Ester

Insuro ni Presidente Dieter F. Uchtdorf a tunggal maysa kadatayo ket “agtakder iti naidumduma a lugar ken addaan iti napateg nga aramid a [datayo] laeng ti makaaramid. . … Inikkannaka ti Apo kadagiti pagrebbengam gapu iti maysa a rason. Mabalin nga adda dagiti tao ken puso a sika laeng ti makadanon ken makasagid. Nalabit awanen ti sabali a makaaramid iti daytoy iti isu met laeng a wagas” (“Lift Where You Stand,” Liahona, Nob. 2008, 56).

Bayat ti panangbasam iti estoria ni Ester, utobem no kasano a mayaplikar daytoy a palawag kenkuana. Sapulem dagiti wagas a nangaramidan ti Apo a posible ken ni Ester a mangisalakan kadagiti Judio (kitaen, kas pagarigan, iti Ester 2:21–23; 3:10–14; 4:14–16). Kalpasanna utobem no kasano nga inikkannaka kadagiti gundaway a mangbendision kadagiti dadduma. Ania dagiti sumagmamano a kasasaad wenno pagnaigan nga inwanwannaka iti “iti kasta a tiempo kas itoy”? (Ester 4:14). No addaanka iti maysa a bendision ti patriarka, ibilangmo ti panangbasa iti daytoy tapno masursuro ti ad-adu pay maipapan iti ipaaramid ti Apo kenka. Ania ti maaramidmo a mangipatungpal iti daytoy nga aramid?

Kitaen met iti “For Such a Time as This” (video), ChurchofJesusChrist.org.

13:44

Iti libro ni Ester, masursurotayo manipud iti kinapudno da Ester ken Mardokeo, kasta met ti kinapalangguad ken gura ni Aman. Bayat ti panangbasam iti Ester 3; 5:9–14, sapulem ti rikna, balikas, ken tignay ni Aman. Ania ti ipakaammoda maipapan kenkuana ken dagiti pangguyugoyna? Ania dagiti bunga a nakaipasanguanna? (kitaen iti Ester 7). Ti panagbasa maipapan ken ni Aman ket mabalin a mangguyugoy kenka a mangamiris no ania ti mangparegta kadagiti riknam ken tignaymo. Maparegtaka kadi nga agaramid iti ania man a panagbalbaliw? Mabalinmo kadi ti umasideg iti Nailangitan nga Ama para iti tulong?

Kitaen met iti Dagiti Proverbio 16:32; Alma 5:28.

Kitaen no apay nga inkeddeng ni Ester ken ti dadduma pay a Judio nga agayunoda (kitaen iti Ester 3:13; 4:1–3, 10–17). Kasano a binendisionan ida ti panagayuno? (kitaen iti Ester 5:2–3; 8:11–12). Apay nga idawat ti Apo nga agayunotayo? (kitaen iti Topics and Questions, “Fasting and Fast Offerings,” Gospel Library). Ibilangmo no kasano a mapagbalinmo ti panagayuno a nain-indaklan a bendision iti biagmo.

Kitaen met iti Isaias 58:6–12; “Fasting: Young Single Adult Ward, Amanda” (video), ChurchofJesusChrist.org.

2:41

Idi indepensa da Mardokeo ken Ester ti pammatida ken dagiti taoda, insagmakda ti biagda iti peggad. Adda bunga dagiti pilitayo a mabalin a saan a nakarkaro, ngem ti panagaramid iti umno a banag ket mabalin nga agkasapulan latta iti tured. Ania ti nasursurom manipud iti Ester 3:1–4; 4:10–17 maipapan iti kaadda ti tured a mangaramid iti umno a banag? Kitaen dagiti nadumaduma a bunga ti napasaran da Mardokeo ken Ester kalpasan ti panangipakitada iti tured (kitaen iti Ester 3:5–11; 5:1–4). Ania ti nasken a maammuan da Ester ken Mardokeo maipapan iti Dios a mangaramid kadagiti pili nga inaramidda?

Panunotem dagiti kasasaad a kasapulam ti tured tapno maitakdermo no ania ti umno. Ania ti masursurom manipud kada Mardokeo ken Ester a makatulong kenka a mangsapul iti tured iti Apo?

Ti tured ni Ester ti nangiturong kenkuana iti “aldaw ti ragsak” (kitaen iti Ester 9:17–19). Kasano a nangted kenka iti “aldaw ti ragsak” ti tured a kas ken ni Cristo?

Kitaen met iti “Courage,” “Dare to Stand Alone” (videos), Gospel Library; “True to the Faith,” Hymns, no. 254.

3:19

4:20

• Mabalin a mariknam a naparegtaka a mangusar iti Ester 2:7 nga isuro kadagiti annakmo maipapan iti panangtulong kadagiti miembro ti pamilia nga agkasapulan, kas iti inaramid ni Mardokeo para ken Ester. Mabalinyo nga aggigiddan a basaen ti bersikulo wenno gupgopen daytoy iti bukodmo a balikas. Kalpasanna mabalinmo ken dagiti annakmo ti mangpanunot kadagiti miembro ti pamilia a mabalin a makasapul iti tulongyo. Agaramidka iti plano a mangtulong kadakuada.

• Dagiti pagarigan da Ester ken Mardokeo ti makatulong kadagiti annakmo a makaawat a ti kinatured kaipapananna ti panangaramid iti umno uray no mabutengkayo. Ibilang ti panangisurat kadagiti ragup ti balikas a Natured ni Mardokeo idi isuna ket … ken Natured ni Ester idi isuna ket … . Bayat ti aggigiddan a panagsursuroyo maipapan iti estoria ni Ester, mabalin nga isingasing dagiti annakyo dagiti wagas a panangileppas kadagiti binatog. Mabalinyo a basaen ti Ester 3:1–11; 4:10–17 wenno “Ni Reyna Ester” (iti Dagiti Estoria iti Daan a Tulag, 166–70) wenno sapulen dagiti ladawan iti daytoy a balabala. Kalpasanna isurat ti Agbalinakto a natured babaen iti … , ken awisem dagiti annakmo a mangilista kadagiti banag a tarigagayan ti Nailangitan nga Ama nga aramidenda nga agkasapulan iti tured. Maysa a kanta maipapan iti tured, kas iti “I’ll Walk with You” (Children’s Songbook, 158), ket makatulong.

  

  2:45

• Masursuroyo pay ti maipapan kadagiti panawen idi nagtured ni Jesucristo; kas pagarigan, idi nagsagaba Isuna para kadagiti basbasoltayo, iti Getsemani ken iti krus (kitaen iti Mateo 26:36–39; 27:33–35). Idawat kadagiti annakmo a mangibinglayda iti maysa a panawen idi nagturedda, ket ibinglaymo met dagiti bukodmo a padas.

• Ti panangbasa iti Ester 4:1–3, 10–17 ket makatulong kenka a mangisuro kadagiti annakmo maipapan iti panangayuno. Apay a nagayuno ni Ester ken dagiti Judio? Ibagam kadagiti annakmo no apay nga agayunokayo. Mabalinmo pay a damagen kadakuada no kasano nga ilawlawagda ti panagayuno iti maysa a gayyem a di pay pulos nakaaramid iti daytoy. Kasano a matulongantayo dagiti gagayyemtayo a makaawat kadagiti bendision nga aggapu iti panagayuno?

• Allukoyem dagiti annakmo a mangpanunot iti maysa a banag a mabalin a kasapulanda ti tulong ti Apo. Isingasing nga aramidenda dayta a paset ti panagayunoda bayat ti sumaruno a panagayuno iti Domingo.

• Tulongam dagiti annakmo a makaawat nga idi nagbuteng ni Ester, pinaregta ni Mardokeo isuna babaen iti panangilawlawagna kenkuana a tinulongan ti Apo nga agbalin a reyna “iti kasta a tiempo a kas itoy” (Ester 4:14). Ania ti kayat a sawen daytoy ni Mardokeo? Pagsaritaan iti tunggal maysa no kasano a maysa a ramit ni Ester para iti Apo. Kasano a makapagbalintayo a ramit para iti Apo?

• Kasano a matulonganyo dagiti annakyo a makaawat no ania ti kayat a sawen ti maysa a ramit? Nalabit a mabalinmo nga awisen ti maysa a tao nga agpatugtog iti maysa nga instrumento ti musika wenno ipakitam ti maysa a ladawan ti maysa a tao nga agus-usar iti daytoy a ramit. Kalpasanna mabalinmo nga isarita ti maipapan iti no ania ti kaipapanan ti agbalin a maysa a ramit kadagiti ima ti Dios.