Ruth; 1 Samuel 1–7

Narigat ti biag ti maysa a balo iti aniaman a panawen. Ngem idi natay ti asawa ni Ruth, naipangpangruna a narigat ti kasasaadna. Iti kultura dagiti Israelita iti dayta a panawen, ti maysa a babai nga awanan iti asawa wenno annak a lallaki ket awanan iti karbengan iti sanikua ken addaan iti manmano a wagas tapno agullo iti pagbiag. Bayat ti panangbasam iti estoria ni Ruth, makita a pinagbalin ti Apo ti trahedia iti nawadwad a bendision. Ania ti madlawmo maipanggep ken ni Ruth a mabalin a nakatulong koma kenkuana? Kasano a sinubbot ni Boaz ni Ruth manipud iti makaupay a kasasaadna? (kitaen iti Ruth 4:4–10). Kasano a maipada da Ruth ken Boaz ken ni Jesucristo?

Kitaen met iti “Be Still, My Soul,” Hymns, no. 124.

Nalabit a nagsagabaka unay iti pannakapukaw, a kas iti naaramid kada Ruth ken Noemi (kitaen iti Ruth 1:1–5). Wenno nalabit, kas ken ni Anna, nagtarigagayka kadagiti bendision a dimo pay naawat (kitaen iti 1 Samuel 1:1–10). Kasano nga impakita dagitoy a babbai ti pammatida iti Dios? Ania ti masursuroyo manipud kadagiti pagwadanda?

Siempre, saan nga amin nga agkararag para iti maysa nga anak ket umawat iti maysa, ken saan nga amin a natay ti asawana ket makikallaysa manen. Ngem tunggal maysa nga umasideg iti Mangisalakan ket umawat iti tulong ken pannarabayna. Ibilangmo no kasano a “nagtalekka” iti Apo (Ruth 2:12) kabayatan dagiti narigat a panawenmo.

Kitaen met iti Amy A. Wright, “Abide the Day in Christ,” Liahona, Nob. 2023, 9–11.

Idi rinaut dagiti kabusorda, makita nga impagarup dagiti Israelita a ti basta panangtagikua iti lakasa ti tulag ket mangsalaknib kadakuada. Bayat ti panangbasam iti 1 Samuel 4–6, panunotem no apay a saan a nagballigi dayta. (Kitaen pay dagiti saan a nalinteg nga aramid dagiti annak ni Eli, a nagserbi kas saserdote iti tabernakulo, iti 1 Samuel 2:12–25.) Ania ti panagkunam a padpadasen nga isuro ti Apo kadagiti taona? Ania ti masursurom manipud iti no ania ti napasamak kadagiti Filisteo kalpasan ti panangalada iti lakasa (kitaen kadagiti kapitulo 5–6). Ania ti masursurom manipud kadagiti panagkagumaan ti Israel a manggun-od manen iti salaknib ti Apo iti 1 Samuel 7?

Mabalin a maparegtaka iti panangbasa iti daniw ni Anna a pammadayaw iti 1 Samuel 2:1–10. Ania ti masarakam kadagiti sasaona a makatulong koma kadagiti annak ni Eli ken iti dadduma pay nga Israelita?

No dadduma, mabalin a mariknam a kas ken Samuel, a nakangngeg iti timek ti Apo ngem dina nabigbig daytoy. Kas iti amin kadatayo, nasken a sursuruen ni Samuel no kasano ti mangbigbig iti timek ti Apo. Bayat ti panagadalmo iti 1 Samuel 3, ania ti masursurom manipud iti daytoy nga ubing a lalaki maipapan iti panagdengngeg ken panagtungpal iti timek ti Apo? Mabalinmo pay a sukisoken dagitoy mainayon a nasantuan a kasuratan ken mangilista kadagiti pagalagadan a makatulong iti maysa a tao a mangbigbig iti timek ti Apo: 1 Ar-ari 19:11–12; Lucas 24:15–32; 3 Nephi 11:3–7; Doktrina ken Katulagan 6:22–23; 8:2–3; 9:7–9.

No dadduma, mabalin a mariknam a naserraan ti langit ket saan a tarigagayan ti Dios ti makisarita kenka. Kinuna ni Presidente Russell M. Nelson: “Talaga kadi a tarigagayan ti Dios ti makisao kenka? Wen!” (“Revelation for the Church, Revelation for Our Lives,” Liahona, Mayo 2018, 93–96). Bayat ti panangadalmo iti mensahe ni Presidente Nelson, ania ti masarakam a mangparegta kenka a dumngeg ken agtulnog iti timek ti Apo? Ania ti yawis nga aramiden ni Presidente Nelson, ken ania dagiti bendision nga ikarina? Mabalinmo pay a sapulen dagiti awis ken naikari a bendision maipapan iti paltiing iti “Magna iti lawag ti Dios” (Para iti Pigsa dagiti Agtutubo: Maysa a Pangiwanwan iti Panagpili, 16–20). Ibilang ti panangpili iti maysa a banag a mabalinmo nga aramiden tapno “mangpadur-as iti naespirituan a kabaelan nga umawat iti paltiing.”

• Bayat ti panangibinglaymo kadagiti annakmo ti estoria ni Ruth (mabalinmo nga usaren ti “Da Ruth ken Noemi” iti Dagiti Estoria iti Baro a Tulag, 100–103), awisem ida a mangitag-ay kadagiti imada tunggal adda mangngegda nga aramid ti kinaimbag iti estoria. Mabalinda pay nga ibinglay no kasano ti riknada no naimbag dagiti dadduma kadakuada, wenno no naimbagda kadagiti dadduma. Kasano a nagbalin a naimbag ti Mangisalakan kadatayo? Kasano a masurottayo ti pagwadanna? (kitaen iti “Kindness Begins with Me” Children’s Songbook, 145).

  

  2:0

• Mabalin a makaparegta kadagiti annakmo dagiti estoria da Ruth ken Anna tapno agtalinaedda a napudno kabayatan dagiti narigat a panawen. Ibilangmo ti panangtulong kadakuada a mangaramid iti simple a tsart nga addaan kadagiti paulo a Dagiti Pannubok, Dagiti Tignay, Dagiti Bendision. Kalpasanna mabalinyo nga aggigiddan a basaen ti Ruth 1:3–5, 8, 16; 2:1–3, 8–12; 4:13–17; 1 Samuel 1:1–18 ken isurat iti baba dagiti paulo ti no ania ti masarakanda kadagitoy a bersikulo. Kasano nga impakita da Ruth ken Anna ti pammatida iti Apo? Kalpasanna mabalinmo wenno dagiti annakmo ti mangibinglay kadagiti pagarigan ti no kasano a binendisionannakayo ti Apo kabayatan dagiti narigat a panawen.

• Tapno maammuanda ti maipapan ken ni Anna, mabalin a basaen dagiti annakmo iti 1 Samuel 1:1–18 wenno “Anna” iti Dagiti Estoria iti Daan a Tulag (104–5) wenno buyaenda ti “Hannah’s Faith” (video, Gospel Library). Mabalin a makaparagsak ti mangipuruak iti bola iti maysa nga ubing ken awisen ida a mangisarita iti paset ti estoria sakbay ti panangipasa iti bola iti sabali pay nga ubing. Ania ti masursurotayo maipapan iti kararag manipud iti pagwadan ni Anna?

  

  1:15

  

  3:9

• Nalabit a makatulong ti simple a panangyakem (role play) kadagiti annakyo a makasursuro manipud iti padas ni Samuel iti paltiing. Mabalin ti maysa nga ubing nga agpammarang a Samuel, ken ti sabali pay nga ubing nga agpammarang nga Eli bayat ti panangbasam iti 1 Samuel 3:1–10 (kitaen met iti “Ni Samuel a Propeta” iti Dagiti Estoria iti Daan a Tulag, 106–9, wenno ti video a “Samuel and Eli,” Gospel Library). Ania ti masursurotayo manipud ken ni Samuel maipapan iti no kasano a dumngeg iti timek ti Apo? Kasano nga ipakitatayo a natallugodtayo a dumngeg no makisao ti Apo kadatayo?

  

  2:10

  

  1:58

• Saludsodem kadagiti annakmo no kasano nga ilawlawagda iti maysa a tao no kasano a makisao ti Apo kadakuada. Mabalinmo a tulongan ida a mangsapul kadagiti sungbat iti Doktrina ken Katulagan 6:22–23; 8:2–3; 9:7–9.