“24–30 agosto. Tinch’olob’ jo’nimal kixb’aanu li Qaawa’ choq’ re li waam: Salmos 49–51; 61–66; 69–72; 77–78; 85–86,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“24–30 agosto. Tinch’olob’ jo’nimal kixb’aanu li Qaawa’ choq’ re li waam,” Kim, Taaqehin: Li Najter Chaq’rab’ 2026
Saving That Which Was Lost [Xkolb’al li k’a’ru sachb’il], xb’aan laj Michael T. Malm
24–30 agosto: Tinch’olob’ jo’nimal kixb’aanu li Qaawa’ choq’ re li waam
Salmos 49–51; 61–66; 69–72; 77–78; 85–86
Eb’ laj Salmista ke’xtz’iib’a li reek’ahom xch’ooleb’ sa’ lix utz’u’ujinb’il aatin. Ke’tz’iib’ak chirix li wiib’ank ch’oolej, li xuwak, ut li xutaanak. Wan naq ke’reek’a naq kanab’anb’ileb’ xjuneseb’ xb’aan li Dios, ut wankeb’ li salmo li nujenaqeb’ rik’in rahilal ut xmaak’a’il li yo’onihom. Wi wan naq nakaweek’a a’in, rilb’al ru li hu Salmos naru nakatxtenq’a chixnawb’al naq moko aajunes ta wankat. A’b’an, taawileb’ ajwi’ li salmo li neke’xwaklesi aach’ool naq ra wankat, xb’aan naq eb’ laj salmista ke’xnima ajwi’ ru li Qaawa’ xb’aan lix chaab’ilal, ke’xsach xch’ool xb’aan lix wankilal, ut ke’saho’ xch’ool xb’aan li ruxtaan. Ke’xnaw naq sutb’il qix xb’aan li maa’usilal ut li maak, a’b’an ke’xnaw ajwi’ naq “q’axal chaab’il” ut “aj kuyul maak” li Qaawa’ (Salmos 86:5). Ke’xtaw ru naq li paab’aal chirix li Qaawa’ ink’a’ naraj naxye naq maak’a’aq li rahilal, li maak, malaj li xiw. Naraj b’an naxye naq nakanaw ani taasik’ sa’ laa ch’a’ajkilal.
Li na’leb’ re tzolok sa’ li ochoch ut sa’ li iglees
Salmos 49; 62:6–13
Li tojb’al-ix nachal ka’ajwi’ sa’ xk’ab’a’ li Jesukristo.
Wan li aatin sa’ Salmos 49 choq’ re “li maak’a’ xwankil ut li q’axal wank xloq’al, jo’ b’ihom jo’ neb’a’” (raqal 3). K’a’ru li aatin a’an? K’a’ chik ru nakawil sa’ Salmos 62:6–13 li naxk’am rib’?
Rilb’aleb’ li salmo a’in maare tatxmusiq’a chixk’oxlankil chan ru naq noko’aaleek chixkanab’ankil qib’ sa’ ruq’ jalan chik k’a’aq re ru sa’ xna’aj li Dios re xsik’b’al li tojb’al-ix (chi’ilmanq Salmos 49:7–8). Chan ru naq eek’asinb’il laa yu’am xb’aan lix nawom aach’ool naq “li Dios tixkol laa waam chiru xwankil li kamk”? (Salmos 49:15).
Salmos 51; 85–86
Sa’ xk’ab’a’ li ruxtaan li Kolonel, naru te’kuye’q lin maak.
Li rey aj David kixtz’iib’a Salmos 51 chirix naq kixk’e reetal naq naraj ru naq taakuye’q lix maak—li naqaj ajwi’ ru chiqajunilo laa’o. B’ar wan reheb’ li raqal neke’xch’olob’ li k’a’ru aaweek’ahom laa’at? K’a’ru nakataw sa’ li salmo a’in li naxk’e aawoyb’enihom chirix li kuyuk maak?
Naru ajwi’ nakasik’ li na’leb’ sa’ Salmos 51 chirix k’a’ru naraj naxye li jalb’a-k’a’uxlej. Tz’iib’a li k’a’ru nakataw. Re xtawb’al xkomon li na’leb’ naru nakawil li raatin li Awa’b’ej Russell M. Nelson, “Naru taqab’aanu li chaab’il wi’chik ut toowanq chi chaab’il wi’chik” (Jolomil ch’utub’aj-ib’ re abril 2019).
Chan raj ru taach’olob’ li na’eek’aman chirix xk’ulb’al xkuyb’al li maak rik’in li Kristo? Wi nakawaj aatenq’ankil re xch’olob’ankileb’ laa week’ahom, naru nakawil Salmos 51:1–2, 7–12; 85:2–9. Junjunqeb’ li kristiaan nawulak chiruheb’ xyiib’ankil malaj xsik’b’al xjalam-uucheb’ li reek’ahom; naru nakayal xb’aanunkil a’an. Naru ajwi’ nakab’icha malaj nakawab’i junaq b’ich chirix li Kolonel, jo’ “Sachso ninkana” (Eb’ li B’ich, 118).
Re xjalb’al qak’a’uxl, tento taqapaab’ naq li Jesukristo naru tooxsaqob’resi ut naq jo’kan tixb’aanu. K’a’ru nakataw sa’ Salmos 86:5, 13, 15 li nakatxtenq’a chixnawb’al naq li Kolonel naru ut naraj xkuyb’al li maak?
Chi’ilmanq ajwi’ Alma 36; Peter F. Meurs, “A’an naru chink’irtesinkil!,” Jolomil ch’utub’aj-ib’ re abril 2023.
Salmos 51:13–15; 66:5–20; 71:15–24
Lix nawom inch’ool chirix li Jesukristo naru tixtenq’aheb’ li was wiitz’in chi chalk rik’in a’an.
K’oxla chan ru xak’ul xnawom aach’ool chirix li Jesukristo ut lix wankilal re xtojb’al rix laa maak. Chirix a’an, naq yookat chirilb’al Salmos 51:13–15; 66:5–20; 71:15–24, k’oxla chan ru taab’oqeb’ laa was aawiitz’in re “te’chalq chirilb’al lix b’aanuhom li Dios” (Salmos 66:5). Wi tento raj “taaseraq’i jo’nimal kixb’aanu aawe li Qaawa’” (Salmos 66:16), k’a’ raj ru taaye?
K’a’ru naraj naxye choq’ aawe “xseraq’inkil lix tiikilal chi junelik”? (Salmos 71:24).
Chi’ilmanq ajwi’ Alma 26.
“Kimqex chi ab’ink ut tinseraq’i eere jo’nimal kixb’aanu we li Qaawa’” (Salmos 66:16).
Salmos 63; 69; 77–78
Li Qaawa’ tinxtenq’a sa’ wajom ru.
Naab’aleb’ li salmo neke’xch’olob’ chan ru na’eek’aman li wank chi najt rik’in li Dios ut rajb’al ru lix tenq’ (chi’ilmanq Salmos 63:1, 8; 69:1–8, 18–21; 77:1–9). K’a’ru nakataw sa’ Salmos 63; 69; 77–78, li kixk’ojob’ xch’ooleb’ laj salmista?
Naq naraho’ aach’ool, chan ru tenq’anb’ilat naq “najultiko’ aawe li xninqal ru xb’aanuhom li Qaawa’” ut “li sachb’a-ch’oolej kixb’aanu junxil”? (Salmos 77:12). Ch’olob’anb’ileb’ junjunq reheb’ li sachb’a-ch’oolej a’an sa’ Salmos 78. Naq nakawileb’ resil, k’oxla k’a’ru nakatxtenq’a chixk’eeb’al aayo’onihom rik’in li Dios (chi’ilmanq li raqal 7).
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Xb’aan naq a’an a’in li ro’ domingo re li po, us raj naq eb’ laj k’utunel sa’ li Tzoleb’aal reheb’ li Kok’al te’roksi li kok’ k’anjel sa’ “Xtiqb’al li aatin B: Xkawresinkileb’ li kok’al re te’kanaaq chiru chixjunil li yu’am sa lix b’ehileb’ li sumwank re li Dios.”
Salmos 51; 86:5, 13, 15
Naq ninb’aanu li k’a’ru ink’a’ us, li Jesukristo naru nikinxtenq’a chi jalaak.
-
Re xtenq’ankileb’ laa kok’al chixtawb’aleb’ li yaal chirix li jalb’a-k’a’uxlej sa’ Salmos 51, naru nakayiib’ xjalam-uuch junaq aamej chi nim. Tatruuq ut chixtenq’ankileb’ laa kok’al chixtz’iib’ankil sa’ li aamej li k’a’aq re ru ink’a’ us li nokoraale chixb’aanunkil laj Satanas. Chan ru neke’qisi li k’a’aq re ru a’an sa’ li qaam? Patz’ reheb’ laa kok’al naq te’xsik’ li aatin “ch’oolej” sa’ Salmos 51:12, 19. Wotz li neke’xk’ut li raqal a’in chirix li jalb’a-k’a’uxlej. Kanab’eb’ laa kok’al chirisinkileb’ li aatin sa’ li aamej ut te’xtz’iib’a ak’ aatin li neke’xch’olob’ chan ru naq li Jesus naru nokoxk’e chi jalaak naq naqajal qak’a’uxl.
-
Maare taawaj xtenq’ankileb’ laa kok’al chixtzolb’al k’a’ru naraj naxye jun ch’oolej yot’b’il ut tuulan (chi’ilmanq Salmos 51:17). Naru nekek’e eehoonal re xjorb’al junaq k’a’aq re ru kaw li rix, jo’ jun li mol malaj jun li map. Naru nakatenq’aheb’ chixjuntaq’eetankil rix li k’a’ru kaw rik’in li k’a’ru naramok qe chireek’ankil lix rahom li qaChoxahil Yuwa’. Chan ru naru naqate li qaam chiru a’an?
-
Naru ajwi’ nekeril junaq xjalam-uuch li Kolonel ut taapatz’ reheb’ laa kok’al k’a’ru li aatin te’roksi raj re aatinak chirix a’an. Patz’ reheb’ naq te’xsik’ aatin li neke’aatinak chirix a’an sa’ Salmos 86:5, 13, 15. K’a’ut naq aajel ru xnawb’aleb’ li na’leb’ a’in chirix a’an?
Salmos 61:3–4
Li Jesukristo a’an lin saqoonaq,
-
Maare taawulaq chiruheb’ laa kok’al xyiib’ankil xjalam-uuch li eetalil wankeb’ sa’ Salmos 61:3–4. Chan ru naq li Jesukristo juntaq’eet rik’in jun “saqoonaq” najt xteram (raqal 3), “li muhelaal,” ut li “kab’l q’axal kaw rib’”? (raqal 4).
“Laa’at nakatmuhelank we, kama’at junaq kab’l li q’axal kaw rib’” (Salmos 61:4).
Salmos 66:16; 77:12; 78:6–7
“Najultiko’ we li xninqal ru xb’aanuhom li Qaawa’.”
-
Patz’ reheb’ laa kok’al naq te’xwotz junjunq reheb’ li seraq’ neke’wulak chiruheb’ sa’ li loq’laj hu (eb’ li jalam-uuch wankeb’ sa’ li Hu reheb’ li Jalam-uuch re li Evangelio naru neke’tenq’an). K’a’ru neke’xk’ut chiqu li seraq’ a’an chirix li Qaawa’? Naru nekeril Salmos 66:16 ut teek’e eehoonal re xsumenkil li patz’om “K’a’ru xb’aanuhom li Qaawa’ choq’ re li waam”?
-
Naq teeril Salmos 77:12; 78:6–7, naru nekewotz chan ru “najultiko’ eere li xninqal ru xb’aanuhom li Qaawa’” (Salmos 77:12), jo’ ajwi’ lix k’anjel sa’ lee yu’am. Chan ru naq li loq’laj wa’ak nokoxtenq’a “junelik chixjultikankil a’an”? (Moroni 4:3; 5:2).
Salmos 71:8
Naru nikin’aatinak chirix li Jesukristo rik’ineb’ li was wiitz’in.
-
Chirix naq taawil Salmos 71:8 rik’ineb’ laa kok’al, patz’ reheb’ naq te’xyiib’ xjalam-uuch jun xnimal tz’uumal ehej. Patz’ reheb’ naq tate’xtenq’a “chixnujob’resinkil” li xtz’uumal ehej rik’in k’a’aq re ru li naru naqaye reheb’ li qas qiitz’in chirix li Jesukristo.
-
Naru taanumsi jun xjalam-uuch li Jesukristo sa’ xyanqeb’ li kok’al. Li kristiaan li nachapok re li jalam-uuch naru naxye junaq na’leb’ naxnaw chirix a’an. Chan ru naru naqatenq’aheb’ li kristiaan chixnawb’al li k’a’aq re ru a’in?
Eb’ li kok’al naab’al li k’a’ru naru neke’xwotz. “Naq eb’ li kok’al neke’xtzol jun ak’il na’leb’, ak reheb’ naq te’raj xwotzb’al rik’in jalaneb’. Tenq’a li rajomeb’ a’in rik’in xk’eeb’al xhoonaleb’ li kok’al chixk’utb’al li na’leb’ re li evangelio chirib’ileb’ rib’, rik’ineb’ lix junkab’al, ut rik’ineb’ li ramiiw. Patz’ ajwi’ reheb’ naq te’xwotz aawik’in lix k’oxlahom, li reek’ahom, ut li k’a’ru xe’xk’ul chaq rik’in li na’leb’ yookat chixk’utb’al. Taak’e reetal naq wankeb’ xna’leb’ li saqeneb’ ru ut nim xwankileb’” (Li K’utuk jo’ li Kolonel, 32).
Salmos 86:7
Lin Choxahil Yuwa’ narab’iheb’ ut naxsumeheb’ lin tij.
-
Naab’al reheb’ li salmo a’aneb’ li tij chiru li Dios. Naq taawileb’ li Salmos rik’ineb’ laa kok’al, naru nakak’uteb’ k’a’aq re ru li naru neke’qoksi re raatinankileb’ li kristiaan li wankeb’ chi najt, jo’ jun telefono malaj jun li hu. Chirix a’an il Salmos 86:7. Chan ru “naqayaab’a” xk’ab’a’ li qaChoxahil Yuwa’? Chan ru naq nokoxsume?
-
Naru nekeb’icha jun li b’ich chirix li tijok, jo’ “Natijok jun chʼina al” (B’ichleb’aal choq’ reheb’ li Kok’al, 6–7; chi’ilmanq ajwi’ Susan H. Porter, “Chattijoq, yoo chi ab’ink,” Jolomil ch’utub’aj-ib’ re abril 2024. Seraq’ihomaq cherib’il eerib’ resil junaq hoonal b’ar wi’ li Dios xsume lee tij.
Re xtawb’al xkomon chik li na’leb’, chi’ilmanq li hu Amigos re li po a’in.