1 Samuel 17–18; 24–26; 2 Samuel 5–7

Ti estoria da David ken Goliat ti maysa kadagiti kalatakan nga estoria iti nasantuan a kasuratan. Siempre, gagangay nga agpokustayo ken ni David. Ngem itoy a gundaway, bayat ti panangadalmo iti 1 Samuel 17, utobem dagiti balikas ti dadduma a tao iti daytoy a kapitulo (kitaen iti listaan iti baba). Ania ti masursurom maipapan kadakuada ken dagiti motiboda? Ania ti masursuroyo maipanggep ken ni David? Kasano a maiduma isuna?

• Goliat: dagiti bersikulo 8–10, 43–44

• Eliab: bersikulo 28

• Saul: bersikulo 33

• David: dagiti bersikulo 26, 32, 34–37, 39, 45–47

Ti estoriam, nupay saan a kas iti kalatak iti estoria ni David, ket sigurado a mangiraman kadagiti kas kadakkel ti Goliat a karit a parmeken ken dagiti gundaway a mangaramat iti pammati iti Apo. Ania ti isuro kenka dagiti pagwadan ni David maipapan iti panangsango iti rigat iti estoriam? Mabalin pay a basaem ti mensahe ni President Camille N. Johnson “Invite Christ to Author Your Story” (Liahona, Nob. 2021, 80–82) a pampanunotem ti maysa kadagiti karitmo. Sapulem dagiti sungbat kadagiti saludsod a kas kadagitoy: Kasano ti kayat ti Apo a panangkitak kadagiti karitko? Kasano a natulongannak iti napalabas? Kasano a maipakitak nga agtalekak Kenkuana a mangisurat iti estoriak?

Mabalin nga ammomon nga adda sumagmamano a nakalkaldaang a kapitulo iti agangay iti estoria ni David (kitaen, kas pagarigan, iti 2 Samuel 11). No adda gundawaymo a mangted ken ni David iti sumagmamano a balakad kalpasan ti pannakidangadangna ken ni Goliat, ania koma ti masaom? Kasano a mayaplikar daytoy a balakad iti biagmo?

Kitaen met iti “The Law of Consecration” (video), Gospel Library.

3:24

Malaksid kadagiti personal a karit, maipasangotayo pay kadagiti dadakkel, narikut a parikut a mangapekto iti intero a lubong. No dagiti puersa ti dakes ket “nagtitipon … makigubat” kadagiti puersa ti naimbag (1 Samuel 17:1), mabalin a panunotentayo no kasano a dagiti indibidual a panagkagumaantayo ket mabalin a makaaramid iti pagdumaan. Ania ti masarakanyo iti estoria ni David a mangted kadakayo iti namnama?

Kitaen met iti “Let Us All Press On, Hymns, no. 243.

Bayat ti panangbasam iti 1 Samuel 18, ibilang ti panamaggidiat ken ni Saul ken ti anakna a ni Jonatan (a, no saan a gapu ken David, mabalinna koma nga ipapan nga isunto ti sumaruno nga ari). Kasano ti reaksion da Saul ken Jonatan iti balligi ni David? Ania dagiti masursurom manipud iti daytoy a padas?

Ania ti masarakanyo kadagiti kababalin ken tignay ni Jonatan mangipalagip kenka maipapan ken ni Jesucristo?

Iti 1 Samuel 24–26, agsapul kadagiti adalen maipapan iti kinapalangguad, pammakawan, ken panagteppel iti bagi. Mabalinmo pay nga ibilang ti panangbasa iti mensahe ni Elder Mark A. Bragg a “Christlike Poise” kas paset ti panagadalmo (Liahona, Mayo 2023, 60–63). Kasano nga impakita da David, Abigail, ken dadduma pay—wenno dida impakita—ti talinaay a kas ken ni Cristo kadagitoy a kapitulo? Ania dagiti gundaway nga adda kenka a mangipakita iti talinaay a kas ken ni Cristo?

Ti mensahe ni Sister Kristen Yee “Beauty for Ashes: The Healing Path of Forgiveness” (Liahona, Nob. 2022, 36–39) ti makatulong kenka a mangadal iti 1 Samuel 25. Kasano a maipada ni Abigail ken ni Jesucristo?

Uray kalpasan a pinarmek ni David ni Goliat, saan pay a nalpas dagiti parikutna kadagiti Filisteo. Bayat ti panangbasam iti 2 Samuel 5:17–25, ibilangmo no kasano a makatulong kenka ti pagwadan ni David kadagiti karit a pakaipasanguam (kitaen met iti 1 Samuel 23:2, 10–11; 30:8; 2 Samuel 2:1). Kasano a nabendisionanka babaen iti panagtignaymo a mayannurot iti paltiing a naawatmo?

Idi indiaya ni David a mangbangon iti maysa a balay, kayatna a sawen ti maysa a templo, para iti Apo (kitaen iti 2 Samuel 7:1–3), simmungbat ti Apo nga iti kinapudnona a ti anak ni David ti mangbangonto iti daytoy (kitaen kadagiti bersikulo 12–15; kitaen met iti 1 Cronicas 17:1–15). Kinuna pay ti Apo a kas supapak mangbangonto met iti “balay,” ni David a kayatna a sawen ti kaputotan, ken agpautto iti agnanayon ti tronona (kitaen iti 2 Samuel 7:11, 16, 25–29; Salmo 89:3–4, 35–37). Naipatungpal daytoy a kari ken ni Jesucristo, ti Agnanayon nga Aritayo, a maysa nga an-annabo ni David (kitaen iti Mateo 1:1; Lucas 1:32–33; Juan 18:33–37).

• Mabalin a kayatmo ti mangusar iti “Da David ken Goliat” iti Dagiti Estoria iti Daan a Tulag, 112–16), a mangtulong kadagiti annakmo nga agbalin a pamiliar iti napasamak iti estoria iti 1 Samuel 17:20–54. Kalpasanna mabalin a bay-am ida a mangisarita manen iti estoria babaen ti panangusar kadagiti ladawan wenno drowing ti linia iti daytoy a balabala. Saludsodem kadakuada no ania ti pagarupda a kayat ti Apo a masursuroda manipud iti daytoy nga estoria.

  

  2:36

• Mabalinmo ken dagiti annakmo ti agaramid iti listaan ti sumagmamano a narigat a karit a mabalin a maipasango kadakuada bayat ti biagda. Kalpasanna, tulongam ida a mangsapul kadagiti banag a kinuna ni David a makatulong kadagitoy a karit (kitaen iti 1 Samuel 17:26, 32, 34–37, 45–47). Ibinglaymo no kasano a tinulongannaka ni Jesucristo iti panawen dagiti karit.

• Awisem dagiti annakmo nga agmartsa a kasla isuda ni David a mapan makiranget ken ni Goliat bayat ti panagkansionda iti maysa a kanta maipapan iti panagbalin a natured, kas iti “I Will Be Valiant” (Children’s Songbook, 162).

• Kasano a matulongam dagiti annakmo a makasursuro manipud iti panaggayyem da Jonatan ken David? Maysa a wagas ket ti panangted iti tunggal ubing iti dua a papel a sinanpuso, maysa ti mangibagi ken ni David ken sabali ti mangibagi ken ni Jonatan. Kalpasanna aggigiddan a mangbasa iti sumagmamano a ragup ti balikas manipud iti 1 Samuel 18:1–4 a mangyunay-unay iti ayat a narikna dagitoy dua nga aggayyem iti tunggal maysa. Kalpasanna mabalin nga isurat wenno idrowing dagiti annakmo iti papelda a sinanpuso no kasano a maipakitada ti ayat iti maysa a gayyem.

• Kadagitoy a kapitulo, nagbalin ni David nga ari ti Israel. Mabalin a naragsak para kadagiti annakmo nga agpammarang a maysa nga ari wenno reyna. Ania dagiti linteg nga aramidenda? Sadino ti papananda a pagpatulongan? Tulongam dagiti annakmo a mangtakuat nga idi agkasapulan ni David iti tulong, isu ket “nakiuman,” wenno nagkararag, para iti sungbat. Kas pagarigan, bayat ti panangbasam iti 2 Samuel 5:19, 23, awisem dagiti ubbing a dumngeg iti balikas a “nakiuman” ken agdalikepkepda no mangngeganda daytoy. Apay a kasapulan ni David ti tulong ti Apo iti baro nga akemna?

• Isarita iti tunggal maysa maipapan kadagiti panawen idi nagkararagka para iti tulong ti Nailangitan nga Ama. Ania ti pagdumaan a naaramid a gapu ti nangtulonganna Kenka?

• Dagiti ari a mabasatayo maipapan iti Daan a Tulag ket addaanda amin iti pakapilawan, ken naggibus amin dagiti pagarianda. Ngem maysa a naan-anay nga Ari ni Jesucristo ken agturayto iti agnanayon. Matulongam dagiti annakmo a mangtakuat iti daytoy babaen ti aggigiddan a panangbasa iti imbaga ni propeta Natan ken ni Ari David iti 2 Samuel 7:16–17. Kasano a mabalin nga awan patinggana ti pagarian ni David? Tulongam dagiti annakmo a mangsarak ken mangbasa kadagiti binatog ti nasantuan a kasuratan a mangisuro nga Aritayo ni Jesucristo, nga an-annabo ni David, kas iti Lucas 1:32–33; Juan 18:33–37; ken Apocalipsis 19:16. Kasano a maiduma ni Jesucristo manipud kadagiti ari iti daga? Kasano a dayawentayo ni Jesucristo kas Agnanayon nga Aritayo?