Dagiti Salmo 1–2; 8; 19–33; 40; 46

Bayat ti panangbasam kadagti Salmo, mabalin a madlawmo no kasano ti kasansan nga impeksa dagiti mannurat ti panagbuteng, panagladingit, wenno panagdanag. Gagangay dagiti kasta a rikna, uray para kadagti tao nga addaan pammati. Ngem ania ti mamagbalin a makaparegta dagiti Salmo ket dagiti pangrisut nga idiayada, agraman ti naan-anay a panagtalek iti Apo. Bayat ti panangbasam iti Dagiti Salmo 1; 23; 26–28; 46, isuratmo:

• Dagiti awis nga agtalek iti Apo.

• Dagiti balikas a mangiladawan Kenkuana.

• Dagiti balikas a mangiladawan iti kappia, pigsa, ken dadduma pay a bendision nga ipaayna.

• Dagiti balikas a mangiladawan kadagiti tao nga agtalek Kenkuana.

Kasta met a buyaen dagiti nalawag a ladawan ken simbolo nga us-usaren dagiti Salmo a mangisuro maipapan iti Mangisalakan. Kas pagarigan, iti Salmo 23, ania kadagitoy a ragup ti balikas kas iti “ipaiddanak kadagiti nalasbang a pagaraban” wenno “dandanum a natalna” (bersikulo 2) ti mapanunotmo? Ania ti mabalin nga isimbolo ti mangliwliwa a “baras” ken “sarukod” iti (bersikulo 4)? Ania ti mabalin a kaipapanan ti “malukong[tayo]” (bersikulo 5) nga agliplipias?

Itudo ti sumagmamano kadagiti salmo iti mortal a biag ni Jesucristo. Nakita met dagiti Kristiano kadagiti panawen ti Baro a Tulag dagitoy a koneksion. Ibilang ti panangbasa kadagiti sumaganad a reperensia iti nasantuan a kasuratan. Sapulen dagiti koneksion iti nagbabaetan dagiti balikas kadagitoy a salmo ken ti biag ti Mangisalakan:

• Salmo 2:1–3 ken Dagiti Aramid 4:24–28

• Salmo 2:7 ken Dagiti Aramid 13:30–33

• Salmo 22:1 ken Mateo 27:45–46

• Salmo 22:7–8 ken Mateo 27:39–43

• Salmo 22:16 ken Lucas 23:32–33

• Salmo 22:18 ken Mateo 27:35

• Salmo 31:5 and Lucas 23:46

Ania ti masursurom manipud iti panagadal kadagitoy a koneksion? Anai kadagiti padto iti nasantuan a kasuratan a saan pay a naipatungpal? Ania ti masarakam kadagitoy a kari a mangted kenka iti namnama para iti masakbayan?

Ti panangbasa iti Dagiti Salmo 8; 19; 33 ket mabalin a mangparegta kenka a mangibilang iti adu a nakaskasdaaw a pinarsua ti Apo. Ikasom dagiti riknam bayat ti panangaramidmo. Mabalin a magustuam pay a kantaen wenno utoben dagiti balikas ti maysa a kanta a mainaig kadagitoy a salmo, kas iti “How Great Thou Art” (Hymns, 86). Kasano a dagiti pinarsua ti Apo ket “ipalawagda ti dayag ti Dios” kenka? (Salmo 19:1).

Adtoy ti sumagmamano a dadduma pay a himno a pinaregta dagiti Salmo:

• Salmo 23: “The Lord Is My Shepherd” (Hymns, no. 108)

• Salmo 23:6; 150: “Praise to the Lord, the Almighty” (Hymns, no. 72)

• Salmo 26:8: “We Love Thy House, O God” (Hymns, no. 247)

• Salmo 27:1: “The Lord Is My Light” (Hymns, no. 89)

• Dagiti Salmo 33:1–6; 95:1–6: “For the Beauty of the Earth” (Hymns, no. 92)

• Salmo 37:3–9: “Be Still, My Soul” (Hymns, no. 124)

• Salmo 148: “All Creatures of Our God and King” (Hymns, no. 62)

Iti Dagiti Salmo, dagiti balikas a kas iti pammaneknek, al-alagaden, bilin, ken panangukom ket mabalin a maibasar iti balikas ti Apo. Laglagipem dayta bayat ti panangbasam iti Salmo 19:7–11. Ania ti isingasing dagitoy a bersikulo kenka maipanggep iti balikas ti Apo? Ania ti isuro ti Salmo 29 maipapan iti timekna? Iti padasmo, kasano a maipada ti balikas wenno ti timek ti Apo kadagitoy a panangiladawan?

Gapu ta nabangon ti templo iti Jerusalem iti rabaw ti maysa a turod, ti ragup ti balikas a “turod ti Apo” (Salmo 24:3) ket mabalin a mangibasar iti templo wenno iti imatang ti Dios. Ania ti inayon daytoy iti pannakaawatmo iti Salmo 24? Ania ti kayat a sawen kenka ti maaddaan iti “nadalus nga im-ima, ken natarnaw a puso”? (bersikulo 4). Bayat ti panangbasam iti Dagiti Salmo 26–27, ania pay ti masursurom maipapan iti balay ti Apo?

No dadduma, mabalin a maupaytayo a dengngen a nasken nga agbalintayo a natarnaw a sumrek iti imatang ti Dios. Kinapudnona, agkarigatantayo amin, ken awan kadatayo ti perpekto. Ania a namnama ti masarakan iti mensahe ni Elder David A. Bednar a “Clean Hands and a Pure Heart”? (Liahona, Nov. 2007, 80–83). Kasano a mausarmo ti mensahena a mangtulong iti maysa a tao nga agkarigatan iti panagtarigagayna nga agbalin a perpekto? Ibilangmo no kasano a maawatmo ti tulong ti Mangisalakan kadagiti panagkagumaanmo a maaddaan iti “nadalus nga im-ima, ken natarnaw a puso.”

Kitaen met iti Bradley R. Wilcox, “Worthiness Is Not Flawlessness,” Liahona, Nob. 2021, 61–67.

• Ibilang ti panangisurat iti Ti Apo ket … Awisem dagiti annakmo a mangsapul kadagiti wagas a mangkumpleto iti dayta a binatog nga us-usaren dagiti nasantuan a kasuratan kas kadagitoy: Dagiti Salmo 23:1; 27:1; 28:1; 28:7; 32:7; 46:1. Ania ti isuro kadatayo dagitoy a bersikulo maipapan no kasano a matulongannatayo ti Apo?

• Mabalinyo a paglilinnawagan kadagiti annakmo no ania ti kasapulan ti maysa a kordero tapno agbalin a natalged ken nasalun-at. Kalpasanna, bayat ti aggigiddan a panangbasayo iti Salmo 23, tulongam dagiti annakmo a mangidilig no ania ti ar-aramiden ti maysa a pastor para iti maysa a kordero iti no ania ti ar-aramiden ti Dios para kadatayo. Ania ti kasapulantayo tapno agbalin a naespirituan a natalged ken nasalun-at? Aggigiddan nga agkansion iti maysa a kanta a makaited kadakuada kadagiti kapanunotan, kas iti “I Feel My Savior’s Love, (Children’s Songbook, 74–75).

• Bayat ti panangbasayo iti Salmo 24:3 nga aggigiddan, mabalin dagiti annakmo ti mangsapul kadagiti balikas a mangipalagip kadakuada iti templo. Mabalinda pay ti kumita iti ladawan ti maysa a templo. Kalpasanna mabalinyo ti aggigiddan a mangbasa iti bersikulo 4 tapno ammuen no asino ti mabalin a sumrek iti templo. Mabalinmo a saritaen maipapan no kasano nga agbalin a narugit dagiti ima ken no kasano a dalusantayo dagitoy. Kasano nga agbalintayo a naespirituan a narugit? Kasano a tulongannatayo ti Mangisalakan nga agbalin a naespirituan a nadaalus?

• No addaanka kadagiti babassit nga ubbing, mabalinmo nga awisen ida nga agpammarang nga agsangsangit bayat ti panangbasam iti Salmo 30:5, “Ti sangit mabalin nga agpatnag iti rabii.” Kalpasanna idawatmo kadakuada a mangipeksa iti rag-o bayat ti panangbasam iti, “Ngem iti ragsak umay iti bumigat.” Ulitem daytoy a ragup ti balikas iti sumagmamano a daras.

• Ipakitam ti maysa a ladawan ti Mangisalakan, ket isaritam kadagiti annakmo no ania ti naaramidna para kenka a nangisangbay kenka iti rag-o. Mabalinmo pay ti mangted iti tunggal ubing iti batang a mangiggem iti ladawan ket mangibinglay no ania ti inaramid ni Jesus a mangisangbay kadakuada iti rag-o.

• Tulongam dagiti annakmo a mangyulo iti umuna a linia manipud iti Salmo 46:10: “Agtalnakayo, ket ammuenyo a siak ti Dios.” Ania ti kayat a sawen ti “agtalnakayo”? Nalabit a mabalinyo ti mangbubos iti sumagmamano a kanito nga agsansanay iti panagbalin a natalna. Mabalinyo pay nga ibinglay iti tunggal maysa dagiti padas idi pinapigsa ti panagbalinyo a “natalna” ti relasionyo iti Dios. Tulongam dagiti annakmo a mangpanunot kadagiti kanito kabayatan ti aldaw no mabalinda ti “agtalna” tapno makarikna nga asidegda iti Nailangitan nga Ama.