Job 1–3; 12–14; 19; 21–24; 38–40; 42

Kas maysa a daniw, yunay-unay dagiti panglukat a kapitulo ti Job ti akem ni Satanas kas kabusortayo wenno mamabpabasol; saanda a mangiladawan iti aktual a pannakipulpol ti Dios ken ni Satanas. Bayat ti panangbasam iti kinuna ni Satanas maipapan ken ni Job (kitaen iti Job 1:9–11; 2:4–5), mabalinmo a saludsoden iti bagim, “Apay nga agtalinaedak a napudno iti Dios?” Apay a napeggad nga agtungpaltayo laeng iti Apo a gapu ta insingasing ni Satanas?

Ania ti makaawis iti riknam maipapan kadagiti sungbat ni Job kadagiti pannubokna? (kitaen iti Job 1:20–22; 2:9–10).

Insingasing dagiti gagayyem ni Job a ti Dios ti mangdusdusa kenkuana (kitaen iti Job 4–5; 8; 11). Ania dagiti problema a makitam iti daytoy a kapanunotan? Basaen ti sungbat ni Job kadagiti kapitulo 12–13. Ania iti ammo ni Job maipapan iti Dios a nangpabael kenkuana tapno agtalinaed iti panangtalekna? Ania iti ammom maipapan iti Dios a mangtulong kenka a mangsango kadagiti karit?

No dadduma, masursurotayo dagiti kapatgan a kinapudno bayat ti karirigatan a panawentayo. Utobem dagiti pannubok nga inladawan ni Job iti Job 19:1–22 ken dagiti kinapudno nga impakdaarna kadagiti bersikulo 23–27. Kasano nga ammom a sibibiag ti Mannubbotmo? Ania ti pagdumaan a maaramid daytoy a pannakaammo iti biagmo?

Ibilang ti panangkanta wenno idedengngeg iti maysa a himno maipapan ken ni Jesucristo, a kas iti “I Know That My Redeemer Lives” (Hymns, no. 136). Ania dagiti balikas manipud iti daytoy a himno a mangipeksa iti riknam maipapan Kenkuana?

Kitaen met iti Doktrina ken Katulagan 121:1–12; 122.

Iti Job 21–24, basaem ti panagdebate ni Job ken dagiti gagayyemna. Iti puso daytoy a panagdebate ket adda saludsod a dinamag ti adu a tattao: Apay nga agsagaba no dadduma dagiti nalinteg a tao?

Nupay awan kadatayo amin dagiti sungbat, iti naisubli nga ebanghelio ni Jesucristo, addaantayo iti sumagmamano a kinapudno a makatulong kadatayo a mangaramid iti kaipapanan ti rigat ken panagsagaba. Adda iti baba dagiti nasantuan a kasuratan iti ud-udina nga aldaw a naglaon iti sumagmamano kadagitoy a kinapudno. Ania ti isuro dagitoy a nasantuan a kasuratan maipapan iti Nailangitan nga Ama ken iti planona?

• 2 Nephi 2:11–13

• Mosiah 23:21–23; 24:10–16

• Ether 12:27

• Doktrina ken Katulagan 58:3–5

• Abraham 3:22–26

Mabalinmo pay a basaen dagiti pannursuro ni Presidente Spencer W. Kimball maipapan iti rigat iti “Tragedy or Destiny?” (Teachings of Presidents of the Church: Spencer W. Kimball [2011]), 11–21).

Maibatay iti no ania ti inadalmo, kasano a masungbatam ti saludsod a kas iti “Apay nga ipalubos ti Dios nga agsagaba dagiti nalinteg a tao?”

Naupay kadagiti pammabasol dagiti gagayyemna (kitaen iti Job 16:1–5; 19:1–3), naulit-ulit a dinamag ni Job iti Dios no apay a nasken nga agsagaba iti kasta unay (kitaen iti Job 19:6–7; 23:1–9; 31). Saan nga inted ti Apo ti nalawag a rason iti libro ti Job. Ngem insurona ti napateg a mensahe kadagiti kapitulo 38–40. Kasano ti pananggupugopmo iti daytoy a mensahe? Kas pagarigan, ania ti masursurom manipud kadagiti saludsod ti Apo iti Job 38:1–7, 18–24?

Makitamto a nakisarita ti Apo ken ni Job maipapan iti sumagmamano kadagiti pinarsuana ken dadduma pay a mannakabalin nga aramidna (kitaen iti Job 38–39). Mabalin a makitam ti sumagmamano kadagita a pinarsua (wenno ladawan ti maysa kadagitoy). Kasano a matulongandaka dagitoy a banag a mangpanunot iti sabali maipapan iti Dios? maipapan iti pannubokmo? Kasano a binalbaliwanda ti pannirigan ni Job? (kitaen iti Job 42:1–6; kitaen met iti Moises 1:8–10).

Adtoy ti dua a mensahe ti sapasap a komperensia a makatulong a mangbalbaliw iti pannirigantayo: Tamara W. Runia, “Seeing God’s Family through the Overview Lens” (Liahona, Nob. 2023, 62–69); Russell M. Nelson, “Think Celestial!” (Liahona, Nob. 2023, 117–20). Iti ania man a mensahe, sapulem ti maysa a banag a kayatmonto a laglagipen intono kasla nakaron dagiti pannubokmo. Kasano a maipalagipmonto iti bagim dagiti nasursurom?

• Allukoyem dagiti annakmo a mangibaga kenka no ania ti ammoda maipanggep ken ni Job. No kasapulanda ti tulong, mabalinmo nga itudo ida iti Job 1:1, 13–22; 2:7–10 wenno iti “Job” (iti Dagiti Estoria iti Daan a Tulag, 145–47). Kasano a sinungbatan ni Job dagiti karit? (kitaen iti Job 1:21; 2:10).

  

  1:55

• Napudno ni Job kadagiti karitna gapu iti no ania ti ammona maipapan iti Apo. Nalabit a mabalinmo ken dagiti annakmo a kumita kadagiti ladawan ni Jesucristo a makilanglangen kadagiti dadduma (kas iti adda iti maysa nga adda iti baba wenno dagiti ladawan iti Libro ti Arte ti Ebanghelio). Isaritam no ania ti ammom maipapan Kenkuana ken no ania ti kayariganna. Adtoy ti sumagmamano a bersikulo a mangipakita no ania ti ammo ni Job maipapan iti Apo: Job 12:10, 13, 16; 19:25–27. Apay a napateg a maammuan dagitoy a banag maipapan Kenkuana?

• Nagdamag ni Job iti maysa a napateg a saludsod iti Job 14:14. Nalabit a mabalinmo ken dagiti annakmo ti agsisinnublat a mangibinglay no kasano a sungbatanyo ni Job. Mabalinmo a sapulen dagiti kapanunotan iti Alma 11:42–44, iti video “In a Coming Day” (Gospel Library), wenno iti maysa a kanta maipapan iti Panagungar, kas iti “Did Jesus Really Live Again?” (Children’s Songbook, 64).

1:11

• Idi nalidayan ni Job, kinuna dagiti gagayyemna a ti Dios ti mangdusdusa kenkuana gapu ta nagbasol (kitaen iti Job 22:5). . No koma gagayyemnatayo ni Job, kasano a padasentayo a tulongan? Kasano a makatulong dagiti balikastayo kadagiti dadduma no malidayanda? (kitaen iti Job 16:5). Ibilangmo ti panangipakita iti maysa wenno ad-adu pay kadagiti ladawan iti daytoy a balabala bayat ti panangilawlawagmo kadagitoy a saludsod.

• Ibilang ti panangidawat kadagiti annakmo a mangilista iti sumagmamano a kababalin ti nasayaat a gayyem ken manginagan iti maysa a gayyem nga addaan kadagitoy a kababalin. Kalpasanna mabalinyo a kitaen ti maysa a ladawan ni Jesucristo. Iti ania a wagas a maysa a nasayaat a gayyem ni Jesus iti tunggal maysa kadatayo? Mabalinmo a panunoten ti maysa a tao nga agpaspasar iti rigat ita a panawen. Agplano no kasano nga agbalinkanto a maysa a gayyem a kas ken Cristo kadakuada.

• Kalpasan ti panangbasa iti Job 19:23–27, mabalinmo ken dagiti annakmo ti agsarita maipapan iti no kasano nga ammoyo a sibibiag ti Mannubbottayo. Mabalin nga agtitinnulongkayo a mangipan kadagiti pammaneknekyo (wenno dagiti naidrowing a ladawan ti Mangisalakan) iti maysa a libro (kitaen ti bersikulo 23).

• Mabalinyo pay ti agkansion iti maysa a kanta a mangipaneknek iti Mangisalakan, kas iti “I Know That My Redeemer Lives” (Hymns, no. 136). Mangibinglay kadagiti ragup ti balikas manipud iti himno a mangpapigsa iti pammatiyo Kenkuana. Apay a napateg a maammuan a sibibiag ni Jesucristo?