“7–13 septiembre. “A’an tixtiikob’resi laa b’e”: Proverbios 1–4; 15–16; 22; 31; Eklesiastes 1–3; 11–12,” Kim, Taaqehin—Choq’ re li ochoch ut li iglees: Li Najter Chaq’rab’ 2026 (2026)
“7–13 septiembre. “A’an tixtiikob’resi laa b’e,”” Kim, Taaqehin: Li Najter Chaq’rab’ 2026
Jesus with Children [Jesus rik’ineb’ li kok’al], xb’aan li xDilleen Marsh
7–13 septiembre: “A’an tixtiikob’resi laa b’e”
Proverbios 1–4; 15–16; 22; 31; Eklesiastes 1–3; 11–12
Naru nakawil li hu Proverbios jo’ jun ch’uut chi chaab’il na’leb’ neke’xk’e yuwa’b’ej aj rahonel (chi’ilmanq Proverbios 1:8). Li xnimal ru na’leb’ chi sa’ a’an naq wi nakasik’ li chaab’il na’leb’—k’a’jo’ wi’chik lix chaab’il na’leb’ li Dios—chaab’il tatwanq sa’ laa yu’am. A’b’an chirix li hu Proverbios nachal li hu Eklesiastes, li chanchan naq naxye, “Oyb’eni wan, b’ayaq chik naraj.” Laj ch’olob’anel sa’ Eklesiates kixye naq “xk’e xch’ool re xnawb’al b’ar wan li choxahil na’leb’,” a’b’an toj kireek’a naq “nachapok iq’” ut “numtajenaq ajwi’ lix rahilal” (Eklesiastes 1:17–18). Li hu naxpatz’ chi k’iila paay ru, “Ma naru natawman li yaal sa’ jun ruchich’och’ b’ar wi’ chanchan naq chixjunil maak’a’ xyaalal, yal aj numel, ut ink’a’ nawb’il?”
A’b’anan, us ta li wiib’ chi hu a’in jalan jalanq xna’leb’eb’ chirix li yu’am, juntaq’eet li yaal neke’xk’ut. Naxye sa’ Eklesiastes: “Tz’aqalaq li aatin. Ak xinye chixjunil. Chawoxloq’i li Dios ut paab’ lix chaq’rab’, xb’aan naq a’in naxk’ul wi’ rib’ chixjunil laa tzolb’al” (Eklesiastes 12:13). A’an ajwi’ a’in li na’leb’ natawman sa’ Proverbios: “K’ojk’ooq aach’ool rik’in li Dios chi junelik” (Proverbios 3:5; chi’ilmanq ajwi’ li raqal 7). Nachaab’ilo’ li yu’am—us ta moko tz’aqal ta re ru—naq naqakanab’ qib’ sa’ ruq’ li Qaawa’ Jesukristo.
Re xtzolb’al k’a’ru wan sa’eb’ li hu a’in, chi’ilmanq “Proverbios” ut “Eklesiastes” sa’ li K’utul Raqal reheb’ li Loq’laj Hu.
Li na’leb’ re tzolok sa’ li ochoch ut sa’ li iglees
Proverbios 1–4; 15–16; Eklesiastes 1–3; 11–12
“Rab’inkil li choxahil na’leb’.”
Li hu Proverbios ut Eklesiastes nujenaqeb’ rik’in nawom chirix li chaab’il na’leb’. Naru taajuch’ li aatin “chaab’il na’leb’” ut xkomoneb’ chik li aatin, maare “chaab’il k’a’uxl” ut “xtawb’al xyaalal,” naq nakataweb’ sa’ Proverbios 1–4; 15–16; Eklesiastes 1–3; 11–12. Chan ru naq eb’ li ch’ol a’in neke’xjal li nakak’oxla chirix li chaab’il k’a’uxl? A’ yaal li nakataw, chan raj ru taach’olob’ li chaab’il k’a’uxl “naxk’e li Qaawa’”? (Proverbios 2:6). Chan ru nokorosob’tesi lix chaab’il k’a’uxl li Dios?
Chi’ilmanq ajwi’ Mateo 7:24–27; 25:1–13.
Tenq’aheb’ li komon chixwotzb’al li yookeb’ chixtzolb’al. “Aajel ru naq eb’ li komon nakatzoleb’ te’ruuq chixwotzb’al chirib’ileb’ rib’ li yookeb’ chixtzolb’al chirix li Kolonel ut lix evangelio. Naq neke’xb’aanu naru neke’xyu’ami li yaal neke’xtzol ut te’ruuq chixwotzb’al. Jo’kan ajwi’ naru neke’xpaab’ naq te’ruuq chixwotzb’al li yaal sa’ junaq chik li na’jej” (Li K’utuk jo’ li Kolonel, 26). Naru nakapatz’ reheb’ laj tzolonel naq te’xtz’iib’a junjunq li raqal wankeb’ sa’ Proverbios malaj Eklesiastes b’ar wi’ xe’xtaw xna’leb’ chirix lix chaab’il na’leb’ li Dios. Chirix a’an patz’ reheb’ naq te’aatinaq chirix li xe’xtzol.
Proverbios 1:7; 2:5; 3:7; 15:33; 16:6; 31:30; Eklesiastes 12:13
“Maaye aawib’ naq k’a’jo’ aana’leb’; chawoxloq’i li Qaawa’.”
Jun chik li na’leb’ natawman sa’ Proverbios malaj Eklesiastes a’an “xxuwankil li Qaawa’.” Chak’e reetal li na’leb’ a’an naq taawileb’ li raqal. K’a’ru naraj naxye xxuwankil li Qaawa’ naq nakak’oxla? Sik’eb’ aana’leb’ sa’ li raatin li Elder David A. Bednar, “Jo’kan naq ke’xch’anab’ lix xiweb’” (Jolomil ch’utub’aj-ib’ re abril 2015). K’a’ru xjalanil xxuwankil li Qaawa’ rik’in xxuwankil jalan chik k’a’aq re ru?
Chi’ilmanq ajwi’ Proverbios 8:13.
Proverbios 3:5–7; 4
“K’ojk’ooq aach’ool rik’in li Qaawa’ chi junelik.”
Chan raj ru taaq’unb’esi junaq kristiaan naq us wi’chik “xk’ojob’ankil qach’ool rik’in li Qaawa’” chiru xk’ojob’ankil qach’ool “rik’in li qak’a’uxl ut qana’leb’”? (Proverbios 3:5). K’a’ raj ru li juntaq’eetank malaj na’leb’ taawoksi? Naq yooqat chi k’oxlak chirix Proverbios 3:5–7, k’oxla chan ru naru nakatz’aqob’resi ru jun li ch’ol aatin jo’ a’in: Xkanab’ankil qib’ sa’ ruq’ li Qaawa’ a’an … Xkanab’ankil qib’ sa’ ruq’ li qanawom laa’o a’an …
K’a’ut naq ink’a’ us xk’ojob’ankil qach’ool qajunes qib’? Chan ru naq kak’e reetal naq naru nakakanab’ aawib’ sa’ ruq’ li Qaawa’?
Ut toj chi jo’kan, maare ch’a’aj xkanab’ankil qib’ sa’ ruq’ li Qaawa’. K’a’ut naq jo’kan a’an? Li Elder Gerrit W. Gong naxk’ut junjunq li yaal rochb’een junjunq li na’leb’, sa’ “Paab’an wi’chik” (Jolomil ch’utub’aj-ib’ re octubre 2021). K’a’ chi seraq’ malaj na’leb’ nakataw sa’ li aatin a’in li naru naxtenq’a anihaq chixkanab’ankil wi’chik rib’ sa’ ruq’ li Qaawa’?
Sa’ Proverbios 3:6 ut Proverbios 4 najuntaq’eetaman li yu’am rik’in li “b’e.” K’a’ru naraj naxye xkanab’ankil li Qaawa’ naq “tixtiikob’resi laa b’e” naq nakak’oxla? (Proverbios 3:6). K’a’ru nakataw sa’ li ch’ol 4 li nakatxtenq’a “chixtiikob’resinkil ru laa b’e”? (raqal 26). K’a’ru neke’xk’ut li raqal 11–12 ut 18–19 chirix li osob’tesiik rik’in xk’amb’al li tiikil b’e? K’a’ru naraj neke’xye li raqal 26–27 choq’ aawe?
Chi’ilmanq ajwi’ 2 Nefi 31:18–21; “Qaawaʼ, chatintaaqe,” Eb’ li B’ich, 141.
Proverbios 15; 16:24–32
“Li nasumenk rik’in q’unil aatin, naxkotz li josq’il.”
Junjunq reheb’ li na’leb’ wankeb’ sa’ Proverbios 15–16 naru nakate’xtenq’a chixsumenkileb’ chi chaab’il laa was aawiitz’in, ut eb’ laa raarookil komon. Naru nakajultikaheb’ li hoonal b’ar wi’ naq li “sumenk rik’in q’unil aatin” katxtenq’a “chixkotzb’al li josq’il” (Proverbios 15:1).
Naru ajwi’ nakajultikaheb’ hoonal b’ar wi’ li Kolonel kixk’utb’esi reetalil li k’utum wankeb’ sa’ Proverbios 15:1–4, 18 (chi’ilmanq Markos 12:13–17; Jwan 8:1–11). Chan ru naru taab’aanu li kixb’aanu a’an naq nakawaatinaheb’ laa was aawiitz’in?
Chan ru naq li na’leb’ wan sa’ Proverbios 15; 16:24–32 nak’anjelak sa’ li aatinak sa’ internet anajwan? Yal xtawb’al junaq raqal sa’eb’ li ch’ol a’in li naru nakawoksi jo’ jun na’leb’ chirix li aatinak sa’eb’ li redes sociales malaj chirix li aatinak sa’ mensaaj.
Chi’ilmanq ajwi’ Neil L. Andersen, “Xtaaqenkil li Jesus: Wank choq’ aj k’amol tuqtuukilal,” Jolomil ch’utub’aj-ib’ re abril 2022; Ronald A. Rasband, “Wankeb’ xwankil li aatin,” Jolomil ch’utub’aj-ib’ re abril 2024; Choq’ re Xkawilaleb’ li Saaj: Jun tenq’ re xsik’b’al ru laa b’e (2022), 11–12.
Jwal ch’a’aj xtawb’al junaq ixq chaab’il xna’leb’. II, xb’aan li xLouise Parker
Proverbios 31:10–31
“Li ixq li naroxloq’i li Qaawa’, a’an xk’ulub’ xk’eeb’al xloq’al.”
Proverbios 31:10–31 na’aatinak chirix jun “ixq chaab’il xna’leb’,” malaj jun ixq li kaw xmetz’ew sa’ musiq’ej, seeb’ xch’ool, ut kaw rib’. Maare taayal xch’olob’ankil rik’in laa waatin k’a’ru neke’xye li raqal a’in chirixeb’ li saq ruhil ixq. B’ar wan reheb’ li chaab’il na’leb’ a’in naru nakawoksi sa’ laa yu’am?
Eklesiastes 1–3; 12
Wan roso’jik li yu’am sa’ ruchich’och’.
K’a’ut naq us xnawb’al naq naab’al li k’a’aq re ru re li ruchich’och’ a’in, jo’ naxye sa’ Eklesiastes 1–2, “maak’a’ rajb’al” (malaj yal aj numel ut maak’a’ na’ok wi’)? K’a’ru nakataw sa’ Eklesiastes 12 li naxk’e xloq’al li yu’am chi junelik?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li na’leb’ re xtzolb’aleb’ li kok’al
Proverbios 1:7; 2:5; 15:33; 16:6; Eklesiastes 12:13
“Xxuwankil li Dios” naraj naxye naq taqara ut too’ab’inq chiru.
-
Re xtenq’ankileb’ laa kok’al chixtawb’aleb’ ru li raqal neke’aatinak chirix xxuwankil ru li Dios, naru nakajal li aatin “xuwak” rik’ineb’ aatin jo’ ch’anch’ookilal, rahok, malaj ab’ink (chi’ilmanq ajwi’ Hebreos 12:28). Ma naxjal a’an li naqak’oxla chirixeb’ li raqal a’in? Chan ru taqak’ut naq naqoxloq’i li Qaawa’?
Proverbios 3:5–7
Naru nink’ojob’ inch’ool rik’in li Qaawa’ chi junelik.
-
Laa’at ut eb’ laa kok’al naru nekeyoob’eb’ kok’ eetalink li neke’xk’am rib’ rik’in Proverbios 3:5–7, jo’ xk’utb’al jun aamej rik’in li uq’ej, salab’ank-ib’, b’eek sa’ junaq na’ajej, ut xk’utb’al lix sa’ uhej. Chan ru taqak’ut naq naqapaab’ li Jesukristo chi anchal qach’ool?
-
Re xk’utb’al k’a’ru naraj naxye “maakanab’ aawib’ rik’in laa k’a’ux laa na’leb’” (Proverbios 3:5), naru nakab’oqeb’ laa kok’al chix’anab’ankileb’ rib’ chiru junaq k’a’aq re ru kaw, jo’ jun li xaqxookil tz’ak. Toja’ naq te’xyal ranab’ankil rib’ chiru k’a’ruhaq li na’eek’an, maare jun li mesleb’. Malaj naru neke’xsalab’ junaq che’ malaj tz’iib’leb’ chiru k’a’ruhaq jalan jalanq xkawil, maare jun li tasal hu malaj jun perel hu. K’a’ut naq aajel ru “xk’ojob’ankil qach’ool rik’in li Qaawa’” (raqal 5) ut “maawa’ rik’in qak’a’uxl qana’leb’”?
Learning to Trust the Lord [Xtzolb’al xpaab’ankil li Qaawa’], xb’aan li xKathleen Peterson
Proverbios 15:1, 18
Naru nawoksi li chaab’il aatin.
-
Maare laa’at ut eb’ laa kok’al naru nekejultikaheb’ hoonal b’ar wi’ laa’at malaj eb’ a’an maare kereek’a naq yoo eejosq’il. Ilomaq Proverbios 15:1, ut tenq’aheb’ laa kok’al chiroksinkil li raqal a’in sa’eb’ li na’leb’ xe’xk’oxla. Maare naru nekeyal xyeeb’aleb’ ka’ajwi’ li “q’unil aatin.” Jun li b’ich chirix li rahok, jo’ “Wan rahok arin” (B’ichleb’aal choq’ reheb’ li Kok’al, 102–103), naru naxch’olob’ chi us li na’leb’ a’in.
-
Re xtzolb’al k’a’ru naraj naxye “li wank xkuyum” (Proverbios 15:18), laa’at ut eb’ laa kok’al naru nekewotz junaq seraq’ naq laa’at (malaj junaq kristiaan nakanaw ru) xatjosq’o’ a’b’an xasik’ ru xk’utb’al aarahom. Tenq’aheb’ laa kok’al chixk’oxlankil k’a’ruhaq naru naqab’aanu sa’ junpaat wi “wan qakuyum.” Qayehaq, xk’oxlankil li Jesus sa’ junpaat, xpatz’b’al qatenq’ rik’in li qaChoxahil Yuwa’, xk’oxlankil junaq li b’ich reheb’ li kok’al, malaj, wi nokoru, naru naqisi qib’.
Re xtawb’al xkomon chik li na’leb’, chi’ilmanq li hu Amigos re li po a’in.