Isaias 13–14; 22; 24–30; 35

Sa’eb’ lix kutankil laj Isaias, Babilonia a’an chaq jun awa’b’ejil nim xwankil. Anajwan Babilonia yal a’an jun najteril seraq’. K’a’ut b’i’, naq li na’leb’ kixk’e laj Isaias choq’ re Babilonia sa’ Isaias 13–14, aajel ru choq’ qe anajwan? Xb’aan naq Babilonia nareetali li kaqalil, li rahink-u, ut li maak, li toj wankeb’ sa’ qayanq anajwan. K’oxla li eetalil a’an naq nakawil Isaias 13:1–11, 19–22; 14:1–20. K’oxlaheb’ li patz’om jo’ a’in:

• K’a’ru nakawil sa’ xq’etq’etil Babilonia li nakawil ajwi’ sa’ xq’etq’etil laj Satanas? (chi’ilmanq Isaias 14:4–20; Moises 4:1–4). K’a’ru li na’leb’ nakataw choq’ aawe laa’at sa’eb’ li raqal a’in?

• Chan ru naq li Kolonel toorisi “sa’ li rahilal ut sa’ li kawil k’anjel nokotawasiik wi’”? (Isaias 14:3).

Laj Isaias ki’aatinak chirix lix k’anjel li Kolonel, lix mayej re xtojb’al qix, li wakliik chi yo’yo, ut li xkab’ xk’ulunik. K’a’ru na’leb’ chirix lix k’anjel a’an neke’chal sa’ laa k’a’uxl naq nakawileb’ li raqal a’in: Isaias 22:22–23; 24:21–23; 25:6–8; 26:19; 28:16? Ma wankeb’ chik li raqal nakataw li neke’xjultika li Kolonel aawe?

Sa’ li ruxtaan, li Qaawa’ kixtaqla laj Isaias chixq’usb’aleb’ li tenamit re li sumwank li yookeb’ chixnajtob’resinkil rib’ rik’in a’an. Il ma naru nakataweb’ li reetalil li xiwxiw sa’ musiq’ej sa’ Isaias 24:5; 29:13; 30:8–12. K’a’ut naq eb’ li na’leb’ ut b’aanuhom a’in xiwxiweb’ sa’ musiq’ej?

Re q’usuk chirix lix najtob’resinkil qib’ rik’in li Qaawa’, laj Isaias kiroksi junjunqeb’ li juntaq’eetank. Naq taatzoleb’ a’an, patz’ aawib’ k’a’ru nak’ulman naq na’ux li najto’k rik’in li Qaawa’:

• Jun ruchich’och’ ra xch’ool ut yamyo ru (Isaias 24:1–12).

• Kalaak (Isaias 28:7–8).

• Tz’okaak ut chaqi-eel (Isaias 29:7–10).

• Jun xaqxookil tz’ak malaj uk’al jorol (Isaias 30:13–14).

K’a’ut naq aajel ru choq’ aawe wank chi nach’ rik’in li Qaawa’?

Ma sachenaq k’a’ruhaq chawu li kak’oxla naq maajun wa raj chik taataw? Malaj maare kijore’ k’a’ruhaq ut kak’oxla naq maajun wa raj taaruuq chi yiib’aak wi’chik. Naq nokonajto’ rik’in li Qaawa’, laj Satanas naraj naq taqak’oxla naq maajun wa tooruuq chi sutq’iik chi moko chi k’iraak. A’b’anan, laj Isaias kixye k’a’ruheb’ li sachb’a-ch’oolej tixb’aanu li Qaawa’ re qatenq’ankil chi sutq’iik rik’in a’an. K’a’ru nakatzol sa’ Isaias 29:13–24; 30:18–26; 35 chirix li Qaawa’, lix rahom, ut lix wankilal? Maare naru nakataw junaq ch’ol aatin sa’eb’ li raqal a’in li tixk’e aayo’onihom naq nakawaj ru k’irtesiik. Naru ajwi’ nakawil li raatin li hermana Amy A. Wright, “Li Kristo naxk’irtesi li toqol” (Jolomil ch’utub’aj-ib’ re abril 2022).

Li Qaawa’ naxk’utb’esi lix wankilal ut li ruxtaan sa’ li qakutankil rik’in lix k’ojob’ankil wi’chik lix evangelio. Sa’ Isaias 29 wan wiib’ oxib’ li raqal li neke’xk’am rib’ rik’in li kik’ulman sa’ lix k’ojob’ankil wi’chik li evangelio. Jo’ jun eetalil:

• Juntaq’eeta Isaias 29:11–12 rik’in 2 Nefi 27:6–26 ut Jose Smith—Resilal 1:63–65.

• Juntaq’eeta Isaias 29:13–14 rik’in Tzol’leb’ ut Sumwank 4 ut Jose Smith—Resilal 1:17–19.

• Juntaq’eeta Isaias 29:18–24 rik’in li perel re xjolomil li aatin saʼ lix Hu laj Mormon.

Sa’ laa waatin, k’a’ut naq “xninqal eetalil” ut “sachb’a-ch’oolej” (Isaias 29:14) a’aneb’ chaab’il aatin re aatinak chirix li Qaawa’ naq naxk’ojob’ lix evangelio? Chan ru naru nakattenq’an sa’ xtz’aqob’resinkil ru li profeetil aatin chirix li k’ojob’ank wi’chik? Re xtawb’al aana’leb’, il li raatin li Elder Gerrit W. Gong, “Chixjunileb’ li tenamit, junkab’al, ut aatinob’aal” (Jolomil ch’utub’aj-ib’ re octubre 2020).

Chi’ilmanq ajwi’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’” (Biblioteca del Evangelio); “Xnumeʼ qʼojyin, kutan nachal,” Eb’ li B’ich, 1.

• Chan ru taatenq’aheb’ laa kok’al chirilb’al li Kolonel sa’eb’ lix tz’iib’ahom laj Isaias? Naru nakatenq’aheb’ chixtawb’aleb’ ch’ol aatin li te’xk’oxla wi’ li Qaawa’ sa’ Isaias 14:3; 25:8; malaj 28:16. Naru ajwi’ neke’xtzoleb’ li raqal a’in sa’ Isaias rik’ineb’ jalan chik li raqal li neke’k’utuk chirix li Kolonel, jo’ Mateo 11:28–30; 1 Korintios 15:53–57; Helaman 5:12. K’a’ruheb’ li xninqal ru k’a’aq re ru ak xb’aanu li Qaawa’ choq’ re li qajunkab’al?

• Chirix rilb’al Isaias 25:8–9 naru nekerileb’ xjalam-uuch li Kolonel sa’ Getsemani, chiru li krus, ut chirix lix waklijik chi yo’yo. Kanab’eb’ laa kok’al chi aatinak chirix k’a’ru nak’ulman sa’eb’ li jalam-uuch ut k’a’ut naq neke’xra li Jesus ut “neke’saho’ xch’ool xb’aan naq a’an xkolok reheb’” (raqal 9).

• Naru nakaseraq’i reheb’ laa kok’al chan ru li rahil ch’oolej kaweek’a naq kikam junaq laa komon li nakara. Ch’olob’ xyaalal lix k’ojob’ankil aach’ool nakak’ul sa’ xk’ab’a’ li Jesukristo. Eb’ laa kok’al maare te’raj xyiib’ankil xjalam-uuch jun uhej li nayaab’ak ut chirix a’an te’risi li xya’al ru naq teeril Isaias 25:8 sa’ komonil.

• Ma wanjenaqat laa’at ut eb’ laa kok’al sa’ junaq na’ajej li chaab’il re kolok-ib’ chiru li hab’ malaj li mu xsa’ chiru li tiqwal kutan sa’ saq’ehil? Malaj ma aayalom xsahil junaq tzakemq naq tattz’okaaq? Aatinan chirixeb’ li numsihom a’in naq taawil Isaias 25:4–6. Chan ru naq li Jesus chanchaneb’ li k’a’aq re ru a’an?

• Naq laa’at ut eb’ laa kok’al teeril Isaias 29:14, wotz rik’ineb’ a’an xkomoneb’ chik aatin li neke’xye ajwi’ “xninqal eetalil” ut “sachb’a-ch’oolej.” Kanab’eb’ chatenq’ankil chixtawb’aleb’ k’a’aq re ru malaj jalam-uuch li te’xk’utb’esi junjunq reheb’ li xninqal b’aanuhom li Qaawa’ chiru roso’jikeb’ li kutan. Maare lix Hu laj Mormon, xjalam-uuch junaq santil ochoch, malaj xjalam-uuch li Xb’een K’utb’esink (wan jun sa’ xtiklajik li tusleb’ aatin a’in). Chirix a’an eb’ laa kok’al naru te’xsik’ ru jun reheb’ li k’a’aq re ru a’an ut te’xye k’a’ut naq sachb’a-ch’oolejil a’an choq’ reheb’.

• Jun li b’ich chirix lix k’ojob’ankil wi’chik li evangelio naru naxk’am rib’ rik’in Isaias 29, a’an “Saʼ jun chaqʼal ru kutan” (Bʼichlebʼaal choqʼ rehebʼ li kokʼal, 57). Jun laa numsihom naru naxtenq’aheb’ laa kok’al chixtawb’al ru k’a’ru naraj naxye k’ojob’ank wi’chik. Qayehaq, laa’at ut eb’ laa kok’al naru nekex’aatinak chirix junaq k’a’aq re ru kisach cheru ut chan ru naq ketaw. Tenq’aheb’ laa kok’al chixjuntaq’eetankil a’an rik’in lix k’ojob’ankil wi’chik li evangelio. Jo’ naxye Isaias 29:13–15, k’a’ut naq naqaj ru li k’ojob’ank wi’chik? K’a’ru xninqal ru k’anjel yoo chixb’aanunkil li Qaawa’ re xk’ojob’ankil wi’chik lix evangelio? (chi’ilman li perel re kok’ k’anjel re li xamaan a’in).