1 Samuel 8–10; 13; 15–16

1 Samuel 8 isaritana ti maysa a pasamak a mangbalbaliw iti agnanayon a pagtungpalan dagiti Israelita. Para iti salaknib kadagiti kabusorda, tarigagayan dagiti Israelita no ania ti adda kadagiti kaarrubada—maysa nga ari a mangituray kadakuada. Bayat ti panangbasam maipapan iti kiddawda ken ti sungbat ti Apo, panunotem no siasino ti kitkitaem para iti kinatalged ken pannarabay. Ibilang no ania ti kaipapanan ti panangbay-an iti Apo nga “agturay [kenka]” (1 Samuel 8:7).

Kadagiti sumaganad a lawas, mabasamto ti maipapan iti sumagmamano nga ari a naawagan a mangidaulo iti Israel. Bayat ti panangsursurom ti maipapan kadakuada, ibilangmo dagiti sumaganad a saludsod:

• Kasano a natungpal dagiti pakdaar ti Apo iti 1 Samuel 8:10–18?

• Kasano a naapektuan dagiti annak ti Israel iti pilida a maaddaan iti ari iti daga?

• Kasano a maiduma ni Jesucristo kadagiti ari iti daga? Panunotem no ania dagiti nailubongan nga impluensia a mabalin a kasapulam nga ikkaten iti biagmo tapno bay-am ni Cristo nga agbalin nga Arim.

Kitaen met iti “Rejoice, the Lord Is King!,” Hymns, no. 66.

Basaen maipapan no kasano a pinili ti Dios dagiti ari ti Israel iti 1 Samuel 9–10 ken 16 (kitaen nangnangruna iti 9:15–17; 10:1–12; 16:1–13). Sapulem dagiti binatog a makatulong kenka a makaawat no ania ti kaipapanan ti “maawagan iti Dios, babaen ti pammadto” iti Simbaan ti Apo ita (Pagannurotan ti Pammati 1:5). Mabalin nga ibilangmo ti panangikabil iti bagim iti lugar ti lider a mangmangted iti awag (Samuel), ti tao a maawagan (da Saul ken David), ken dagiti tao a nakaawaganda a pagserbian (dagiti Israelita). Ania ti masursurom manipud kadagiti balikas ken tignayda kadagitoy a kapitulo?

No panunoten no kasano a kasla managbabain ni Saul iti 1 Samuel 10, nakaskasdaaw a basaen ti maipapan iti “kinasukir” ken “kinatangsitna” kalpasan ti panagbalinna nga ari (1 Samuel 15:23). Apay iti panagkunam a napasamak daytoy? Iti 1 Samuel 13:5–14, ania dagiti kababalin ken ugali a makitam a nangiturong iti pannakatnagna?

Iti 1 Samuel 15, mabasamonto maipapan iti maysa bilin manipud iti Apo a saan a nagtungpal ni Saul gapu ta impagarupna nga adda nasayaat a rasonna. Tapno masursuro dagiti nakapsut a pili ni Saul, kitaen iti bersikulo 22 ket sukatan dagiti balikas a “sakripisio” ken “kinalukmeg dagiti karnero a lalaki” kadagiti banag a kasla nasayaat ngem saan a kas iti kinapateg ti panagdengngeg ken panagtungpal iti Apo. Kasano a nabendisionanka bayat ti panangipangrunam nga umuna ti Apo iti biagmo?

Nakaaramidka kadin iti pangngeddeng a naibatay iti “makinruar a langa” ti maysa a banag wenno maysa a tao, tapno laeng maammuam a nagbiddutka? Mabalin a nanganka iti maysa a banag a saan a kas iti kinasayaat ti langana. Wenno mabalin a saan a nainkalintegan ti pananghusgam iti maysa a tao.

Idi agsapsapul ni Samuel iti baro nga ari ti Israel, insuro kenkuana ti Apo ti nasaysayaat a wagas. Basaen ti maipapan iti daytoy iti 1 Samuel 16:6–7, ken ibilang ti panangaramid iti listaan dagiti wagas a pananghusga dagiti tao iti dadduma “iti makinruar a langa.” Masarakam ti sumagmamano a pagarigan iti mensahe ni Elder Christophe G. Giraud-Carrier “We Are His Children” (Liahona, Nob. 2023, 114–16). Ania ti kaipapanan ti kumita ”iti puso,” kas iti ar-aramiden ti Apo? (1 Samuel 16:7). Masarakam met dagiti pagarigan daytoy iti mensahe ni Elder Giraud-Carrier. Mabalin a mapanunotmo ti dadduma pay a panawen idi kumita ti Mangisalakan iti makinruar a langa ti maysa a tao. (Kitaen, kas pagarigan, iti Marcos 12:41–44; Lucas 5:1–11; 19:1–9; Juan 4:5–30; Moises 6:31–36.) Ania ti masursurom manipud kadagitoy a pagarigan?

Kasano a masurotmo ti pagwadan ti Mangisalakan iti wagas a panangkitam kadagiti dadduma—ken iti bagim? Kasano a ti panangaramid iti kastoy ket makaapekto kadagiti pannakipulapol wenno pannakilangenmo iti dadduma? Ibilangmo ti panangibaga iti maysa a tao maipapan iti kinaimbag a makitam iti pusona.

Kitaen met iti Ulisses Soares, “Brothers and Sisters in Christ,” Liahona, Nob. 2023, 70–73.

• Bayat ti panangbasam iti 1 Samuel 8 kadagiti annakmo, tulongam ida a mangbirok kadagiti gapu a nangibagaan ni Samuel kadagiti Israelita a madi nga ideya ti kaadda ti maysa nga ari. Apay a nasaysayaat ti kaadda ni Jesucristo kas aritayo? Nalabit a mabalinyo ti agaramid iti papel a korona a sangsangkamaysa ket agsisinnublatkayo a mangisuot iti daytoy ken mangibinglay iti maysa a banag a maaramidtayo tapno maipakita a kayattayo ni Jesus nga agbalin nga Aritayo. (Kitaen met iti Jeremias 23:5; Doktrina ken Katulagan 45:59)

• Dagiti salaysay iti panagpili ti Dios kada Saul ken David nga agbalin nga ari ket makatulong iti klasem a makaawat no kasano nga awagan ti Dios ti tao nga agserbi iti Simbaan ita. Tapno maisuro kadakuada dagitoy nga estoria, mabalinmo nga isurat dagiti pasamak manipud kadagiti estoria kadagiti akikid a papel, ken mabalin nga ipuesto dagiti annakmo dagitoy iti umno nga urnos bayat ti panangbasam kadagiti binatog ti nasantuan a kasuratan a sangkamaysa (kitaen met iti “Ni Ubing a David” iti Dagiti Estoria iti Daan a Tulag, 110–11). Kalpasanna mabalinmo ti agsarita maipapan kadagiti panawen a binendisionannaka ti Dios iti naespirituan a bileg a mangipatungpal a pagrebbengan wenno calling (kitaen iti 1 Samuel 10:9–10).

  

  1:16

• Mabalin a daytoy pay ti nasayaat a gundaway tapno isuro kadagiti annakmo ti maikalima a pagannurotan ti pammati. Isaritam kadakuada no kasano a naawatmo ti calling-mo iti Simbaan. Kasano ti pannakaammom nga inawagannaka ti Dios?

• Makatulong ti maysa a banag nga adalen [object lesson] kadagiti annakmo tapno maawatanda ti pagbatayan iti 1 Samuel 16:7. Kas pagarigan, mabalinmo nga ipakita kadakuada ti sumagmamano a taraon wenno maysa a libro nga adda bungon wenno akkubna a saan a maipada kadagiti pudno a linaonna. Ania ti isingasing ti 1 Samuel 16:7 ken daytoy banag nga adalen maipapan no kasano a nasken a kitaentayo ti bagbagitayo ken dagiti dadduma a tao? Agkansion iti maysa a kanta a mangyunay-unay iti daytoy a pagbatayan, kas iti “Love One Another” (Children’s Songbook, 136).

  Agusar kadagiti adalen a banag [object lesson]. No adda maysa a banag a makita ken sagiden dagiti annakmo a mainaig iti pagbatayan ti ebanghelio, ad-adda a malagipda daytoy. Kas pagarigan, bayat ti panangbasam iti 1 Samuel 16:7 a kadua ida, mabalin a bay-am ida a tumulong kenka a mangbirok kadagiti pagarigan ti makaallilaw a panagkita (optical illusion) a mangiladawan iti punto a nasken a padasentayo a kitaen a kas iti ar-aramiden ti Apo—babaen ti panangkita “iti puso”—imbes a dagiti panaghusga a maibatay iti “makinruar a langa.”

• Mangibinglayka ken dagiti annakmo iti padas a pakasursuruanyo no apay a nasken a “kumitakayo iti puso,” saan laeng “iti akinruar a langa” (bersikulo 7). Mabalin pay nga agsisinnublatkayo a mangibaga iti maysa ken maysa maipapan kadagiti nasayaat a kababalin a makitayo iti puso ti tunggal maysa.