“ວັນທີ 24–30 ເດືອນສິງຫາ ‘ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ’: ເພງສັນລະເສີນ 49–51; 61–66; 69–72; 77–77; 85–86,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 24–30 ເດືອນສິງຫາ ‘ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ,’” ຈົ່ງຕາມເຮົາມາ: ພຣະຄຳພີເດີມ 2026
Saving That Which Was Lost [ຊ່ວຍກູ້ສິ່ງທີ່ເສຍໄປ], ໂດຍ ໄມໂກ ມອມ
ວັນທີ 24–30 ເດືອນສິງຫາ: “ຂ້ອຍຈະບອກສິ່ງທີ່ພຣະອົງໄດ້ເຮັດເພື່ອຂ້ອຍ”
ເພງສັນລະເສີນ 49–51; 61–66; 69–72; 77–78; 85–86
ຜູ້ຂຽນເພງສັນລະເສີນແບ່ງປັນຄວາມຮູ້ສຶກສ່ວນຕົວທີ່ເລິກເຊິ່ງຢູ່ໃນບົດກະວີຂອງພວກເພິ່ນ. ພວກເພິ່ນໄດ້ຂຽນກ່ຽວກັບຄວາມທໍ້ແທ້ໃຈ, ຄວາມຢ້ານກົວ, ແລະ ຄວາມສຳນຶກຜິດ. ໃນບາງເວລາ, ພວກເພິ່ນກໍຮູ້ສຶກໄດ້ວ່າຖືກພຣະເຈົ້າປະຖິ້ມ, ແລະ ເພງສັນລະເສີນບາງບົດກໍສະແດງຄວາມບໍ່ພໍໃຈ ຫລື ຄວາມໝົດຫວັງ. ຖ້າຫາກທ່ານເຄີຍຮູ້ສຶກແບບນັ້ນ, ການອ່ານເພງສັນລະເສີນສາມາດຊ່ວຍທ່ານໃຫ້ຮູ້ວ່າ ບໍ່ມີແຕ່ທ່ານຄົນດຽວ. ແຕ່ທ່ານຈະພົບເຫັນອີກວ່າ ເພງສັນລະເສີນສາມາດໃຫ້ກຳລັງໃຈທ່ານ ເມື່ອທ່ານຮູ້ສຶກເຊັ່ນນັ້ນ, ຍ້ອນວ່າເພງສັນລະເສີນກໍສັນລະເສີນພຣະຜູ້ເປັນເຈົ້ານຳອີກສຳລັບພຣະກະລຸນາທິຄຸນຂອງພຣະອົງ, ສຳລັບອຳນາດທີ່ໜ້າງຶດງໍ້ຂອງພຣະອົງ, ແລະ ສຳລັບຄວາມປິຕິຍິນດີໃນຄວາມເມດຕາຂອງພຣະອົງ. ພວກເພິ່ນຮູ້ວ່າ ເຮົາເຕັມໄປດ້ວຍຄວາມຊົ່ວຮ້າຍ ແລະ ບາບ ແຕ່ພຣະຜູ້ເປັນເຈົ້າຍັງ “ດີ, ແລະ ພ້ອມທີ່ຈະໃຫ້ອະໄພ” (ເພງສັນລະເສີນ 86:5). ພວກເພິ່ນເຂົ້າໃຈວ່າ ການມີສັດທາໃນພຣະຜູ້ເປັນເຈົ້າບໍ່ໄດ້ໝາຍຄວາມວ່າ ທ່ານຈະບໍ່ເຄີຍດີ້ນລົນກັບຄວາມກັງວົນ, ກັບບາບ, ຫລື ກັບຄວາມຢ້ານກົວ. ມັນໝາຍຄວາມວ່າທ່ານຮູ້ຈັກຜູ້ທີ່ຈະຫັນໄປຫາ ເມື່ອທ່ານຕ້ອງການຄວາມຊ່ວຍເຫລືອ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເພງສັນລະເສີນ 49; 62:5–12
ການໄຖ່ມີມາຜ່ານທາງພຣະເຢຊູຄຣິດເທົ່ານັ້ນ.
ເພງສັນລະເສີນ 49 ມີຂ່າວສານສຳລັບ “ທັງຜູ້ໃຫຍ່ ແລະ ຜູ້ນ້ອຍ, ທັງຄົນຮັ່ງມີ ແລະ ຄົນຍາກຈົນ” (ຂໍ້ທີ 2). ທ່ານຄິດວ່າຂ່າວສານນີ້ແມ່ນກ່ຽວກັບຫຍັງ? ທ່ານຮູ້ສຶກວ່າ ເພງສັນລະເສີນ 62:5–12 ຕື່ມຫຍັງໃສ່ກັບຂ່າວສານນີ້?
ການອ່ານເພງສັນລະເສີນເຫລົ່ານີ້ ອາດດົນໃຈທ່ານໃຫ້ໄຕ່ຕອງວິທີທີ່ເຮົາຖືກລໍ້ລວງໃຫ້ໄວ້ວາງໃຈໃນບາງສິ່ງ ແທນທີ່ຈະໄວ້ວາງໃຈໃນພຣະເຈົ້າເພື່ອການໄຖ່ (ເບິ່ງ ເພງສັນລະເສີນ 49:6–7). ຊີວິດຂອງທ່ານໄດ້ຮັບອິດທິພົນຈາກປະຈັກພະຍານຂອງທ່ານວ່າ “ພຣະເຈົ້າຈະຊ່ວຍກູ້ຈິດວິນຍານ [ຂອງທ່ານ] ຈາກອຳນາດຂອງຄວາມຕາຍ” ແນວໃດ? (ເພງສັນລະເສີນ 49:15).
ເພງສັນລະເສີນ 51; 85–86
ຍ້ອນຄວາມເມດຕາຂອງພຣະຜູ້ຊ່ວຍໃຫ້ລອດ, ເຮົາຈຶ່ງສາມາດຮັບການໃຫ້ອະໄພ.
ກະສັດດາວິດໄດ້ຂຽນ ເພງສັນລະເສີນ 51 ຫລັງຈາກທີ່ເພິ່ນໄດ້ຮັບຮູ້ເຖິງຄວາມຕ້ອງການການໃຫ້ອະໄພຢ່າງຍິ່ງ—ຊຶ່ງເປັນບາງສິ່ງທີ່ເຮົາທຸກຄົນຕ້ອງການ. ຂໍ້ພຣະຄຳພີໃດແດ່ທີ່ອະທິບາຍຄວາມຮູ້ສຶກທີ່ທ່ານມີຢູ່? ທ່ານພົບເຫັນຫຍັງແດ່ຢູ່ໃນເພງສັນລະເສີນນີ້ ທີ່ຊ່ວຍທ່ານໃຫ້ມີຄວາມຫວັງສຳລັບການໃຫ້ອະໄພ?
ທ່ານອາດຄົ້ນຫາໃນ ເພງສັນລະເສີນ 51 ເພື່ອຮ່ອງຮອຍກ່ຽວກັບຄວາມໝາຍຂອງການກັບໃຈນຳອີກ. ໃຫ້ຂຽນສິ່ງທີ່ທ່ານພົບເຫັນລົງໄວ້. ລອງເບິ່ງວ່າທ່ານຈະສາມາດເພີ່ມເຕີມຫຍັງແດ່ລົງໃນລາຍການຂອງທ່ານໂດຍການຄົ້ນຫາໃນຂ່າວສານຂອງປະທານຣະໂຊ ເອັມ ແນວສັນ “We Can Do Better and Be Better” (Liahona, May 2019, 67–69).
ທ່ານຈະອະທິບາຍຄວາມຮູ້ສຶກທີ່ໄດ້ຮັບການໃຫ້ອະໄພຜ່ານທາງພຣະຄຣິດແນວໃດ? ຖ້າທ່ານຕ້ອງການຄວາມຊ່ວຍເຫລືອໃນການອະທິບາຍຄວາມຮູ້ສຶກຂອງທ່ານ, ທ່ານສາມາດເບິ່ງໄດ້ໃນ ເພງສັນລະເສີນ 51:1–2, 7–12; 85:2–9. ບາງຄົນກໍມັກແຕ້ມ ຫລື ຊອກຫາຮູບພາບ ເພື່ອສະແດງຄວາມຮູ້ສຶກຂອງເຂົາເຈົ້າອອກມາ; ທ່ານອາດຈະລອງເຮັດແບບນັ້ນກໍໄດ້. ທ່ານສາມາດຮ້ອງ ຫລື ຟັງເພງສວດທີ່ກ່ຽວກັບພຣະຜູ້ຊ່ວຍໃຫ້ລອດນຳອີກ, ເຊັ່ນ “ຂ້າເຝົ້າພິສະຫວົງ” (ເພງສວດ ແລະ ເພງຂອງເດັກນ້ອຍ, 24).
ເພື່ອກັບໃຈ, ເຮົາຕ້ອງມີສັດທາບໍ່ແມ່ນພຽງແຕ່ວ່າພຣະເຢຊູຄຣິດ ສາມາດ ຊຳລະລ້າງເຮົາໃຫ້ສະອາດໄດ້ເທົ່ານັ້ນ ແຕ່ວ່າພຣະອົງ ຈະ ເຮັດ. ທ່ານພົບເຫັນຫຍັງໃນ ເພງສັນລະເສີນ 86: 5, 13, 15 ທີ່ຊ່ວຍໃຫ້ທ່ານຮູ້ວ່າ ພຣະຜູ້ຊ່ວຍໃຫ້ລອດທັງສາມາດ ແລະ ເຕັມໃຈທີ່ຈະໃຫ້ອະໄພ?
ເບິ່ງ ແອວມາ 36; Peter F. Meurs, “He Could Heal Me!,” Liahona, May 2023, 39–41 ນຳອີກ.
ເພງສັນລະເສີນ 51:13–15; 66:5–20; 71:15–24
ປະຈັກພະຍານຂອງເຮົາເຖິງພຣະເຢຊູຄຣິດສາມາດຊ່ວຍຄົນອື່ນໃຫ້ມາຫາພຣະອົງແນວໃດ.
ໃຫ້ໄຕ່ຕອງວິທີທີ່ທ່ານໄດ້ຮັບປະຈັກພະຍານຂອງທ່ານເຖິງພຣະເຢຊູຄຣິດ ແລະ ເຖິງອຳນາດແຫ່ງການຊົດໃຊ້ຂອງພຣະອົງ. ແລ້ວ, ຂະນະທີ່ທ່ານສຶກສາ ເພງສັນລະເສີນ 51:13–15; 66:5–20; 71:15–24, ໃຫ້ຄິດກ່ຽວກັບວິທີທີ່ທ່ານສາມາດເຊື້ອເຊີນຄົນອື່ນໃຫ້ “ມາເບິ່ງສິ່ງທີ່ພຣະເຈົ້າຊົງກະທຳ” (ເພງສັນລະເສີນ 66:5). ຖ້າທ່ານຈະຕ້ອງ “ບອກສິ່ງທີ່ [ພຣະຜູ້ເປັນເຈົ້າ] ໄດ້ເຮັດເພື່ອຈິດວິນຍານ [ຂອງທ່ານ]” (ເພງສັນລະເສີນ 66:16), ທ່ານຈະບອກວ່າແນວໃດ?
ຂໍ້ຄວາມທີ່ວ່າ “ເວົ້າເຖິງຄວາມຊອບທຳ [ຂອງພຣະອົງ] ຕະຫລອດວັນ” ມີຄວາມໝາຍຕໍ່ທ່ານແນວໃດ? (ເພງສັນລະເສີນ 71:24).
ເບິ່ງ ແອວມາ 26 ນຳອີກ.
“ຈົ່ງມາຟັງເອົາສາ, … ຂ້ອຍຈະບອກສິ່ງທີ່ [ພຣະເຈົ້າ] ໄດ້ເຮັດເພື່ອຂ້ອຍ” (ເພງສັນລະເສີນ 66:16).
ເພງສັນລະເສີນ 63; 69; 77–78
ພຣະຜູ້ເປັນເຈົ້າຈະຊ່ວຍເຮົາໃນຍາມທີ່ຕ້ອງການ.
ພຣະທຳເພງສັນລະເສີນ ຫລາຍບົດໄດ້ອະທິບາຍເຖິງຄວາມຮູ້ສຶກເວລາຢູ່ຫ່າງໄກຈາກພຣະເຈົ້າ ແລະ ກໍຕ້ອງການຄວາມຊ່ວຍເຫລືອເປັນຢ່າງຍິ່ງ (ເບິ່ງ ເພງສັນລະເສີນ 63:1, 8; 69:1–8, 18–21; 77:1–9). ໃນ ເພງສັນລະເສີນ 63; 69; 77–78, ທ່ານພົບເຫັນຫຍັງແດ່ ທີ່ໃຫ້ຄວາມແນ່ນອນໃຈແກ່ຜູ້ຂຽນເພງສັນລະເສີນເຫລົ່ານີ້?
ເມື່ອທ່ານອຸກໃຈ, ການ “ຈົດຈຳວຽກງານຂອງພຣະຜູ້ເປັນເຈົ້າ” ແລະ “ການອັດສະຈັນຜ່ານມາ” ຂອງພຣະອົງ ຊ່ວຍທ່ານໄດ້ແນວໃດ? (ເພງສັນລະເສີນ 77:11). ການອັດສະຈັນບາງຢ່າງເຫລົ່ານັ້ນມີຢູ່ໃນ ເພງສັນລະເສີນ 78. ຂະນະທີ່ທ່ານອ່ານກ່ຽວກັບມັນ, ໃຫ້ໄຕ່ຕອງສິ່ງທີ່ຊ່ວຍເຫລືອທ່ານໃຫ້ “ວາງຄວາມຫວັງ [ຂອງທ່ານ] ໄວ້ໃນພຣະເຈົ້າ” ແນວໃດ (ຂໍ້ທີ 7).
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”
ເພງສັນລະເສີນ 51; 86:5, 13, 15
ເມື່ອເຮົາເລືອກຜິດທາງ, ພຣະເຢຊູສາມາດຊ່ວຍເຮົາໃຫ້ປ່ຽນແປງໄດ້.
-
ເພື່ອຊ່ວຍລູກໆຂອງທ່ານໃຫ້ຄົ້ນພົບຄວາມຈິງກ່ຽວກັບການກັບໃຈໃນ ເພງສັນລະເສີນ 51, ທ່ານສາມາດແຕ້ມຮູບຫົວໃຈໃຫຍ່ດວງໜຶ່ງ. ຈາກນັ້ນທ່ານສາມາດຊ່ວຍລູກໆຂອງທ່ານໃຫ້ຂຽນສິ່ງທີ່ບໍ່ດີຕ່າງໆທີ່ຊາຕານໄດ້ລໍ້ລວງໃຫ້ເຮົາເຮັດ ລົງໃນຮູບຫົວໃຈນັ້ນ. ເຮົາຈະເອົາສິ່ງເຫລົ່ານີ້ອອກໄປຈາກໃຈຂອງເຮົາໄດ້ແນວໃດ? ບອກໃຫ້ລູກໆຂອງທ່ານຊອກຫາຄຳວ່າ “ຫົວໃຈ” ໃນ ເພງສັນລະເສີນ 51:10, 17. ເວົ້າລົມກ່ຽວກັບຂໍ້ເຫລົ່ານີ້ສິດສອນຫຍັງແດ່ກ່ຽວກັບການກັບໃຈ. ໃຫ້ລູກໆຂອງທ່ານລຶບຂໍ້ຄວາມຕ່າງໆທີ່ຢູ່ໃນຮູບຫົວໃຈ ແລະ ຂຽນຂໍ້ຄວາມໃໝ່ທີ່ອະທິບາຍກ່ຽວກັບວິທີທີ່ພຣະເຢຊູສາມາດປ່ຽນແປງເຮົາເມື່ອເຮົາກັບໃຈ.
-
ທ່ານອາດຈະຕ້ອງການຊ່ວຍລູກໆຂອງທ່ານໃຫ້ຮຽນຮູ້ຄວາມໝາຍຂອງຄຳວ່າ “ຈິດໃຈທີ່ຖ່ອມຕົວລົງ” ແມ່ນຫຍັງ (ເພງສັນລະເສີນ 51:17). ພວກເຂົາສາມາດປ່ຽນຜຽນກັນປອກບາງສິ່ງທີ່ມີເປືອກແຂງ, ເຊັ່ນ ເປືອກໄຂ່ ຫລື ເປືອກໝາກບົກ. ທ່ານສາມາດຊ່ວຍພວກເຂົາດ້ວຍການປຽບທຽບເປືອກນັ້ນໃສ່ສິ່ງທີ່ກີດກັນເຮົາ ຈາກຄວາມຮູ້ສຶກເຖິງຄວາມຮັກຂອງພຣະບິດາເທິງສະຫວັນ. ເຮົາຈະສາມາດເປີດໃຈຂອງເຮົາຕໍ່ພຣະອົງໄດ້ແນວໃດ?
-
ພວກທ່ານກໍສາມາດເບິ່ງຮູບພາບຂອງພຣະຜູ້ຊ່ວຍໃຫ້ລອດນຳກັນ ແລະ ຂໍໃຫ້ລູກໆຂອງທ່ານໃຊ້ຄຳເວົ້າອັນໃດກໍໄດ້ເພື່ອອະທິບາຍກ່ຽວກັບພຣະອົງນຳອີກ. ເຊື້ອເຊີນພວກເຂົາໃຫ້ຊອກຫາຄຳເວົ້າທີ່ບັນຍາຍກ່ຽວກັບພຣະອົງໃນ ເພງສັນລະເສີນ 86:5, 13, 15. ເປັນຫຍັງຈຶ່ງສຳຄັນທີ່ຈະຮູ້ຈັກສິ່ງເຫລົ່ານີ້ກ່ຽວກັບພຣະອົງ?
ເພງສັນລະເສີນ 61:2–3
ພຣະເຢຊູຄຣິດຄືຫີນສີລາຂອງເຮົາ.
-
ລູກໆຂອງທ່ານອາດມັກແຕ້ມຮູບຂອງສັນຍາລັກໃນ ເພງສັນລະເສີນ 61:2–3. ວິທີທີ່ພຣະເຢຊູຄຣິດເປັນ “ສີລາ” ທີ່ສູງກວ່າໃນ (ຂໍ້ທີ 2), “ບ່ອນລີ້ໄພ,” ແລະ “ປ້ອມປ້ອງກັນ” ແນວໃດ? (ຂໍ້ທີ 3).
“ພຣະອົງຄືປ້ອມປ້ອງກັນຂອງຂ້ານ້ອຍ, ເປັນບ່ອນທີ່ແໜ້ນໜາຕໍ່ສູ້ສັດຕູຂອງຂ້ານ້ອຍໄດ້” (ເພງສັນລະເສີນ 61:3).
ເພງສັນລະເສີນ 66:16; 77:11; 78:6–7
“ເຮົາຈະຈື່ຈຳວຽກງານຂອງພຣະຜູ້ເປັນເຈົ້າ.”
-
ຂໍໃຫ້ລູກໆຂອງທ່ານໃຫ້ແບ່ງປັນເລື່ອງລາວໃນພຣະຄຳພີທີ່ພວກເຂົາມັກທີ່ສຸດ (ຮູບພາບຈາກ ປຶ້ມຮູບພຣະກິດຕິຄຸນ ອາດຈະຊ່ວຍໄດ້). ເລື່ອງລາວເຫລົ່ານີ້ສິດສອນເຮົາຫຍັງແດ່ກ່ຽວກັບພຣະຜູ້ເປັນເຈົ້າ? ພວກທ່ານສາມາດອ່ານ ເພງສັນລະເສີນ 66:16 ນຳກັນ ແລະ ປ່ຽນຜຽນກັນຕອບຄຳຖາມທີ່ວ່າ “ພຣະຜູ້ເປັນເຈົ້າໄດ້ເຮັດຫຍັງແດ່ເພື່ອຈິດວິນຍານຂອງເຮົາ”?
-
ຂະນະທີ່ພວກທ່ານອ່ານ ເພງສັນລະເສີນ 77:11; 78:6–7 ນຳກັນ, ພວກທ່ານສາມາດແບ່ງປັນນຳກັນກ່ຽວກັບວິທີທີ່ພວກທ່ານພະຍາຍາມທີ່ຈະ “ຈົດຈຳສິ່ງອັນຍິ່ງໃຫຍ່ທີ່ພຣະອົງໄດ້ກະທຳ” (ເພງສັນລະເສີນ 77:11), ລວມທັງສິ່ງອັນຍິ່ງໃຫຍ່ທີ່ [ພຣະຜູ້ເປັນເຈົ້າ] ໄດ້ກະທຳໃນຊີວິດຂອງພວກທ່ານ. ພິທີສິນລະລຶກຊ່ວຍເຫລືອເຮົາໃຫ້ “ຈື່ຈຳຕະຫລອດເວລາ” ແນວໃດ? (ໂມໂຣໄນ 4:3; 5:2).
ເພງສັນລະເສີນ 71:8
ເຮົາສາມາດບອກຄົນອື່ນກ່ຽວກັບພຣະເຢຊູຄຣິດໄດ້.
-
ຫລັງຈາກທີ່ອ່ານ ເພງສັນລະເສີນ 71:8 ກັບລູກໆຂອງທ່ານແລ້ວ, ໃຫ້ເຊື້ອເຊີນພວກເຂົາໃຫ້ແຕ້ມຮູບປາກໃຫຍ່ອັນໜຶ່ງ. ຂໍໃຫ້ພວກເຂົາຊ່ວຍທ່ານ “ຕື່ມ” ຮູບພາບ ຫລື ຄຳຕ່າງງໃສ່ໃນປາກນັ້ນ ທີ່ເປັນຕົວແທນໃຫ້ກັບສິ່ງທີ່ເຮົາສາມາດບອກຄົນອື່ນກ່ຽວກັບພຣະເຢຊູຄຣິດ.
-
ພວກທ່ານສາມາດສົ່ງຕໍ່ຮູບພາບຂອງພຣະເຢຊູຄຣິດ. ຜູ້ທີ່ກຳລັງຖືຮູບດັ່ງກ່າວສາມາດເວົ້າສິ່ງໜຶ່ງທີ່ເຂົາຮູ້ຈັກກ່ຽວກັບພຣະອົງ. ເຮົາຈະສາມາດຊ່ວຍຄົນອື່ນໃຫ້ຮູ້ຈັກກ່ຽວກັບສິ່ງເຫລົ່ານີ້ໄດ້ແນວໃດ?
ເດັກນ້ອຍມີຫລາຍສິ່ງຫລາຍຢ່າງທີ່ຈະແບ່ງປັນ. “ເມື່ອເດັກນ້ອຍຮຽນຮູ້ບາງສິ່ງທີ່ໃໝ່ໆ, ຕາມປົກກະຕິແລ້ວພວກເຂົາຢາກບອກຄົນອື່ນໃຫ້ຮູ້ນຳ. ໃຫ້ຊຸກຍູ້ຄວາມປາດຖະໜານີ້ໂດຍການໃຫ້ໂອກາດເດັກໄດ້ສິດສອນຫລັກທຳພຣະກິດຕິຄຸນໃຫ້ກັນແລະກັນ, ໃຫ້ສະມາຊິກໃນຄອບຄົວຂອງພວກເຂົາ, ແລະ ໃຫ້ໝູ່ເພື່ອນຂອງພວກເຂົາ. ຂໍໃຫ້ພວກເຂົາແບ່ງປັນຄວາມຄິດ, ຄວາມຮູ້ສຶກ, ແລະ ປະສົບການທີ່ກ່ຽວຂ້ອງກັບຫລັກທຳທີ່ທ່ານກຳລັງສິດສອນນຳອີກ. ທ່ານຈະພົບວ່າພວກເຂົາມີຄວາມຮູ້ທີ່ລຽບງ່າຍ, ບໍລິສຸດ, ແລະ ມີພະລັງ” (Teaching in the Savior’s Way, 32).
ເພງສັນລະເສີນ 86:7
ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານຂອງເຮົາ.
-
ເພງສັນລະເສີນຫລາຍບົດກໍເປັນຄືກັນກັບການອະທິຖານຫາພຣະເຈົ້າ. ຂະນະທີ່ທ່ານອ່ານພຣະທຳເພງສັນລະເສີນກັບລູກໆຂອງທ່ານ, ທ່ານອາດຈະສະແດງໃຫ້ພວກເຂົາໄດ້ຮູ້ ສິ່ງທີ່ເຮົາສາມາດນຳໃຊ້ໃນການສື່ສານກັບຜູ້ຄົນຜູ້ທີ່ຢູ່ຫ່າງໄກ, ຕົວຢ່າງເຊັ່ນ ໂທລະສັບ ຫລື ຈົດໝາຍ. ຈາກນັ້ນໃຫ້ອ່ານ ເພງສັນລະເສີນ 86:7. ເຮົາຈະ “ຮ້ອງຫາ” ພຣະບິດາເທິງສະຫວັນແນວໃດ? ພຣະອົງຕອບເຮົາແນວໃດ?
-
ພວກທ່ານສາມາດຮ້ອງເພງກ່ຽວກັບການອະທິຖານນຳກັນ, ເຊັ່ນ “ອະທິຖານແລ້ວບໍ່” (ເພງສວດ ແລະ ເພງຂອງເດັກນ້ອຍ, 52; ເບິ່ງ Susan H. Porter, “Pray, He Is There,” Liahona, May 2024, 77–79 ນຳອີກ). ໃຫ້ເລົ່າສູ່ກັນຟັງກ່ຽວກັບເວລາທີ່ພຣະເຈົ້າໄດ້ຕອບຄຳອະທິຖານຂອງພວກທ່ານ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Come unto Christ [ຈົ່ງມາຫາພຣະຄຣິດ], ໂດຍ ເຄຊີ ຊາຍສ໌