“ຄວາມຄິດທີ່ໃຫ້ເກັບໄວ້ໃນໃຈ: ການອ່ານບົດກະວີຢູ່ໃນພຣະຄຳພີເດີມ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ການອ່ານບົດກະວີຢູ່ໃນພຣະຄຳພີເດີມ,” ຈົ່ງຕາມເຮົາມາ: ພຣະຄຳພີເດີມ 2026
ຄວາມຄິດທີ່ໃຫ້ເກັບໄວ້ໃນໃຈ
ການອ່ານບົດກະວີຢູ່ໃນພຣະຄຳພີເດີມ
ໃນພຣະຄຳພີເດີມ ພຣະທຳປະຖົມມະການຈົນຮອດພຣະທຳເອສະເທີ, ເຮົາພົບເຫັນວ່າສ່ວນຫລາຍມັນເປັນເລື່ອງລາວຕ່າງໆ—ເປັນເລື່ອງເລົ່າທີ່ບັນຍາຍເຫດການທີ່ເກີດຂຶ້ນໃນປະຫວັດສາດ ຈາກທັດສະນະທາງວິນຍານ. ໂນອາໄດ້ສ້າງເຮືອໃຫຍ່, ໂມເຊໄດ້ປົດປ່ອຍຊາວອິດສະຣາເອນ, ນາງຮັນນາໄດ້ອະທິຖານຂໍລູກ, ແລະ ອື່ນໆ. ເລີ່ມຕົ້ນຈາກໂຢບ, ເຮົາພົບເຫັນຮູບແບບການຂຽນແມ່ນແຕກຕ່າງກັນໄປ. ໃນໜັງສືເຫລົ່ານີ້, ຜູ້ຂຽນພຣະຄຳພີເດີມໄດ້ຫັນໄປຫາບົດກະວີເພື່ອສະແດງຄວາມຮູ້ສຶກຢ່າງເລິກເຊິ່ງ ຫລື ການທຳນາຍອັນສຳຄັນ ໃນວິທີທາງທີ່ໜ້າຊົງຈຳ.
ເຮົາກໍໄດ້ເຫັນສອງສາມຕົວຢ່າງແລ້ວກ່ຽວກັບບົດກະວີ ຕະຫລອດທົ່ວໜັງສືແຫ່ງປະຫວັດສາດຂອງພຣະຄຳພີເດີມ. ຕໍ່ຈາກພຣະທຳໂຢບໄປ, ເຮົາຈະເຫັນຫລາຍຕື່ມອີກ. ສ່ວນຫລາຍແລ້ວຢູ່ໃນພຣະທຳໂຢບ, ເພງສັນລະເສີນ, ແລະ ສຸພາສິດເປັນບົດກະວີ, ຊຶ່ງເປັນພາກສ່ວນໜຶ່ງຂອງໜັງສືຄຳທຳນາຍເຊັ່ນ ເອຊາຢາ, ເຢເຣມີຢາ, ແລະ ອາໂມດ. ຍ້ອນວ່າການອ່ານບົດກະວີແມ່ນແຕກຕ່າງຈາກການອ່ານເລື່ອງລາວຕ່າງໆ, ການເຂົ້າໃຈມັນຈຶ່ງມັກຈະຮຽກຮ້ອງການເຂົ້າຫາທີ່ແຕກຕ່າງ. ຕໍ່ໄປນີ້ແມ່ນບາງແນວຄິດທີ່ສາມາດຊ່ວຍທ່ານໃຫ້ພົບເຫັນຄວາມໝາຍຫລາຍຂຶ້ນໃນບົດກະວີພຣະຄຳພີເດີມ.
ການມາຮູ້ຈັກບົດກະວີເຮັບເຣີ
ທຳອິດ, ມັນອາດຈະຊ່ວຍທ່ານໃຫ້ຮູ້ວ່າ ບົດກະວີເຮັບເຣີໃນພຣະຄຳພີເດີມ ບໍ່ໄດ້ອີງຕໍ່ຄຳທີ່ສຳຜັດກັນ, ຫລື ເປັນຄືກັນກັບບົດກະວີຢ່າງອື່ນໆ. ແລະ ເຖິງແມ່ນວ່າຈັງຫວະ, ການຫລິ້ນຄຳເວົ້າ, ແລະ ການອອກສຽງຊ້ຳ ເປັນລັກສະນະທົ່ວໄປຂອງບົດກະວີເຮັບເຣີໃນສະໄໝບູຮານ, ແຕ່ສິ່ງເຫລົ່ານີ້ ໂດຍປົກກະຕິ ມັນໄດ້ເສຍໄປກັບການແປ. ເຖິງຢ່າງໃດກໍຕາມ, ລັກສະນະໜຶ່ງທີ່ທ່ານຈະສັງເກດເຫັນ, ແມ່ນຄວາມຄິດ ຫລື ແນວຄິດທີ່ຖືກກ່າວຊ້ຳ, ບາງເທື່ອເອີ້ນວ່າ “ການຂະໜານ.” ນີ້ແມ່ນຕົວຢ່າງງ່າຍໆຈາກໜັງສືເອຊາຢາ:
ຈົ່ງເຂັ້ມແຂງຍິ່ງໃຫຍ່ອີກ, ຊີໂອນ ເອີຍ;
ຈົ່ງສວມສະຫງ່າລາສີເຖີດ, ນະຄອນສັກສິດ ເອີຍ. (ເອຊາຢາ 52:1)
ເພງສັນລະເສີນ 29 ບັນຈຸແຖວຂະໜານຢ່າງຫລວງຫລາຍ—ຍົກຕົວຢ່າງ:
ສຸລະສຽງຂອງ [ພຣະຜູ້ເປັນເຈົ້າ] ມີລິດເດດ;
ສຸລະສຽງຂອງ [ພຣະຜູ້ເປັນເຈົ້າ] ໜ້າຢ້ານກົວ. (ເພງສັນລະເສີນ 29:4)
ແລະ ຕໍ່ໄປນີ້ແມ່ນຕົວຢ່າງບ່ອນທີ່ແຖວທີສອງຂະໜານກັບແຖວທີໜຶ່ງ ເພື່ອເຮັດໃຫ້ຂໍ້ພຣະຄຳພີງ່າຍຕໍ່ການເຂົ້າໃຈຫລາຍຂຶ້ນ:
ແມ່ນເຮົາທີ່ນຳເອົາຄວາມອຶດຢາກມາສູ່ທຸກໆນະຄອນ,
ບໍ່ມີອາຫານກິນໃນທຸກໆບ່ອນ. (ອາໂມດ 4:6)
ໃນຕົວຢ່າງເຫລົ່ານີ້, ນັກກະວີໄດ້ກ່າວຊ້ຳ ດ້ວຍແນວຄິດທີ່ມີຄວາມແຕກຕ່າງເລັກນ້ອຍ. ເທັກນິກນີ້ສາມາດເນັ້ນແນວຄິດຊ້ຳໆ ແລະ ນຳໃຊ້ຄວາມແຕກຕ່າງ ເພື່ອອະທິບາຍ ຫລື ພັດທະນາມັນຢ່າງເຕັມທີ່.
ໃນກໍລະນີອື່ນໆ, ສອງປະໂຫຍກທີ່ຂະໜານກັນ ໄດ້ໃຊ້ພາສາທີ່ຄ້າຍຄືກັນ ເພື່ອຖ່າຍທອດແນວຄິດກົງກັນຂ້າມ, ດັ່ງມີຢູ່ໃນຕົວຢ່າງດັ່ງຕໍ່ໄປນີ້:
ຄຳຕອບອັນອ່ອນຫວານລະງັບຄວາມໂກດໄວ້:
ແຕ່ຄຳເວົ້າຫຍາບຊ້າຍົວະໃຫ້ໂມໂຫ. (ສຸພາສິດ 15:1)
ຄວາມຂະໜານແນວນີ້ບໍ່ໄດ້ເກີດຂຶ້ນແບບບັງເອີນ. ຜູ້ຂຽນໄດ້ເຮັດໂດຍເຈດຕະນາ. ມັນຊ່ວຍໃຫ້ພວກເພິ່ນສະແດງຄວາມຮູ້ສຶກທາງວິນຍານ ຫລື ຄວາມຈິງທີ່ມີທັງພະລັງ ແລະ ຄວາມສວຍງາມ. ສະນັ້ນ ເມື່ອທ່ານສັງເກດເຫັນການຂະໜານຢູ່ໃນການຂຽນຂອງພຣະຄຳພີເດີມ, ໃຫ້ຖາມຕົວເອງວ່າ ມັນຊ່ວຍທ່ານໃຫ້ເຂົ້າໃຈຂ່າວສານຂອງການຂຽນນັ້ນແນວໃດ. ຍົກຕົວຢ່າງ, ເອຊາຢາໄດ້ພະຍາຍາມກ່າວຫຍັງ ໂດຍການໃຊ້ຄຳວ່າ “ຄວາມເຂັ້ມແຂງ” ກັບ “ສວມສະຫງ່າລາສີ” ແລະ “ຊີໂອນ” ກັບ “ເຢຣູຊາເລັມ”? (ເອຊາຢາ 52:1). ເຮົາຈະສະຫລຸບແນວໃດກັບວະລີທີ່ວ່າ “ຄຳຕອບອັນອ່ອນຫວານ” ຖ້າຫາກເຮົາຮູ້ວ່າ “ຄຳເວົ້າຫຍາບຊ້າ” ກົງກັນຂ້າມກັບມັນ? (ສຸພາສິດ 15:1).
He Restoreth My Soul [ພຣະອົງໃຫ້ຂ້ານ້ອຍມີແຮງຂຶ້ນໃໝ່], ໂດຍ ວາວເຕີ ເຣນ
ບົດກະວີເຮັບເຣີເປັນເພື່ອນໃໝ່
ບາງຄົນຈະປຽບທຽບການອ່ານບົດກະວີໃສ່ກັບການພົບກັບເພື່ອນໃໝ່ຄົນໜຶ່ງ. ການອ່ານບົດກະວີຢູ່ໃນພຣະຄຳພີເດີມ, ແລ້ວຄົງຈະເປັນຄືກັນກັບການພົບບາງຄົນຈາກປະເທດຫ່າງໄກ ແລະ ມີວັດທະນະທຳທີ່ແຕກຕ່າງ ທີ່ເວົ້າພາສາແຕກຕ່າງຈາກເຮົາ—ແລະ ຜູ້ມີອາຍຸຫລາຍກວ່າສອງພັນປີ. ບຸກຄົນນີ້ອາດເວົ້າບາງສິ່ງທີ່ເຮົາບໍ່ເຂົ້າໃຈໃນຕອນຕົ້ນ, ແຕ່ກໍບໍ່ໄດ້ໝາຍຄວາມວ່າເພິ່ນບໍ່ມີສິ່ງໃດດີທີ່ຈະເວົ້າກັບເຮົາ. ເຮົາພຽງແຕ່ຕ້ອງໃຊ້ເວລາກັບເພິ່ນ, ພະຍາຍາມເບິ່ງສິ່ງຕ່າງໆຈາກມຸມມອງຂອງເພິ່ນ. ເຮົາອາດພົບເຫັນວ່າໃນໃຈຂອງເຮົາ, ຕາມຈິງແລ້ວເຮົາເຂົ້າໃຈກັນໄດ້ເປັນຢ່າງດີ. ແລະ ຖ້າເຮົາສະແດງຄວາມອົດທົນ ແລະ ຄວາມເຫັນອົກເຫັນໃຈ, ເພື່ອນໃໝ່ຂອງເຮົາອາດກາຍເປັນເພື່ອນຮັກໄດ້.
ສະນັ້ນເມື່ອທ່ານອ່ານຂໍ້ພຣະຄຳພີຈາກເອຊາຢາ, ຍົກຕົວຢ່າງ, ໃຫ້ຄິດວ່າ ມັນເປັນການແນະນຳຕົວໃຫ້ຮູ້ຈັກກັບເພື່ອນໃໝ່ຂອງທ່ານ. ໃຫ້ຖາມຕົວເອງວ່າ, “ແມ່ນຫຍັງຄືຄວາມປະທັບໃຈທົ່ວໄປຂອງເຮົາ?” ຂໍ້ພຣະຄຳພີເຫລົ່ານີ້ເຮັດໃຫ້ທ່ານຮູ້ສຶກແນວໃດ—ເຖິງແມ່ນຖ້າຫາກທ່ານບໍ່ເຂົ້າໃຈທຸກຄຳກໍຕາມ? ແລ້ວໃຫ້ອ່ານມັນຄືນອີກ, ຫລາຍເທື່ອ ຖ້າເປັນໄປໄດ້. ໃຫ້ພິຈາລະນາການອ່ານອອກສຽງ, ບາງຄົນພົບວ່າການອ່ານແບບນັ້ນເພີ່ມຄວາມໝາຍໄດ້ຫລາຍຂຶ້ນ. ໃຫ້ສັງເກດເບິ່ງຖ້ອຍຄຳທີ່ເອຊາຢາເລືອກໃຊ້, ໂດຍສະເພາະຖ້ອຍຄຳທີ່ປະກົດເປັນພາບຢູ່ໃນຈິດໃຈຂອງທ່ານ. ຮູບພາບເຫລົ່ານັ້ນເຮັດໃຫ້ທ່ານຮູ້ສຶກແນວໃດ? ມັນແນະນຳຫຍັງແດ່ກ່ຽວກັບຄວາມຮູ້ສຶກຂອງເອເຊຢາ? ເມື່ອທ່ານສຶກສາຖ້ອຍຄຳຂອງນັກຂຽນເຫລົ່ານີ້ຢູ່ໃນພຣະຄຳພີເດີມຫລາຍຂຶ້ນເທົ່າໃດ, ທ່ານຈະພົບເຫັນວ່າພວກເພິ່ນໄດ້ເລືອກຖ້ອຍຄຳ ແລະ ເທັກນິກໃດໜຶ່ງໂດຍສະເພາະ ເພື່ອຖ່າຍທອດຂ່າວສານທີ່ເລິກເຊິ່ງທາງວິນຍານ.
ບົດກະວີສາມາດເປັນເພື່ອນທີ່ດີເລີດ ຍ້ອນວ່າມັນຊ່ວຍເຮົາໃຫ້ເຂົ້າໃຈຄວາມຮູ້ສຶກ ແລະ ປະສົບການຂອງເຮົາ. ບົດກະວີຢູ່ໃນພຣະຄຳພີເດີມມີຄຸນຄ່າພິເສດ ຍ້ອນວ່າມັນຊ່ວຍເຮົາໃຫ້ເຂົ້າໃຈຄວາມຮູ້ສຶກ ແລະ ປະສົບການທີ່ສຳຄັນຂອງເຮົາ—ອັນທີ່ເຊື່ອມໂຍງຄວາມສຳພັນຂອງເຮົາເຂົ້າກັບພຣະເຈົ້າ.
ຂະນະທີ່ທ່ານສຶກສາບົດກະວີ ຢູ່ໃນພຣະຄຳພີເດີມ, ຈົ່ງຈື່ຈຳວ່າການສຶກສາພຣະຄຳພີແມ່ນມີຄ່າຫລາຍທີ່ສຸດເມື່ອມັນນຳພາເຮົາມາຫາພຣະເຢຊູຄຣິດ. ຈົ່ງຊອກຫາສັນຍາລັກ, ພາບຈິນຕະນາການ, ແລະ ຄວາມຈິງທີ່ເສີມສ້າງສັດທາຂອງທ່ານໃນພຣະອົງ. ຈົ່ງຄອຍຟັງການດົນໃຈຈາກພຣະວິນຍານບໍລິສຸດ ຂະນະທີ່ທ່ານສຶກສາ.
ວັນນະຄະດີທີ່ໃຫ້ປັນຍາ
ນັກປາດອາຈານເອີ້ນບົດກະວີໝວດໜຶ່ງໃນພຣະຄຳພີເດີມວ່າ “ວັນນະຄະດີທີ່ໃຫ້ປັນຍາ.” ໂຢບ, ສຸພາສິດ, ແລະ ປັນຍາຈານ ບັນຈຸຢູ່ໃນໝວດນີ້. ຂະນະທີ່ ເພງສັນລະເສີນກ່າວເຖິງຄວາມຮູ້ສຶກທີ່ສັນລະເສີນ, ຄວາມໄວ້ທຸກ, ແລະ ການນະມັດສະການ, ແຕ່ວັນນະຄະດີທີ່ໃຫ້ປັນຍາໄດ້ເຈາະຈົງໃສ່ຄຳແນະນຳທີ່ບໍ່ມີກຳນົດເວລາ ຫລື ຄຳຖາມທີ່ເລິກເຊິ່ງ ແລະ ປັດຊະຍາ. ພຣະທຳໂຢບ, ຍົກຕົວຢ່າງ, ກ່າວເຖິງຄວາມຍຸດຕິທຳຂອງພຣະເຈົ້າ ແລະ ເຫດຜົນທີ່ມະນຸດໄດ້ຮັບທຸກທໍລະມານ. ສຸພາສິດສະເໜີໃຫ້ຄຳແນະນຳວິທີທີ່ຈະໃຊ້ຊີວິດໃນທາງທີ່ດີ, ລວມທັງຄຳເວົ້າທີ່ສະຫລາດ ຊຶ່ງຖືກຮວບຮວມ ແລະ ສົ່ງຕໍ່ກັນມາຈາກຄົນລຸ້ນເກົ່າແກ່. ແລະ ພຣະທຳປັນຍາຈານ ຮຽກຮ້ອງໃຫ້ຖາມກ່ຽວກັບຈຸດປະສົງຂອງຊີວິດ—ເມື່ອທຸກສິ່ງເບິ່ງຄືວ່າຫາຍວັບໄປຢ່າງໄວ ແລະ ເກີດຂຶ້ນໂດຍບັງເອີນ, ເຮົາຈະພົບເຫັນຄວາມໝາຍທີ່ແທ້ຈິງໄດ້ແນວໃດ? ທ່ານອາດຄິດກ່ຽວກັບວັນນະຄະດີທີ່ໃຫ້ປັນຍາ ຂະນະທີ່ການສົນທະນາທີ່ຮອບຄອບດ້ວຍຄູຊ່ວຍຝຶກທີ່ໃຫ້ການດົນໃຈ ຜູ້ຢາກແບ່ງປັນການສັງເກດບາງຢ່າງກ່ຽວກັບພຣະເຈົ້າ ແລະ ໂລກທີ່ພຣະອົງໄດ້ສ້າງ—ແລະ ອາດຊ່ວຍທ່ານໃຫ້ເຂົ້າໃຈສິ່ງເຫລົ່ານີ້ດີຂຶ້ນຈັກໜ່ອຍ ຫລາຍກວ່າທີ່ຜ່ານມາ.