“31 agosto–6 septiembre. “Chixjunil li wank xyu’am chixnimaaq xk’ab’a’ li Qaawa’”: Salmos 102–103; 110; 116–119; 127–128; 135–139; 146–150,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“31 agosto–6 septiembre. “Chixjunil li wank xyu’am chixnimaaq xk’ab’a’ li Qaawa’,”” Kim, Taaqehin: Li Najter Chaq’rab’ 2026
Reverential Return [Sutq’iik rik’in oxloq’], xb’aan li xKelsy ut laj Jesse Lightweave
31 agosto–6 septiembre: “Chixjunil li wank xyu’am chixnimaaq xk’ab’a’ li Qaawa’”
Salmos 102–103; 110; 116–119; 127–128; 135–139; 146–150
Lix k’ab’a’ li hu Salmos sa’ Hebreo a’an Tehillim, jun aatin li naraj naxye “nimank-u.” Wan rilom rik’in li aatin Aleluya (li naraj naxye “nimamb’ilaq taxaq xk’ab’a’ li Jehova” malaj “loq’oninb’ilaq taxaq li Jehova”). Wi ta taasik’ ru yal jun aatin re xch’olob’ankil li na’leb’ k’utb’il sa’ li hu Salmos, chaab’ilaq raj li aatin nimank-u. Wankeb’ li salmo li neke’xye “chenimaaq xk’ab’a’ li Qaawa’” (chi’ilmanq Salmos 146–150), ut chixjunileb’ neke’ru chiqamusiq’ankil re taqaloq’oni ut taqanima ru li Qaawa’. Eb’ li Salmo nokohe’xb’oq chixk’eeb’al reetal lix wankilal ut li ruxtaan li Qaawa’, jo’ ajwi’ chixjunil li xninqal ru b’aanuhom. Maajo’q’e raj truuq taqatoj xtz’aq li kixb’aanu choq’ qe, a’b’an naru taqanima ru. Jalan jalanq paay li nimank-u naru naqab’aanu—maare a’an li b’ichank, li tijok, malaj xyeeb’al lix nawom qach’ool. Naru nokoxtenq’a chixtaaqenkil li Qaawa’ ut li raatin chi anchal qach’ool. Maak’a’ naxye k’a’ru naraj naxye “xnimankil ru xk’ab’a’ li Qaawa’” sa’ laa yu’am, naru tatmusiq’aaq chixb’aanunkil a’an naq nakawileb’ ut nakatk’oxlak chirixeb’ li Salmo.
Li na’leb’ re tzolok sa’ li ochoch ut sa’ li iglees
Salmos 102–103; 116
Li Qaawa’ naru tixk’ojob’ inch’ool sa’ inch’a’ajkilal.
K’e reetal chan ru naq Salmos 102:1–12 naxch’olob’ li rahilal ut li junaatal li wan naq nachal rik’in li yale’k. Maare laa’at malaj jalaneb’ chik kristiaan ak nekenaweb’ ru li eek’ahom a’an. Naq nakawil Salmos 102:13–29; 103; 116, sik’eb’ li aatin li neke’xk’e xkawilal aach’ool chixpatz’b’al xk’ab’a’ li Qaawa’ (chi’ilmanq Salmos 116:13). Maare taawaj xjuch’b’al, xkanab’ankil sa’ aak’a’uxl, malaj xwotzb’al li aatin li naxk’e aayo’onihom rik’in a’an.
Chi’ilmanq ajwi’ Isaias 25:8; Hebreos 2:17–18; Alma 7:11–13; Camille N. Johnson, “A’ li Jesukristo natenq’an qe,” Jolomil ch’utub’aj-ib’ re abril 2023; “Bʼar wan xhiilal li waam?” (Eb’ li B’ich, 67).
Carl Heinrich Bloch (1834–1890), Cristo sana a los enfermos de Betesda, 1883, óleo sobre lienzo, 100 3/4 × 125 1/2 pulgadas. Museo de Arte de la Universidad Brigham Young, kiloq’man rik’in li tumin kixsi laj Jack R. ut xMary Lois Wheatley, 2001.
Salmos 110; 118
Li Jesukristo kixtz’aqob’resi ru li profeetil aatin wankeb’ sa’ li Salmos.
Wankeb’ li Salmo li neke’aatinak chirix lix yu’am ut lix k’anjel li Jesukristo. Wahe’ junjunq li na’leb’ re aatenq’ankil:
-
Salmos 110:1–4 (chi’ilmanq Mateo 22:41–45; Hebreos 5:4–10; 6:20)
-
Salmos 118:22 (chi’ilmanq Mateo 21:42; Hechos 4:10–11; 1 Pedro 2:7)
-
Salmos 118:25–26 (chi’ilmanq Mateo 21:9)
K’a’ru neke’xk’ut li raqal a’in chawu chirix li Jesukristo? K’a’ut naq aajel ru xnawb’aleb’ li na’leb’ a’in chirix a’an?
Salmos 119
Li raatin li Dios tixk’am inb’e rik’in a’an.
Sa’ Salmos 119 wankeb’ naab’al ch’ol aatin li neke’xjuntaq’eeta li qayu’am rik’in jun b’e re q’ajk rik’in li qaChoxahil Yuwa’. Naq yookat chirilb’al, sik’eb’ li aatin jo’ “b’eek,” “b’e,” ut “oqej.” K’oxla xb’ehil laa yu’am—b’ar wanjenaqat, b’ar wankat, ut b’ar yookat chi xik anajwan. K’a’ru nakatzol sa’ li salmo a’in chirix laa b’eenik re q’ajk rik’in li Dios? K’a’ru nakatzol naq nakawileb’ xb’e laa was aawiitz’in? Jo’ naxye sa’ li salmo a’in, k’a’ru xk’e li Dios aawe re aatenq’ankil chi kanaak chiru lix b’e a’an?
Jultika junaq hoonal b’ar wi’ katwulak sa’ junaq na’ajej rik’in xtaaqenkil jun li b’e malaj jun li reetalil li ch’och’. K’a’ru naxk’ut chawu a’an chirix xtaaqenkil lix b’e li Dios?
Sa’ naab’aleb’ chik li loq’laj hu, li Qaawa’ ut eb’ lix profeet neke’aatinak chirix jun li b’e. A’ineb’ junjunq li eetalil. Naru nakasik’eb’ li raqal a’in ut taatz’iib’a malaj taawotz rik’ineb’ laa was aawiitz’in li nakatzol.
|
Raqal sa’ li loq’laj hu |
Li nintzol chirix li b’e naxik rik’in li Dios |
|---|---|
Raqal sa’ li loq’laj hu Proverbios 4:11–19 | |
Raqal sa’ li loq’laj hu Mateo 7:13–14 | |
Raqal sa’ li loq’laj hu | |
Raqal sa’ li loq’laj hu | |
Raqal sa’ li loq’laj hu | |
Raqal sa’ li loq’laj hu |
Chan ru naq eb’ li yaal a’in naru nakate’xtenq’a chi kanaak chiru lix b’e li Dios?
K’a’ chik ru li na’leb’ naru nakatzol sa’ li na’leb’ kixk’e li Awa’b’ej Russell M. Nelson?
“Re naq too’elq chi uub’ej sa’ li qayu’am, tento naq taqataaqe li choxahil b’eresihom. Li Qaawa’ kixye, “Chex’iloq wankin wi’ sa’ li junjunq eek’oxlahom; miwiib’an eech’ool; mexxuwak” [Tzol’leb’ ut Sumwank 6:36]. Ut laj Salmista kixtz’iib’a, “Lochlookil xam laa waatin choq’ we laa’in, a’an nakutanob’resink re lin b’e” [Salmos 119:105]. …
“Sa’ laa yu’am, nakataw k’iila ramleb’ ut nakak’ul junjunq li sachk. Li loq’laj hu nakatxtenq’a chixk’eeb’al reetaleb’ a’an ut xjalb’al li k’a’ru aajel ru xjalb’al. Nakakanab’ b’eek sa’ li b’e ink’a’ us. Nakatzol chi ch’olch’o ru li reetalil li b’e sa’ li loq’laj hu. Chirix a’an nakajal aak’a’uxl ut nakatuqub’ li tuqub’aak ajb’il ru re ok sa’ li “laatz’ ut ka’ch’in ruhil b’e a’in li nak’amok sa’ li junelik yu’am” [2 Nefi 31:18]” (“El vivir mediante la guía de las Escrituras,” Liahona, enero 2001, 20).
Chi’ilmanq ajwi’ Dieter F. Uchtdorf, “Li alalb’ej sachenaq ut li b’e nak’amok sa’ ochoch,” Jolomil ch’utub’aj-ib’ re octubre 2023.
Salmos 134–136
Q’axal nim wi’chik xwankil li Qaawa’ chiru yalaq pak’b’il dios.
K’e reetal k’a’ut naq moko us ta xpaab’ankileb’ li pak’b’il dios jo’ naxye sa’ Salmos 135:15–18. K’a’ru li maare chanchan pak’b’il dios li nakat-aaleek wi’ chixkanab’ankil aawib’? Naru taatz’iib’aheb’ li xninqal ru b’aanuhom naru naxb’aanu li Qaawa’, jo’ ke’xb’aanu laj salmista sa’ Salmos 134–136. K’a’ru xb’aanuhom choq’ aawe?
Salmos 139
Li Qaawa’ naxnaw ru li waam.
K’a’ru nakataw sa’ Salmos 139 li nakatxtenq’a chixtawb’al ru naq wan xk’a’uxl li Qaawa’ sa’ aab’een—laa k’oxlahom ut laa b’aanuhom, laa kawilal ut lix q’unil aametz’ew? Chan ru naq li na’leb’ a’in naxjal laa yu’am ut li k’a’ru nakasik’ ru?
Salmos 146–50
“Chenimaaq xk’ab’a’ li Qaawa’”
Naq nakawileb’ li salmo a’in re nimank-u, k’oxla k’a’ut naq nakanima ru li Qaawa’. K’a’ut naq aajel ru xnimankil ru? K’a’ru naru taab’aanu re xnimankil ru a’an?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Salmos 102:1–2
Li Qaawa’ naxk’ojob’ inch’ool ut naxk’e woyb’enihom.
-
Laa’at malaj jun reheb’ laa kok’al naru nekeril Salmos 102:1–2, ut teetaw chan ru naq li Qaawa’ nokoxtenq’a sa’eb’ li qach’a’ajkilal. Chan ru naru naqataw lix tenq’ a’an? Naru ajwi’ nekewotz resil hoonal b’ar wi’ keraj ru eetenq’ankil ut kereek’a naq li Dios kirab’i lee tij.
Salmos 119:105
Li raatin li Dios chanchan chik li saqen.
-
Maare taawulaq chiruheb’ laa kok’al aatinak chirix k’a’ru na’eek’aman naq wan li q’ojyin. Malaj naru neke’xye k’a’ru ch’a’aj xb’aanunkil sa’ q’ojyin. Naru nakab’oqeb’ chixb’aanunkil k’a’ruhaq chi tz’aptz’ookeb’ lix sa’ li ruheb’, jo’ xyiib’ankil jun jalam-uuch. K’a’ru naqatzol sa’ Salmos 119:105 chirix li saqen ut li raatin li Dios?
-
Sik’ k’a’ru xk’ehom qe li qaChoxahil Yuwa’ re qatenq’ankil chi kanaak chiru lix b’e sa’eb’ li raqal a’in: Salmos 119:47–48; 119:105; 1 Nefi 11:25; 2 Nefi 31:20. K’a’ru naru naqab’aanu re kanaak chiru lix b’e li Dios?
-
Maare taawulaq raj chiruheb’ laa kok’al rilb’aleb’ xjalam-uuch li k’a’ru nayeeman sa’ Salmos 119:105. Naru neke’xtusub’eb’ li jalam-uuch naq te’ril li raqal. Naru ajwi’ nekeb’icha jun li b’ich, jo’ “Tzolin chi bʼeek saʼ saqen” (B’ichleb’aal choq’ reheb’ li Kok’al, 70) malaj “Tinb’eeq rik’in li Qaawa’ Jesus” (Biblioteca del Evangelio).
Salmos 139:1–3, 23–24
Li qaChoxahil Yuwa’ ut li Jesukristo neke’xnaw wu ut nikine’xra.
-
Naru nakatz’iib’a li k’a’ru nakanaw chirixeb’ laa kok’al sa’ junjunqal. Taayaab’asiheb’ li k’a’aq re ru a’an chi junjunqal ut taapatz’ reheb’ li kok’al ani li nakat-aatinak wi’. Chirix a’an, chirix naq teeril Salmos 139:1–3, naru nekeye li k’a’aq re ru naxnaw li qaChoxahil Yuwa’ ut li Jesukristo chiqix.
-
Tz’iib’aheb’ li aatin wankeb’ sa’ Salmos 139:23–24 chiru jun hu malaj chiru li pizarron. Patz’ reheb’ laa kok’al naq te’xjuch’ rub’el li aatin li na’aatinak chirix k’a’ru naru naxb’aanu li Dios choq’ qe. K’a’ut naq naqaj naq li Dios tixb’aanu li k’a’aq re ru a’an choq’ qe?
Salmos 146:1, 5–9
Naru ninnima ru li Qaawa’.
-
Eb’ laa kok’al maare naru te’xwotz xnumsihomeb’ naq xe’sahob’resiik xch’ool malaj xyehe’ reheb’ naq chaab’il xk’anjeleb’. Wotz junjunq reheb’ li chaab’il k’a’aq re ru wankeb’ sa’ Salmos 146:6–9 li naxb’aanu li Qaawa’ (tenq’aheb’ laa kok’al chixtawb’aleb’ ru li aatin ink’a’ neke’xnaw ru). Patz’ reheb’ laa kok’al naq te’aatinaq chirix k’a’ chik ru naxb’aanu a’an choq’ qe laa’o. Chan ru naru naqaloq’oni ru sa’ xk’ab’a’eb’ li k’a’aq re ru a’an?
Tzolok sa’ kab’l; wotzok rik’ineb’ laa was aawiitz’in. Li Awa’b’ej Russell M. Nelson kixk’ut naq li ochochnal a’an “jun na’ajej re xtzolb’al li evangelio” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib re octubre 2018). K’a’ru naru nakab’aanu chiru li xamaan a’in re xchaab’ilob’resinkil li tzolok nakab’aanu aajunes malaj rik’in laa junkab’al sa’ Salmos? Chirix naq tattzoloq, naru nakawotz rik’ineb’ laa was aawiitz’in li nakatzol ut nakaweek’a. Naru nakab’aanu a’in sa’ jun seraq’ik, sa’ jun mensaaj malaj sa’ li redes sociales, malaj sa’ li iglees.
Re xtawb’al xkomon chik li na’leb’, chi’ilmanq li hu Amigos re li po a’in.