Job 1–3; 12–14; 19; 21–24; 38–40; 42

Li xb’eenileb’ raqal sa’ lix hu laj Job neke’xch’olob’, rik’in uutz’u’ujinb’il aatin, lix k’anjel laj Satanas jo’ aj ka’pak’alinel malaj aj jitonel; ink’a’ naxye naq li Dios ut laj Satanas neke’seraq’ik. Naq taawil li k’a’ru kixye laj Satanas chirix laj Job (chi’ilmanq Job 1:9–11; 2:4–5), naru nakapatz’ aawib’, “K’a’ut naq toj wankin chi tiik chiru li Dios?” K’a’ut naq xiwxiw xpaab’ankil li Qaawa’ ka’ajwi’ xb’aan li na’leb’ kixye laj Satanas?

K’a’ru naxsach aach’ool chirix lix na’leb’ laj Job sa’ lix yalb’al rix? (chi’ilmanq Job 1:20–22; 2:9–10).

Eb’ li ramiiw laj Job ke’xye naq yoo chi k’ehe’k sa’ tojb’a-maak xb’aan li Dios (chi’ilmanq Job 4–5; 8; 11). K’a’ru li ch’a’ajkilal nakawil sa’ li na’leb’ a’in? Il lix sumehom laj Job sa’eb’ li ch’ol 12–13. K’a’ru kixnaw laj Job chirix li Dios li kitenq’an re chixkanab’ankil rib’ sa’ ruq’ a’an? K’a’ru nakanaw laa’at chirix li Dios li nakatxtenq’a chixk’ulb’al lix yalb’al aawix?

Wan naq neke’qatzol li yaal aajeleb’ ru sa’eb’ li hoonal ch’a’aj. K’oxla lix yalb’al rix laj Job sa’ Job 19:1–22 ut li na’leb’ li kixye sa’eb’ li raqal 23–27. Chan ru nakanaw naq yo’yo laj Tojol aawix? Chan ru naq li nawom a’in naxjal laa yu’am?

Naru nakab’icha malaj nakawab’i jun li b’ich chirix li Jesukristo, jo’ “Ninnaw naq yoʼyo inKolonel” (Eb’ li B’ich, 77). K’a’ru aatin sa’ li b’ich a’in neke’xch’olob’ laa week’ahom chirix a’an?

Chi’ilmanq ajwi’ Tzol’leb’ ut Sumwank 121:1–12; 122.

Sa’ Job 21–24, taawil li wech’ink naxb’aanu laj Job rik’ineb’ li ramiiw. Sa’ xyi li wech’ink a’in wan jun li patz’om neke’xpatz’ naab’aleb’ li kristiaan: K’a’ut naq eb’ li ani tiik neke’xk’ul rahilal?

Us ta ink’a’ naru naqasume chixjunil, sa’ lix evangelio li Jesukristo, li k’ojob’anb’il wi’chik, naqataw junjunq li yaal li naru nokoxtenq’a chixtawb’al ru li ch’a’ajkilal ut li rahilal. Arin wankeb’ junjunq li raqal reheb’ li roso’jik li kutan a’in b’ar wi’ neke’tawman li yaal a’an. K’a’ru neke’xk’ut li raqal a’an chirix li qaChoxahil Yuwa’ ut lix k’uub’anb’il na’leb’?

• 2 Nefi 2:11–13

• Mosiah 23:21–23; 24:10–16

• Eter 12:27

• Tzol’leb’ ut Sumwank 58:3–5

• Abraham 3:22–26

Naru ajwi’ nakawil lix k’utum li Awa’b’ej Spencer W. Kimball chirix li ch’a’ajkilal sa’ “¿Tragedia o destino?” (Enseñanzas de los Presidentes de la Iglesia: Spencer W. Kimball [2011]), 13–24).

A’ yaal li k’a’ru xatzol, chan raj ru taasume jun patz’om jo’ “K’a’ut naq li Dios naxkanab’ naq eb’ li ani tiik te’xk’ul rahilal?”

Chi luktajenaq xch’ool xb’aan lix q’aab’ahomeb’ li ramiiw (chi’ilmanq Job 16:1–5; 19:1–3), laj Job k’iila sut kixpatz’ re li Dios k’a’ut naq numtajenaq li rahilal naxk’ul (chi’ilmanq Job 19:6–7; 23:1–9; 31). Li Qaawa’ ink’a’ kixch’olob’ a’an sa’ lix hu laj Job. A’b’an kixk’ut jun na’leb’ aajel ru sa’eb’ li ch’ol 38–40. Chan raj ru taak’os ru li na’leb’ a’an? K’a’ru nakatzol sa’eb’ lix patz’om li Qaawa’ sa’ Job 38:1–7, 18–24?

Taak’e reetal naq li Qaawa’ ki’aatinak rik’in laj Job chirix junjunq reheb’ lix yo’ob’tesihom ut xkomoneb’ chik li xninqal ru k’anjel (chi’ilmanq Job 38–39). Naru nakawileb’ junjunq reheb’ li yo’ob’tesihom a’in (malaj xjalam-uucheb’ a’an). Chan ru naq eb’ li k’a’aq re ru a’in nakate’xtenq’a chixjalb’al laa k’a’uxl chirix li Dios? chirixeb’ li yale’k? Chan ru naq kijala lix k’a’uxl laj Job? (chi’ilmanq Job 42:1–6; chi’ilmanq ajwi’ Moises 1:8–10).

A’ineb’ wiib’ li aatin re li jolomil ch’utub’aj-ib’ li naru neke’xjal li qak’a’uxl: Tamara W. Runia, “Rilb’al lix junkab’al li Dios rik’in li lem li na’ilok chaq chi najt” (Jolomil ch’utub’aj-ib’ re octubre 2023); Russell M. Nelson, “Chak’oxla li k’a’ru re choxa!” Jolomil ch’utub’aj-ib’ octubre 2023). Sa’ yalaq b’ar wan reheb’ li aatin a’an, sik’ junaq na’leb’ li nakawaj xjultikankil sa’ li hoonal naq lix yalb’al aawix chanchan naq jwal kaw. Chan ru taajultika li k’a’ru xatzol?

• Patz’ reheb’ laa kok’al naq te’xye k’a’ru neke’xnaw chirix laj Job. Wi neke’raj xtenq’, naru nakataqlaheb’ chixsik’b’al Job 1:1, 13–22; 2:7–10 malaj “Laj Job” (sa’ Eb’ li Esilal sa’ li Najter Chaq’rab’, 145–147). Chan ru naq laj Job kixk’ulub’aheb’ li ch’a’ajkilal? (chi’ilmanq Job 1:21; 2:10).

  

  1:55

• Laj Job kiwan chi tiik sa’eb’ lix ch’a’ajkilal sa’ xk’ab’a’ lix nawom chirix li Qaawa’. Maare laa’at ut eb’ laa kok’al texruuq chirilb’al junaq xjalam-uuch li Jesukristo naq na’aatinak rik’ineb’ jalan chik kristiaan (jo’ li wan arin malaj sa’ li Hu reheb’ li Jalam-uuch re li Evangelio). Aatinanqex chirix li nekenaw chirix a’an ut chan ru a’an. Arin wankeb’ junjunq li raqal li neke’xk’ut k’a’ru naxnaw laj Job chirix li Qaawa’ : Job 12:10, 13, 16; 19:25–27. K’a’ut naq aajel ru xnawb’aleb’ li na’leb’ a’in chirix a’an?

• Laj Job kixpatz’ jun na’leb’ aajel ru sa’ Job 14:14. Maare laa’at ut eb’ laa kok’al nekexru chixk’eeb’al eehoonal re xwotzb’al chan raj ru teesume laj Job. Naru nakasik’ aana’leb’ sa’ Alma 11:42–44, sa’ li video “Un mensaje de esperanza y triunfo en la Pascua de Resurrección” (Biblioteca del Evangelio), malaj sa’ junaq b’ich chirix li wakliik chi yo’yo, jo’ “Ma yaal naq li Jesus xwakli?” (B’ichleb’aal choq’ reheb’ li Kok’al, 45).

1:11

• Naq laj Job ra chaq xch’ool, eb’ li ramiiw ke’xye naq yoo chi k’ehe’k sa’ tojb’a-maak xb’aan li Dios xb’aan naq kimaakob’k (chi’ilmanq Job 22:5). Wi ta laa’o raj ramiiw laj Job, chan raj ru taqayal xtenq’ankil? Chan ru naq li qaatin naru naxtenq’aheb’ li qas qiitz’in naq raheb’ xch’ool? (chi’ilmanq Job 16:5). Naru nakak’ut jun malaj wiib’ oxib’ li jalam-uuch sa’ li tusleb’ aatin a’in naq yooqex chixtz’ilb’aleb’ rix li patz’om a’in.

• Patz’ reheb’ laa kok’al naq te’xtz’iib’a junjunq xchaab’ilaleb’ li chaab’il amiiw ut naq te’xye xk’ab’a’ junaq ramiiweb’ li wan xchaab’ilal chi jo’kan. Naru ut nekeril junaq xjalam-uch li Jesukristo. Chan ru naq li Jesus a’an jun chaab’il amiiw choq’ qe chiqajunil? Maare najultiko’ aawe junaq kristiaan li yoo chi nume’k sa’ ch’a’ajkilal. K’uub’ chan ru tatwanq jo’ jun amiiw jo’ li Kristo choq’ reheb’ a’an.

• Chirix rilb’al Job 19:23–27, laa’at ut eb’ laa kok’al naru nekeye chan ru naq nekenaw naq laj Kolol qe yo’yo. Naru ajwi’ nekexk’anjelak sa’ komonil re xtz’iib’ankil lix nawom eech’ool (malaj xk’eeb’al xjalam-uuch li Kolonel) sa’ jun tasal hu (chi’ilmanq raqal 23).

• Naru ajwi’ nekeb’icha jun li b’ich li nach’olob’an chirix li Kolonel, jo’ “Ninnaw naq yo’yo inKolonel” (Eb’ li B’ich, 77). Wotzomaq ch’ol aatin re li b’ich li naxkawob’resi lee paab’aal chirix a’an. K’a’ut naq aajel ru xnawb’al naq yo’yo li Jesukristo?