Dagiti Salmo 49–51; 61–66; 69–72; 77–78; 85–86

Adda mensahe tiSalmo 49 para iti “nababa man ken nangato, nabaknang ken napanglaw” (bersikulo 2). Ania koma ti masaom iti daytoy a mensahe? Ania ti mariknam nga inayon ti Salmo 62:5–12 iti dayta a mensahe?

Ti panagbasa kadagitoy a salmo ket mabalin a mangparegta kenka a mangutob kadagiti wagas a pakasulisogantayo nga agtalek iti maysa a banag malaksid iti Dios para iti pannakasubbot (kitaen iti Salmo 49:6–7). Kasano nga inimpluensiaan ti pammaneknekmo ti biagmo a ti “Dios subbotennanto ti kararua[yo] iti pannakabalin ni tanem”? (Salmo 49:15).

Insurat ni Ari David ti Salmo 51 kalpasan a nabigbigna ti desperado a panagkasapulanna iti pammakawan—maysa a banag a kasapulantayo amin. Ania dagiti bersikulo a mangiladawan kadagiti kasta a riknam idi? Ania ti masarakam iti daytoy a salmo a mangted kenka iti namnama iti pannakapakawan?

Mabalinmo pay a sukisoken ti Salmo 51 maipapan iti no ania ti kaipapanan ti agbabawi. Ilistam no ania ti naammuam. Kitaem no mainayonmo iti listaam ti mensahe ni Presidente Russell M. Nelson “We Can Do Better and Be Better” (Liahona, Mayo 2019, 67–69).

Kasano nga iladawam no ania ti rikna ti umawat iti pannakapakawan babaen ken ni Jesucristo? No kasapulam ti tulong a mangiladawan iti riknam, mabalinmo ti kumita iti Dagiti Salmo 51:1–2, 7–12; 85:2–9. Kayat ti sumagmamano a tattao ti agdrowing wenno agsapul kadagiti ladawan tapno mangipeksa iti riknada; mabalinmo a padasen dayta. Mabalinyo met ti aggigiddan a mangkanta iti maysa a himno maipapan iti Mangisalakan, kas iti “I Stand All Amazed” (Hymns, no. 193).

Tapno makapagbabawi, kasapulantayo ti pammati a saan laeng a kabaelan ni Jesucristo a dalusannatayo no di ketdi pay dalusannatayto. Ania ti masarakam iti Alma 86:5, 13, 15 a mangtulong a mangipakaammo kenka nga agpada a makabael ken naayat a mamakawan ti Mangisalakan?

Kitaen met iti Alma 36; Peter F. Meurs, “He Could Heal Me!,” Liahona, Mayo 2023, 39–41.

Utobem no kasano a nagun-odmo ti pammaneknekmo maipapan ken ni Jesucristo ken ti pangsubbot a bilegna. Kalpasanna, bayat ti panagadalmo iti Dagiti Salmo 51:13–15; 66:5–20; 71:15–24, panunotem maipapan no kasano a maawismo dagiti dadduma nga “umay ket kitaen dagiti ar-aramid ti Dios” (Salmo 66:5). No nasken nga “ipalawagmo ti impaay ti [Dios] iti kararua[m]” (Salmo 66:16), ania ti ipalawagmo?

Ania ti kayat a sawen kenka ti “sarsaritaen ti kinalinteg[na] iti agmalmalem”? (Salmo 71:24).

Kitaen met iti Alma 26.

Sumagmamano a salmo ti mangiladawan no ania ti kayarigan ti rikna nga adayo iti Dios ken kasapulan unay ti tulongna (kitaen iti Salmo 63:1, 8; 69:1–8, 18–21; 77:1–9). Iti Dagiti Salmo 63; 69; 77–78, ania ti masarakam a nangted kadagiti salmista iti pammatalged manen?

No malidayankayo, kasano a tulongannakayo a “lagipen dagiti ar-aramid ti Dios” ken dagiti “nakaskasdaaw a gapuanan[na] idi ugma”? (Salmo 77:11). Sumagmamano kadagita a nakaskasdaaw ti nailadawan iti Salmo 78. Bayat ti panangbasam maipapan kadagitoy, utobem no ania ti makatulong kenka a “maisaad ti inanama[m] iti Dios” (bersikulo 7).

• Tapno matulongan dagiti annakmo a mangtakuat kadagiti kinapudno maipapan iti panagbabawi iti Salmo 51, mabalinmo ti mangidrowing iti maysa a dakkel a puso. Kalpasanna mabalinmo a tulongan dagiti annakmo a mangisurat iti sumagmamano a dakes a banag a pangsulisogan ni Satanas nga aramidentayo. Kasano nga iruartayo dagitoy a banag iti puspusotayo? Idawatmo kadagiti annakmo a mangsapul iti balikas a “puso” iti Salmo 51:10, 17. Isaritam maipapan no ania ti isuro dagitoy a bersikulo maipapan iti panagbabawi. Bay-an a pugasen dagiti annakmo dagiti balikas iti uneg ti puso iti pisarra ket mangisurat kadagiti baro a balikas a mangiladawan kadagiti wagas a pakapagbalbaliwan kadatayo ni Jesus no agbabawitayo.

• Mabalin a kayatmo a tulongan dagiti annakmo a mangammo no ania ti kaipapanan ti kaadda iti “napakumbaba ken agbabbabawi a puso” (Salmo 51:17). Mabalinda ti agsisinnublat iti panangukis iti maysa a banag a natangken ti ukisna, a kas iti itlog wenno mani. Mabalinmo a tulongan ida a mangidilig iti ukis kadagiti banag a manglapped kadatayo a makarikna iti ayat ti Nailangitan nga Ama. Kasano a maluktantayo ti pusotayo Kenkuana?

• Mabalinyo pay nga aggigiddan a kitaen ti ladawan ti Mangisalakan ket damagem kadagiti annakmo no ania dagiti balikas nga usarenda a mangiladawan Kenkuana. Awisem ida a mangsapul kadagiti balikas a mangiladawan Kenkuana iti Salmo 86:5, 13, 15. Apay a napateg a maammuan dagitoy a banag maipapan Kenkuana?

• Mabalin magustuan dagiti annakmo a mangidrowing kadagiti ladawan dagiti simbolo iti Salmo 61:2–3. Kasano a kasla maysa ni Jesucristo a “bato” (bersikulo 2), “kinamangan,” ken “natibker a baluarte”? (bersikulo 3).

• Idawatmo kadagiti annakmo a mangibinglay iti sumagmamano a paggugustoda nga estoria iti nasantuan a kasuratan (mabalin a makatulong dagiti ladawan manipud iti Libro ti Arte ti Ebanghelio ). Ania ti isuro kadatayo dagitoy nga estoria maipapan iti Apo? Mabalinyo ti aggigiddan a mangbasa iti Salmo 66:16 ken agsisinnublat iti panangsungbat iti saludsod nga “Ania ti inaramid ti Apo para iti kararuak”?

• Bayat ti panangbasayo iti Salmo 77:11; 78:6–7 nga aggigiddan, makapagbibinninglaykayo no kasano ti panangpadasyo a “lagipen dagiti ar-aramid ti Apo” (Salmo 77:11), agraman dagiti aramidna iti biagmo. Kasano a tulongannatayo ti sakramento a “kanayon a laglagipen? (Moroni 4:3; 5:2).

• Kalpasan ti panangbasayo kadagiti annakmo iti Salmo 71:8 , awisem ida a mangidroving iti dakkel a ngiwat. Idawatmo kadakuada a mangtulong kenka a “mangpunno” iti ngiwat kadagiti ladawan wenno balikas a mangibagbagi kadagiti banag a maibagatayo iti dadduma maipapan ken ni Jesucristo.

• Mabalinmo ti mangipasa iti maysa a ladawan ni Jesucristo. Mabalin ti tao a nakagiggem iti ladawan ti mangisao iti maysa a banag nga ammoda maipapan Kenkuana. Kasano a matulongantayo dagiti dadduma a tao a mangammo kadagitoy a banag?

• Adu kadagiti salmo dagiti kasla kararag iti Dios. Bayat ti panangbasayo kadagiti Salmo kadagiti annakmo, mabalinmo nga ipakita kadakuada dagiti banag a mabalintayo nga usaren a makiuman kadagiti tao nga adda iti adayo, kas iti telepono wenno surat. Kalpasanna basaen ti Salmo 86:7. Kasano nga “umawagtayo” iti Nailangitan nga Ama? Kasano ti panangsungbatna kadatayo?

• Mabalinyo ti aggigiddan a mangkansion iti maysa a kanta maipapan iti kararag, kas iti “A Child’s Prayer” (Children’s Songbook, 12–13; kitaen met iti Susan H. Porter, “Pray, He Is There,” Liahona, Mayo 2024, 77–79). Isaritayo iti tunggal maysa maipapan iti panawen idi sinungbatan ti Dios dagiti kararagyo.