosoiahiong Kumwail Dahme E Ketin Wiagiongehr Pali Ngeni,’” Kohdo, Idawehn Ie: Kadehde Mering 2026
Kapwurehdo Me Salongalahr Kan, sang Michael Malm
Oahkos 24–30: “I Pahn Kosoiahiong Kumwail Dahme E Ketin Wiagiongehr Pali Ngeni”
Melkahka kan 49–51; 61–66; 69–72; 77–78; 85–86
Soun nting kan en nan pwuken Melkahka Kan kasalehda pepehm en loalerail nan ahr mahsen kan. Irail ntingiedi arail pepehm en peikasal, masopwehk, oh pahtou. Ekei pak, re kin pehm me Koht likidmelieirail lahr, oh ekei irail kin wia mwekid en lineringer de saruwaru. Ma komwi kin iang ahneki soangen pepehm wet, ah ni omw Pahn wadek pwuken Melkahka Kan komwi Pahn diarada me kaidehn komwi kelehpw. Ahpw komw pahn diarada mehkot sang nan ire kesempwal pwukat me pahn sewesei komwi, pwehki soun nting en nan pwuken Melkahka Kan kin kepinga kupwur mwahu en Kauno, oh Sapwellime manaman, oh mahk. Irail wehwehki me kitail direki me suwed oh dihp ahpw Kauno me ketin “kupwur mwahu, oh diren mahk” (Melkahka Kan 86:5). Irail wehwehki me ahneki pwoson sohte wehwehki me komw sohte pahn lelohng apwal en pwunod, dihp, de masopwehk. E wehwehki me komw wehwehki isime komw pahn sohpeieng ansou me ke wia mepwukat.
Mehn Kasukuhl ohng Tehnpesomwi oh Imwen Sarawi kan
Melkahka kan 49; 62:5–12
Sises Krais me wia Sounkomouro.
Melkahka Kan 49 rongamwahu ohng “me lapalap oh me tikitik kan, me kepwehpwe oh me semwehmwe kan” (verse 2). Ia wehwehn padahk wet? Ia ahmw pepehm Melkahka Kan 62:5–12 ohng Padahk wet?
Wasahn wadawad wet pahn elehiong komwi en medemedewe dahme kahrehda kitail kin wia mehkot me sohte wia kupwuren Koht (kilang Melkahka Kan 49:6–7). Ia wekdeklahn omw mour me sang omw Kadehde me pid “Koht Pahn ketin kapitiehla, e pahn ketin doareiehsang nan manaman en mehla”? (Melkahka Kan 49:15).
Melkahka Kan 51; 85–86
Pwehki diren mahk me Sounkomouro sapwelimanki, I kak ale mahkepen dipei kan.
Nahnmwarki Dehpit ntingiada Melkahka Kan 51 mwurin ah diarada me e ananhne douluhl ale mahkepen dipe—mehkot ieu me kitail anahne. Mehnia ire me kawehwehda omw pepehm kan? Dahme komw alehdi sang nan ire pwukat me kihong komwi koapwoaroapwoar ohng mahkepomw?
Komw pil kak rapahki nan Melkahka kan 51 wehwehn koluhla. Ntingihdi dahme ke diarada. Kilang ma komw kak diarada ekei ire kesempwal sang nan en President Russell M. Nelson Padahk me pid “Kitail kak wia mwahu sang met oh kamwahuiala” (Liahona, Mei 2019, 67–69).
Ia mwomwen omw pahn kawehwehda omw pepehn ohng ale mahk sang rehn Krais? Ma komw anahne sawas en kawehwehda omw pepehm kan, komw kak wadek Melkahka Kan 51:1–2, 7–12; 85:2–9. Ekei kin mwahuki maleniada de kilangada kilel kan me pahn kawehwehda ahr pepehm kan; komw pil kak song wia met Komw pil kak kouliki de rong melkahka me iei “I Stand All Amazed” (Melkahka, no. 193).
Pwehn koluhla, kitail anahne ahneki pwoson kaidehnte pwehki me Sises Krais kak kamwakelei kitailda ahpw me udahn e pahn. Soahng da me komw diarada nan Melkahka Kan 86:5, 13, 15 me kadehdehiong komwi me Sounkomouro udahn pahn mahkohng komwi ?
Pil kilang Alma 36; Peter F. Meurs, “E Pahn Ketin Kamwahuihala Iehla!,” Liahona, Mei 2023, 39–41.
Melkahka Kan 51:13–15; 66:5–20; 71:15–24
Ahi kadehdeh pen Sises Krais kak wahdo mehteikan Reh.
Medemedewe mwomwen ahmw alehdi omw kadehdeh pen Sises Krais oh manaman en Sapwellime tomwo. Pil onopiki Melkahka Kan 51:13–15; 66:5–20; 71:15–24, medewe mwomwen omw kak lukehiong mehteikan kan en “patohdo oh Kadehdeh Dahme Koht Ketin wiadahr” (Melkahka Kan 66:5). Ma komw pahn “kosiahiong irail dahme Kauno Ketin wiahiong uhkehr” (Melkahka Kan 66:16), dahme komw pahn kosoia?
Ia omw wehwe me pid “kalohkiselli Sapwelime pwung sang nimenseng lel nihpwong”? (Melkahka Kan 71:24).
Pil kilang Alma 26.
“Patohdo oh rong, … I ahpw Pahn Kosoiahiong Kumwail dahme Koht Ketin wiahiongieier” (Melkahka Kan 66:16).
Melkahka Kan 63; 69; 77–78
Kauno pahn seweseie nan ahi apwalakan.
Ekei ireh kan Nan pwuken Melkahka Kan kawehwehda pepehm en ansou me komw dohsang ngenen Koht oh omw kin anahneda Sapwelime sawas (kilang Melkahka Kan 63:1, 8; 69:1–8, 18–21; 77:1–9). Sang nan Melkahka Kan 63; 69; 77–78, dahme kin kihieng irail soun nting kan koapwoaroapwoar?
Nan irair en kapwunod kan, dahme kin sowesei komwi en “tamanda wiepen nin limen Kauno me lapalap akan” oh “soahng kopwuriamwei kan men E wiadahr kawao”? (Melkahka Kan 77:11). Kawehwehpen doahk kopwuriamwei pwukat mih nan pwuken Melkahka Kan 78. Ni ahmw pahn wadek mepwukat, medewe dahme kin seweseiuk en “koasoanehdi [ahmw] koapwoaroapwoarki Koht” (verse 7).
Kalaudpe, kilang pwuken nan sounpwonget Liahona oh makesihn en Ohng Kakehlepen Me Pwulopwul kan.
Iren kaweid en Kaskuhl ohng Seri Kan
Pwehki rahn sarawiet ah wia kelimaun rahn sarawi nan sounpwonget, sounpadahk ohng seri kan anahne doadoahngki mehn kamwadong ohng kasukuhl kan nan “Iren Kaweid Kapatapat A: Kaunopada Noumwail Seri Kan en Weweid Nahn Ahl en Inouo Kohkohlahte.”
Melkahka Kan 51; 86:5, 13, 15
Sises kak wekidiehla, ma I wiahda pilipil sapwung.
-
Pwehn sewese noumwail seri kan en diarada padahk mehlel kan en koluhla nan Melkahka Kan 51, ke kak mahleniada ehu lapalahn mohngiongen. Uhd mweidehng noumwail seri kan en ntingiedi nan mohngiongo soahng sakanakan kan me tepelo kin mwahuki kitail en wia. Ia mwomwen atail kak kihsang soahng pwukat nan atail mohngiong? Ndahiong Serih kan en kilangada lepin lokaia “mohngiong” nan Melkahka Kan 51:10, 17. Kosoia pene dahme ire pwukat padahngki duwen pwoson. Mweidehng seri kan en irisasang lokaia kan nan mohngiongo irail uhd ntingiedi ekei lepin lokaia kapw me kawehwehda ahl akan me Sises kak sewesehkin kitail en weliakapwala.
-
Mwein ke pahn anahne sewese noumwail seri kan en esehla ia wehwehn en ahneki “mohngiong ohla oh mwakelekel” (Melkahka Kan 51:17). Irail kak wad emen kawehla mehkot me kekelwak, me duehte kutohr de weren tuhke. Ke kak seweseirail karasahiong mehkot wet soahng kan koaros me kin keremwpwa atail kak en kehn limpoak en Sahm Nanleng. Ia mwomwen atail kak riting ohng Ih atail mohngiong kan?
-
Kumwail pil kak kilang pene ehu kilel en Soundoaro oh idek rehrail soangen lepin lokaia da me re pahn doadoahngki pwehn kawehwehda duwen Ih. Lukehiong irail en kilangda mahsen kan me kawehwehda duwen Ih nan Melkahka Kan 86:5, 13, 15. Dahme e kesempwaliki kitail en ese soahng pwukat duwen Ih?
Melkahka Kan 61:2–3
Sises Krais iei ahi takain pwukekeimw.
-
Noumwail seri kan kakete pereniki mahleniedi kasansal kan nan Melkahka Kan 61:2–3. Ia mwomwen Sises Krais ah duehte takai ehu me “ile” (ire tikitik 2), “imwen keiru,” oh “dahwer ehu me kehlail”? (ire tikitik 3).
“Komw ketkihwihng Ie Wasahn ruk mwahu, pwe komwi me silepei ” (Melkahka Kan 61:3).
Melkahka Kan 66:16; 77:11; 78:6–7
“Maing Kaun, I Pahn patohwan tamanda wiepen nin limomwi lapalap akan.”
-
Pekihda rehn seri kan en ehukihda ekei soai en pwuhk sarawi kan me irail kin pereniki (kilel kan sang Gospel Art Book pil kak sawas). Dahme soai pwukat padahkihong kitail duwen Kauno? kumwail kak wadekpene Melkahka Kan 66:16 oh wad emen sapeng peidek me nda “Dahme kauno wiahiongehr peli ngeniet”?
-
Ni amwail pahn wadek pene Melkahka Kan 77:11; 78:6–7, kumwail kak ehukipene ia mwomwen amwail kin song en “tamataman doadoahk kan en Kauno” (Melkahka Kan 77:11), iangahki Sapwelime doadoahk kan nan ahmw mour. Ia mwomwen kamadipw sarawi ah sewese kitail en “tamataman ansou koaros”? (Moronai 4:3; 5:2).
Melkahka Kan 71:8
I Kak padahkihong Mehteikan duwen Sises.
-
Mwurin amwail wadek Melkahka kan 71:8, lukehiong irail en mahleniada ehu lapalahn owe. Ndahiong irail en seweseiuk “audehkihda” kilel de lokaia kan me pid soahng kan me kitail kak kosoia me pid Sises Krais ohng mehteikan.
-
Ke kak kihseli nanpwungarail kilel en Sises Krais. Emen me kolokol kilelo kak koasoia ehu mehkot me irail ese duwen Ih. Ia mwomwen atail kak sewese mehteikan en ese mepwukat?
Serih kan kin pereniki ehukihda dahme re esehla. “Ansou me seri kan kin esehla mehkot kapw, irail kin mwadangete mehn ehukihong mehteikan. Kakehlailih ineng en ehuki rongamwahuo sang ni ahmw pahn mweidohng seri kan arail ansou mwahu en padahngki ire kan en rongamwahuo ohng nanpwungarail, arail peneinei kan, oh kempoakepahrail kan. Pil pekida rehrail en ehukihong uhk arail madamadau kan, pepehm, oh irair en mour kan me rasohng ire kan me ke padpadahngki. Ke pahn diarada me arail kaweid kan me mengei, mwakelekel, oh manaman” (Padpadahngki Ni Koasoandien Sounkomouro, 32).
Melkahka Kan 86:7
Sahm Nanleng kin ketin karonge oh sapeng ahi kapakap kan.
-
Pali laud en pwuken Melkahka Kan duehte kapakap kei ohng Koht. Ni amwail pahn wadek pene pwuken Melkahka Kan, ke kak kasalehiong irail soahng kan me kitail kin doadoahngki pwehn wehwehiong me dohsang kitail, me duehte delepwohn de kisin likou. Wadek Melkahka Kan 86:7. Ia mwomwen atail kin “kapakap” ohng Sahm Nanleng? Ia Sapwellime pasapeng ohng kitail?
-
Kumwail kak koulkipene ehu koul me pid kapakap, me duehte “A Child’s Prayer” (Children’s Songbook, 12–13; pil kilang Susan H. Porter, “Pray, He Is There,” Liahona, Mei 2024, 77–79). Kasukuhlkipene nanpwungamwail ansou kan me Koht kin sapeng amwail kapakap.
Kalaudpe, kilang pwuken makesihn en sounpwonget Friend.