“Hulio 20–26. ‘Dagiti Matami Addada a Situturong Kenka’: 2 Cronicas 14–20; 26; 30,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Hulio 20–26. ‘Dagiti Matami Addada a Situturong Kenka,’” Umaykayo, Sumurot Kaniak: 2026
Ti Kararag ni Ari Jehosafat, ni Keeley Rae
Hulio 20–26: “Dagiti Matami Addada a Situturong Kenka”
2 Cronicas 14–20; 26; 30
Napalawlawan ti Pagarian ti Juda. Namimpinsan nga umab-abante amin dagiti buyot manipud iti tallo a nabileg a kabusor a nasion, a nakasagana a makigubat. Iti daytoy nakaro a kanito ti panagkasapulan, nagturong ni Jehosafat, Ari ti Juda, iti Ari ti langit ken daga. Inummong ni Jehosafat dagiti taona iti templo ket nagkararagda. Binigbigna ti kinakapuyda kas tao ket nagpakaasi iti pannakaispal. Kas sungbat, inkari ti Apo ti pannalaknibna: “Dikayo agbuteng, dikayo met agkullayaw” (2 Cronicas 20:17).
Mabalin nga awan ti rumaraut a buyottayo iti ruangantayo a mangpangpangta a mangdadael kadatayo, ngem no dadduma mariknatayo a nalikmutantayo iti rigat ken kinadakes. Ti danatayo nga agturong iti pannakaisalakan ket isu met laeng ti dana a sinapul ni Jehosafat, ket ti kararagtayo ket mabalin a maipada met iti kararagna: “O Diosmi, … awan ti pannakabalinmi a bumusor itoy dakkel a buyot nga umay a maibusor kadakami; dikami met ammo no ania koma ti aramidenmi: no di ket dagiti matami addada a situturong kenka” (2 Cronicas 20:12).
Iti 2 Cronicas 14–30, mabasayonto ti maipapan ken Jehosafat ken ti dadduma pay nga ari iti Juda. Ibilang no kasano a mayaplikar iti bukodyo a biag dagiti reporma, balligi, ken karitda a maiturong iti pammati.
Para iti pakagupgopan ti libro ti 2 Cronicas, kitaen iti “Cronicas” iti Bible Dictionary.
Dagiti Kapanunotan iti Panagsursuro iti Pagtaengan ken iti Simbaan
2 Cronicas 14–16
Ti panangtalek iti Dios mangisangbayto kaniak iti talna.
Idi ari ni Asa ti Juda, adu a karit ti naipasango kenkuana—kas iti ar-aramidentayo amin ita. Bayat ti panangbasam maipapan kadagiti pannubok a naipasango kenkuana, makita no sadino ti nagtalkanna ken no kasano a nagbalbaliw dayta bayat ti panaglabas ti panawen.
|
Reperensia |
Dagiti karit a sinango ni Asa |
No sadino ti nagtalkan ni Asa |
|---|---|---|
Reperensia 2 Cronicas 14:9–12 | ||
Reperensia 2 Cronicas 15:1–8 | ||
Reperensia 2 Cronicas 16:1–10 |
Apay a no dadduma agsardengtayo nga agtalek iti Apo? Ania pay ti masursurom manipud iti biag ni Asa?
Kitaen met iti Elder D. Todd Christofferson, “Our Relationship with God,” Liahona, Mayo 2022, 78–80.
2 Cronicas 18
Masaluadak ti kinapudno, uray no saan a nalatak daytoy.
Narikna la ketdi ni propeta Micaias ti adu a pannakapilit a mangipadto iti balligi dagiti ari a da Jehosafat ken Ahab iti pannakigubatda iti Siria. Sapulem ti pakakitaan dayta a panangpilit iti 2 Cronicas 18:1–12. Ania a pakakitaan a masarakam iti kinatured ken integridad ni Micaias kadagiti bersikulo 13–27? (Makita nga iti bersikulo 14, mangted ni Micaias iti sarkastiko a sungbat; ti pudno a sungbatna adda iti bersikulo 16.) Kasano a naipatungpal dagiti balikas ni Micaias kadagiti bersikulo 28–34?
Ania dagiti sumagmamano a kasasaad a mabalin a pakaipasanguam iti pannakapilit a kas iti nakaipasanguan ni Micaias? Ania ti mangted kenka iti tured a mangitakder iti Apo ken kadagiti pannursurona?
Kadagiti aldaw ni Ari Jehosafat, tallo a nasion ti nangraut iti Jerusalem.
2 Cronicas 20:1–25
Kadagiti narigat a panawen, makaasidegak iti Dios ken dagiti propetana.
Bayat ti panangbasam iti 2 Cronicas 20:1–12, sapulem no ania ti inaramid ni Ari Jehosafat idi immay ti adu a nasion a nangraut iti Juda. Kasano a mayaplikarmo dagiti tignayna kadagiti makakarit a kasasaad a sangsanguem?
Masarakan ti sungbat ti Apo iti kararag ni Jehosafat kadagiti bersikulo 14–17. Ania dagiti ragup ti balikas a masarakam sadiay a makaliwliwa kenka wenno iti maysa nga am-ammom bayat dagiti narigat a panawen?
Kabigatanna, rimmuar dagiti tao ti Jerusalem a nangsabat iti bumusbusor a buyot. Bayat ti panangbasam iti 2 Cronicas 20:20, sapulem ti mensahe nga inted ni Jehosafat kadagiti tao ti Jerusalem. Kasano a naipatungpal dagiti balikasna? (kitaen kadagiti bersikulo 22–23). Kasano a binendisionannaka ti Dios iti panangpatim Kenkuana ken iti panangsurotmo kadagiti propetana?
Kinuna ni Presidente Russell M. Nelson: “Ti padasko ket apaman nga isardengmo ti mangikabil kadagiti question mark iti likudan dagiti palawag ti propeta ket ikabilmo ketdi dagiti exclamation point, ket aramidem daytoy, maibukbok dagiti bendision. Diak pulos isaludsod iti bagik, ‘Kaano nga agsao ti propeta kas mammadto ken kaano a saan?’ Kaay-ayok ti kastoy, ‘Kasano a makapagbalinak a kas kenkuana?’” (iti Lane Johnson, “Russell M. Nelson: A Study in Obedience,” Ensign, Ago. 1982, 24).
Kitaen met iti Doctrine and Covenants 21:4–6; “A Secure Anchor” (video), Gospel Library; “Make inspired choices,” For the Strength of Youth: A Guide for Making Choices (2022), 4–5.
A Secure Anchor
Lasinem dagiti simple a palawag ti kinapudno. Insuro ni Elder Neal A. Maxwell: “Idiaya kadatayo dagiti nasantuan a kasuratan dagiti nakaad-adu a diamante a mainaig iti doktrina. Ket no agay-ayam ti lawag ti Espiritu iti sumagmamano a pasetda, agsilnag dagitoy iti nailangitan a rikna ken mangsilnag iti dana a surotentayo” (“According to the Desire of [Our] Hearts,” Ensign, Nob. 1996, 21). Bayat ti panagadalmo kadagiti nasantuan a kasuratan, ibilangmo ti panangted iti oras a mangilasin, mangmarka, ken mangutob kadagiti ababa ngem nabileg a mensahe. Masarakan ti sumagmamano a pagarigan iti 2 Cronicas 14:11; 15:7; 18:13; 20:15; 26:5. Ania dagiti dadduma pay a “diamante a mainaig iti doktrina” a masarakam?
2 Cronicas 26:3–21
Mangiturong ti kinapalangguad iti pannakadadael.
Kas iti adu a dadduma pay nga ari ti Juda, nangrugi ti panagturay ni Uzzias kadagiti naindaklan a gapuanan ngem naggibus iti trahedia. Sapulem daytoy a pagtuladan iti 2 Cronicas 26. Ania ti makunam a nagbalbaliwan iti biag ni Uzzias?
Bayat ti panangbasam kadagiti bersikulo 16–23, laglagipem nga iti daytoy a panawen, dagiti laeng saserdote ti mapalubosan nga agpuor iti insienso iti templo. Apay iti panagkunam a nagsukir iti Dios ni Ari Uzzias? Ania dagiti masursurom manipud iti daytoy napeggad a padas?
Kitaen met iti “Be Thou Humble,” Hymns, no. 130.
2 Cronicas 30
Makapagbalinak a mamagkappia.
Iti 2 Cronicas 30, ni Ezekias ti ari ti Juda. Inawisna ti karibal a Pagarian ti Israel nga aguummong idiay Jerusalem tapno rambakan ti Fiesta ti Paskua—maysa a banag a saan a naaramid dagiti Israelita iti uneg ti adu a tawen (kitaen kadagiti bersikulo 1–12). Ania ti makaawis iti riknam maipapan iti awis ken no kasano a naawat dayta—agpadpada dagiti sangaili nga Israelita ken dagiti nangsangaili kadakuada idiay Juda?
Gapu ta nabayagen dayta, saan a pamiliar ti dadduma a sangaili idiay Jerusalem kadagiti detalye ti no kasano ti makiraman iti Fiesta ti Paskua. Bayat ti panangbasam iti 2 Cronicas 30:18–27, ania ti masursurom iti sungbat ni Ezekias ken dagiti bunga ti sungbatna?
Kitaen met iti Russell M. Nelson, “Peacemakers Needed,” Liahona, Mayo 2023, 98–101.
Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
2 Cronicas 14–16; 20
Makapagtalekak iti Dios.
-
Tapno mayam-ammo ti kapanunotan ti panagtalek iti Apo, mabalin nga ipakitam kadagiti annakmo ti maysa a banag a pagtalkam a mangpatalinaed kenka a namaga no agtudo, kas iti payong wenno dyaket. Bay-an ida nga agsarita maipapan iti no apay a makapagtalektayo kadagitoy a banag. Kalpasanna tulongam ida a mangidilig iti dayta iti panagtalektayo iti Apo. Apay nga agtalektayo Kenkuana a mamagtalinaed kadatayo a naespirituan a natalged?
-
Mabalinmo a tulongan dagiti annakmo a mangtakuat no kasano a simmungbat da Ari Asa ken Ari Jehosafat kadagiti karit babaen ti panagtalekda iti Apo (kitaen iti 2 Cronicas 14:11; 20:3–5, 12). Ibinglayyo iti tunggal maysa dagiti wagas a maipakitayo iti Apo nga agtalekkayo Kenkuana.
2 Cronicas 20:1–29
Denggen ken sungbatanto ti Dios dagiti kararagko.
-
Ti panid ti aktibidad ita a lawas ket makatulong kadagiti annakmo a makaawat iti estoria ti kararag ni Jehosafat ken ti sungbat ti Apo. Mabalinmo ken dagiti annakmo ti mangibinglay kadagiti panawen idi nangngeg ken sinungbatan ti Dios dagiti kararagmo. Ibilangmo ti panangiraman kadagiti panawen idi dimteng dagiti sungbat kadagiti wagas wenno no dadduma a dimo ninamnama. Ti maysa a kanta maipapan iti kararag, kas iti “I Pray in Faith” (Children’s Songbook, 14), ket makatulong a mangbangon iti pammati dagiti annakyo.
2 Cronicas 26:3–23
Makapagpakumbabaak.
-
Tapno maammuanda dagiti peggad ti kinapannakkel, mabalin a mangbangon dagiti annakmo iti torre nga addaan kadagiti bloke wenno babassit a kopa. Bayat ti panangikabilda ti tunggal bloke wenno kopa iti torre, tulongam ida a mangilasin iti maysa kadagiti nagapuanan ni Uzzias manipud iti 2 Cronicas 26:3–15. Kalpasan a malpasda ti torre, pagsaritaanyo kadagiti annakmo no kasano a mapagtalinaed ni Uzzias a nangato ken natibker daytoy. Ania ti mabalin a mangrebba iti daytoy? Kalpasanna, bayat ti panangbasam iti bersikulo 16, mabalinmo nga isarita maipapan iti no ania ti kayat a sawen ti pusotayo a “timmangsit a nakaigapuan ti pannakarpuog[tayo].” Ibinglaymo kadagiti annakmo no ania ti napasamak ken ni Uzzias kadagiti bersikulo 16–23. Bay-am a rebbaenda ti torreda. Isaritam no ania ti maaramidantayo tapno agtalinaedtayo a napakumbaba.
Agyamyaman ni Ari Ezekias ken dagiti Tao iti Dios, © Lifeway Collection/licensed from goodsalt.com
2 Cronicas 30
Makapagbalinak a mamagkappia.
-
Ipakita ti ladawan iti ngato idi inawis ni Ezekias dagiti kaarruba ti Juda manipud iti Pagarian ti Israel a mangrambak iti Fiesta ti Paskua a kaduada. Mabalinmo a kitaen daytoy a ladawan a kaduam dagiti annakmo ket basaenyo ti 2 Cronicas 30:18–19, a mangilawlawag a sumagmamano kadagiti sangaili ti saan a nagbuggo a mayannurot iti linteg ni Moises. Ania ti inaramid ni Ezekias? Ania koma ti iparikna daytoy kadagiti sangaili? Tulongam dagiti annakmo a mangpanunot no kasano a mabalinda ti agbalin a kas ken Ezekias iti wagas ti panangtratoda kadagiti dadduma.
Para iti ad-adu pay, kitaen iti isyu ti magasin a Friend iti daytoy a bulan.