“ວັນທີ 7–13 ເດືອນກັນຍາ. ‘ພຣະອົງຈະໃຫ້ເຈົ້າເຫັນຫົນທາງອັນຖືກຕ້ອງ’: ສຸພາສິດ 1–4; 15–16; 22; 31; ປັນຍາຈານ 1–3; 11–12,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 7–13 ເດືອນກັນຍາ. ‘ພຣະອົງຈະໃຫ້ເຈົ້າເຫັນຫົນທາງອັນຖືກຕ້ອງ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026
Jesus with Children [ພຣະເຢຊູກັບພວກເດັກນ້ອຍ], ໂດຍ ດຽວລີນ ມາສ໌
ເດືອນກັນຍາ 7–13: “ພຣະອົງຈະໃຫ້ເຈົ້າເຫັນຫົນທາງອັນຖືກຕ້ອງ”
ສຸພາສິດ 1–4; 15–16; 22; 31; ປັນຍາຈານ 1–3; 11–12
ທ່ານອາດຄິດວ່າພຣະທຳສຸພາສິດເປັນການຮວບຮວມຂອງຄຳແນະນຳທີ່ສະຫລາດຈາກພໍ່ແມ່ທີ່ມີຄວາມຮັກ (ເບິ່ງ ສຸພາສິດ 1:8). ຂ່າວສານຫລັກກໍຄືວ່າ ຖ້າຫາກທ່ານສະແຫວງຫາສະຕິປັນຍາ—ໂດຍສະເພາະ ສະຕິປັນຍາຂອງພຣະເຈົ້າ—ຊີວິດຈະໄປດ້ວຍດີ. ແຕ່ສຸພາສິດຕິດຕາມດ້ວຍພຣະທຳປັນຍາຈານ, ຊຶ່ງເບິ່ງຄືເວົ້າວ່າ, “ມັນບໍ່ງ່າຍປານນັ້ນ.” ນັກເທດສະໜາຜູ້ທີ່ອ້າງເຖິງປັນຍາຈານໄດ້ສັງເກດເຫັນວ່າ ເພິ່ນ “ໄດ້ຕັ້ງໃຈຮໍ່າຮຽນປັນຍາ” ແຕ່ກໍຍັງ “ວິຕົກກັງວົນ” ແລະ “ເຈັບປວດຫລາຍ” (ປັນຍາຈານ 1:17–18). ໃນຫລາຍວິທີທາງ, ພຣະທຳນັ້ນໄດ້ຖາມວ່າ, “ມີຫຍັງບໍ່ທີ່ມີຄວາມໝາຍແທ້ຈິງໃນໂລກບ່ອນທີ່ທຸກສິ່ງເບິ່ງຄືວ່າ ອະນິຈັງ, ຊົ່ວຄາວ, ແລະ ບໍ່ແນ່ນອນ?”
ແລະ ເຖິງແມ່ນພຣະທຳທັງສອງເຫລັ້ມນີ້ເບິ່ງຊີວິດຈາກມຸມມອງທີ່ແຕກຕ່າງ, ແຕ່ທັງສອງສິດສອນຄວາມຈິງທີ່ຄ້າຍຄືກັນ. ປັນຍາຈານປະກາດວ່າ: “ໃນທີ່ສຸດນີ້ ຍັງມີພຽງສິ່ງດຽວທີ່ຈະເວົ້າ ຈົ່ງຢຳເກງພຣະເຈົ້າ ແລະ ເຮັດຕາມຂໍ້ຄຳສັ່ງຂອງພຣະອົງ ເພາະພຣະອົງໄດ້ສ້າງມະນຸດຂຶ້ນມາກໍເພື່ອສິ່ງທັງໝົດນີ້” (ປັນຍາຈານ 12:13). ນີ້ຄືຫລັກທຳດຽວກັນທີ່ພົບຕະຫລອດທົ່ວສຸພາສິດ: “ຈົ່ງໄວ້ວາງໃຈໃນ [ພຣະຜູ້ເປັນເຈົ້າ] ດ້ວຍສຸດໃຈຂອງເຈົ້າ” (ສຸພາສິດ 3:5; ເບິ່ງ ຂໍ້ທີ 7 ນຳອີກ). ຊີວິດຈະດີກວ່າສະເໝີ—ຖ້າມັນບໍ່ດີພ້ອມຕະຫລອດເວລາ—ເມື່ອເຮົາໄວ້ວາງໃຈ ແລະ ຕິດຕາມອົງພຣະເຢຊູຄຣິດເຈົ້າ.
ສຳລັບພາບລວມຂອງພຣະທຳເຫລົ່ານີ້, ເບິ່ງ “ສຸພາສິດ” ແລະ “ປັນຍາຈານ” ໃນ ຄູ່ມືພຣະຄຳພີ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ສຸພາສິດ 1–4; 15–16; ປັນຍາຈານ 1–3; 11–12
“ຈົ່ງໃຊ້ຫູຟັງສິ່ງທີ່ມີປັນຍາ.”
ພຣະທຳສຸພາສິດ ແລະ ປັນຍາຈານເຕັມໄປດ້ວຍຄວາມຮູ້ກ່ຽວກັບປັນຍາ. ໃຫ້ຄິດທີ່ຈະໝາຍຄຳວ່າ “ປັນຍາ” ແລະ ຄຳທີ່ກ່ຽວຂ້ອງ, ເຊັ່ນ “ຄວາມຮູ້” ແລະ “ຄວາມເຂົ້າໃຈ,” ເມື່ອທ່ານພົບເຫັນມັນໃນ ສຸພາສິດ 1–4; 15–16; ປັນຍາຈານ 1–3; 11–12. ບົດເຫລົ່ານີ້ມີຜົນກະທົບຕໍ່ວິທີທີ່ທ່ານຄິດກ່ຽວກັບປັນຍາແນວໃດ? ອີງຕາມສິ່ງທີ່ທ່ານພົບເຫັນ, ທ່ານຈະບັນຍາຍປັນຍາວ່າເປັນສິ່ງທີ່ “ພຣະຜູ້ເປັນເຈົ້າໂຜດໃຫ້” ແນວໃດ? (ສຸພາສິດ 2:6). ພອນຢ່າງໃດແດ່ທີ່ມາຈາກປັນຍາຂອງພຣະເຈົ້າ?
ເບິ່ງ ມັດທາຍ 7:24–27; 25:1–13 ນຳອີກ.
ຊ່ວຍໃຫ້ຜູ້ຮຽນແບ່ງປັນສິ່ງທີ່ເຂົາເຈົ້າກຳລັງຮຽນຮູ້. “ໃຫ້ຜູ້ຮຽນມີໂອກາດທີ່ຈະແບ່ງປັນນຳກັນ ໃນສິ່ງທີ່ເຂົາເຈົ້າກຳລັງຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ການເຮັດສິ່ງນີ້ຈະຊ່ວຍໃຫ້ເຂົາເຈົ້ານຳໃຊ້ຄວາມຈິງທີ່ເຂົາເຈົ້າໄດ້ຖືກສິດສອນ ແລະ ສະແດງມັນ. ມັນຈະຊ່ວຍໃຫ້ເຂົາເຈົ້າມີຄວາມໝັ້ນໃຈກັບຄວາມສາມາດຂອງຕົນທີ່ຈະແບ່ງປັນຄວາມຈິງໃນສະພາບແວດລ້ອມອື່ນນຳອີກ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 26). ຍົກຕົວຢ່າງ, ທ່ານສາມາດເຊື້ອເຊີນໃຫ້ຜູ້ຮຽນຂຽນຄຳອ້າງອີງບາງຄຳຈາກສຸພາສິດ ຫລື ປັນຍາຈານ ບ່ອນທີ່ພວກເຂົາໄດ້ພົບຄວາມຮູ້ກ່ຽວກັບປັນຍາຂອງພຣະເຈົ້າ. ແລ້ວເຊື້ອເຊີນຜູ້ຮຽນໃຫ້ເວົ້າກ່ຽວກັບສິ່ງທີ່ເຂົາເຈົ້າໄດ້ຮຽນຮູ້.
ສຸພາສິດ 1:7; 2:5; 3:7; 15:33; 16:6; 31:30; ປັນຍາຈານ 12:13
“ຢ່າຄິດເລີຍວ່າຕົນເປັນຄົນມີປັນຍາກວ່າທີ່ຕົນມີຢູ່ ຈົ່ງຢຳເກງ [ພຣະຜູ້ເປັນເຈົ້າ] ເທົ່ານັ້ນ.”
ຫົວຂໍ້ອີກອັນໜຶ່ງທີ່ມີຢູ່ທົ່ວສຸພາສິດ ແລະ ປັນຍາຈານກໍຄື “ການຢຳເກງພຣະຜູ້ເປັນເຈົ້າ.” ໃຫ້ເຝົ້າເບິ່ງວະລີນີ້ ຂະນະທີ່ທ່ານອ່ານ. ທ່ານຮູ້ສຶກວ່າການຢຳເກງພຣະຜູ້ເປັນເຈົ້າແມ່ນໝາຍຄວາມວ່າແນວໃດ? ຊອກຫາຄວາມຮູ້ໃນຂ່່າວສານຂອງແອວເດີ ເດວິດ ເອ ແບ໊ດນາ “Therefore They Hushed Their Fears” (Liahona, May 2015, 46–49). ການຢຳເກງພຣະຜູ້ເປັນເຈົ້າແຕກຕ່າງຈາກຄວາມຢ້ານກົວປະເພດອື່ນໆແນວໃດ?
ເບິ່ງ ສຸພາສິດ 8:13 ນຳອີກ.
ສຸພາສິດ 3:5–7; 4
“ຈົ່ງໄວ້ວາງໃຈໃນ [ພຣະຜູ້ເປັນເຈົ້າ] ດ້ວຍສຸດໃຈຂອງເຈົ້າ.”
ທ່ານຈະລອງໂນ້ມນ້າວໃຜບາງຄົນວ່າ ການ “ໄວ້ວາງໃຈໃນ [ພຣະຜູ້ເປັນເຈົ້າ]” ດີກວ່າການ “ເຊື່ອໝັ້ນ … ໃນສິ່ງທີ່ [ເຮົາ] ຄິດວ່າ [ເຮົາ] ຮູ້ຈັກ” ດ້ວຍວິທີໃດ? (ສຸພາສິດ 3:5). ທ່ານຈະໃຊ້ການປຽບທຽບ ຫລື ບົດຮຽນທີ່ໃຊ້ສິ່ງຂອງໃດ? ຂະນະທີ່ທ່ານໄຕ່ຕອງ ສຸພາສິດ 3:5–7, ໃຫ້ຄິດເຖິງວິທີທີ່ທ່ານອາດຕື່ມຄຳໃສ່ປະໂຫຍກເຊັ່ນນີ້: ການໄວ້ວາງໃຈໃນພຣະເຈົ້າປຽບເໝືອນດັ່ງ … ການເຊື່ອໝັ້ນໃນສິ່ງທີ່ເຮົາຄິດວ່າເຮົາຮູ້ຈັກປຽບເໝືອນດັ່ງ …
ເປັນຫຍັງການເຊື່ອໝັ້ນໃນສິ່ງທີ່ເຮົາຄິດວ່າເຮົາຮູ້ຈັກຈຶ່ງເປັນສິ່ງທີ່ບໍ່ສະຫລາດ? ທ່ານໄດ້ຄົ້ນພົບວ່າ ພຣະຜູ້ເປັນເຈົ້າຊົງໜ້າເຊື່ອຖືໄດ້ແນວໃດ?
ເຖິງຢ່າງນັ້ນກໍຕາມ, ເຮົາອາດພົບວ່າມັນຍາກທີ່ຈະໄວ້ວາງໃຈໃນພຣະຜູ້ເປັນເຈົ້າໃນບາງຄັ້ງ. ເປັນຫຍັງຈຶ່ງເປັນແບບນັ້ນ? ແອວເດີ ແກຣິດ ດັບເບິນຢູ ກອງ ແນະນຳເຫດຜົນບາງຢ່າງ, ພ້ອມທັງຄຳແນະນຳທີ່ມີປະໂຫຍດ, ໃນ “Trust Again” (Liahona, Nov. 2021, 97–99). ເລື່ອງລາວ ຫລື ຄຳສອນໃດແດ່ທີ່ທ່ານພົບໃນຂໍ້ຄວາມນີ້ ທີ່ອາດຊ່ວຍໃຫ້ໃຜບາງຄົນຟື້ນຟູຄວາມໄວ້ວາງໃຈໃນພຣະເຈົ້າອີກຄັ້ງ?
ທັງ ສຸພາສິດ 3:6 ແລະ ປັນຍາຈານ 4 ປຽບທຽບຊີວິດວ່າເປັນ “ເສັ້ນທາງ” ຫລື “ທາງ.” ທ່ານຄິດວ່າ ການໃຫ້ພຣະຜູ້ເປັນເຈົ້າ “[ຊີ້ນຳທາງຂອງທ່ານ]” ໝາຍຄວາມວ່າແນວໃດ? (ສຸພາສິດ 3:6). ທ່ານພົບເຫັນຫຍັງແດ່ໃນ ບົດທີ 4 ທີ່ຊ່ວຍໃຫ້ທ່ານ “ວາງແຜນຢ່າງຮອບຄອບໃນສິ່ງທີ່ [ທ່ານ] ກະທຳ”? (ຂໍ້ທີ 26). ຍົກຕົວຢ່າງ, ຂໍ້ທີ 11–12 ແລະ 18–19 ສິດສອນຫຍັງກ່ຽວກັບພອນຈາກການເດີນຕາມເສັ້ນທາງທີ່ຖືກຕ້ອງ? ຂໍ້ທີ 26–27 ມີຄວາມໝາຍຫຍັງຕໍ່ທ່ານ?
ເບິ່ງ 2 ນີໄຟ 31:18–21; “Lord, I Would Follow Thee,” Hymns, no. 220 ນຳອີກ.
ສຸພາສິດ 15; 16:24–32
“ຄຳຕອບອັນອ່ອນຫວານລະງັບຄວາມໂກດໄວ້.”
ແນວຄິດບາງຢ່າງໃນ ສຸພາສິດ 15–16 ອາດດົນໃຈທ່ານໃຫ້ພັດທະນາວິທີທີ່ທ່ານສື່ສານກັບຄົນອື່ນ, ໂດຍສະເພາະຄົນທີ່ທ່ານຮັກ. ຍົກຕົວຢ່າງ, ໃຫ້ຄິດກ່ຽວກັບເວລາທີ່ເຈາະຈົງຕອນທີ່ “ຄຳຕອບອັນອ່ອນຫວານ” ໄດ້ຊ່ວຍ “ລະງັບຄວາມໂກດໄວ້” (ສຸພາສິດ 15:1).
ທ່ານອາດຄິດເຖິງຊ່ວງເວລາທີ່ພຣະຜູ້ຊ່ວຍໃຫ້ລອດເປັນຕົວຢ່າງໃຫ້ກັບຄຳສອນໃນ ສຸພາສິດ 15:1–4, 18 (ເບິ່ງ ມາຣະໂກ 12:13–17; ໂຢຮັນ 8:1–11). ທ່ານຈະເຮັດຕາມຕົວຢ່າງຂອງພຣະອົງໄດ້ແນວໃດ ຂະນະທີ່ທ່ານປະຕິສຳພັນກັບຄົນອື່ນ?
ຄຳແນະນຳໃນ ສຸພາສິດ 15; 16:24–32 ອາດນໍາໄປໃຊ້ໃນການສື່ສານທາງດິຈິຕ້ອນໃນປະຈຸບັນໄດ້ແນວໃດ? ເບິ່ງວ່າ ທ່ານຈະສາມາດພົບຂໍ້ໜຶ່ງໃນບົດເຫລົ່ານີ້ທີ່ທ່ານສາມາດຮຽບຮຽງຄຳໃໝ່ໃຫ້ເປັນຄຳແນະນຳກ່ຽວກັບການປະຕິສຳພັນທາງສື່ສັງຄົມ ຫລື ຜ່ານຂໍ້ຄວາມໄດ້ຫລືບໍ່.
ເບິ່ງ Neil L. Andersen, “Following Jesus: Being a Peacemaker,” Liahona, May 2022, 17–20; Ronald A. Rasband, “Words Matter,” Liahona, May 2024, 70–77; ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (2022), 11–12 ນຳອີກ.
ໃຜສາມາດພົບເຫັນຜູ້ຍິງທີ່ມີຄຸນນະທຳ? II, ໂດຍ ລູອີສ໌ ພາກເກີ
ສຸພາສິດ 31:10–31
“ຍິງທີ່ຢຳເກງພຣະຜູ້ເປັນເຈົ້າ, ສົມຄວນໄດ້ຮັບຄຳຊົມເຊີຍ.”
ສຸພາສິດ 31:10–31 ບັນຍາຍເຖິງ “ຜູ້ຍິງທີ່ມີຄຸນນະທຳ,” ຫລື ຜູ້ຍິງທີ່ເຂັ້ມແຂງທາງວິນຍານ, ມີຄວາມສາມາດ, ແລະ ມີອິດທິພົນ. ທ່ານອາດລອງສະຫລຸບແຕ່ລະຂໍ້ເຫລົ່ານີ້ດ້ວຍຄວາມເວົ້າຂອງທ່ານເອງກ່ຽວກັບຍິງທີ່ມີຄຸນນະທຳ. ທ່ານສາມາດຮຽນແບບລັກສະນະນິໄສໃດໃນນີ້?
ປັນຍາຈານ 1–3; 12
ຊີວິດມະຕະເປັນພຽງຊົ່ວຄາວ.
ເປັນຫຍັງມັນຈຶ່ງມີຄ່າສຳລັບທ່ານທີ່ຈະຈື່ວ່າ ຫລາຍຢ່າງໃນໂລກນີ້, ເຊັ່ນ ປັນຍາຈານ 1–2 ຢືນຢັນ, “ອະນິຈັງ” (ຫລື ຊົ່ວຄາວ ແລະ ມັກຈະບໍ່ສຳຄັນ)? ທ່ານພົບເຫັນຫຍັງແດ່ໃນ ປັນຍາຈານ 12 ທີ່ມອບຄຸນຄ່າອັນນິລັນດອນໃຫ້ກັບຊີວິດ?
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ສຸພາສິດ 1:7; 2:5; 15:33; 16:6; ປັນຍາຈານ 12:13
ການ “ຢຳເກງພຣະເຈົ້າ” ໝາຍເຖິງການຮັກ ແລະ ເຊື່ອຟັງພຣະອົງ.
-
ເພື່ອຊ່ວຍໃຫ້ລູກໆຂອງທ່ານເຂົ້າໃຈຂໍ້ຄວາມຕ່າງໆກ່ຽວກັບການຢຳເກງພຣະເຈົ້າ, ທ່ານສາມາດປ່ຽນແທນຄຳວ່າ “ຄວາມຢຳເກງ” ເປັນຄຳຕ່າງໆເຊັ່ນ ຄວາມຄາລະວະ, ຄວາມຮັກ, ຫລື ຄວາມເຊື່ອຟັງ (ເບິ່ງ ເຮັບເຣີ 12:28 ນຳອີກ). ສິ່ງນີ້ມີຜົນກະທົບຕໍ່ວິທີທີ່ເຮົາຄິດກ່ຽວກັບຂໍ້ເຫລົ່ານີ້ແນວໃດ? ເຮົາຈະສະແດງວ່າເຮົາຢຳເກງພຣະຜູ້ເປັນເຈົ້າແນວໃດ?
ສຸພາສິດ 3:5–7
ເຮົາສາມາດໄວ້ວາງໃຈໃນພຣະຜູ້ເປັນເຈົ້າດ້ວຍສຸດໃຈ.
-
ທ່ານ ແລະ ລູກໆຂອງທ່ານສາມາດແຕ່ງການກະທຳໃຫ້ເຂົ້າກັບ ສຸພາສິດ 3:5–7, ເຊັ່ນ ເອົາມືເຮັດຮູບຫົວໃຈ, ງ່ຽງໄປຂ້າງໜຶ່ງ, ຍ່າງຢູ່ບ່ອນເກົ່າ, ແລະ ຊີ້ໃສ່ຕາຂອງທ່ານ. ເຮົາຈະສາມາດສະແດງວ່າເຮົາໄວ້ວາງໃຈໃນພຣະເຢຊູຄຣິດດ້ວຍສຸດໃຈຂອງເຮົາໄດ້ແນວໃດ?
-
ເພື່ອສະແດງວ່າ ການ “ຢ່າເຊື່ອໝັ້ນຈັກເທື່ອໃນສິ່ງທີ່ເຈົ້າຄິດວ່າເຈົ້າຮູ້ຈັກ” ນັ້ນໝາຍຄວາມວ່າແນວໃດ (ສຸພາສິດ 3:5), ໃຫ້ພິຈາລະນາທີ່ຈະເຊື້ອເຊີນລູກໆຂອງທ່ານໃຫ້ເອື່ອຍບາງຢ່າງທີ່ໜັກແໜ້ນ ແລະ ໝັ້ນຄົງ, ເຊັ່ນ ກຳແພງ. ແລ້ວພວກເຂົາສາມາດລອງເອື່ອຍບາງຢ່າງທີ່ບໍ່ໜັກແໜ້ນ, ເຊັ່ນ ຟອຍ. ຫລື ພວກເຂົາສາມາດລອງເອົາກິ່ງໄມ້ ຫລື ສໍເອື່ອຍໃສ່ວັດຖຸທີ່ມີຄວາມໜັກແໜ້ນທີ່ແຕກຕ່າງກັນ, ເຊັ່ນ ປຶ້ມ ຫລື ເຈ້ຍແຜ່ນໜຶ່ງ. ເປັນຫຍັງຈຶ່ງສຳຄັນທີ່ຈະ “ໄວ້ວາງໃຈໃນພຣະຜູ້ເປັນເຈົ້າ” (ຂໍ້ທີ 5) ແລະ ບໍ່ແມ່ນ “ສິ່ງທີ່ເຮົາຄິດວ່າເຮົາຮູ້ຈັກ”?
Learning to Trust the Lord [ຮຽນຮູ້ທີ່ຈະໄວ້ວາງໃຈພຣະຜູ້ເປັນເຈົ້າ], ໂດຍ ແຄັດລີນ ພີເຕີສັນ
ສຸພາສິດ 15:1, 18
ເຮົາສາມາດໃຊ້ຄຳເວົ້າທີ່ມ່ວນ.
-
ບາງທີທ່ານ ແລະ ລູກໆຂອງທ່ານສາມາດຄິດເຖິງສະຖານະການຕ່າງໆຕອນທີ່ທ່ານ ຫລື ພວກເຂົາອາດຮູ້ສຶກໃຈຮ້າຍ. ອ່ານ ສຸພາສິດ 15:1 ນຳກັນ, ແລະ ຊ່ວຍໃຫ້ລູກໆຂອງທ່ານນໍາໃຊ້ຂໍ້ນີ້ກັບສະຖານະການຕ່າງໆທີ່ພວກເຂົາຄິດອອກ. ບາງເທື່ອ ພວກເຂົາສາມາດຝຶກ “ຄຳຕອບອັນອ່ອນຫວານ.” ເພງກ່ຽວກັບຄວາມເມດຕາ, ເຊັ່ນ “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69), ສາມາດເສີມສ້າງຫລັກທຳນີ້ໄດ້.
-
ເພື່ອທີ່ຈະຮຽນຮູ້ວ່າ ການ “[ຊ້າທີ່ຈະໃຈຮ້າຍ]” (ສຸພາສິດ 15:18), ທ່ານ ແລະ ລູກໆຂອງທ່ານສາມາດແບ່ງປັນຊ່ວງເວລາຕອນທີ່ທ່ານ (ຫລື ຄົນທີ່ທ່ານຮູ້ຈັກ) ຮູ້ສຶກໃຈຮ້າຍ ແຕ່ເລືອກທີ່ຈະມີເມດຕາ. ຊ່ວຍໃຫ້ລູກໆຂອງທ່ານຄິດເຖິງສິ່ງທີ່ພວກເຂົາສາມາດ ໄວ ໄດ້ ຖ້າເຮົາ “[ຊ້າທີ່ຈະໃຈຮ້າຍ].” ຍົກຕົວຢ່າງ, ເຮົາສາມາດໄວທີ່ຈະຄິດກ່ຽວກັບພຣະເຢຊູ, ຂໍໃຫ້ພຣະບິດາເທິງສະຫວັນຊ່ວຍ, ຄິດເຖິງເພງປະຖົມໄວ, ຫລື, ຖ້າເປັນໄປໄດ້, ຍ່າງອອກໄປ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.