2 Samuel 11–12; 1 Ar-ari 3; 6–9; 11

No dadduma kumitatayo kadagiti tao a kasla natibker iti pammatida, ket ipapantayo a saanda a maaringan iti sulisog. Dagiti nakalkaldaang a pili ni David a nailadawan iti 2 Samuel 11 ket nalawag nga ipakitana a saan a kastoy ti kasasaadna. Ibilangmo no ania dagiti adalen a mabalinmo a sursuruen manipud kadagiti padasna. Dagiti saludsod kas kadagitoy ti mabalin a makatulong kenka nga adalem ti 2 Samuel 11–12:

• Ania dagiti pili nga inaramid ni David a nangiturong kenkuana iti umad-adun a dana ti managbasol? Ania dagiti nalinteg a pili nga inaramidna koma ketdi? (Kitaen met ti video a “To Look Upon,” Gospel Library).

  

  4:15

  Panangusar kadagiti video. Makatulong kenka dagiti video a mangiladawan kadagiti salaysay manipud kadagiti nasantuan a kasuratan ket ibilangmo no kasano a mayaplikarda kenka. Ibilangmo no kasano a mausarmo dagitoy a mangpasayaat iti panangisuro ken panagsursuro. Kas pagarigan, bayat ti panagbuya iti “To Look Upon” (Gospel Library), ibilang ti panangisardeng iti video iti nadumaduma a punto tapno utobem wenno pagsasaritaan ti sumagmamano kadagiti saludsod a naisingasing iti daytoy nga aktibidad.

• Kasano ti panangpadas ti kabusor a mangiturong kenka kadagiti managbasol a dana? Ania dagiti pili a mabalinmo nga aramiden itan nga agtalinaed iti naespirituan a kinatalged?

• Kitaen ti reaksion ni David iti estoria ni Nathan iti 2 Samuel 12:1–6. Ania ti isingasing ti reaksionna maaipapaan no kasano ti panangkita ni David iti bagina? Ania ti inaramid ti Apo a mangtulong kenka a kumita iti bagim a naum-umiso?

• Kasano a gupgopem dagiti pasamak iti 2 Samuel 11–12 iti maysa a binatog a pammallaag?

Ti panagbasa maipapan kadagiti dakes a pili ni David ket mabalin nga iturongnaka a mangammo maipapan kadagiti peggad ti pornograpia ken seksual a basol. Maysa a nasayaat a resource para iti daytoy ti para iti Pigsa dagiti Agtutubo: Maysa a Pangiwanwan iti Panagpili, nangruna kadagiti benneg a napauluan iti “Ania ti aramiden iti kanito” ken “Sagrado ti bagiyo” (dagiti panid 21–28). Nalabit a mabalinmo ti agsapul iti dayta a resource para iti balakad a nakatulong koma ken ni David a mangaramid kadagiti nasaysayaat a pili. Wenno mabalinmo a basaen ti “Tulongannakanto ni Jesucristo” (dagiti panid 6–9), a mangsapsapul iti maysa a banag a nakatulong koma ken ni David nga agsubli iti Apo.

Ibilang ti panangkanta iti maysa a himno kas iti “I Need Thee Every Hour” (Hymns, no. 98) ken panangutob no kasano a pinabilegnaka ti Mangisalakan idi naipasangoka iti sulisog.

Kitaen met iti 2 Nephi 28:20–24; Ulisses Soares, “Seek Christ in Every Thought,” Liahona, Nob. 2020, 82–85; “Taking Charge of Technology,” Gospel Library; “Watch Your Step” (video), Gospel Library.

2:36

No kinuna ti Apo kenka, “Kiddawem ti itedkonto kenka” (1 Ar-ari 3:5), ania koma ti kiddawem? Ania ti makaawis iti riknam maipapan iti kiddaw ni Solomon? Utobem no apay a ti “maysa a mannakaawat a puso” a “mangilasin iti naimbag ken dakes” (bersikulo 9) ket maysa a napateg a sagut. Ania ti maaramidmo a mangsapul iti daytoy a sagut?

Kitaen met iti Moroni 7:12–19.

Iti 1 Ar-ari 6–7 masarakamto ti detalyado a panangiladawan iti sagrado a balay nga imbangon ni Solomon para iti Apo. Mabalin a kasla saan a kas kapateg kenka dagiti detalye a kas kadagiti nagkauna nga Israelita. Ngem ti panangbasa kadagitoy a kapitulo ket mabalin a mangted kenka iti panagrikna no kasano ti kapateg kadakuada ti maaddaan iti balay ti Apo. Apay a napateg daytoy kenka?

Mabalin nga utobem no ania ti mabalin nga isimbolo ti nadumaduma a paset ti templo ni Solomon. Kas pagarigan, ibilangmo no ania ti mabalin nga ibagi dagiti kerubin, kaykayo, ken sabsabong iti 1 Ar-ari 6:35 . (Kitaen met iti Genesis 3:24.)

Kapitulo 8 irekordna ti kararag ni Solomon idi nakumpletona ti templo (kitaen kadagiti bersikulo 22–61). Ibilangmo ti panangaramid iti maysa a listaan dagiti bendision a kiniddaw ni Solomon. Ania ti makaawis iti riknam maipapan kadagitoy a bendision? (Kitaen met dagiti kari ti Apo iti 1 Ar-ari 6:11–13; 9:1–9.) No napankan iti balay ti Apo, panunotem maipapan dagiti padasmo nga agdaydayaw sadiay. Kasano a nakatulong kenka ti panangtungpal kadagiti katulagan iti templo a manggun-od kadagiti bendision ti Apo?

Kitaen met iti Doktrina ken Katulagan 109; Henry B. Eyring, “I Love to See the Temple,” Liahona, Mayo 2021, 28–31.

Ania ti kayat a sawen ti “ti puso[yo] … naan-anay koma iti Apo”? (1 Ar-ari 8:61). Maigiddiat kadi daytoy kadagiti tignaytayo nga agbalin a naan-anay? Kasano koma a kastoy? Basaen ti 1 Ar-ari 11:1–11, ket kitaen no ania ti kinuna ti Apo maipapan iti puso ni Solomon. Mabalinmo nga utoben no adda dagiti impluensia iti biagmo a mabalin a mangyadayo iti pusom iti Apo ken agturong iti “dadduma a didiosen.”

• Makatulong kenka ti “Ni Ari David” iti Dagiti Estoria iti Daan a Tulag, 117–20, a mangisarita kadagiti annakmo iti estoria iti 2 Samuel 11. Mabalin a kiddawem kadagiti annakmo a mangilasin kadagiti di umiso a pili nga inaramid ni David ket mangisingasing kadagiti nasayaat a pili a mabalinna koma nga inaramid ketdi. Ania dagiti sumagmamano a banag a mabalintayo nga aramiden no masulisogtayo a makatulong kadatayo nga agpili iti umno?

  

  2:11

• Ti panagbasa maipapan kadagiti nadagsen a basol ni David ket mabalin a maysa a nasayaat a gundaway a paglilinnawagan dagiti peggad ti pornograpia. Ti video “What Should I Do When I See Pornography?” (Gospel Library) ti makatulong a mangiwanwan. Tulongam dagiti annakmo nga agaramid iti maysa a plano maipapan iti no anianto ti aramidenda no maipasangoda iti pornograpia.

  

  5:46

• Bayat ti panagsursurom ken dagiti annakmo maipapan iti pannakaidaton ti templo iti 1 Ar-ari 8, mabalinmo a kitaen dagiti ladawan dagiti templo iti balabala daytoy a lawas. Paisaritam kadagiti annakmo maipapan kadagiti detalye a makitada kadagiti ladawan. Mabalinmo a yunay-unay dagiti bersikulo 57–58. Ania ti kayat a sawen ti “magnatayo iti amin a wagas ti [Apo]”? (1 Ar-ari 8:58). Mabalin a makaaramid dagiti annakmo iti addang para iti tunggal sungbat nga itedda.

• Ibagam kadagiti annakmo no kasano a ti panagtungpal kadagiti katulagan nga aramidem iti templo ket makatulong kenka a magna kadagiti dalan ti Apo. Mabalinmo nga ibaga kadakuada no ania dagitoy a katulagan (kitaen iti General Handbook, 27.2, Gospel Library). Mabalinyo pay nga aggigiddan nga agkansion ti kanta a kas iti “I Love to See the Temple” (Children’s Songbook, 95).

• Ti panagbasa maipapan no kasano nga inimpluensiaan dagiti assawa ni Solomon kenkuana ket mabalin nga agtungpal iti panagsasarita maipapan kadagiti pagarigan ti “dadduma a didiosen”—wenno dagiti banag a pagdaydayawan wenno ay-ayaten dagiti tao imbes nga iti Apo. Kasano nga ipakitatayo nga ad-adda nga ay-ayatentayo Isuna ngem iti aniaman a banag iti biagtayo?