Ester

Li Awa’b’ej Dieter F. Uchtdorf kixk’ut naq chiqajunilo “wanko sa’ jun na’ajej b’ar wi’ tento toowanq ut b’ar wi’ wan jun k’anjel aajel ru li k’a’jwi’ naru naqab’aanu laa’o. … Wan xyaalal naq li Qaawa’ kixk’e aateneb’ankil. Maare wankeb’ kristiaan ut aamej li ka’ajwi’ naru neke’tawe’ ut neke’toch’e’ aab’aan laa’at. Maare maa’ani raj chik taaruuq chi b’aanunk re (“Impulsen desde donde estén,” Liahona, noviembre 2008, 56).

Naq nakawil ru li seraq’ chirix xEster, k’oxla chan ru naq li aatin a’in wan xyaalal sa’ xyu’am. K’e reetal li k’a’ru kixb’aanu li Qaawa’ re xtenq’ankil chixkolb’aleb’ laj Judio (chi’ilmanq, Ester 2:21–23; 3:10–14; 4:14–16). Chirix a’an k’oxla chan ru naq naxk’e aahoonal chirosob’tesinkileb’ laa was aawiitz’in. Ma naru nakak’oxlaheb’ hoonal ut kristiaan xatxb’eresi wi’ chixtenq’ankileb’? (Ester 4:14). Wi ak xak’ul jun rosob’tesihom li yuwa’b’ejil aj k’anjel, naru taawil ru re xtzolb’al k’a’ru naraj li Qaawa’ naq taab’aanu. Kʼaʼru naru taabʼaanu re xbʼaanunkil lix kʼanjel aʼin?

Chiʼilmanq ajwiʼ “Para este tiempo” (video), ChurchofJesusChrist.org.

13:44

Sa’ lix hu li xEster, naqataw qana’leb’ rik’in xtiikilal chi paab’ank xEster ut laj Mardokeo, jo’ ajwi’ rik’in xq’etq’etil ut xjosq’il laj Aman. Naq nakawil Ester 3; 5:9–14, k’e reetal k’a’ru kireek’a, kixye, ut kixb’aanu laj Aman. K’a’ru naxk’ut a’an chirix li rajom xch’ool? K’a’ru xq’ajkamunkil? (chi’ilmanq Ester 7). Li seraq’ chirix laj Aman maare tatxk’e chixtz’il rix li rajom aach’ool sa’ li nakaweek’a ut li nakab’aanu. Ma wan k’a’ru taawaj xjalb’al? Chan ru taasik’ xtenq’ li qaChoxahil Yuwa’?

Chi’ilmanq ajwi’ Proverbios 16:32; Alma 5:28.

K’e reetal k’a’ut naq xEster ut eb’ laj Judio ke’xkuy xsa’ (chi’ilmanq Ester 3:13; 4:1–3, 10–17). Chan ru ke’osob’tesiik naq ke’xkuy xsa’? (chi’ilmanq Ester 5:2–3; 8:11–12). K’a’ut naq li Qaawa’ naxpatz’ naq taqakuy qasa’? (chi’ilmanq Temas y preguntas, “Ayuno y ofrendas de ayuno,” Biblioteca del Evangelio). K’oxla k’a’ru taab’aanu re naq lix kuyb’al aasa’ taawulaq choq’ nimla osob’tesiik sa’ laa yu’am.

Chi’ilmanq ajwi’ Isaias 58:6–12; “Ayuno: Amanda, de un barrio de jóvenes adultos solteros” (video), ChurchofJesusChrist.org.

2:41

Naq laj Mardokeo ut xEster ke’xxaqab’ rib’ chixkolb’al rix lix paab’ahomeb’ ut lix tenamiteb’, kiru raj naq te’kamsiiq. Li k’a’ru naqasik’ ru xb’aanunkil naru naxk’am chaq li k’a’ru ink’a’ jwal ra jo’ a’an, a’b’an xb’aanunkil li k’a’ru us naraj ru li kawil ch’oolej. K’a’ru nakatzol sa’ Ester 3:1–4; 4:10–17 chirix xkawilal li ch’oolej sa’ xb’aanunkil li us? K’e reetal lix jalanil li kixk’ul laj Mardekeo rik’in li kixk’ul xEster chirix naq ke’xk’ut xpaab’aaleb’ (chi’ilmanq Ester 3:5–11; 5:1–4). K’a’ru ke’raj ru xnawb’al li xEster ut laj Mardokeo chirix li Dios re xsik’b’al ru li k’a’ru ke’xsik’ ru xb’aanunkil?

K’oxlaheb’ hoonal b’ar wi’ nakawaj ru li kawil ch’oolej re xkolb’al rix li k’a’ru us. K’a’ru nakatzol rik’in li xEster ut laj Mardokeo li naru nakatxtenq’a chixtawb’al xkawil aach’ool rik’in li Qaawa’?

Lix kawil xch’ool li xEster kixk’am chixnumsinkil “jun kutan q’axal sa” (chi’ilmanq Ester 9:17–19). Chan ru naq li xkawil ch’oolej aj Kristiano naxk’e “jun kutan q’axal sa” aawe?

Chi’ilmanq ajwi’ “Valor,” “Atrévete a lo correcto aunque solo estés” (video), Biblioteca del Evangelio; “Xaqxo toowanq,” Eb’ li B’ich, 164.

3:19

4:20

• Maare taaweek’a naq us roksinkil Ester 2:7 re xk’utb’al chiruheb’ laa kok’al chan ru xtenq’ankileb’ li komon wankeb’ sa’ rajom ru, jo’ kixb’aanu laj Mardokeo rik’in xEster. Naru nekeril li raqal sa’ komonil malaj taach’olob’ a’an sa’ tz’aqal aawaatin. Chirix a’an, laa’at ut eb’ laa kok’al naru nekek’oxlaheb’ li komon sa’ lee junkab’al li maare neke’raj ru xtenq’ankil. K’uub’ahomaq chan ru teetenq’a.

• Lix k’utum li xEster ut laj Mardokeo naru neke’xtenq’aheb’ laa kok’al chixtawb’al ru naq li kawil ch’oolej naraj naxye naq taab’aanumanq li k’a’ru chaab’il us ta wan li xiw. Naru nakatz’iib’aheb’ li ch’ol aatin Laj Mardokeo kiwan chi kaw xch’ool naq a’an … ut Li xEster kiwan chi kaw xch’ool naq a’an … . Naq yooqex chixtzolb’al li seraq’ chirix xEster sa’ komonil, laa kok’al naru neke’xye chan raj ru naru nachoyman li ch’ol aatin. Naru nakawil Esdras 3:1–11; 4:10–17 malaj “Li xEster, rixaqil li rey” (sa’ Eb’ li Esilal sa’ li Najter Chaq’rab’, 166–170) malaj li jalam-uuch sa’ li tusulal a’in. Chirix a’an tz’iib’a Tinwanq chi kaw inch’ool naq …, ut patz’ reheb’ laa kok’al naq te’xtz’iib’a li k’a’aq re ru naraj li qaChoxahil Yuwa’ naq te’xb’aanu ut li naraj kawil ch’oolej. Jun li b’ich chirix li kawil ch’oolej jo’ “Sikʼ xbʼaanunkil li tiikilal” (B’ichleb’aal choq’ reheb’ li Kok’al, 80), naru naxtenq’aheb’ li kok’al

  

  2:45

• Naru ajwi’ nakataw eena’leb’ chirixeb’ li hoonal b’ar wi’ li Jesukristo kiwan chi kaw xch’ool—qayehaq, naq kixnumsi rahilal sa’ xk’ab’a’ li qamaak sa’ Getsemani ut sa’ li krus (chi’ilmanq Mateo 26:36–39; 27:33–35). Patz’ reheb’ laa kok’al naq te’xwotz resil junaq hoonal b’ar wi’ ke’wan chi kaw xch’ool ut wotz ajwi’ laa we laa’at.

• Rilb’al Ester 4:1–3, 10–17 naru nakatxtenq’a chixtzolb’aleb’ laa kok’al chirix li kuyuk sa’. K’a’ut naq li xEster ut eb’ laj Judio ke’xkuy xsa’? Seraq’i reheb’ laa kok’al k’a’ut naq nakakuy aasa’ laa’at. Naru ajwi’ nakapatz’ reheb’ chan raj ru te’xch’olob’ li kuyuk sa’ re jun reheb’ li ramiiw li maajun wa xkuyum xsa’. Chan raj ru naru neke’qatenq’a li qamiiw chixtawb’aleb’ ru li osob’tesihom neke’k’ulman sa’ xk’ab’a’ li kuyuk sa’?

• Waklesi xch’ooleb’ laa kok’al chixk’oxlankil k’a’ raj ru naru neke’raj wi’ ru xtenq’ li Qaawa’. Ye reheb’ naq naru neke’xk’e a’an jo’ xcha’al li kuyuk sa’ chiru li domingo chal re.

• Tenq’aheb’ laa kok’al chixtawb’al ru naq sa’ li hoonal naq kiwan xxiw li xEster, laj Mardokeo kixwaklesi xch’ool a’an rik’in xch’olob’ankil chiru naq kitenq’aak xb’aan li Qaawa’ chi wulak choq’ reina “re qatenq’ankil sa’ li rahilal a’in” (Ester 4:14). K’a’ru kiraj xyeeb’al laj Mardokeo rik’in a’in? Aatinanqex chirix chan ru naq li xEster kiwan jo’ jun k’anjeleb’aal sa’ ruq’ li Qaawa’. Chan ru toowanq choq’ k’anjeleb’aal sa’ ruq’ li Qaawa’?

• Chan ru naru nakatenq’aheb’ laa kok’al chixtawb’al ru k’a’ru a’an jun k’anjeleb’aal? Maare naru nakak’e xb’oqb’al anihaq chixtoch’b’al junaq li b’ich malaj xk’utb’al xjalam-uuch anihaq li naroksi junaq k’anjeleb’aal. Naru neketz’il rix k’a’ru naraj naxye wank choq’ k’anjeleb’aal sa’ ruq’ li Dios.