“ຄວາມຄິດທີ່ໃຫ້ເກັບໄວ້ໃນໃຈ: ບັນດາສາດສະດາ ແລະ ຄຳທຳນາຍ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ບັນດາສາດສະດາ ແລະ ຄຳທຳນາຍ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026
ຄວາມຄິດທີ່ໃຫ້ເກັບໄວ້ໃນໃຈ
ບັນດາສາດສະດາ ແລະ ຄຳທຳນາຍ
ໃນການແຍກພາກສ່ວນພຣະຄຳພີເດີມຂອງຊາວຄຣິດດັ້ງເດີມ, ພາກສຸດທ້າຍ (ເອຊາຢາ ເຖິງ ມາລາກີ) ຖືກເອີ້ນວ່າ ບັນດາສາດສະດາ. ພາກນີ້, ປະມານໜຶ່ງສ່ວນສີ່ຂອງພຣະຄຳພີເດີມ, ບັນຈຸຖ້ອຍຄຳຂອງຜູ້ຮັບໃຊ້ທີ່ໄດ້ຮັບສິດອຳນາດຂອງພຣະເຈົ້າ, ຜູ້ທີ່ໄດ້ເວົ້າລົມກັບພຣະຜູ້ເປັນເຈົ້າ ແລະ ແລ້ວກ່າວ ແທນ ພຣະອົງ, ໂດຍແບ່ງປັນຂ່າວສານຂອງພຣະອົງກັບຜູ້ຄົນ ປະມານ 900 ແລະ 500 ປີ ກ່ອນ ຄ.ສ.
ບັນດາສາດສະດາສື່ສານພຣະປະສົງຂອງພຣະເຈົ້າ
ບັນດາສາດສະດາ ແລະ ຄຳທຳນາຍມີບົດບາດທີ່ສຳຄັນຕະຫລອດທົ່ວພຣະຄຳພີເດີມ. ອັບຣາຮາມ, ອີຊາກ, ແລະ ຢາໂຄບ ໄດ້ເຫັນພາບນິມິດ ແລະ ໄດ້ເວົ້າລົມກັບຜູ້ສົ່ງຂ່າວແຫ່ງສະຫວັນ. ໂມເຊໄດ້ເວົ້າລົມກັບພຣະເຈົ້າໜ້າຕໍ່ໜ້າ ແລະ ໄດ້ສື່ສານພຣະປະສົງຂອງພຣະອົງກັບລູກຫລານຂອງອິດສະຣາເອນ. ພຣະທຳກະສັດເຫລັ້ມທີໜຶ່ງ ແລະ ເຫລັ້ມທີສອງເລົ່າເຖິງວຽກງານທີ່ໜ້າຈົດຈຳ ແລະ ຂ່າວສານຂອງສາດສະດາເອລີຢາ ແລະ ເອລີຊາ. ພຣະຄຳພີເດີມກໍຍັງກ່າວເຖິງສາດສະດາຍິງນຳອີກ ເຊັ່ນນາງມີຣີອາມ ແລະ ນາງເດໂບຣາ, ພ້ອມທັງຜູ້ຍິງຄົນອື່ນໆທີ່ໄດ້ຮັບພອນດ້ວຍວິນຍານແຫ່ງຄຳທຳນາຍ, ເຊັ່ນນາງເຣເບກາ ແລະ ນາງຮັນນາ. ແລະ ເຖິງແມ່ນວ່າເພງສັນລະເສີນບໍ່ໄດ້ຖືກຂຽນໂດຍບັນດາສາດສະດາທີ່ເປັນທາງການ, ພຣະທຳເຫລົ່ານີ້ກໍເຕັມໄປດ້ວຍວິນຍານແຫ່ງຄຳທຳນາຍ, ໂດຍສະເພາະຢ່າງຍິ່ງແມ່ນຂະນະທີ່ພວກເພິ່ນຊີ້ໄປຍັງການສະເດັດມາຂອງພຣະເມຊີອາ.
ສິ່ງເຫລົ່ານີ້ບໍ່ເປັນເລື່ອງໜ້າປະຫລາດໃຈສຳລັບສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ຕາມຈິງແລ້ວ, ພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດສິດສອນເຮົາວ່າ ບັນດາສາດສະດາບໍ່ໄດ້ເປັນພຽງແຕ່ບຸກຄົນທາງປະຫວັດສາດເທົ່ານັ້ນ ແຕ່ເປັນພາກສ່ວນທີ່ສຳຄັນໃນແຜນຂອງພຣະເຈົ້າ. ເຖິງແມ່ນບາງຄົນອາດເຫັນວ່າ ບັນດາສາດສະດາມີແຕ່ສະເພາະໃນສະໄໝພຣະຄຳພີເດີມ, ແຕ່ເຮົາເຫັນພວກເພິ່ນເປັນບາງສິ່ງທີ່ພວກເຮົາມີ ຄືກັນ ກັບສະໄໝພຣະຄຳພີເດີມ.
ແຕ່ການອ່ານບົດໜຶ່ງຈາກເອຊາຢາ ຫລື ເອເຊກຽນ ອາດຮູ້ສຶກແຕກຕ່າງຈາກການອ່ານຂ່າວສານຂອງກອງປະຊຸມໃຫຍ່ສາມັນຈາກປະທານຂອງສາດສະໜາຈັກໃນປະຈຸບັນ. ບາງເທື່ອມັນກໍຍາກທີ່ຈະເຫັນວ່າບັນດາສາດສະດາໃນສະໄໝບູຮານມີບາງຢ່າງຈະກ່າວກັບເຮົາ. ເຖິງຢ່າງໃດ, ໂລກທີ່ເຮົາອາໄສຢູ່ໃນທຸກມື້ນີ້ກໍຂ້ອນຂ້າງແຕກຕ່າງຈາກສະໄໝທີ່ພວກເພິ່ນໄດ້ສັ່ງສອນ ແລະ ທຳນາຍ. ແລະ ຄວາມຈິງທີ່ວ່າເຮົາ ມີ ສາດສະດາທີ່ມີຊີວິດຢູ່ ສາມາດກໍ່ໃຫ້ເກີດມີຄຳຖາມທີ່ວ່າ: ເປັນຫຍັງຈຶ່ງຄຸ້ມກັບຄວາມພະຍາຍາມ—ແລະ ກໍຕ້ອງໃຊ້ຄວາມພະຍາຍາມ—ໃນການອ່ານຖ້ອຍຄຳຂອງບັນດາສາດສະດາໃນສະໄໝບູຮານ?
Fulness of Times [ຄວາມສົມບູນແຫ່ງເວລາ], ໂດຍ ກະເຣກ ອໍເຊັນ
ສາດສະດາໃນສະໄໝບູຮານມີບາງຢ່າງຈະກ່າວກັບເຮົາ
ສ່ວນຫລາຍແລ້ວ, ຜູ້ຄົນທຸກມື້ນີ້ ບໍ່ແມ່ນກຸ່ມເປົ້າໝາຍຫລັກຂອງບັນດາສາດສະດາໃນພຣະຄຳພີເດີມ. ສາດສະດາເຫລົ່ານັ້ນມີຄວາມກັງວົນເລັ່ງດ່ວນໃນສິ່ງທີ່ພວກເພິ່ນໄດ້ກ່າວໃນວັນເວລາ ແລະ ສະຖານທີ່ຂອງພວກເພິ່ນ—ດັ່ງທີ່ບັນດາສາດສະດາໃນຍຸກສຸດທ້າຍຂອງເຮົາກ່າວເຖິງຄວາມກັງວົນເລັ່ງດ່ວນຂອງເຮົາໃນທຸກມື້ນີ້.
ໃນເວລາດຽວກັນ, ບັນດາສາດສະດາກໍສາມາດເຫັນສິ່ງທີ່ຢູ່ເໜືອຄວາມກັງວົນເລັ່ງດ່ວນຂອງເຮົານຳອີກ. ພວກເພິ່ນສິດສອນຄວາມຈິງນິລັນດອນ, ຊຶ່ງກ່ຽວຂ້ອງກັບທຸກໆເວລາ ແລະ ສະຖານທີ່. ໂດຍທີ່ໄດ້ຮັບພອນດ້ວຍການເປີດເຜີຍ, ພວກເພິ່ນຈຶ່ງເຫັນມຸມມອງທີ່ກວ້າງໄກກວ່າໃນວຽກງານຂອງພຣະເຈົ້າ. ຍົກຕົວຢ່າງ, ເອຊາຢາເຕືອນຜູ້ຄົນໃນເວລາຂອງເພິ່ນກ່ຽວກັບບາບຂອງພວກເຂົາ. ເພິ່ນຍັງໄດ້ຂຽນກ່ຽວກັບການປົດປ່ອຍຂອງຊາວອິດສະຣາເອນຜູ້ທີ່ຈະມີຊີວິດຢູ່ໃນອີກ 200 ປີ ໃນອະນາຄົດ. ໃນເວລາດຽວກັນ, ເພິ່ນໄດ້ສິດສອນກ່ຽວກັບການປົດປ່ອຍທີ່ຜູ້ຄົນທັງໝົດຂອງພຣະເຈົ້າຈະສະແຫວງຫາ. ແລະ ເພິ່ນໄດ້ຂຽນຄຳທຳນາຍທີ່, ແມ່ນແຕ່ທຸກມື້ນີ້, ກໍຍັງລໍຖ້າໃຫ້ສຳເລັດຄົບຖ້ວນຢູ່—ເຊັ່ນຄຳສັນຍາຂອງ “ແຜ່ນດິນໂລກໃໝ່” (ເອຊາຢາ 65:17) ທີ່ຈະເຕັມໄປດ້ວຍ “ຄົນທີ່ຮູ້ເຖິງພຣະຜູ້ເປັນເຈົ້າ” (ເອຊາຢາ 11:9), ບ່ອນທີ່ເຜົ່າອິດສະຣາເອນທີ່ສູນຫາຍໄປໄດ້ຖືກເຕົ້າໂຮມ ແລະ ບ່ອນທີ່ “ຊົນຊາດທັງຫລາຍ” ຈະບໍ່ “ເຮັດເສິກອີກຕໍ່ໄປ” (ເອຊາຢາ 2:4). ສ່ວນໜຶ່ງຂອງຄວາມຊື່ນຊົມ ແລະ ການດົນໃຈທີ່ມາຈາກການອ່ານຖ້ອຍຄຳຂອງບັນດາສາດສະດາໃນພຣະຄຳພີເດີມ ເຊັ່ນເອຊາຢາ ກໍຄືການທີ່ໄດ້ຮູ້ວ່າ ເຮົາ ມີບົດບາດໃນວັນທີ່ຮຸ່ງເຮືອງ ຊຶ່ງພວກເພິ່ນໄດ້ມະໂນພາບໄວ້.
ສະນັ້ນ ເມື່ອທ່ານອ່ານຄຳທຳນາຍສະໄໝບູຮານ, ມັນສາມາດຊ່ວຍໃຫ້ທ່ານຮຽນຮູ້ກ່ຽວກັບບໍລິບົດຊຶ່ງມັນໄດ້ຖືກຂຽນໄວ້—ແຕ່ທ່ານຄວນເຫັນຕົວເອງໃນຄຳທຳນາຍນັ້ນເຊັ່ນກັນ, ຫລື “ຈົ່ງປຽບທຽບຂໍ້ຄວາມນັ້ນກັບຕົວຂອງ [ທ່ານເອງ]” (1 ນີໄຟ 19:24; ເບິ່ງ ຂໍ້ທີ 23 ນຳອີກ). ບາງເທື່ອ ນັ້ນໝາຍເຖິງການຮັບຮູ້ບາບີໂລນວ່າເປັນເຄື່ອງໝາຍຂອງບາບ ແລະ ຄວາມທະນົງຕົວ, ບໍ່ແມ່ນພຽງແຕ່ເປັນເມືອງບູຮານເທົ່ານັ້ນ. ມັນອາດໝາຍເຖິງການເຂົ້າໃຈວ່າ ອິດສະຣາເອນເປັນຜູ້ຄົນຂອງພຣະເຈົ້າໃນທຸກໆເວລາ ແລະ ສະຖານທີ່. ຫລື ມັນອາດໝາຍເຖິງການເຫັນຊີໂອນວ່າເປັນອຸດົມການໃນຍຸກສຸດທ້າຍທີ່ຜູ້ຄົນຂອງພຣະເຈົ້ານ້ອມຮັບເອົາ, ແທນທີ່ເຫັນມັນວ່າເປັນພຽງທີ່ອີກຄຳໜຶ່ງສຳລັບເຢຣູຊາເລັມເທົ່ານັ້ນ.
ເຮົາສາມາດປຽບທຽບຂໍ້ພຣະຄຳພີກັບຊີວິດຂອງເຮົາ ຍ້ອນວ່າເຮົາເຂົ້າໃຈວ່າຄຳທຳນາຍສາມາດສຳເລັດຄົບຖ້ວນໃນຫລາຍວິທີທາງ. ຕົວຢ່າງໜຶ່ງທີ່ດີແມ່ນຄຳທຳນາຍໃນ ເອຊາຢາ 40:3 ທີ່ວ່າ: “ຈົ່ງຕຽມທາງໃນຖິ່ນແຫ້ງແລ້ງກັນດານໃຫ້ພ້ອມຈົ່ງຕຽມຫົນທາງນັ້ນໄວ້ສຳລັບ [ພຣະຜູ້ເປັນເຈົ້າ] ເດີ.” ຕໍ່ຊາວຢິວທີ່ເປັນຊະເລີຍໃນບາບີໂລນ, ຄຳນີ້ອາດໝາຍເຖິງພຣະຜູ້ເປັນເຈົ້າຈັດຫາວິທີໃຫ້ພົ້ນຈາກການເປັນຊະເລີຍ ແລະ ກັບຄືນສູ່ເຢຣູຊາເລັມ. ຕໍ່ມັດທາຍ, ມາຣະໂກ, ແລະ ລູກາ, ຄຳທຳນາຍນີ້ໝາຍເຖິງໂຢຮັນບັບຕິສະໂຕ, ຜູ້ທີ່ໄດ້ກະກຽມທາງໄວ້ໃຫ້ແກ່ການປະຕິບັດສາດສະໜາກິດໃນຊ່ວງມະຕະຂອງພຣະຜູ້ຊ່ວຍໃຫ້ລອດ. ແລະ ໂຈເຊັບ ສະມິດ ໄດ້ຮັບການເປີດເຜີຍວ່າ ຄຳທຳນາຍນີ້ກຳລັງສຳເລັດຄົບຖ້ວນໃນທຸກວັນນີ້ ໃນການກຽມພ້ອມສຳລັບການປະຕິບັດສາດສະໜາກິດໃນຊ່ວງໜຶ່ງພັນປີຂອງພຣະຄຣິດ. ໃນຫລາຍວິທີທີ່ເຮົາຫາກໍເຂົ້າໃຈ, ບັນດາສາດສະດາໃນສະໄໝບູຮານ ໄດ້ ກ່າວກັບເຮົາ. ແລະ ພວກເພິ່ນໄດ້ສິດສອນຫລາຍໆຄວາມຈິງທີ່ລໍ້າຄ່າ ແລະ ນິລັນດອນທີ່ກ່ຽວຂ້ອງກັບເຮົາເທົ່າໆກັບທີ່ມັນກ່ຽວຂ້ອງກັບຊາວອິດສະຣາເອນໃນສະໄໝບູຮານ.
ບັນດາສາດສະດາໃນສະໄໝບູຮານໄດ້ເປັນພະຍານເຖິງພຣະເຢຊູຄຣິດ
ບາງທີສິ່ງທີ່ສຳຄັນກວ່າການເຫັນຕົວທ່ານເອງໃນຄຳທຳນາຍຢູ່ໃນພຣະຄຳພີເດີມກໍຄືການເຫັນພຣະເຢຊູຄຣິດໃນຄຳທຳນາຍເຫລົ່ານັ້ນ. ຖ້າຫາກທ່ານຊອກຫາພຣະອົງ, ທ່ານກໍຈະພົບພຣະອົງ, ເຖິງແມ່ນວ່າ ພຣະອົງຈະບໍ່ໄດ້ຖືກກ່າວເຖິງດ້ວຍພຣະນາມກໍຕາມ. ມັນອາດຊ່ວຍໄດ້ທີ່ຈະເກັບໄວ້ໃນໃຈວ່າ ພຣະເຈົ້າໃນພຣະຄຳພີເດີມ, ອົງພຣະເຢໂຮວາ, ຄື ພຣະເຢຊູຄຣິດ. ທຸກເທື່ອທີ່ບັນດາສາດສະດາບັນຍາຍເຖິງສິ່ງທີ່ພຣະຜູ້ເປັນເຈົ້າກຳລັງກະທຳ ຫລື ສິ່ງທີ່ພຣະອົງຈະກະທຳ, ພວກເພິ່ນກຳລັງກ່າວເຖິງພຣະຜູ້ຊ່ວຍໃຫ້ລອດ.
The Lord Appearing unto Abraham [ພຣະຜູ້ເປັນເຈົ້າກຳລັງປະກົດຕົວຕໍ່ອັບຣາຮາມ], ໂດຍ ຄີທ໌ ລາສັນ
ທ່ານຍັງຈະພົບການອ້າງອີງເຖິງຜູ້ທີ່ຖືກເຈີມ, ພຣະຜູ້ໄຖ່, ແລະ ກະສັດໃນອະນາຄົດຈາກເຊື້ອວົງດາວິດນຳອີກ. ທັງໝົດນີ້ເປັນຄຳທຳນາຍກ່ຽວກັບພຣະເຢຊູຄຣິດ. ໂດຍທົ່ວໄປແລ້ວ, ທ່ານຈະອ່ານກ່ຽວກັບການປົດປ່ອຍ, ການໃຫ້ອະໄພ, ການໄຖ່, ແລະ ການຟື້ນຟູ. ໂດຍທີ່ມີພຣະຜູ້ຊ່ວຍໃຫ້ລອດຢູ່ໃນຈິດໃຈ ແລະ ໃນໃຈຂອງທ່ານ, ຄຳທຳນາຍເຫລົ່ານີ້ຈະຊີ້ບອກທ່ານໄປຍັງພຣະບຸດຂອງພຣະເຈົ້າໂດຍທຳມະຊາດ. ເຖິງຢ່າງໃດ, ວິທີທີ່ດີທີ່ສຸດທີ່ຈະເຂົ້າໃຈຄຳທຳນາຍກໍຄືການມີ “ເນື້ອຄວາມຂອງ [ການທຳນາຍ],” ຊຶ່ງໂຢຮັນບອກເຮົາວ່າເປັນ “ຄຳພະຍານຝ່າຍພຣະເຢຊູ” (ພຣະນິມິດ 19:10).