Esra 1; 3–7; Nehmaia 2; 4–6; 8

Mwurin mehn Persia kan ahr kalowedier mehn Papilon kan, Kauno ahpw kaweidki nahnmwarki en Persia, Sairus, sang kaweid en ngehn sarawi en kadarala ehu pwihn en mehn Suhs nan Serusalem pwehn pwurehng kauwada tehnpas sarawio. Ni ahmw pahn wadek Esra 1, kilelehdi dahme Sairus wiaiong irail mehn Suhs akan nan doadoahk kesempwal wet. Ia mwomwen ahmw kilang Kauno ah ketin wie doadoahngki mehn mpomw ohl oh lih akan, pil iangahki irail akan me sohte wia tohn Sapwellime Mwomwohdiso? Dahme ire wet kaweidkinuhk me pid Kauno oh Sapwellime doadoahk?

Pil tehk Aiseia 44:24–28.

Ansou me mehn Papilon kan kalowehdi mehn Serusalem kan, irail kawehla tehnpas sarawio oh isikada (tehk 2 Nahnmwarki Kan 25:1–10; 2 Kronikel 36:17–19). Ia pahn mwomwen ahmw pepehm ma kowe emen mehn Suhs me iang mih wasahu oh kilang mwekid wet? (tehk Melkahka Kan 137). Tehk mwahu dahme mehn Suhs akan pehm, pahr ekei mwuri, ansou me irail mweimweidahr en pwurala oh pwurehng kawada tehnpas sarawio (tehk Esra 3:8–13; 6:16–22). Met kak kapehm kinuhk en medemedewe pein ahmw pepehm ong Kauno oh Sapwellime tehnpas. Dahme kahrehda kokoudahn tehnpas sarawi wia mwekid ehu me kitail en perenikihda?

Sapwellimen Kauno doadoahk sohte kin mengei ansou koaros. Met mehlel pweh rasehng mwekid kan Serupapel oh Nehmaia wiahier. Iet ehu kaweid ong mwomwen ahmw pahn kak esehla sang soai pwukat oh pilada mwomwen ahmw pahn wia Sapwellimen Kauno doadoahk mendahte kaupeh kan:

Sapwellimen Kauno doadohk ong Serupapel (Esra 4:3):

Sapwellimen Kauno doadohk ong Nehmaia (Nehmaia 2:17–18):

Sapwellimen Kauno doadohk ohngie:

Kahpwal me Serupapel lelohng (Esra 4:4–24):

Kahpwal me Nehmaia lelohng (Nehmaia 2:19; 4:1–3, 7–8; 6:1–13):

Kahpwal mei kin lelohng:

Ia mwomwen ahn Serupapel pasapeng (Esra 5:1–2):

Ia mwomwen ahn Nehmaia pasapeng (Nehmaia 2:20; 4:6, 9; 6:3–15):

Ia mwomwen ahi pahn inginlangih:

Pwehn sewese karasahieng ahmw mour en Nehmaia, ke kak onopiki en Presiden Dieter F. Uchtdorf padahk “Kitail Wiewia Doadoahk Laud ehu oh Sohte Kak Tikitikla” (Liahona, Mei 2009, 59–62), ahpw mehlel iralaud riau ni imwilahu. Ni ahmw pahn medemedewe doadoahk me Kauno ketkihieng uhk, ke kak onopiki “Oaralap en Peinakapw Akan” de “Oaralap en Kuohrom en Aaronic Prihsduhd Kan” (Gospel Library). De ke pil kak kilang koul en sarawi meduehte “As Sisters in Zion” (Koulen Sarawi, nempe. 309) de “Ye Elders of Israel” (Koulen Sarawi, nempe. 319).

Ia ahmw madamadau ohng wehwehn en “ahneki madamadau en doadoahk” nan Sapwelimen Sounkomouro papah? (Nehmaia 4:6). Ia wehwehn en alehda “lime mwahu kan en … Koht [pohmw]” ni ahmw wiewia Sapwellime doadoahk? (Nehmaia 2:8; pil tehk Nehmaia 2:18; Esra 7:6, 9, 27–28). Ia mwomwen ahmw kilangehr Limeh kan ah seweseiuk nan ahmw kin papah Ih?

Nan pahr tohto me irail mehn Suhs akan wie senselki, e itait arail mweimwei ohng “pwuken kosonned en Moses” (Nehmaia 8:1). Nan Nehmaia 8, Esra wadekohng aramas akan kosonned ko. Dahme iralaud wet kasalehionguhk me pid duwehn en Esra oh nah aramas akan ahr pepehm ohng Kauno oh Sapwellime mahsen? (ahpw mehlel kilang ire tikitik 1–12). Dahnge kan nan ahmw mour me kasalehda mwomwen ahmw pepehm ohng Kauno oh Sapwellime mahsen?

Pil kilang Padahk kan en Presiden kan en Mwomwohdisoht: Ezra Taft Benson (2014), 115–24.

• Pwehn kasukuhlihki noumw seri kan duwehn peren me irail mehn Suhs akan kehn ansou me arail tehnpas sarawio pilehuehr kokouhda, ke kak kasalehiong irail kilel wet me mih pah. Kosoia dahme kak kahrehda aramas pwukat ahr peren ni ahr mihmi ni tehnpesen Kauno. Ke pil kak ndahng noumw seri kan dahme kahrehda tehnpas sarawi wia wasahn popohl ong uhk. Ia mwomwen tehnpas sarawi ah sewese ahmw pepehm en karaniala Sahm Nanleng oh Soundoaro?

• Ni ahmw pahn wadekehng Esra 3:10–13 noumw seri kan, seweseirail en kilangada lepin lokaia kan me kasalehda en mehn Suhs akan ahr pepehm ansou me tehnpas sarawio pwurehng wie kokouda. Ansou me kumwail lel ni imwin ire tikitik 13, mwein kumwail kak pil werkihda amwail peren. Sewese noumw seri kan en medewehda kahrepe kan en ahneki popohl pwehki Kauno ah ketikihong kitailehr tehnpas sarawi kan. Ia mwomwen atail kak kasalehdo popohl wet?

• Pil song koulkihong noumw seri kan koul me pid tehnpas sarawi, me rasehng keriaun iren koul me kahdaniki “Welcome Home” (Gospel Library). Mwurin ehu ehu ire, kek kak kauhdi koulo oh pekihda rehn emen seri en ehukihda soahng da me pid tehnpas sarawi meh poakohng. Kumwail pil kak kilangpene kilel en tehnpas sarawi kan ni amwail wie kokoul.

• Ehukihong noumw seri kan soai en Nehmaia (see Nehmaia 2:17–20; 6:1–9; or “Nehmaia” in Soai kan nan Kadehdeh Mering, 173–74). Ni amwail pahn wadek Nehmaia 2:20, kowe oh noumw seri kan kak “uhda” oh kamwomwehda seusewese kawada kehl en Serusalem. De noumw seri kahn pil kakete pereniki kawada kehl ki piloak de soahng teikan. Ni arail pahn wiewia met, ke kak seweseirail en medewehda soahng kesempwal kan me Sahm Nanleng kupwurki kitail en wia.

  

  1:38

• Ni amwail pahn wadekpene Nehmaia 6:9, Lukehiong noumw seri kan en kin kawada pehrail kan ansou me ke pahn nda “kakehlailih pehikat.” Kosoiahng noumw seri kan ansou ehu meke kehn Koht ah ketin kakehlailihda pehm kan pwehn wia Sapwelime doadoahk.

• Wadekada ni ngihl laud ekei lepin koasoai sangNehmaia 8:2–3, 5–6, 8–9, 12 me kawehwehda dahme aramas akan wia ansou me re rong Esra ah wadekada pwuhk srawi kan. Ni amwail pahn wie wadawad, noumw seri kan kak sohngada wiahda lepin koasoai pwukat. Kumwail ahpw uhd ehukipene dahme kumwail kehn ansou me kumwail wadek oh rongpene iren pwuhk sarawi pwukat.

• Ni amwail pahn wadek pene Nehmaia 8:8, ke kak idek rehn noumw seri kan dahme kin seweseirail ren kak wehwehki pwuhk sarawi kan. Kasalehiong irail mwomwen arail pahn doadoahngki kaweid pen onopki kan me duehte Kaweid ohng Pwuhk Sarawi kan oh Oaralap oh Peidek kan (Gospel Library). Lukehiong noumw seri kan en ehukihda dahme irail eselahr me pid Sounkomouro sang nan pwuhk sarawi kan.