Esdras 1; 3–7; Nehemias 2; 4–6; 8

Kalpasan a pinarmek ti Persia ti Babilonia, ti ari ti Persia, ni Ciro, ket pinaregta ti Apo a mangibaon iti maysa a grupo dagiti Judio iti Jerusalem a mangbangon manen iti templo. Bayat ti panangbasam iti Esdras 1, kitaem no ania ti inaramid ni Ciro a tumulong kadagiti Judio iti daytoy napateg nga aramid. Kasano a makitam ti Apo nga agar-aramid babaen kadagiti lallaki ken babbai iti aglawlawmo, agraman kadagiti tao a saan a miembro ti Simbaanna? Ania iti isingasing kenka daytoy maipapan iti Apo ken ti aramidna?

Kitaen met iti Isaias 44:24–28.

Idi sinakup dagiti taga Babilonia ti Jerusalem, tinakawda dagiti napapateg a banag iti templo ket inuramda daytoy (kitaen iti 2 Ar-ari 25:1–10; 2 Cronicas 36:17–19). Kasano iti panagkunam a mabalin a nariknam no naibilangka koma kadagiti Judio a nakasaksi iti daytoy? (kitaen iti Salmo 137). Kitaem no kasano ti narikna dagiti Judio, kalpasan dagiti dekada, no idi napalubosanda nga agsubli ket bangonenda manen ti templo (kitaen iti Esdras 3:8–13; 6:16–22). Dayta ti mabalin a mangtignay kenka a mangutob iti bukodmo a rikna maipapan iti Apo ken iti balayna. Apay a ti pannakabangon ti maysa a templo ti maysa a gapu tapno agrambak?

Manmano a di masuppiat ti aramid ti Apo. Pudno daytoy kadagiti panagkagumaan nga indauluan da Zorobabel ken Nehemias. Adtoy ti simple a wagas a makatulong kenka nga agsursuro manipud kadagitoy nga estoria ken mangibilang no kasano a maitrabahom ti aramid ti Apo iti laksid ti oposision:

Aramid ti Dios para ken ni Zorobabel (Esdras 4:3):

Aramid ti Dios para ken ni Nehemias (Nehemias 2:17–18):

Aramid ti Dios para kaniak:

Oposision a nakaipasanguan ni Zorobabel (Esdras 4:4–24):

Oposision a nakaipasanguan ni Nehemias (Nehemias 2:19; 4:1–3, 7–8; 6:1–13):

Oposision a pakaipasanguak:

No kasano a simmungbat ni Zorobabel (Esdras 5:1–2):

No kasano a simmungbat ni Nehemias (Nehemias 2:20; 4:6, 9; 6:3–15):

No kasano a masungbatak:

Para iti tulong a panangidilig iti padas ni Nehemias iti biagmo, mabalinmo nga adalen ti mensahe ni President Dieter F. Uchtdorf a “We Are Doing a Great Work and Cannot Come Down” (Liahona, Mayo 2009, 59–62), nangnangruna iti maudi a dua a benneg. Bayat ti panangpanunotmo iti trabaho nga inted kenka ti Dios, mabalinmo nga adalen ti “Tema ti Young Women” wenno ti “Tema ti Korum ti Aaronic Priesthood” (Gospel Library). Wenno mabalinmo a kitaen iti maysa a himno a kas iti “As Sisters in Zion” (Hymns, no. 309) wenno “Ye Elders of Israel” (Hymns, no. 319).

Ania ti panangkunam a kayat a sawen ti “maysa a nakem tapno agaramid” iti serbisio iti Apo? (Nehemias 4:6). Ania ti mabalin a kaipapanan ti kaadda “ti namimbag a panangidalan … ti Dios [kenka]” bayat ti panangaramidmo iti trabahona? (Nehemias 2:8; kitaen met iti Nehemias 2:18; Esdras 7:6, 9, 27–28). Kasano a nakitamon ti imana kadagiti panagkagumaam nga agserbi Kenkuana?

Iti adu a kaputotan a pannakabaludda, limitado ti pannakagun-od dagiti Judio iti “libro ti linteg ni Moises” (Nehemias 8:1). Iti Nehemias 8, binasa ni Esdras ti linteg kadagiti tao. Ania ti masarakam iti daytoy a kapitulo a mangipakita no kasano ti rikna ni Esdras ken dagiti taona maipapan iti Dios ken ti balikasna? (kitaen met nangnangruna kadagiti bersikulo 1–12). Ania ti mangipakita iti biagmo no kasano ti riknam maipapan iti Dios ken iti balikasna?

Kitaen met iti Teachings of Presidents of the Church: Gordon B. Hinckley (2014), 115–24.

• Tapno maisuro kadagiti annakmo ti maipapan iti rag-o a narikna dagiti Judio idi nabangon manen ti temploda, mabalinmo nga ipakita kadakuada ti ladawan a kas iti maysa nga adda iti baba. Pagsaritaan no apay a mabalin a maragsakan dagitoy a tao nga adda iti balay ti Apo. Mabalinmo pay nga isarita kadagiti annakmo no apay a ti templo ket lugar ti rag-o para kenka. Kasano a nakatulong kenka ti templo a makarikna nga as-asidegka iti Nailangitan nga Ama ken iti Mangisalakan?

• Bayat ti panangbasam iti Esdras 3:10–13 kadagiti annakmo, tulongam ida a mangsapul kadagiti balikas a mangipakita no kasano ti narikna dagiti Judio idi mabangbangon manen ti templo. No makadanonkayo iti bersikulo 13, nalabit a mabalinyo ti aggigiddan a mangipukkaw iti rag-o. Tulongam dagiti annakmo a mangpanunot kadagiti rason tapno agrag-o gapu ta inikkannatayo ti Apo kadagiti templo. Kasano a maipakitatayo dayta a rag-o?

• Ibilangmo ti panagkansion iti maysa a kanta maipapan iti templo a kagiddan dagiti annakmo, kas iti maikadua a berso ti “Welcome Home” (Gospel Library). Kalpasan ti tunggal linia, mabalinyo ti agsardeng tapno idawat iti maysa nga ubing a mangibinglay iti maysa a banag a magustuanna maipapan iti templo. Mabalinyo pay a kitaen iti ladladawan dagiti templo kabayatan ti panagkantayo.

• Ibinglaymo kadagiti annakmo ti estoria ni Nehemias (kitaen iti Nehemias 2:17–20; 6:1–9; wenno “Nehemias” iti Dagiti Estoria iti Daan a Tulag, 173–74). Bayat ti panangbasam iti Nehemias 2:20, mabalinmo ken dagiti annakmo ti “tumakder” ket agpammarangkayo a tumultulong a mangbangon kadagiti pader ti Jerusalem. Mabalin a magustuan dagiti annakmo ti mangbangon iti maysa a pader manipud kadagiti bloke wenno dadduma pay a banag. Bayat ti panangaramidda, matulongam ida a mangpanunot kadagiti napateg a banag a tarigagayan ti Nailangitan nga Ama nga aramidentayo.

  

  1:38

• Bayat ti panangbasam iti Nehemias 6:9, awisem dagiti annakmo a mangingato kadagiti imada no mangngegda nga isaom ti “papigsaem dagiti im-imak.” Ibagam kadagiti ubbing maipapan iti maysa a panawen idi nariknam a pinapigsa ti Dios dagiti imam a mangaramid iti trabahona.

• Basaen iti napigsa ti sumagmamano a ragup ti balikas manipud iti Nehemias 8:2–3, 5–6, 8–9, 12 a mangiladawan no ania ti inaramid dagiti tao idi nangngeganda ni Esdras a nangbasa kadagiti nasantuan a kasuratan. Bayat ti panagbasam, mabalin a yakem dagiti annakmo dagitoy a ragup ti balikas. Kalpasanna, mabalinyo nga ibinglay iti tunggal maysa no kasano ti riknayo no basaen wenno mangngeganyo dagiti nasantuan a kasuratan.

• Bayat ti aggigddan a panangbasayo iti Nehemias 8:8, mabalinmo a kiddawen kadagiti annakmo no ania ti makatulong kadakuada a makaawat kadagiti nasantuan a kasuratan. Ipakitam kadakuada no kasano nga usaren dagiti tulong iti panagadal iti nasantuan a kasuratan kas iti Pangiwanwan iti Nasantuan a Kasuratan ken Topics and Questions (Gospel Library). Awisem dagiti annakmo a mangibinglay iti maysa a banag a nasursuroda maipapan iti Mangisalakan manipud kadagiti nasantuan a kasuratan.