2 Ar-ari 2–7

Ipakita dagiti milagro kadatayo ti bileg ti Dios. Matulongandatayo a mangparmek kadagiti rigat ti mortalidad—kas iti maysa a lupes a daga nga agkasapulan iti natarnaw a danum (kitaen iti 2 Ar-ari 2:19–22) wenno ti maysa a napukaw a wasay a kasapulan a masarakan (kitaen iti 2 Ar-ari 6:4–7). Ngem ti kapatgan, maisublinatayo iti Apo dagiti milagro. Bayat ti panagbasam iti 2 Ar-ari 2–6, ibilangmo ti panangilista kadagiti milagro a masarakam, ken utoben dagiti naespirituan nga adalen a masursurom manipud iti tunggal maysa.

Mabalinmo pay nga idilig dagiti milagro nga inaramid ni Eliseo kadagiti milagro nga inaramid ni Jesucristo (kitaen iti 2 Ar-ari 4:8–37 ken Lucas 7:11–16; 2 Ar-ari 4:42–44 ken Juan 6:1–13; 2 Ar-ari 5:1–15 ken Lucas 17:11–19). Ania ti isuro dagitoy a milagro kenka maipapan iti Mangisalakan ken dagiti propetana?

Kitaen met iti 2 Nephi 26:12–13; 27:23; Moroni 7:35–37; ti benneg a “Seek and expect miracles” iti Russell M. Nelson, “The Power of Spiritual Momentum,” Liahona, Mayo 2022, 99–100.

Pinaregta ti Apo ni Eliseo a mangipadto kadagiti banag nga umay—gagangay, dagiti banag a kasla saan a mapasamak. Bayat ti panagbasam iti 2 Ar-ari 4:8–17; 7:1–16, panunotem maipapan no kasano a sumungbatka iti balikas ti Apo babaen kadagiti propetana ita. Ania dagiti pannursuro, padto, wenno kari a nangngegamon manipud kadagiti sibibiag a propeta? Ania ti ar-aramidem nga agtignay iti pammati kadagiti balikasda?

Kitaen met iti 3 Nephi 29:6; Doktrina ken Katulagan 1:37–38; “Teachings of Presidents” collection, Gospel Library.

Bayat ti panagbasam iti 2 Ar-ari 5, ibilangmo ti panagidilig iti kukutel ni Naaman iti naespirituan a karit a sangsanguem.

Adda kadi maysa a tao a kas iti “bassit a tagabo” iti biagmo, a mangparparegta kenka nga agkalikagum a manggun-od iti pannarabay maipapan iti karitmo manipud kadagiti propeta ti Apo? (kitaen kadagiti bersikulo 2–3, 13).

Ania ti yaw-awis ti Apo nga aramidem a mabalin a kasla nakasimsimple—kas iti “agdigoska, ken madalusanka”? (bersikulo 13). Ania ti mabalin a manglaplapped kenka iti panangawat kadagiti simple nga awisna?

Kasano a maipakitam ti kinapakumbaba a kas iti inaramid ni Naaman?

Kitaen no kasano nga inaringan ti padas ni Naaman ti pammatina iti Dios ti Israel (kitaen iti bersikulo 15). Ania dagiti masursuroyo manipud iti daytoy?

Kitaen met iti Lucas 4:27; 1 Pedro 5:5–7; Alma 37:3–7; Ether 12:27; L. Whitney Clayton, “Whatsoever He Saith unto You, Do It,” Liahona, Mayo 2017, 97–99; “Naaman and Elisha” (video), Gospel Library.

14:30

Bayat ti panangikarigatam a sumurot ken ni Cristo, nariknam kadin a kas iti agtutubo nga adipen ni Eliseo —nalablabes iti bilang ken mabuteng? Ipapanmo a sika ti adda iti lugarna bayat ti panagbasam iti 2 Ar-ari 6:8–23. Kasano a balbaliwan daytoy nga estoria ti wagas a panagpanunotmo ken panagriknam maipapan kadagiti pannubokmo, pagrebbengam, wenno panagkagumaanmo nga agbiag iti ebanghelio?

Bayat ti panangutobmo, ibilangmo dagiti balikas ni Presidente Henry B. Eyring: “Kas iti dayta adipen ni Eliseo, ad-aduda dagiti adda kadakayo ngem dagiti makitayo a sumuppiat kadakayo. Sumagmamano nga adda kadakayo ti saanyonto a makita iti mortal a matayo. Ti Apo ti mangpapigsanto iti pakinakemyo ken no dadduma aramidennanto daytoy babaen ti panangawagna iti dadduma a makipagtakder kadakayo” (“O Ye That Embark,” Liahona, Nob. 2008, 58).

Ibilang ti panangilista iti “ad-aduda dagiti adda [kadakayo]” (bersikulo 16)—tattao nga inkabil ti Dios iti biagyo a mangsuporta kadakayo. Mabalinmo a kiddawen Kenkuana a tulongannaka a mangilasin kadakuada babaen ti pananglukatna kadagiti naespirituan a matam. Nalabit nga inkabilnaka met iti biag ti dadduma tapno matulongam ida. Kasano a makagun-odkayo iti pigsa ken suporta manipud iti tunggal maysa?

Kaano a nariknam ti suporta nga iladawan ti Apo iti Doktrina ken Katulagan 84:88?

Mabalinmo pay nga adalen ti mensahe ni Sister Michelle D. Craig “Eyes to See” (Liahona, Nob. 2020, 15–17). Saludsodem iti bagim, “Ania ti tarigagayan ti Dios a makitak?”

Iti panangibasar iti estoria iti 2 Ar-ari 6:8–23, kinuna ni Elder Ronald A. Rasband: “Mabalin nga addaantayo wenno awanan kadagiti karuahe nga apuy a naibaon a mangikkat kadagiti butengtayo ken mangparmek kadagiti demoniotayo, ngem nalawag ti adalen. Adda ti Apo kadatayo, pampanunotennatayo ken bembendisionannatayo kadagiti wagas nga Isu laeng ti makaaramid. Kabaelan ti kararag nga idawat dagiti pigsa ken paltiing a kasapulantayo tapno ipamaysa ti pampanunottayo ken ni Jesucristo ken iti pangsubbot a sakripisiona. Ammo ti Apo a no dadduma mariknatayo ti agbuteng. Nariknak ti buteng ket kastakayo met. … Iti daytoy a Simbaan mabalin a saantayo nga umdas a makaipaay iti napateg nga impluensia iti lubong, ngem no luktantayo dagiti naespirituan a matatayo, ‘ad-aduda dagiti adda kadatayo ngem kadagiti adda kadakuada’ [2 Ar-ari 6:16]” (“Be Not Troubled,” Liahona, Nob. 2018, 18–19). Kasano nga usarem dagitoy a balikas tapno matulongam ti maysa a tao a makarikna iti panagdanag wenno panagbuteng?

Kitaen met iti “Dearest Children, God Is Near You,” Hymns, no. 96.

• Kalpasan a matulongam dagiti annakmo a makaawat no ania ti milagro, awisem ida a mangilista iti adu a pagarigan ti milagro agingga a kabaelanda. Dagiti ladawan iti Libro ti Arte ti Ebanghelio wenno iti Umaykayo, Sumurot Kaniak ket makatulong. Kalpasanna mabalinda a sapulen dagiti milagro iti 2 Ar-ari 4:1–7, 14–17, 32–35, 38–44. Ania ti isuro dagitoy a milagro maipapan iti Nailangitan nga Ama?

• Mabalin a pagsasaritaanyo kadagiti annakmo maipapan no kasano nga impakita ti Dios ti ayatna babaen dagiti milagro. Mabalinyo pay a kansionen ti maysa a kanta kas iti “God’s Gracious Love” (Gospel Library).

• Tulongam dagiti annakmo a mangsursuro iti estoria iti 2 Ar-ari 5:1–3, 9–14. Ibilang ti panangusar iti “Agasan ni Eliseo ni Naaman,” (iti Dagiti Estoria iti Daan a Tulag, 134–37), wenno ti ladawan ni Naaman iti balabala iti daytoy a lawas. Apay a saan a kayat ni Naaman ti agbuggo iti Karayan Jordan, nupay kinuna ni Eliseo a daytoy ti makaagas iti sakitna? Kasano a nabendisionan ni Naaman idi sinurotna dagiti pammilin ni Eliseo? Mabalinyo nga ibinglay iti tunggal maysa dagiti padasyo idi nagtungpalkayo iti Apo, nupay saankayo a sigurado a kayatyo.

  

  1:52

• Mabalinmo pay a yunay-unay ti 2 Ar-ari 5:13, a nangtulongan dagiti adipen ni Naaman kenkuana a mangikeddeng nga agtungpal ken ni propeta Eliseo. Kalpasanna mabalin a pagsasaritaan dagiti annakmo maipapan kadagiti wagas a pakatulonganda kadagiti gagayyemda wenno miembro ti pamilia a dumngeg ken agtungpal iti propeta.

• Mabalinmo ken dagiti annakmo ti mangipapan a napalawlawankayo iti buyot nga addaan kadagiti kampilan, kabalio, ken umap-apuy a lugan. Kasano koma ti mariknayo? Ania koma ti aramidenyo? Kalpasanna mabalin dagiti annakmo nga ikidemda dagiti matada bayat ti panangibasam iti 2 Ar-ari 6:16–17 kadakuada. (Kitaen met iti “Ni Eliseo ken ti Buyot ti Apo,” iti Dagiti Estoria iti Daan a Tulag, 138–39, wenno ti ladawan iti ungto daytoy a balabala.) No madanonmo dagiti balikas a “luktam koma dagiti matana,” (bersikulo 17), idawatmo kadagiti ubbing nga imulagatda dagiti matada. Saritaem maipapan iti no ania ti nakita ti adipen. Ibinglaymo kadagiti annakmo dagiti wagas a nariknam nga adda kenka ti Apo bayat dagiti karitmo, uray no kasla agmaymaysaka.

  

  1:9