Isaias 1–12

Insuro ti Mangisalakan nga “amin dagiti banag a sawenna napasamaken ken mapasamakto, uray pay ti maipanggep kadagiti balikas nga insawangna” (3 Nephi 23:3). Bayat ti panagadalmo iti libro ti Isaias, ibilang ti panangaramid iti maysa a tsart dagiti padto nga addaan kadagiti paulo a kas kadagitoy: Aldaw ni Isaias, Ti mortal a panangministro ti Mangisalakan, ken Dagiti ud-udina nga aldaw. Makita nga adu dagiti padto ni Isaias ti naipatungpal iti nasurok ngem maysa a wagas (kitaen iti Pangiwanwan iti Nasantuan a Kasuratan, “Isaias”).

Insuro ni Presidente Dallin H. Oaks: “Ti libro ti Isaias ket naglaon iti adu a padto a kasla namin-adun ti pannakaipatungpalda. Maysa ti kasla mangiraman kadagiti tao iti aldaw ni Isaias wenno dagiti kasasaad ti sumaruno a kaputotan. Sabali pay a kaipapanan, a masansan a mangisimbolo, ket kasla maibasar kadagiti pasamak iti kangitingitan ti panawen, idi nadadael ti Jerusalem ken nawarawara dagiti taona kalpasan ti pannakailansa iti krus ti Anak ti Dios. Sabali pay a kaipapanan wenno pannakaipatungpal ti isu met laeng a padto ti kasla mainaig kadagiti pasamak a maigiddan iti Maikadua a Yaay ti Mangisalakan. Ti kinapudno nga adu kadagitoy a padto ti mabalin nga addaan iti adu a kaipapanan ti mangipagunamgunam ti kinapateg ti panagkalikagumtayo a manggun-od iti paltiing manipud iti Espiritu Santo tapno makatulong kadatayo a mangipatarus kadagitoy” (“Scripture Reading and Revelation,” Ensign, Ene. 1995, 8).

Kas kadagiti propeta iti amin a panawen, nagtultuloy ni Isaias a nangballaag kadagiti tao maipapan iti naespirituan a kasasaadda. Bayat ti panangbasam iti Isaias 1; 3; 5, sapulem dagiti ragup ti balikas a mangiladawan no kamustan ti kinaespiritualidad dagiti tao (kitaen, kas pagarigan, iti Isaias 1:2–4, 21–23; 3:9, 16–17; 5:11–12, 20–23). Ania dagiti isu met laeng a problema a makitam iti panawentayo? Mabalinmo pay a sapulen dagiti bersikulo a mangballaag maipapan kadagiti bunga ti naespirituan a kasasaad dagiti Israelita (kas iti Isaias 1:7; 3:17–26; 5:5–7, 13–15).

Kas nayon kadagiti ballaag, nangted ni Isaias kadagiti mensahe ti namnama para iti pannakasubbot babaen ti Mangisalakan (kitaen, kas pagarigan iti, Isaias 1:16–19, 25–27; 3:10; 4). Ania ti masursurom maipapan iti Apo manipud kadagitoy a mensahe? Kasano a maigiddiat ti mensahe ti Apo kadagitoy a bersikulo iti no ania ti kayat ni Satanas a patientayo?

Kas ken ni Isaias, ballaagannatayo dagiti propeta maipapan iti basol ken dagiti bungana, ken mangipaayda kadagiti mensahe ti namnama babaen ken ni Jesucristo. Ania dagiti pagarigan a mapanunotmo? Mabalin a kayatmo nga irebyu ti maysa a mensahe manipud iti napalabas a sapasap a komperensia, a mangsapsapul kadagiti kasta a ballaag ken kari.

Adu kadagiti padto ni Isaias ti addaan iti nalawag a kaipapanan para iti aldawtayo. Tapno masarakan dagitoy, sapulem dagiti verbo a future tense (kas iti “agbalinto” wenno “mapanto”). Kas pagarigan, sapulem dagitoy a verbo bayat ti panagbasam iti Isaias 2; 4; 11–12. Mabalinmo pay a padasen ti panangsukat kadagitoy kadagiti verbo a present-tense (kas iti ket wenno ket mapan). Ania kadagitoy a padto ti naipangpangruna a makaparegta kenka? Ania ti masursurom manipud kadagitoy a padto maipapan iti Zion, panangbangon kadagiti templo, ken panangummong iti Israel?

Isaias 2:2–3 ket nangnangruna nga adda pakainaiganna para kadagiti Santo iti Ud-udina nga Aldaw. Kasano a maipatpatungpal dagitoy a padto? Ania ti masursurom maipapan kadagiti “wagas” ken “dana” iti balayna? (bersikulo 3)

Kitaen met iti Isaias 5:26; “High on the Mountain Top,” Hymns, no 5.

Iti Isaias 6, insalaysay ni Isaias ti awagna nga agbalin a maysa a propeta. Bayat ti panangbasam iti daytoy a kapitulo, ania ti makaawis iti riknam maipapan iti padas ni Isaias? Kasano a makaimpluensia daytoy a kapitulo iti wagas a panagpanunotmo maipapan iti Apo, dagiti propetana, ken ti aramid a nakaawaganda nga aramiden?

Kabayatan ti panagministro ni Isaias, nangbukel ti Israel iti ragup iti Siria a mangsalaknib iti bagina a maibusor iti Asiria. Tinarigagayan ti Israel ken Siria ti mangpilit ken ni Ahaz, ti ari ti Juda, tapno makitipon kadakuada. Ngem impadto ni Isaias a matnag ti ragup ket binalakadanna ni Ahaz nga agtalek iti Apo (Isaias 7:7–9; 8:12–13).

Bayat ti panangbalakad ni Isaias ken ni Ahaz, nagaramid iti sumagmamano a nalatak a padto, kas kadagiti masarakan iti Isaias 7:14; 8:13–14; 9:2, 6–7. Idinto a saan a nalawag a naan-anay no ania ti kaipapanan dagitoy a padto ken ni Ahaz, silalawag a mayaplikarda ken ni Jesucristo (kitaen met iti Mateo 1:21–23; 4:16; 21:44; Lucas 1:31–33). Apay nga “Emmanuel” ti napintas a paulo para iti Mangisalakan? (kitaen iti Mateo 1:23). Kasano a nagbalin a maysa a “Mamagbaga” wenno “Prinsipe ti Kappia” Isuna kadakayo? (Isaias 9:7). Ania pay ti masursurom maipapan iti Mangisalakan manipud kadagitoy a bersikulo?

• Iti Isaias 1:2–4, mabalinmo ken dagiti annakmo ti mangsapul kadagiti rason no apay a saan a naragsakan ti Apo kadagiti tao. Kitaen ti panangidilig kadagiti ayup iti bersikulo 3—nga isu ti “maestrotayo”? Kasano nga ipakitatayo iti Dios nga am-ammotayo?

• Tapno mailadawan iti panunot ti Isaias 1:16–18, mabalinmo ken dagiti annakmo a mangsapul iti maysa a banag a narangrang a nalabaga ken maysa a banag a natarnaw a puraw ti marisna. Wenno nalabit a makapagtitinnulongkayo a mangugas iti maysa a banag. Kasano nga agbalintayo a narugit a naespirituan? Kasano a tulongannatayo ni Jesucristo nga agbalin a nadalus? Ania ti masursurotayo maipapan iti Mangisalakan manipud kadagitoy a bersikulo? Ibinglay kadagiti annakmo no kasano ti riknam maipapan Kenkuana ken no ania ti inaramidna para kenka.

• Nasirmata ni Isaias ti maysa a panawen a “ti bantay ti balay ti Apo,” mangawisto kadagiti tao manipud iti “isu amin a nasion” (Isaias 2:2). Kasano a matulongam dagiti annakmo a makarikna iti gagar maipapan iti ipapan iti balay ti Apo? Mabalinmo nga awisen ida nga agdrowing iti maysa a ladawan ti pagtaenganda. Kalpasanna aggigiddan a mangbasa iti Isaias 2:2, ket awisem ida a mangidrowing iti maysa a ladawan “ti balay ti Apo,” a daytoy ti maysa a templo. Basaen ti Isaias 2:3 nga aggigiddan. Awisem ida a mangnayon kadagiti ladawanda iti adu a tattao a mapmapan iti templo, agraman dagiti pamiliada.

• Mabalinyo pay ti aggigiddan a mangbasa iti Isaias 2:2–3 ket ilasin ti maysa a banag a mangparegta kenka ken dagiti annakmo a mapan iti templo. Sa, kalpasan ti panangbasa iti Isaias 2:4 nga aggigiddan, mabalinmo nga ilawlawag no kasano a mangisangbay ti templo iti talna kadakuada. Ibilang ti panagkansion iti maysa a kanta maipapan iti templo kas iti “I Love to See the Temple” (Children’s Songbook, 95). Tulongam dagiti annakmo a mangsarak kadagiti ragup ti balikas iti kanta a mangisuro no ania ti kaipapanan ti templo ken no ania ti aramidentayo sadiay.

• Tapno mayam-ammo dagiti padto ni Isaiah maipapan ken ni Jesucristo, mabalinmo ken dagiti annakmo a pagsasaritaan maipapan kadagiti pangawag kadagiti tao, kas iti presidente, bishop, wenno mannursuro. Ania ti ibaga kadatayo dagitoy a pangawag maipapan kadagitoy a tattao? Tulongam dagiti annakmo a mangsapul kadagiti pangawag ken ni Jesucristo iti Isaias 7:14 ken 9:6–7 (kitaen met iti panid ti aktibidad iti daytoy a lawas). Ania ti isuro ti tunggal maysa kadagitoy a pangawag maipapan Kenkuana? Ania pay ti masursurotayo maipapan ken ni Jesucristo manipud kadagitoy a bersikulo?

• Mabalinmo pay nga ibinglay kadagiti annakmo ti “Ni Isaias a Propeta” (iti Dagiti Estoria iti Daan a Tulag, 150–51). Agsardeng a masansan tapno agsaludsod no ania ti ammo ni Isaias maipapan ken ni Jesucristo adu a tawen sakbay ti pannakayanakna. Kalpasanna mabalinmo nga usaren ti Mateo 1:21–23; Lucas 1:31–33 a mangisarita maipapan no kasano a naipatungpal dagiti padto ni Isaias iti Isaias 7:14; 9:6–7 .

  

  1:18