2 Ar-ari 16–25

Kaaduan kadatayo ti addaan kadagiti padas a mangkarit iti pammatitayo. Para ken Ezekias ken dagiti taona, dimteng ti maysa kadagita a karit idi sinakup ti buyot ti Asirio ti Jerusalem. Bayat ti panagbasam iti 2 Ar-ari 18–19, ipapanmo a nagnaedka iti Jerusalem kabayatan daytoy a panawen. Kasano koma ti mabalin a nariknam, kas pagarigan, a dumdumngeg kadagiti panangumsi dagiti Asirio iti 2 Ar-ari 18:28–37; 19:10–13? Ania koma ti inaramidmo? Idiligmo dagiti rason dagiti Asirio a saan nga agtalek dagiti Israelita iti Apo kadagiti rason nga ited ni Satanas tapno agduaduatayo iti pammatitayo ita. Mabalinmo met a pagdumaen dagiti rason dagiti Asirio kadagiti rasonmo no apay nga aramidem nga agtalek iti Apo.

Ania ti masursurom manipud kadagiti tignay ni Ezekias iti daytoy a kasasaad? (kitaen iti 2 Ar-ari 19:1–7, 14–19). Kasano a simmungbat ti Apo? (kitaen iti 2 Ar-ari 19:35–37). Apay iti panangkunam a nagtalinaed a napudno ni Ezekias? (kitaen iti 2 Ar-ari 18: 5–7). Utobem no kasano a tinulongannaka ti Apo kadagiti mapannubok a panawen. Ania ti mariknam a makaparegta nga aramidem a mangpapigsa iti panagtalekmo Kenkuana?

Ti mensahe ni Presidente Jeffrey R. Holland a “Fear Not: Believe Only!” (Liahona, Mayo 2022, 34–36) addaan iti makatulong a balakad para kadagiti panawen ti buteng wenno duadua. Ti maysa a himno kas iti “Let Us All Press On” (Hymns, no. 243) mabalin pay nga addaan kadagiti makaparegta a mensahe. Ania ti masarakam kadagitoy a resources a makatulong kenka?

Kitaen met iti 2 Cronicas 31–32; 3 Nephi 3–4; Jörg Klebingat, “Valiant Discipleship in the Latter Days,” Liahona, Mayo 2022, 107–10.

Addaan ni Sennakerib, ti ari ti Asiria, iti nasayaat a rason tapno mamati a parmeken ti buyotna ti Jerusalem (kitaen iti 2 Ar-ari 17; 18:33–34; 19:11–13). Ngem adda mensahe ti Apo ken ni Sennakerib, a naited babaen ken ni propeta Isaias. Nairekord daytoy iti 2 Ar-ari 19:20–34. Ania dagiti kinapudno a masarakam iti mensahe ti Apo a nakatulong kenka a maaddaan iti pammati Kenkuana ken iti planona?

Nariknam kadin a nagkurangka iti maysa a banag a naespirituan? Nalabit a nariknam a mabalin a napigpigsa ti relasionmo iti Dios. Ania ti nakatulong kenka a nagsubli Kenkuana? Utobem dagitoy a saludsod bayat ti panagbasam iti 2 Ar-ari 21–23, a mangiladawan no kasano a natnag ti Pagarian ti Juda manipud iti Apo iti babaen ni Ari Manasses (kitaen iti 2 Ar-ari 21) ken no kasano a nakatulong ni Ari Josias kadagiti tao nga agsubli manen Kenkuana (kitaen iti 2 Ar-ari 22–23). Kasano ken apay a nagbalbaliw ni Josias ken dagiti taona? (kitaen iti 2 Ar-ari 22:8–11; 23:1–6, 21, 24).

Inawagan ni Presidente Spencer W. Kimball ti estoria ni Ari Josias a “maysa kadagiti kasayaatan nga estoria iti amin a nasantuan a kasuratan” (Teachings of Presidents of the Church: Spencer W. Kimball [2006],62). Basaen dagiti balikas ni Presidente Kimball maipapan ken ni Ari Josias (dagiti panid 62–64). Nalabit a mapanunotmo ti maysa a padas no ti maysa a paset ti nasantuan a kasuratan ket “[nag]trabaho a sipipinget]” kenka. Ania ti mabalin nga aramidem tapno umawat iti ad-adu pay a padas a kas iti dayta?

Kitaen met iti Alma 31:5; “Josiah and the Book of the Law” (video), Gospel Library.

12:25

Ania ti makaawis iti riknam maipapan iti katulagan nga inaramid ni Josias iti 2 Ar-ari 23:3? Bayat ti panagtultuloymo iti panagbasa iti kapitulo 23, makita no ania ti inaramid ni Josias a mangipakita iti panagkumitna iti Apo (kitaen met ti ladawan iti ungto daytoy a balabala). Kasano a maipakitam ti panagkumitmo Kenkuana?

• Iti 2 Ar-ari 18:3, 5–6, tulongam dagiti annakmo a mangtakuat no ania ti namagbalin ken Ezekias a nasayaat nga ari. Kalpasanna, bayat ti panangbasayo nga aggigiddan iti 2 Ar-ari 19:14–19, mabalinda a takuaten no kasano nga impakitana nga agtalek iti Apo. Mabalinmo a kitaen ti maysa a ladawan ni Jesus ket isaritam no apay a makapagtalektayo Kenkuana. Kasano a maipakitatayo nga agtalektayo iti Apo?

• Iti 2 Ar-ari 22:1, tulongam dagiti annakmo a mangtakuat no mano ti tawen ni Josias idi nagbalin nga ari. Ania ti masursurotayo maipapan ken ni Josias iti bersikulo 2? Ibilangmo ti maysa nga aktibidad a mabalin a mangiladawan iti panangsurot iti Apo ken saan a panagturong “iti makannawan wenno iti makannigid.”

• Dagiti agar-aramid (worker) a nailadawan iti 2 Ar-ari 22:3–7 ket napagtalkan iti kuarta a nausar a pangbangon manen iti templo “gapu ta nagaramidda a matalek” (bersikulo 7). Kalpasan ti panangbasa kadagitoy a bersikulo, mabalin a pagsasaritaanyo kadagiti annakmo maipapan kadagiti banag a naitalek kadakayo. Kasano a makapagbalintayo a mapagtalkan kas kadagiti agar-aramid (worker) kadagitoy a bersikulo?

• Tapno mayam-ammo ti estoria ni Ari Josias iti 2 Ar-ari 22–23, mabalinmo nga ilemmeng ti kopia dagiti nasantuan a kasuratan iti sadino man a lugar iti siled. Awisem dagiti annakmo a mangsapul iti daytoy. Kalpasanna mabalinmo nga ibinglay no ania ti napasamak idi nasarakan ti maysa kadagiti saserdote ni Josias dagiti nasantuan a kasuratan iti templo (kitaen met iti 2 Ar-ari 22:8–11; kitaen met iti “Ni Ari Josias” iti Dagiti Estoria iti Daan a Tulag, 148–49). Ania koma ti mapasamak kadatayo no awanantayo kadagiti nasantuan a kasuratan? Ibinglayyo iti tunggal maysa no apay a maragsakankayo nga addaantayo kadagiti nasantuan a kasuratan ita.

  

  1:36

• Kalpasan ti panagbasa iti 2 Ar-ari 23:2–3, mabalinmo ken dagiti annakmo a pagsasaritaan maipapan kadagiti nasantuan a kasuratan a nangparegta kadakayo a “magna a siaannurot iti Apo” (bersikulo 3). Mabalinyo pay ti agkansion iti maysa a kanta maipapan kadagiti nasantuan a kasuratan, kas iti “Search, Ponder, and Pray” (Children’s Songbook, 109).

• Idi nasursuro ni Josias ken dagiti taona dagiti bilin ti Dios, nagaramidda iti katulagan nga agbiagda kadagitoy. Basaem ti maipapan iti daytoy a kaduam dagiti annakmo iti 2 Ar-ari 23:1–3, ken tulongam ida a mangsapul kadagiti balikas wenno ragup ti balikas a mangipakita no kasano ti narikna dagiti tao maipapan kadagiti bilin ti Apo. Nalabit a mabalin a tumakder dagiti annakmo ket isaritada no ania ti mabalin a kayat a sawen ti “[agtakder] iti katulagan.” Kalpasanna mabalinda ti magna iti lugar ket isaritada no ania ti mabalin a kayat a sawen ti “magna a siaannurot iti Apo.” Kapasanna, mabalinda nga ikabil dagiti imada iti puspusoda ket mangisingasing kadagiti wagas a mabalin a pakatungpalantayo kadagiti katulagan “iti amin a puso[tayo].”