1 Ar-ari 12–13; 17–22

Kasano ti panangiladawanmo iti biddut nga inaramid ni Ari Roboam, ti anak ni Solomon iti 1 Ar-ari 12:1–14? Ania dagiti kababalin a kas ken Cristo a nakatulong koma ken Roboam a nangispal iti pagarianna? (kitaen iti berikulo 7; Mateo 20:25–28; Mosiah 2:10–21). Kasano a mausarmo dagitoy a kababalin kas maysa a lider—iti man maysa a calling iti Simbaan wenno kas maysa a lider ti bukodmo a biag?

Indawat ni Elias iti balo a babai a mangted kenkuana iti taraon ken danum sakbay ti panangpakanna iti bagina ken ti mabisbisin nga anakna a lalaki. Apay nga aramidenna dayta? Ti kiddaw ni Elias ket mabalin met a makita a kas maysa a bendision para iti daytoy bassit a pamilia. Kasapulanda dagiti bendision ti Apo, ket masansan a mangisangbay ti sakripisio kadagiti bendision—a pakairamanan ti bendision ti napigpigsa a pammati.

Bayat ti panagbasam iti 1 Ar-ari 17:8–16, ipapanmo a sika daytoy a balo a babai. Ania ti makaawis iti riknam maipapan kenkuana? Mabalinmo pay ti agaramid iti listaan dagiti pili nga agkasapulan iti pammati ken ni Jesucristo (kas pagarigan, kitaen iti Para iti Pigsa dagiti Agtutubo: Maysa a Pangiwanwan iti Panagpili [2022]). Ania ti masursurom manipud iti daytoy balo a babai maipapan iti panangaramat iti pammati?

Kasano a maipada dagiti tignay ni Eliseo iti 1 Ar-ari 19:19–21 kadagiti tignay ti balo a babai?

Panunotem dagiti sakripisio nga inaramidmo a mangsurot iti Mangisalakan. Ania ti isuro ti 1 Ar-ari 17:8–16; 19:19–21 maipapan kadagitoy a sakripisio? Kasano a matulongannakayo ti pannakaammoyo iti Mangisalakan no kiniddawna kadakayo nga agaramid kadagiti sakripisio? Kasano a binendisionannakayo?

Kitaen met iti Mateo 4:18–22; 6:25–33; Luke 4:24–26; “Elijah and the Widow of Zarephath” (video), Gospel Library; “When Faith Endures,” Hymns, no. 128.

10:13

Mabalin a narikna dagiti Israelita nga adda nasayaat a rason nga agdayawda ken ni Baal, a maam-ammo a kas dios dagiti bagyo ken tudo. Kalpasan ti tallo a tawen a tikag, kinasapulanda unay ti tudo. Ket ti panagdaydayaw ken ni Baal ket inawat ti kagimongan ken intandudo ti ari ken reyna. Bayat ti panangbasam iti 1 Ar-ari 18, panunotem no apay a ti maysa a tao iti aldawtayo ket mabalin a saan a makaikeddeng maipapan iti panangsurot iti Apo. Iti daytoy a kapitulo, ania ti panagkunam a padpadasen ti Apo nga isuro kadagiti taona? Ania dagiti padas a nakatulong kenka nga agkumit iti panangsurot iti Mangisalakan?

Kitaen met iti D. Todd Christofferson, “Choice and Commitment” (worldwide devotional for young adults, Jan. 12, 2020), Gospel Library.

Nakalkaldaang ta ti milagro iti Bantay Carmelo ket saan a nangpabalin a nalaklaka iti mision ni Elias. Kinapudnona, nagpeggad ti biagna, ket masapul nga aglemmeng iti kueba iti let-ang. Sadiay, a nagkarkarigatan iti kinaliday ken pannakaupay, naaddaan iti padasna iti Apo a maigiddiat unay iti no ania ti padas iti Bantay Carmel. Ania ti isuro kadakayo ti padas ni Elias iti 1 Ar-ari 19:1–18 maipapan no kasano a makisao ti Apo kenka iti panawen ti panagkasapulan?

Utobem dagiti panawen idi mariknam a nakisarita kenka ti Apo. Kasano ti panangiladawam iti wagas a pannakiumanna kenka? Apay a dagiti balikas a “naalumamay” ken “babassit” ti nasayaat a wagas a mangiladawan iti timek ti Espiritu? Ania pay dagiti dadduma a balikas a masarakam iti Helaman 5:30; Doktrina ken Katulagan 6:22–23; 11:12–14? Ania ti nasken nga aramidem tapno umawat a nasansansan iti pannarabay ti Apo?

Kitaen met iti Salmo 46:10.

• Tapno matulongan dagiti annakmo a makasursuro kadagiti estoria ti pammati iti 1 Ar-ari 17, mabalinmo nga ipakita kadakuada dagiti ladawan wenno banag a mangiladawan kadagiti estoria, kas kadagiti tumatayab, tinapay, wenno ubing a lalaki. Bayat ti panangisaritam kadagitoy nga estoria kadagiti annakmo, awisem ida a mangsapul iti ladawan wenno banag a maigiddan iti tunggal estoria. Makatulong kenka ti “Ni Elias a Propeta” (iti Dagiti Estoria iti Daan a Tulag, 121–24) a mangisarita kadagitoy nga estoria. Ania ti isuro kadatayo ti tunggal estoria maipapan iti panangipakita iti pammati ken ni Jesucristo?

  

  1:58

• Tulonganyo dagiti annakyo a mangpanunot kadagiti wagas a pakaipakitaanda iti pammatida ken ni Jesucristo. Makipagkansion kadakuada iti kanta maipapan iti pammati, kas iti “Addaanak iti Pammati iti Apo, ni Jesucristo” (Gospel Library), ken ibinglayyo iti tunggal maysa no ania ti masursuroyo maipapan iti pammati manipud iti kanta.

• Nalabit a mabalin nga agdrowing dagiti annakmo iti maysa a ladawan ti no ania ti kiniddaw ti Apo iti balo a babai nga ited ken ni Elias (kitaen iti 1 Ar-ari 17:12–13) ken no ania ti inawat ti balo a babai a kas subad (kitaen iti 1 Ar-ari 17:15–16). (Kitaen met iti panid ti aktibidad iti daytoy a lawas.) Mabalinda met ti agsapul kadagiti ladawan ti dadduma a tattao a nangisuko iti maysa a banag a tarigagayanda para iti maysa a banag a nasaysayaat. Awisem dagiti annakmo a mangsapul kadagiti ladawan iti Libro ti Arte ti Ebanghelio wenno iti Umaykayo, Sumurot Kaniak. Ania ti idawat ti Apo nga isakripisiotayo? Kasano a bendisionannatayo?

• Bayat ti panangbasayo iti 1 Ar-ari 18:17–39 nga aggigiddan, mabalin a mangpili dagiti annakmo iti bersikulo ket mangidrowing iti ladawan ti no ania ti iladawan daytoy. Mabalinda nga usaren dagiti ladawanda a mangisarita iti estoria iti bukodda a balikas. (Kitaen met iti “Ni Elias ken dagiti Saserdote ni Baal,” iti Dagiti Estoria iti Daan a Tulag, 125–28.)

  

  2:17

• Tulongam dagiti annakmo a mangpanunot kadagiti kasasaad no mabalin a kasapulanda ti mangeddeng no surotenda wenno saan ni Jesucristo. Nalabit a mabalinda ti agdrowing kadagiti ladawan ti bagida nga agar-aramid iti umno a pili. Ibinglay iti tunggal maysa no apay a pilienyo ti sumurot ken ni Jesus.

• Bayat ti panangupgupmo iti 1 Ar-ari 19:9–12, awisem dagiti annakmo nga agaramid kadagiti tignay a mangibagi iti napigsa nga angin, ginggined, ken apuy. Kalpasanna awisem ida nga agtugaw a natalna bayat ti panangisaoyo nga aggigiddan, iti naulimek a timek, “kalpasan ti apuy maysa a bassit a naalumamay a timek” (bersikulo 12). (Kitaen met iti “Makisao ti Apo ken ni Elias,” iti Dagiti Estoria iti Daan a Tulag, 129–31.) Isaritam kadagiti annakmo maipapan kadagiti panawen a pannakariknam iti naalumamay, bassit a timek ti Espiritu Santo.

  

  1:48

• Aggigiddan nga agkansion iti maysa a kanta maipapan iti Espiritu, kas iti “The Still Small Voice” (Children’s Songbook, 106–7). Ania ti makasinga kadatayo iti panangbigbig iti Espiritu? Ania ti makatulong kadatayo a dumngeg Kenkuana?