“ວັນທີ 31 ເດືອນສິງຫາ–ວັນທີ 6 ເດືອນກັນຍາ. ‘ຂໍໃຫ້ທຸກສິ່ງທີ່ຫາຍໃຈຢູ່ນັ້ນ ຈົ່ງສັນລະເສີນພຣະຜູ້ເປັນເຈົ້າ’: ເພງສັນລະເສີນ 102–103; 110; 116–119; 127–128; 135–139; 146–150,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 31 ເດືອນສິງຫາ–ວັນທີ 6 ເດືອນກັນຍາ. ‘ຂໍໃຫ້ທຸກສິ່ງທີ່ຫາຍໃຈຢູ່ນັ້ນ ຈົ່ງສັນລະເສີນພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026

Reverential Return [ການກັບມາຢ່າງຄາລະວະ], ໂດຍ ແຄວຊີ ແລະ ແຈຊີ ໄລ້ຫວີບ

ວັນທີ 31 ເດືອນສິງຫາ–ວັນທີ 6 ເດືອນກັນຍາ: “ຂໍໃຫ້ທຸກສິ່ງທີ່ຫາຍໃຈຢູ່ນັ້ນ ຈົ່ງສັນລະເສີນພຣະຜູ້ເປັນເຈົ້າ”

ເພງສັນລະເສີນ 102–103; 110; 116–119; 127–128; 135–139; 146–150

ຊື່ພື້ນເມືອງຂອງຊາວຢິວສຳລັບເພງສັນລະເສີນແມ່ນ ເທລິຮິມ, ຄຳພາສາເຮັບເຣີທີ່ມີຄວາມໝາຍວ່າ “ສັນລະເສີນ.” ມັນກ່ຽວພັນກັບການອຸທານ ອາເລລູຢາ (ໝາຍເຖິງ “ສັນລະເສີນພຣະເຢໂຮວາ” ຫລື “ສັນລະເສີນພຣະຜູ້ເປັນເຈົ້າ”). ຖ້າຫາກທ່ານຕ້ອງເລືອກເອົາຄຳໜຶ່ງ ເພື່ອສະຫລຸບຂ່າວສານຫລັກຂອງເພງສັນລະເສີນ, ຄຳວ່າ ສັນລະເສີນ ຈະເປັນຕົວເລືອກທີ່ເໝາະສົມທີ່ສຸດ. ເພງສັນລະເສີນບາງບົດບັນຈຸຄຳເຊື້ອເຊີນໂດຍກົງໃຫ້ “ສັນລະເສີນພຣະຜູ້ເປັນເຈົ້າ” (ເບິ່ງ ໂດຍສະເພາະ ເພງສັນລະເສີນ 146–50), ແລະ ບົດທັງໝົດສາມາດດົນໃຈເຖິງການນະມັດສະການ ແລະ ການສັນລະເສີນ. ເພງສັນລະເສີນເຊື້ອເຊີນເຮົາໃຫ້ຮັບຮູ້ເຖິງອຳນາດຂອງພຣະຜູ້ເປັນເຈົ້າ, ເຖິງຄວາມເມດຕາຂອງພຣະອົງ, ແລະ ເຖິງສິ່ງທີ່ຍິ່ງໃຫຍ່ທີ່ພຣະອົງໄດ້ກະທຳ. ເຮົາຄົງບໍ່ສາມາດຕອບແທນບຸນຄຸນພຣະອົງຈັກເທື່ອສຳລັບສິ່ງເຫລົ່ານີ້, ແຕ່ເຮົາສາມາດສັນລະເສີນພຣະອົງ. ການສັນລະເສີນນັ້ນອາດມີຮູບແບບທີ່ແຕກຕ່າງກັນໄປສຳລັບແຕ່ລະຄົນ—ມັນອາດຮ່ວມດ້ວຍການຮ້ອງເພງ, ການອະທິຖານ, ຫລື ການສະແດງປະຈັກພະຍານ. ສ່ວນຫລາຍມັນຈະນຳໄປສູ່ຄຳໝັ້ນສັນຍາອັນເລິກເຊິ່ງຕໍ່ພຣະຜູ້ເປັນເຈົ້າ ແລະ ເພື່ອເຮັດຕາມຄຳສອນຂອງພຣະອົງ. ບໍ່ວ່າການ “ສັນລະເສີນພຣະຜູ້ເປັນເຈົ້າ” ຈະມີຄວາມໝາຍແນວໃດໃນຊີວິດຂອງທ່ານກໍຕາມ, ທ່ານສາມາດພົບການດົນໃຈໃຫ້ເຮັດ ຂະນະທີ່ທ່ານອ່ານ ແລະ ໄຕ່ຕອງເພງສັນລະເສີນ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເພງສັນລະເສີນ 102–3; 116

ພຣະຜູ້ເປັນເຈົ້າສາມາດປອບໂຍນເວລາເຮົາທຸກທໍລະມານ.

ໃຫ້ສັງເກດເບິ່ງວິທີທີ່ ເພງສັນລະເສີນ 102:1–11 ບັນຍາຍຄວາມຮູ້ສຶກກັງວົນ ແລະ ຄວາມໂດດດ່ຽວ ທີ່ມັກຈະເກີດຂຶ້ນໃນຊ່ວງທີ່ມີການທ້າທາຍ. ບາງເທື່ອທ່ານ ຫລື ຄົນອື່ນໆທີ່ທ່ານຮູ້ຈັກ ກໍເຄີຍປະສົບກັບຄວາມຮູ້ສຶກເຊັ່ນນັ້ນ. ຂະນະທີ່ທ່ານອ່ານ ເພງສັນລະເສີນ 102:12–28; 103; 116, ໃຫ້ຊອກຫາວະລີທີ່ໃຫ້ຄວາມໝັ້ນໃຈແກ່ທ່ານໃນການ “ເອີ້ນຫາພຣະນາມຂອງພຣະຜູ້ເປັນເຈົ້າ” ໃນການທົດລອງຂອງທ່ານ (ເພງສັນລະເສີນ 116:13). ທ່ານອາດຢາກໝາຍ, ທ່ອງຈຳ, ຫລື ແບ່ງປັນວະລີກັບຄົນອື່ນ ທີ່ໃຫ້ຄວາມຫວັງແກ່ທ່ານໃນພຣະອົງ.

ເບິ່ງ ເອຊາຢາ 25:8; ເຮັບເຣີ 2:17–18; ແອວມາ 7:11–13; Camille N. Johnson, “Christ Is Relief,” Liahona, May 2023, 81–83; “Where Can I Turn for Peace?” (Hymns, no. 129) ນຳອີກ.

ພຣະເຢຊູກຳລັງຊ່ວຍເຫລືອຊາຍທີ່ປ່ວຍ — ຄາລ ຮາຍຣິຈ ບະລັອກ (1834–1890), Christ Healing the Sick at Bethesda [ພຣະຄຣິດກຳລັງປິ່ນປົວຄົນເຈັບປ່ວຍຢູ່ທີ່ເບັດຊະທາ], 1883, ສີນ້ຳມັນເທິງຜ້າໃບ, 100 3/4 × 125 1/2 ນິ້ວ. ຫໍພິພິດທະພັນສິລະປະແຫ່ງມະຫາວິທະຍາໄລ ບຣິກຳ ຢັງ, ຊື້ດ້ວຍເງິນທຶນທີ່ຈັດໃຫ້ໂດຍ ແຈ໊ກ ອາ ແລະ ແມຣີ ລູອີສ ຫວີດລີ, 2001.

ເພງສັນລະເສີນ 110; 118

ພຣະເຢຊູຄຣິດເຮັດໃຫ້ຄຳທຳນາຍຈາກເພງສັນລະເສີນສຳເລັດຄົບຖ້ວນ.

ເພງສັນລະເສີນບັນຈຸຂໍ້ພຣະຄຳພີທີ່ຊີ້ໄປຫາພຣະຊົນຊີບ ແລະ ການປະຕິບັດສາດສະໜາກິດຂອງພຣະເຢຊູຄຣິດ. ຕໍ່ໄປນີ້ແມ່ນບາງຕົວຢ່າງ:

ເພງສັນລະເສີນ 110:1–4 (ເບິ່ງ ມັດທາຍ 22:41–45; ເຮັບເຣີ 5:4–10; 6:20)
ເພງສັນລະເສີນ 118:22 (ເບິ່ງ ມັດທາຍ 21:42; ກິດຈະການ 4:10–11; 1 ເປໂຕ 2:7)
ເພງສັນລະເສີນ 118:25–26 (ເບິ່ງ ມັດທາຍ 21:9)

ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະເຢຊູຄຣິດ? ເປັນຫຍັງມັນຈຶ່ງສຳຄັນທີ່ຈະຮູ້ຈັກສິ່ງນີ້ກ່ຽວກັບພຣະອົງ?

ເພງສັນລະເສີນ 119

ພຣະຄຳຂອງພຣະເຈົ້າຈະຮັກສາເຮົາໃຫ້ຢູ່ໃນເສັ້ນທາງຂອງພຣະອົງ.

ເພງສັນລະເສີນ 119 ບັນຈຸຫລາຍໆວະລີທີ່ປຽບທຽບຊີວິດຂອງເຮົາໃສ່ກັບການເດີນທາງກັບໄປຫາພຣະບິດາເທິງສະຫວັນ. ຂະນະທີ່ທ່ານອ່ານ, ໃຫ້ຊອກຫາຄຳເຊັ່ນ “ດຳເນີນ,” “ເຮັດຕາມຂໍ້ຄຳສັ່ງ,” “ທາງ,” “ເຮັດຕາມຖ້ອຍຄຳ,” ແລະ “ຢ່າໃຫ້ຝ່າຝືນ.” ໃຫ້ໄຕ່ຕອງການເດີນທາງໃນຊີວິດຂອງຕົນເອງ—ບ່ອນທີ່ທ່ານເຄີຍໄປ, ບ່ອນທີ່ທ່ານຢູ່ໃນເວລານີ້, ແລະ ບ່ອນທີ່ທ່ານກຳລັງເດີນໄປຫາ. ທ່ານຮຽນຮູ້ຫຍັງແດ່ຈາກເພງສັນລະເສີນບົດນີ້ກ່ຽວກັບການເດີນທາງກັບບ້ານຂອງທ່ານ? ທ່ານໄດ້ຮຽນຮູ້ຫຍັງແດ່ໂດຍການເບິ່ງເສັ້ນທາງຂອງຄົນອື່ນ? ອີງຕາມເພງສັນລະເສີນບົດນີ້, ພຣະເຈົ້າໄດ້ຈັດຕຽມຫຍັງໄວ້ແດ່ ເພື່ອຊ່ວຍໃຫ້ທ່ານຢູ່ໃນເສັ້ນທາງຂອງພຣະອົງ?

ໃຫ້ຄິດເຖິງເວລາທີ່ທ່ານກຳລັງໄປຕາມທາງໃດໜຶ່ງ ຫລື ແຜນທີ່ໃດໜຶ່ງທີ່ໄດ້ຊ່ວຍໃຫ້ທ່ານເດີນທາງໄປຍັງບ່ອນໃດບ່ອນໜຶ່ງໄດ້ຢ່າງສຳເລັດ. ປະສົບການນັ້ນສິດສອນທ່ານຫຍັງແດ່ກ່ຽວກັບການເດີນຕາມເສັ້ນທາງຂອງພຣະເຈົ້າ?

ໃນຂໍ້ພຣະຄຳພີອື່ນໆຫລາຍໆຂໍ້, ພຣະຜູ້ເປັນເຈົ້າ ແລະ ບັນດາສາດສະດາຂອງພຣະອົງກ່າວເຖິງເສັ້ນທາງ. ຂ້າງລຸ່ມແມ່ນບາງຕົວຢ່າງ. ໃຫ້ພິຈາລະນາທີ່ຈະຄົ້ນຄວ້າຂໍ້ພຣະຄຳພີເຫລົ່ານີ້ ແລະ ຂຽນ ຫລື ແບ່ງປັນສິ່ງທີ່ທ່ານຮຽນຮູ້ກັບຄົນອື່ນ.

ພຣະຄຳພີ	ສິ່ງທີ່ເຮົາຮຽນຮູ້ກ່ຽວກັບເສັ້ນທາງໄປຫາພຣະເຈົ້າ
ພຣະຄຳພີ ສຸພາສິດ 4:11–19
ພຣະຄຳພີ ມັດທາຍ 7:13–14
ພຣະຄຳພີ 1 ນີໄຟ 8:20–28
ພຣະຄຳພີ 2 ນີໄຟ 31:17–21
ພຣະຄຳພີ ແອວມາ 7:9, 19–20
ພຣະຄຳພີ ຄຳສອນ ແລະ ພັນທະສັນຍາ 25:2

ຄວາມຈິງເຫລົ່ານີ້ສາມາດຊ່ວຍໃຫ້ທ່ານຄົງຢູ່ໃນເສັ້ນທາງຂອງພຣະເຈົ້າໄດ້ແນວໃດ?

ຄວາມຮູ້ແຈ້ງເພີ່ມເຕີມໃດແດ່ທີ່ທ່ານສາມາດຮຽນຮູ້ໄດ້ຈາກຄຳແນະນຳຕໍ່ໄປນີ້ຈາກປະທານຣະໂຊ ເອັມ ແນວສັນ?

“ຖ້າຫາກການເດີນທາງໃນຊີວິດຂອງເຮົາຈະປະສົບຜົນສຳເລັດ, ເຮົາຕ້ອງເດີນຕາມການຊີ້ທາງຈາກສະຫວັນ. ພຣະຜູ້ເປັນເຈົ້າໄດ້ກ່າວວ່າ, ‘ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ’ [ຄຳສອນ ແລະ ພັນທະສັນຍາ 6:36]. ແລະ ຜູ້ຂຽນເພງສັນລະເສີນໄດ້ຂຽນວ່າ, ‘ຖ້ອຍຄຳຂອງພຣະອົງເປັນແສງໂຄມນຳທາງໃຫ້ຂ້ານ້ອຍ ແລະ ແສງແຈ້ງສຳລັບທາງເດີນໃຫ້ຂ້ານ້ອຍ’ [ເພງສັນລະເສີນ 119:105]. …

“ໃນການເດີນທາງໃນຊີວິດຂອງທ່ານ, ທ່ານພົບກັບອຸປະສັກຫລາຍຢ່າງ ແລະ ເຮັດຜິດພາດແດ່. ການນຳພາທາງພຣະຄຳພີຊ່ວຍໃຫ້ທ່ານຮູ້ຈັກຄວາມຜິດພາດ ແລະ ເຮັດການແກ້ໄຂທີ່ຈຳເປັນ. ທ່ານຈະຢຸດໄປໃນທາງທີ່ຜິດ. ທ່ານຈະສຶກສາແຜນທີ່ທາງພຣະຄຳພີຢ່າງລະມັດລະວັງ. ແລ້ວທ່ານຈະດຳເນີນຕໍ່ໄປດ້ວຍການກັບໃຈ ແລະ ການທົດແທນທີ່ຈຳເປັນ ເພື່ອທີ່ຈະເດີນໃນ ‘ທາງຄັບ ແລະ ແຄບນີ້ຊຶ່ງນຳໄປຫາຊີວິດນິລັນດອນ’ [2 ນີໄຟ 31:18]” (“Living by Scriptural Guidance,” Ensign, Nov. 2000, 17).

ເບິ່ງ Dieter F. Uchtdorf, “The Prodigal and the Road That Leads Home,” Liahona, Nov. 2023, 86–88 ນຳອີກ.

ເພງສັນລະເສີນ 134–36

ພຣະຜູ້ເປັນເຈົ້າມີອຳນາດຍິ່ງໃຫຍ່ຫລາຍກວ່າຮູບເຄົາລົບໃດໆ.

ໃຫ້ສັງເກດວ່າເປັນຫຍັງ, ອີງຕາມ ເພງສັນລະເສີນ 135:15–18, ມັນຈຶ່ງເປັນເລື່ອງທີ່ໂງ່ຈ້າທີ່ຈະໄວ້ວາງໃຈໃນພຣະປອມ. ທ່ານອາດຖືກລໍ້ລວງໃຫ້ໄວ້ວາງໃຈໃນສິ່ງທີ່ຄ້າຍຄືກັນກັບຮູບເຄົາລົບດ້ວຍສິ່ງໃດ? ທ່ານອາດຂຽນລາຍການຂອງສິ່ງຕ່າງໆທີ່ພຣະຜູ້ເປັນເຈົ້າສາມາດເຮັດໄດ້, ດັ່ງທີ່ຜູ້ຂຽນເພງສັນລະເສີນໄດ້ຂຽນຢູ່ໃນ ເພງສັນລະເສີນ 134–36. ສິ່ງທີ່ຊົງພະລັງໃດແດ່ທີ່ພຣະອົງໄດ້ກະທຳເພື່ອທ່ານ?

ເພງສັນລະເສີນ 139

ພຣະຜູ້ເປັນເຈົ້າຮູ້ຈັກໃຈຂອງເຮົາ.

ທ່ານພົບເຫັນຫຍັງແດ່ ຢູ່ໃນ ເພງສັນລະເສີນ 139 ທີ່ຊ່ວຍໃຫ້ທ່ານເຂົ້າໃຈວ່າ ພຣະຜູ້ເປັນເຈົ້າຮູ້ຈັກທ່ານ—ຄວາມຄິດ ແລະ ການກະທຳ, ຄວາມເຂັ້ມແຂງ ແລະ ຄວາມອ່ອນແອຂອງທ່ານ? ຄວາມຈິງນີ້ມີອິດທິພົນຕໍ່ຊີວິດຂອງທ່ານ ແລະ ການເລືອກຂອງທ່ານແນວໃດ?

ເພງສັນລະເສີນ 146–50

“ສັນລະເສີນພຣະຜູ້ເປັນເຈົ້າ.”

ຂະນະທີ່ທ່ານອ່ານເພງສັນລະເສີນບົດສຸດທ້າຍເຫລົ່ານີ້, ໃຫ້ຄິດກ່ຽວກັບເຫດຜົນທີ່ທ່ານມີ ໃນການສັນລະເສີນພຣະຜູ້ເປັນເຈົ້າ. ເປັນຫຍັງຈຶ່ງສຳຄັນທີ່ຈະສັນລະເສີນພຣະອົງ? ມີທາງໃດແດ່ທີ່ທ່ານສາມາດສັນລະເສີນພຣະອົງ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເພງສັນລະເສີນ 102:1–2

ພຣະຜູ້ເປັນເຈົ້າປອບໂຍນເຮົາ ແລະ ໃຫ້ຄວາມຫວັງແກ່ເຮົາ.

ທ່ານ ຫລື ລູກຄົນໜຶ່ງຂອງທ່ານສາມາດອ່ານ ເພງສັນລະເສີນ 102:1–2, ເພື່ອຊອກຫາວິທີທີ່ພຣະຜູ້ເປັນເຈົ້າຊົງຊ່ວຍເຮົາໃນຊ່ວງເວລາທີ່ຍາກລຳບາກ. ເຮົາຈະສາມາດພົບຄວາມຊ່ວຍເຫລືອຈາກພຣະອົງໄດ້ແນວໃດ? ພວກທ່ານຍັງສາມາດແບ່ງປັນນຳກັນ ກ່ຽວກັບຕອນທີ່ພວກທ່ານຕ້ອງການຄວາມຊ່ວຍເຫລືອ ແລະ ໄດ້ຮູ້ສຶກວ່າ ພຣະເຈົ້າໄດ້ຍິນຄຳອະທິຖານຂອງພວກທ່ານ.

ເພງສັນລະເສີນ 119:105

ພຣະຄຳຂອງພຣະເຈົ້າເປັນເໝືອນດັ່ງແສງສະຫວ່າງ.

ລູກໆຂອງທ່ານອາດມ່ວນຊື່ນກັບການເວົ້າກ່ຽວກັບວ່າ ການຢູ່ໃນຄວາມມືດນັ້ນຮູ້ສຶກແນວໃດ. ຫລື ພວກເຂົາສາມາດສົນທະນາກ່ຽວກັບສິ່ງທີ່ຍາກທີ່ຈະເຮັດໃນຄວາມມືດ. ທ່ານອາດເຊື້ອເຊີນພວກເຂົາໃຫ້ເຮັດບາງຢ່າງຂະນະທີ່ຫລັບຕາ, ເຊັ່ນ ແຕ້ມຮູບ. ເຮົາຮຽນຮູ້ຫຍັງແດ່ຈາກ ເພງສັນລະເສີນ 119:105 ກ່ຽວກັບແສງສະຫວ່າງ ແລະ ພຣະຄຳຂອງພຣະເຈົ້າ?
ໃຫ້ຊອກຫາບາງສິ່ງທີ່ພຣະບິດາເທິງສະຫວັນໄດ້ປະທານໃຫ້ແກ່ເຮົາ ເພື່ອໃຫ້ເຮົາຄົງຢູ່ໃນເສັ້ນທາງຂອງພຣະອົງ ໃນຂໍ້ເຫລົ່ານີ້: ເພງສັນລະເສີນ 119:47–48; 119:105; 1 ນີໄຟ 11:25; 2 ນີໄຟ 31:20. ເຮົາສາມາດເຮັດສິ່ງໃດເພື່ອຄົງຢູ່ໃນເສັ້ນທາງຂອງພຣະເຈົ້າ?
ລູກໆຂອງທ່ານອາດມັກເບິ່ງຮູບຂອງສິ່ງຕ່າງໆທີ່ກ່າວເຖິງໃນ ເພງສັນລະເສີນ 119:105. ພວກເຂົາສາມາດວາງຮູບເຫລົ່ານັ້ນຕາມລຳດັບ ຂະນະທີ່ພວກເຂົາອ່ານຂໍ້ນັ້ນໆ. ທ່ານຍັງສາມາດຮ້ອງເພງທີ່ກ່ຽວຂ້ອງນຳກັນ, ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72), ຫລື “I Will Walk with Jesus” (ຫ້ອງສະໝຸດພຣະກິດຕິຄຸນ).

ເພງສັນລະເສີນ 139:1–3, 23–24

ພຣະບິດາເທິງສະຫວັນ ແລະ ພຣະເຢຊູຄຣິດຮູ້ຈັກເຮົາ ແລະ ຮັກເຮົາ.

ໃຫ້ຄິດທີ່ຈະເຮັດລາຍການສັ້ນໆກ່ຽວກັບສິ່ງທີ່ທ່ານຮູ້ກ່ຽວກັບລູກໆແຕ່ລະຄົນຂອງທ່ານ. ຂະນະທີ່ທ່ານອ່ານລາຍການເທື່ອລະອັນ, ຂໍໃຫ້ລູກໆຂອງທ່ານເດົາວ່າ ທ່ານກຳລັງບັນຍາຍກ່ຽວກັບໃຜ. ແລ້ວ, ຫລັງຈາກທີ່ອ່ານ ເພງສັນລະເສີນ 139:1–3 ນຳກັນ, ທ່ານສາມາດຂຽນລາຍການສິ່ງທີ່ພຣະບິດາເທິງສະຫວັນ ແລະ ພຣະເຢຊູຮູ້ກ່ຽວກັບເຮົາ.
ຂຽນຄຳຕ່າງໆຈາກ ເພງສັນລະເສີນ 139:23–24 ໃສ່ເທິງເຈ້ຍ ຫລື ກະດານ. ເຊື້ອເຊີນລູກໆຂອງທ່ານໃຫ້ຂີດກ້ອງຄຳທີ່ບັນຍາຍສິ່ງທີ່ພຣະເຈົ້າສາມາດກະທຳໄດ້ເພື່ອເຮົາ. ເປັນຫຍັງເຮົາຈຶ່ງຢາກໃຫ້ພຣະເຈົ້າເຮັດສິ່ງເຫລົ່ານີ້?

ເພງສັນລະເສີນ 146:1, 5–9

ເຮົາສາມາດສັນລະເສີນພຣະຜູ້ເປັນເຈົ້າ.

ບາງທີລູກໆຂອງທ່ານສາມາດແບ່ງປັນປະສົບການ ຕອນທີ່ບາງຄົນຍ້ອງຍໍພວກເຂົາ ຫລື ໄດ້ບອກພວກເຂົາວ່າ ພວກເຂົາເຮັດໄດ້ດີ. ແບ່ງປັນສິ່ງດີໆບາງຢ່າງຈາກ ເພງສັນລະເສີນ 146:6–9 ທີ່ພຣະຜູ້ເປັນເຈົ້າໄດ້ກະທຳ (ຊ່ວຍໃຫ້ລູກໆຂອງທ່ານເຂົ້າໃຈຄຳທີ່ພວກເຂົາບໍ່ຄຸ້ນ). ເຊື້ອເຊີນລູກໆຂອງທ່ານໃຫ້ເວົ້າກ່ຽວກັບສິ່ງອື່ນໆທີ່ພຣະອົງໄດ້ກະທຳເພື່ອເຮົາ. ເຮົາຈະສາມາດສັນລະເສີນພຣະອົງສຳລັບສິ່ງເຫລົ່ານັ້ນໄດ້ແນວໃດ?

ຮຽນຮູ້ຢູ່ທີ່ບ້ານ; ແບ່ງປັນກັບຄົນອື່ນ. ປະທານຣະໂຊ ເອັມ ແນວສັນ ໄດ້ສິດສອນວ່າ ບ້ານເຮືອນຄວນເປັນ “ສູນກາງການຮຽນຮູ້ພຣະກິດຕິຄຸນ” (“Becoming Exemplary Latter–day Saints,” Liahona, Nov. 2018, 13). ທ່ານສາມາດເຮັດຫຍັງໄດ້ແດ່ໃນອາທິດນີ້ ເພື່ອເຮັດໃຫ້ການສຶກສາເພງສັນລະເສີນເປັນສ່ວນຕົວ ແລະ ເປັນຄອບຄົວເລິກເຊິ່ງຍິ່ງຂຶ້ນ? ຫລັງຈາກທີ່ທ່ານສຶກສາແລ້ວ, ໃຫ້ພິຈາລະນາທີ່ຈະແບ່ງປັນສິ່ງທີ່ທ່ານໄດ້ຮຽນຮູ້ ແລະ ໄດ້ຮູ້ສຶກ. ທ່ານສາມາດເຮັດສິ່ງນີ້ໃນການສົນທະນາ, ຜ່ານທາງຂໍ້ຄວາມ ຫລື ສື່ສັງຄົມ, ຫລື ຢູ່ທີ່ໂບດ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໜ້າກິດຈະກຳປະຖົມໄວ: ພຣະຄຳຂອງພຣະເຈົ້າເປັນເໝືອນດັ່ງແສງສະຫວ່າງ