Eb’ li profeet ut li profeetil aatin

Nim xwankil lix k’anjeleb’ li profeet ut li profeetil aatin sa’ li Najter Chaq’rab’. Laj Abraham, laj Isaak, ut laj Jakob ke’ril li k’utb’esinb’il matk’ ut ke’aatinak rik’in choxahil aj k’amol esil. Laj Moises ki’aatinak rik’in li Dios ut kixye resil li rajom chiru li ralal xk’ajoleb’ laj Israel. Li xb’een ut li xkab’ hu Reyes neke’xye resil li xninqal ru xk’anjel ut raatin li profeet aj Elias ut li profeet aj Eliseo. Li Najter Chaq’rab’ na’aatinak ajwi’ chirixeb’ ixq profeet jo’ li xMaria ut li xDebora, rochb’eeneb’ junjunq chik li ixq li ke’osob’tesiik rik’in li musiq’ej re profeetil aatin, jo’ li xRebeka ut li xAna. Ut us ta li hu Salmos moko tz’iib’anb’il ta xb’aan tz’aqal profeet, nujenaq ajwi’ rik’in li musiq’ej re profeetil aatin, tz’aqal wi’chik naq nayeeman resil lix k’ulunik li Mesias.

Moko jalan ta a’in choq’ reheb’ li komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Relik chi yaal, lix evangelio li Jesukristo li k’ojob’anb’il wi’chik naxk’ut chiqu naq eb’ li profeet maawa’eb’ yal re chaq li najter kutan, aajeleb’ b’an ru sa’ lix k’uub’anb’il na’leb’ li Dios. Wankeb’ li maare neke’xk’oxla naq eb’ li profeet ka’ajwi’ ke’wan sa’ xkutankil li Najter Chaq’rab’, a’b’an laa’o naqanaw naq toj wankeb’ qik’in jo’ sa’ xkutankil li Najter Chaq’rab’.

A’b’an, rilb’al ru jun ch’ol sa’ Isaias malaj Esekiel maare jalan b’ayaq rik’in rilb’al ru li naxye li Awa’b’ej re li Iglees anajwan sa’ li jolomil ch’utub’aj-ib’. Wan naq ch’a’aj xk’eeb’al reetal naq li k’a’ru tz’iib’anb’il xb’aaneb’ li najter profeet wan xyaalal sa’ qayu’am. Relik chi yaal, li qakutan anajwan jwal jalan rik’in li kutan ke’xjultika wi’ chaq li profeetil aatin. Wan jun li qayo’yookil profeet anajwan, jo’kan ut naq maare taqapatz’: K’a’ru aj-e xyalb’al qaq’e—ut xyalb’al qaq’e naraj chi yaal—chirilb’al li raatineb’ li najter profeet?

Yaal naq eb’ li profeet sa’ li Najter Chaq’rab’ ink’a’ ke’xkawresi xna’leb’eb’ tz’aqal choq’ reheb’ li kristiaan sa’ li kutan a’in. Eb’ li profeet a’in ke’wan xk’a’uxl chirix li yoo chi k’ulmank sa’ xkutankileb’ ut lix tenamiteb’ a’an—jo’ naq eb’ li qaprofeet re li kutan a’in neke’aatinak chirix li qach’a’ajkilal anajwan.

A’b’anan, eb’ li profeet nim wi’chik li k’a’ru naru neke’ril chiru li k’a’ru yal wan anajwan. Neke’xk’ut li junelikil yaal, li aajeleb’ ru yalaq jo’q’e ut yalaq b’ar. Chi osob’tesinb’ileb’ rik’in k’utb’esinb’il na’leb’, neke’ril lix najtil ut lix nimal ru lix k’anjel li Dios. Laj Isaias kixtijeb’ li kristiaan, sa’ chaq lix kutankil, chirixeb’ li maak. Kitz’iib’ak ajwi’ chirix li rach’ab’ankileb’ laj Israel li ke’wan wiib’ cient chihab’ chik chirix a’an. Jo’kan ajwi’, kik’utuk chirix li ach’ab’aak li neke’xsik’ chixjunileb’ lix tenamit li Dios. Kiru chixtz’iib’ankil li profeetil aatin li toj maji’ neke’tz’aqlok ru sa’ li kutankil a’in—li yeechi’ihom re jun “ak’ ruchich’och’” (Isaias 65:17) b’ar wi’ “chixjunileb’ te’xnaw chik ru li Qaawa’” (Isaias 11:9), b’ar wi’ te’ch’utub’aaq lix teepal laj Israel li sachenaqeb’, ut b’ar wi’ “eb’ li tenamit” ink’a’ chik “te’xkawresi rib’ re yalok” (Isaias 2:4). Rik’in li sahil ch’oolejil ut li musiq’anb’il na’leb’ li nachal rik’in rilb’al ru li raatineb’ li profeet sa’ li Najter Chaq’rab’ jo’ laj Isaias, naru naqak’e reetal naq wan qak’anjel sa’ li xnimal ru kutan li ke’aatinak wi’.

Jo’kan ut, naq taawileb’ ru li najteril profeetil aatin, us raj xtzolb’al k’a’ut naq ke’tz’iib’aman—a’b’an tento ajwi’ taawil aawib’ chi sa’, malaj “xjuntaq’eetankil [aawik’in]” (1 Nefi 19:24; chi’ilmanq ajwi’ li raqal 23). Wan naq a’an naraj naxye xk’eeb’al reetal naq Babilonia maawa’ ka’ajwi’ jun li najter tenamit, a’an aj b’an wi’ reetalil li maak ut li q’etq’etil. Malaj maare naraj naxye rilb’al Israel jo’ lix tenamit li Dios yalaq ta b’ar ut yalaq ta jo’q’e. Malaj maare naraj naxye rilb’al Sion jo’ li k’anjel neke’raj xb’aanunkil lix tenamit li Dios sa’ roso’jik li kutan, ut ink’a’ ka’ajwi’ jun chik aatin choq’ re Jerusalen.

Naru naqajuntaq’eeta li qayu’am rik’ineb’ li loq’laj hu xb’aan naq naqataw ru naq li profeetil aatin naru taatz’aqloq ru chi k’iila paay ru. Jun chaab’il reetalil li na’leb’ a’in, a’an li profeetil aatin sa’ Isaias 40:3: “Jun xyaab’ kuxej yoo chixyeeb’al: Tuqub’omaq ru junaq b’e choq’ re li Qaawa’.” Choq’ reheb’ laj Judeo sa’ preexil aran Babilonia, li raqal a’in maare yoo chixyeeb’al naq li Qaawa’ taarach’ab’eb’ ut tixk’ameb’ wi’chik Jerusalen. Choq’ re laj Mateo, laj Markos, ut laj Lukas, li profeetil aatin a’in kitz’aqlok ru rik’in laj Jwan aj Kub’sihom Ha’, li kikawresin re li b’e choq’ re lix ruchich’och’il k’anjel li Kolonel. Ut kik’utb’esiik chiru laj Jose Smith naq li profeetil aatin a’in toj yoo chi tz’aqlok ru sa’ li kutan a’in re xkawresinkil xb’e lix k’anjel li Kristo chiru li jun mil chihab’. Chi k’iila paay chan ru li toj yooko chixtawb’al, eb’ li najter profeet ke’aatinak qik’in chi yaal. Ut ke’xk’ut k’iila na’leb’ li yaaleb’ li toj wankeb’ xyaalal choq’ qe, jo’ naq ke’wan xyaalal choq’ re najter Israel.

Us rilb’al aawib’ sa’ li profeetil aatin re li Najter Chaq’rab’, a’b’an aajel ru rilb’al li Jesukristo chi sa’. Wi taasik’ a’an, taataw, us ta moko nak’utun ta xk’ab’a’. Chiwanq sa’ aach’ool naq li Dios re li Najter Chaq’rab’, li Qaawa’ Jehova, a’an ajwi’ li Jesukristo. Naq eb’ li profeet neke’xch’olob’ k’a’ru yoo chixb’aanunkil malaj k’a’ru tixb’aanu li Qaawa’, yookeb’ chi aatinak chirix li Kolonel.

Naru ajwi’ nakataw na’leb’ chirix li Yulb’il, laj Tojol-ix ut li chalel Rey, riyajil laj David. Chixjunileb’ a’in neke’aatinak chirix li Jesukristo. Taataw ajwi’ li na’leb’ chirix li kolok, li kuyuk maak, li tojok-ix, ut li k’ojob’ank wi’chik. Rik’in li Kolonel sa’ laa k’a’uxl ut sa’ laa ch’ool, eb’ li profeetil aatin tate’xjayali rik’in li Ralal li Dios. Relik chi yaal, re xtawb’al ru li profeetil aatin chi us, na’ajman li “musiq’ej re profeetil aatin,” a’an ajwi’ li “lix ch’olob’ahom li Jesus” jo’ naxye laj Jwan (Apokalipsis 19:10).