“ Madamadau kan me ke anahne Tamataman: Wadewadek Pwoediri nan Kadehdeh Mering,” Kohdo, Idawehn Ie—Ohng Tehnpesomwi oh Wasahn Kaudok Kan: Kadehdeh Mering 2026 (2026)
“Wadewadek Soai Karasaras akan nan Kadehdeh Mering,” Kohdo, Idawehn Ie: Kadehdeh Mering 2026
Madamadau kan me ke anahne Tamataman
Wadewadek Soai karasaras akan nan Kadehdeh Mering
Nan pwuhk kan en Kadehdeh Mering sangete Senesis lel Ester, kitail pahn diar palilaud pid soai—soai poad pwukat kawehwehda mwekid kan sang kaweid en pali ngehn. Noah kawada warihmwo, Moses kapitala mehn Israel ko, Hannah kapakapki en nainekihda pwutak, oh pil me tohto. Tepsang pwuken sohp, kitail pahn diar pilehu wiepen nting. Nahn pwuhk pwukat, irail soun nting kan en Kadehdeh Mering uhd doadoahngki koasoai en soai karasaras pwehn kasalehda pepehm loal de kokohp lap kan ni soangen wiepe ehu pwehn tamataman.
Kitail kilangehr ekei karasaras en soai karasaras kan me dierek wasa tohto nan pwuken soai kan nan Kadehdeh Mering. Sang nan pwuken Sohp kohla, kitail pahn pil diar soai poad tohto. Pwuken Sohp, Melkahka kan, oh Lepin Padahk Audapan Akan palilaud ntingdi ni wiepen soai karasaras, pil duehte ekei wasa nan pwuken soukohp akan me duehte Aiseia, Seremaia, Eimwos. Pwehki mwomwen wadek soai karasaras ah weksang wadek soai, e kin anahne ehusoangen wiepen wadek pwehn kak wehwehki. Iet ekei iren madamadau me kak seweseiuk en ekis kalaudehla ahmw wehwehki wehwehn soai karasaras kan nan Kadehdeh Mering.
Esehla duwen soai karasaras en Ipru
Keieu, e kak seweseiuk en ese me Soai karasaras en Ipru nan Kadehdeh Mering sohte wiawihkihda koasoai kan me duepene de wehwe pil duepene, me duehte ekei soai karasaras akan. Oh mendahte mwomwen ngihl, wiepen koasoai, oh ngihl me kin kopwurpwurieng kan ah kalapw pwerda nan soai karasaras kan en Ipru, kawehwehpen soahng pwukat koaros salongala. Ehu karasepe me ke pahn diar, iei, iren madamadau de iren kaweid kan, me ekei pak kahdaniki “lokaiahkan me wewe ehute.” Iet ehu karasaras mengei sang Aiseia:
Pwuhriong lapalapala oh kehlaila, O Zion;
Kapwatkihda omw likou lingan kan, O Serusalem. (Aiseia 52:1)
Melkahka Kan 29 direki lokaia duepene tohto—me rasehng:
Kepitien Kauno me manaman;
Kepitien Kauno me diren roson; (Melkahka Kan 29:4)
Oh iet ehu ire me kasalehda me sang ni ahmw esehier me keriaun sendenso rasehng keieuo kahrehda ah mengei en wehwehki:
Ngehi me ketikidohng lehk lapalap nan amwail kahnimw kan koaros,
Oh anahnepen mwenge nan amwail wasa kan koaros. (Eimwos 4:6)
Nan karasaras pwukat, soai karasaraso kapwurehiong iren madamadau ehute me ekis weksang me tepo. Wiepe wet kin kiheng kesempwalpen iren kaweid me kopwurpwuriengo oh doadoahngki wiepe kei pwehn kak kawehwehda ni unsek de koasoanehdi.
Nan ekei wasa, sendens riau kak doadoahngki lokaia me kerenieng duepene pwehn kasalehda iren kaweid me wekpeseng, me duehte met:
Sapengki ngihl tikitik kin kameleilei lingernger:
Ahpw ngihl kehlail kin kamwakidada: (Lepin Padahk Audapan Akan 15:1)
Soangen wiepen nting wet kaidehn sapwungala ehu. Irail soun nting kan me koasaonehdi en wia. E sewese irail en kasalehda arail pepehm en pali ngehn de padahk mehlel kan ki manaman oh kaselel. Eri ansou kan me ke pahn diar wiepen nting wet nan Kadehdeh Mering, kalelapak rehmw ia mwomwen ah seweseiuk en kak wehwehki dahme soun ntingo songosong en kaweidki. Karasepe, dahme Aiseia songosong en kosoia sang ni ah karasapene “Kehl” ohng “likou kaselel kan” oh “Zion” ohng “Serusalem”? (Aiseia 52:1). Dahme kitail kak kaimwsekihla lepin mahsen “sapengki ngihl tikitik” ma kitail ese me “ngihl laud” me wia pelie? (Lepin Padahk Audapan Akan 15:1).
E ketin Kapwurehdo Palingeni, sang Walter Rane
Miehier Iengen Soai Karasaras en Ihpru me Kapw.
Ekei aramas karasahieng wadek soai karasaras iei tuheng aramas kapw. Ahpw met wehwehki, me, wadek soai karasaras akan en Kadehdeh Mering kakete duehte ahmw tuhong aramas emen sang ehu sahpw oh ehu tiahk tohrohr me lokaiahki ehusoangen lokaia—oh momourkihier sounpar riekid samwa. Aramas menet kak tepte kosoia soahng kei me kitail sohte kak wehwehki, ahpw met sohte wehwehki me sohte mehkot kesempwal e koskosia. Kitail anahnehte en patehng irail uwen ansou ieu, pwehn song en wehwehkihla dahme irail kilang oh wehwehki. Kitail kakete esehda me nan atail mohngiong ka, kitail kak wehwepene mwahu. Oh ma kitail kasalehiong kanengamah oh limpoak, aramas kapw menet kakete wiahla kempoakepahtail kesempwal.
Eri ansou me ke pahn wadek sang Aiseia, karasahiong, ahmw tuhong aramas kapw emen. Peidekiong pein kowe, “Ia udahn ahi pepehm?” Saongen pepehm da me ire wet wiahngiel—mendahte ma ke sohte wehwehki lepin koasoai ko koaros. Eri kahpw pwurehng wadek pak kei, ma ke kak. Pil song wadekada ni ngihl laud; ekei aramas kin diar wehweh sang wiepe wet. Kilang soangen lepin lokaia kan me Aiseia doadoahngki, ahpw mehlel lepin lokaia kan me kihong kilel nan ahmw madamadau. Pepehm da me kilel pwukat kiheong uhk? Dahme irail kasalehda me pid en Aiseia ah pepehm? Sang ni ahmw pahn onohnopiki mahsen en irail soun nting kan nan Kadehdeh Mering, ke pahn diarada me irail pilada ni keneinei lepin lokaia kan oh wiepe kan pwehn kak kapwil mahseno sang ngehn sarawi.
Pwohem kak wia kempoakepahtail kesempwal pwehki irail kin sewese kitail en wehwehki atail pepehm oh malipilip kan nan atail mour. Pwohem kan nan Kadehdeh Mering me keieu kesempwal pwehki irail kin sewese kitail en wehwehki atail pepehm keieu kesempwal kan oh malipilip kanl—ahpw mehlel me pid nanpwungen Koht oh kitail.
Ansou me ke pahn onopiki soai karasaras akan nan Kadehdeh Mering, tamataman me onopiki pwuhk sarawi kin keieu kesempwal ma e kin kahluwai kitailahng Sises Krais. Rapahki kasansal kan, kilel, oh padahk mehlel kan me kin kalaudehla ahmw pwoson Ih. Rong kaweid en Ngehn Sarawi ni ahmw onopiki.
Kasukuhl en Marain
Ehu Pali en soai poad en nan Kadehdeh Mering iei me irail me loalokong kan kin kahdaniki “kasukuhl en marain.” Sohp, Lepin Padahk Audapan Akan, oh Eklesiasdes koaros iang mih nan pali wet. Ah Melkahka Kan, kasalehda pepehm en kaping, pahtou, oh pwongih, kasukuhl en marain kin kasalehda kaweid tohto de peidek, loal kan. Karasepe, pwuken Sohp, kaweidki pwuhng en Koht oh kahrepen lokolok en aramas akan. Lepin Padahk Audapan Akan sawaski kaweid pen mwomwen momour pwung, me iangahki mahsen en erepit kei me kohpene oh popousdo sang mehn mahsoko. Oh Eklesiades kaweidki kalelapak pen kahrepen mour wet—wasa me soahng koaros sohte pahn erein oh kasahliel, iawasa kitail pahn diar ie mehlelo? Ke kak medewehiong kasukuhl en marain me e wia koasoakoasoaipene ehu nan pwungen kowe oh emen soun kasukuhl me men ehukihda mwomwen ah wehwehkihla Koht oh sampah me E ketin kapikadahrl—oh seweseiuk en kalaudehla ahmw ese mepwukat.