Dagiti Salmo 102–103; 110; 116–119; 127–128; 135–139; 146–150

Kitaen no kasano nga iladawan ti Salmo 102:1–11 dagiti rikna ti panagdandanag ken pannakaisina a masansan a sumangbay kabayatan dagiti karit. Mabalin a napadasamon wenno dagiti dadduma nga am-ammom dagiti kasta a rikna. Bayat ti panangbasam iti Dagiti Salmo 102:12–28; 103;116, sapulem dagiti ragup ti balikas a mangted kenka iti panagtalek a mabalinmo nga “awagam ti nagan ti Apo” kadagiti pannubokmo (Salmo 116:13). Mabalin a kayatmo a markaan, yulo, wenno ibinglay kadagiti dadduma dagiti ragup ti balikas a mangted kenka iti namnama Kenkuana.

Kitaen met iti Isaias 25:8; Hebreo 2:17–18; Alma 7:11–13; Camille N. Johnson, “Christ Is Relief,” Liahona, Mayo 2023, 81–83; “Where Can I Turn for Peace?” (Hymns, no. 129).

Naglaon dagiti Salmo kadagiti binatog a mangitudo iti biag ken panagministro ni Jesucristo. Adtoy ti sumagmamano a pagarigan:

• Salmo 110:1–4 (kitaen iti Mateo 22:41–45; Hebreo 5:4–10; 6:20)

• Salmo 118:22 (kitaen iti Mateo 21:42; Dagiti Aramid 4:10–11; 1 Pedro 2:7)

• Salmo 118:25–26 (kitaen iti Mateo 21:9)

Ania ti isuro kadakayo dagitoy a bersikulo maipapan ken ni Jesucristo? Apay a napateg a maammuan daytoy a banag maipapan Kenkuana?

Salmo 119 naglaon daytoy iti adu a ragup ti balikas a mangidilig iti biagtayo iti panagdaliasat nga agsubli iti Nailangitan nga Ama. Bayat ti panangbasam, sapulem dagiti balikas a kas iti “magna,” “dana,” “dalan,” “saka,” ken “maisiasi.” Utobem ti bukodmo a panagdaliasat iti biag—no sadino ti napanam, sadino ti ayanmo itan, ken ania a direksion ti papanam. Ania ti masursurom manipud iti daytoy a salmo maipapan ti panagdaliasatmo nga agawid? Ania ti nasursurom babaen ti panangbuya kadagiti dana dagiti dadduma? Segun iti daytoy a salmo, ania ti impaay ti Dios a nangtulong kenka nga agtalinaed iti danana?

Panunotem ti maysa a panawen a ti panangsurot iti maysa a dana wenno mapa ti nakatulong kenka a nagbiahe iti maysa a lugar a sibaballigi. Ania ti isuro kenka dayta a padas maipapan iti panagsurot iti dana ti Dios?

Iti adu a dadduma pay a nasantuan a kasuratan, isao ti Apo ken dagiti propetana maipapan iti maysa a dana. Adda iti baba dagiti sumagmamano a pagarigan. Ibilangmo ti panangsukisok kadagitoy a bersikulo ken panangisurat wenno panangibinglay kadagiti dadduma no ania ti masursurom.

Kasano a matulongannaka dagitoy a kinapudno nga agtalinaed iti dana ti Dios?

Ania dagiti nayon a nalawag a pannakaammo ken pannakaawat a masursurom manipud iti sumaganad a balakad manipud ken ni Presidente Russell M. Nelson?

“No ti panagdaliasattayo iti biag ket tapno agballigi, nasken a surotentayo ti nadiosan a pangiturong. Kinuna ti Apo, ‘Kitaendak iti tunggal panunot; saankayo nga agduadua, dikayo agbuteng’ [Doktrina ken Katulagan 6:36]. Ken insurat ti Salmista, ‘Ti saom pagsilawan kadagiti saksakak, ket silaw kadagiti danak’ [Salmo 119:105]. …

“Iti panagdaliasatyo iti daytoy a biag, masabatyo iti adu a tubeng ken makaaramid kadagiti sumagmamano a biddut. Makatulong kadakayo ti pannarabay ti nasantuan a kasuratan a mangbigbig iti biddut ken agaramid iti kasapulan a panagatur. Agsardengkayo a mapan iti biddut a turongen. Siaannadkayo a mangadal iti mapa ti kalsada iti nasantuan a kasuratan. Kalpasanna agtultuloykayo iti panagbabawi ken pannakaisubli a kasapulan tapno makapan iti ‘nailet ken akikid a dana nga agturong iti biag nga agnanayon’ [2 Nephi 31:18]” (“Living by Scriptural Guidance,” Ensign, Nob. 2000, 17).

Kitaen met iti Dieter F. Uchtdorf, “The Prodigal and the Road That Leads Home,” Liahona, Nob. 2023, 86–88.

Kitaen no apay, segun iti Salmo 135:15–18, maag ti agtalek kadagiti palso a didiosen. Ania ti mabalin pakasulisogam nga agtalek iti dayta a maipada iti maysa a didiosen? Mabalinmo ti agaramid iti listaan dagiti banag a mabalin nga aramiden ti Apo, kas iti inaramid dagiti salmista iti Salmo 134–36. Ania dagiti nabileg a banag nga inaramidnan para kenka?

Ania ti masarakam iti Salmo 139 a makatulong kenka a maawatam no apay maseknan kenka ti Apo—dagiti pampanunot ken tignaymo, dagiti pagpigsaam ken pagkapsutam? Kasano nga impluensiaan daytoy a kinapudno ti biagmo ken dagiti pilim?

Bayat ti panangbasam kadagitoy maudi a salmo ti panagdaydayaw, panunotem dagiti gapu no apay a nasken nga agdaydayawka iti Apo. Apay a napateg ti agdaydayaw Kenkuana? Ania dagiti sumagmamano a wagas a pakapagdaydayawam Kenkuana?

• Mabalinmo wenno dagiti annakmo a mangbasa iti Salmo 102:1–2, nga agsapsapul no kasano a tulongannatayo ti Apo bayat dagiti rigattayo. Kasano a masarakantayo ti tulongna? Mabalinyo pay nga ibinglay iti tunggal maysa dagiti dadduma pay a panawen idi kinasapulam ti tulong ken nariknam a sinungbatan ti Dios dagiti kararagmo.

• Mabalin a maay-ayo dagiti annakmo a mangisarita maipapan iti no ania ti rikna ti adda iti kasipngetan. Wenno mabalinda nga ilawlawag dagiti banag a narigat nga aramiden iti kasipngetan. Mabalinmo nga awisen ida nga agaramid iti maysa a banag a nakakidem dagiti matada, kas iti panangidrowing iti maysa a ladawan. Ania ti masursurotayo manipud iti Salmo 119:105 maipapan iti silaw ken balikas ti Dios?

• Sapulen ti maysa a banag nga inted kadatayo ti Nailangitan nga Ama a tumulong kadatayo nga agtalinaed iti danana kadagiti sumaganad a bersikulo: Dagiti Salmo 119:47–48; 119:105; 1 Nephi 11:25; 2 Nephi 31:20. Ania ti maaramidtayo tapno agtalinaed iti dana ti Dios?

• Mabalin a magustuan dagiti annakmo a mangkitkita kadagiti ladawan dagiti banag a nadakamat iti Salmo 119:105. Mabalinda nga urnosen dagiti ladawan bayat ti panangbasada iti bersikulo. Mabalinyo pay nga aggigiddan a kansionen ti maysa a mainaig a kanta, kas iti “Teach Me to Walk in the Light” (Children’s Songbook, 177) wenno “I Will Walk with Jesus” (Gospel Library).

• Ibilang ti panangaramid kadagiti ababa a listaan dagiti banag nga ammom maipapan iti tunggal maysa kadagiti annakmo. Bayat ti panangbasam kadagiti listaan a saggaysa, idawatmo kadagiti ubbing a mangpugto no asino ti iladladawam. Sa, kalpasan ti panangbasa iti Isaias 139: 1–3 nga aggigiddan, mabalinmo nga ilista dagiti banag nga ammo ti Nailangitan nga Ama ken ni Jesucristo maipapan kadatayo.

• Isurat dagiti balikas ti Salmo 139:23–24 iti maysa a panid ti papel wenno iti pisarra. Awisem dagiti annakmo a manguged kadagiti balikas a mangiladawan kadagiti banag a maaramid ti Dios para kadatayo. Apay a kayattayo nga aramiden ti Dios dagitoy a banag?

• Awisem dagiti annakmo a mangibinglay kadagiti padas idi dinaydayaw ida ti maysa a tao wenno imbagana kadakuada a nagtrabahoda a nasayaat. Ibinglay ti sumagmamano kadagiti nasayaat a banag manipud iti Salmo 146:6–9 nga inaramid ti Apo (tulongam dagiti annakmo a makaawat kadagiti saan na pamiliar a balikas). Awisem dagiti annakmo nga agsarita maipapan iti dadduma pay a banag nga aramiden ti Dios para kadatayo. Kasano a madayawtayo Isuna para kadagita a banag?